Read Napu Matiu 18 Bible Online

Matiu 18 - Napu bible

Matiu 18

¹I tempo iti, maihe topeguruna Yesu mekune Iria, rauli, “Pue, hema wei au meliu kamahilena tuwona i lalu poparentana Pue Ala?”

²Yesu mokakio hadua anangkoi, Napopeangka i olonda,

³hai Nauliangaahe, “Tou lolitaNgku ide: ane barakau mobaliki babehiami hai mewali nodo anangkoi ide, barakau ina mewali taunana Pue Ala i lalu poparentaNa.

⁴Hema au mengkaiwoi laluna hai mewali nodo anangkoi ide, iami au mahile ntepuu tuwona hangko i ope-ope taunana Pue Ala i lalu poparentaNa.

⁵Hema au modoko hadua anangkoi nodo anangkoi ide anti peulana Iriko, lempona Ikomi au nadoko.

⁶Agaiana hema au mopakanawo hadua anangkoi au nodo anangkoi ide alana barapi mepoinalai Iriko, ina rumihi mpuu pehukuna Pue Ala i tauna iti. Aginami haogu watu pogilia au mahile ratoe i tambolona hai ratende i lalu tahi.

⁷Hurewumi dunia ide lawi ngkaia au mepakanawo. Tou pepakanawo iti ara, agaiana hurewumohe tauna au mopaara pepakanawo iti.

⁸Maroa-roakau bona ineekau madosa. Ane pandirina taiemu hambali ba bitimu hambali au moantiko madosa, nubohoki peami hai nutende. Agina hambali pea taiemu ba bitimu, asala molambiko katuwo maroa hihimbela hai Pue Ala pane rombali taiemu hai rombali bitimu, agaiana kahopoana ratenderiko i lalu api au rore liliu.

⁹Hai ane pandirina matamu hambali au moantiko madosa, nudungkiki peami hai nutende. Aginami hambali pea matamu asala molambiko katuwo maroa hihimbela hai Pue Ala, pane rombali matamu, agaiana kahopoana ratenderiko i lalu api naraka.”

¹⁰“Mewali, mainga-inga mpuukau. Inee nipakoi tauna au koi tuwona nodo anangkoi ide, nauri hadua pea. Lawi tou-tou Kuuliangaakau: malaeka au mokampaihe maida liliu i lindona UmaNgku au ara i suruga.

¹¹[Lawi tunggaiaKu Iko Ana Manusia mai i dunia bona mohaokiNa tauna au karao hangko i Pue Ala hai mohoremahe hangko i huku dosanda.]

¹²Noumba pelambiami? Ane pandirina, ara hadua tauna au dimbana hangatu baana, hai matanta hambaa, apa au ina nababehi? Batena mopalehi dimbana au hahio pulona hai hahio i tongku-tongkuna, hai lao mohaoki hambaa au matanta iti.

¹³Hai ane nalambi hule, rumihi kamatanana mampokatana dimbana au hambaa iti pane dimbana au hahio pulona hai hahio au barahe matanta.

¹⁴Nodo wori Umami au ara i suruga, bara Naunde ane ara hadua nodo anangkoi ide au puha.”

¹⁵“Ane ara halalumu hampepepoinalai au masala irio, lao nupombelambia, hai nuuliangaa salana. Hangangaa nubabehi iti bona dati ara au moisa, batena pea ikamu rodua. Ane napoinalai lolitamu, maroa hule pohintuwumi.

¹⁶Agaiana ane bara naunde mampeulai lolitamu, nukakio hadua ba rodua tauna nuporanga mopahawe lolitamu iria. Lawi i lalu Sura Malelaha hangkoia teuki node: ‘Ane ara tauna au rasalai, hangangaa ara rodua ba talu tauna au mosabiki katouna kamasalana, bona manoto kara-karana.’

¹⁷Ane bara naunde mampehadingi lolitanda sabi iti, nupahawemi i ope-ope halalumi hampepepoinalai. Ane bara liliu napoinalai kehapiri ope-ope halalumi hampepepoinalai mokambaroa, pogiangaamide, hai niimbami nodo tauna au bara moisa Pue Ala hai au kadake babehiana.

¹⁸Nipehadingi: apa au nibotusi i dunia, aminami tebotusi i suruga. Ane niuli hadua tauna hangangaa rahuku, ia nahuku worimi Pue Ala. Ane niuli hadua tauna raampungi dosana, naampungi worimi Pue Ala.

¹⁹Kuuliangaa mbulikau: ane arakau rodua i dunia ide au hintuwu mekakae mamperapi ba apa pea, pekakaemi iti ina nahanai UmaNgku au ara i suruga.

²⁰Lawi iumba tauna teruhu anti kaIkona, nauri rodua ba talu peahe, Iko araNa hihimbela hai ihira.”

²¹Roo indo, Peturu mohungkuki Yesu hai mekune Iria, nauli, “Pue, ane halalungku hampepepoinalai masala iriko, hangkia belana hangangaa kuampungi? Hawe pae pitu belana?”

²²Nahanai Yesu, “Bara pea pitu belana. Agaiana pitu belana pitu pulona belana hangangaa moampungiko rangamu hampepepoinalai au masala irio.

²³Lawi Pue Ala nodo datu au i lalu ngkora pandiri ide: ara hadua datu au moparesa indanda hawina.

²⁴Nguru-nguruna, ara hadua hawi au raanti i lindona au moinda i jutana.[21]

²⁵Bara mpuu woia nabuku mobaiari indana. Mewali, nahawakami datu, nauli: ‘Pobalu peami hawi iti hai anana hai towawinena hai ope-ope anu-anuna bona tebaiari indana.’

²⁶Molingkudumi hawi iti i lindona datu, merapi ampu, nauli: ‘Sabarako, ina kubaiari pea wongkoia indaku!’

²⁷Hangko inditi, tumbumi ahina datu mampokaahi hawina iti, ido hai nauliangaa: ‘Indamu, ineemi nubaiari.’

²⁸Laomi hawi iti, mampohidupaa hadua hangka hawina au moinda iria isabuna pea.[22] Ia liliu mohaka rangana iti, naime hai nauliangaa: ‘Nubaiari ope-ope indamu!’

²⁹Molingkudumi rangana iti merapi ampu, nauli: ‘Sabarako hampai ene, ina kubaiari pea wongkoia indaku!’

³⁰Agaiana bara napoinalai pamperapina iti. Napopesua pea i lalu tarunggu duuna tebaiari ope-ope indana.

³¹Karaitana hawi au ntanina apa au mewali, wiora mpuu lalunda. Laomohe i datu mopahawe babehiana hawi iti.

³²Kanahadina datu lolitanda, motudumi tauna lao mokakio hawi au kadake babehiana iti. Kahawena hawi iti, nauliangaa datu: ‘Kadake mpuuko! Indamu kugewomi hangko i surangku, lawi merapi ampuko iriko.

³³Moapari hai bara nupokaahi hangka hawimu, nodo kakupokaahimu?’

³⁴Masodo ntepuu datu. Hawi au kadake babehiana iti napopesua i lalu tarunggu duuna tebaiari ope-ope indana.”

³⁵Napahopo Yesu ngkora pandiri iti, Nauli, “Iti wori au ina nababehiakau UmaNgku i lalu suruga, ane barakau moampungi rangami hangko i lalumi.”