Read Napu Matiu 19 Bible Online

Matiu 19 - Napu bible

Matiu 19

¹Karoona Yesu mopahawe ope-ope iti, padumi hangko i tampo Galilea lao i tampo Yudea au ntanda i orupena owai Yarade.

²Bosa tauna meula Iria, hai au mahai Napakaohahe.

³Arahe bahangkia toParisi au mai mohaoki kamanawona Yesu, mekunehe, rauli, “Moula atura agamanta, ba peisa mpuu tobalilo mogaa hai towawinena kehapiri bara motoka patoana?”

⁴Nahanai Yesu, “Bara pae nibasa apa au teuki i lalu Sura Malelaha au manguli: nguru-nguruna Pue Ala mampopewali tobalilo hai towawine.

⁵Nauli mbuli Yesu: ‘Ido hai tobalilo hangangaa mopalehi umana hai inana, hai tuwo hihimbela hai towawinena bona au rodua iti mewalihe hawata-wata.’

⁶Mewali i peitana Pue Ala, barapohe rodua, agaiana mewalihe hadua. Ido hai Kuuliangaakau: apa au napahintuwumi Pue Ala, inee mpuu nagaa manusia.”

⁷Mehanahe toParisi, rauli, “Ane nodo, moapari hai Musa mohawa bona tobalilo mowei sura mpogaa i towawinena, ane napeinao napogaaki?”

⁸Nahanai Yesu, “Anti kamatuana lalumi, Musa mopaliu tauna mogaa. Agaiana katouana, bara nodo hangko i nguru-nguruna.

⁹Bona niisa: hema au mampogaaki towawinena hai mampotambia towawine au ntanina, mebualosi. Ane towawinena iti mebualosi, hangko peisari napogaaki.”

¹⁰Hangko inditi, topeguruNa mouliangaa Yesu, “Ane nodori kamaparina ada posamboko, agina ineemoke motambi.”

¹¹Nahanai Yesu, “Bara ope-ope tauna au peisa modoko lolita ide. Agaiana ara tauna au napakanoto Pue Ala bona barahe motambi.

¹²Ara tauna au bara peisa motambi lawi nodomi watana hangko i karapoanakana. Ara wori au bara motambi anti babehiana tauna ntanina i watana. Ara wori au bara motambi anti peundeana haduduana bona tepaka mampopolumao bagona Pue Ala. Hema au peisa mampeulai paturo ide, maroa ane napeulai.”

¹³Hambela tempo, arahe tauna au moanti ananda i Yesu bona Napetobo hai Napekakaengaahe. Agaiana topeguruNa mampokarumpuhe tauna iti.

¹⁴Nauli Yesu i topeguruNa, “Pogiangaahe anangkoi iti mai Iriko. Ineehe nikonto, lawi tauna au nodohe anangkoi ide ina mewali taunana Pue Ala i lalu poparentaNa.”

¹⁵Napetobomohe anangkoi iti, hai Nawati. Roo indo, padumi hangko inditi.

¹⁶Hambela tempo, ara hadua tobalilo au hawe i Yesu mekune, “Guru, babehia apa au hangangaa kubabehi bona molambina katuwo maroa au bara mokahopoa?”

¹⁷Nahanai Yesu, Nauli “Moapa hai nupekune kana i babehia au maroa? Bara ara ntanina au maroa, batena pea Pue Ala. Ane mampeinaoko molambi katuwo maroa, peulaimide hawana Pue Ala.”

¹⁸Mekune mbuli tauna iti, nauli, “Hawa au noumba?” Nahanai Yesu, “Inee mepapate, inee mebualosi, inee manangka, inee mohowara dongko,

¹⁹bila umamu hai inamu, hai nupokaahi hangka rangamu nodo pampokaahimu watamu haduduamu.”

²⁰Nauli anantomoane iti, “Ope-ope hawa iti, kupeulaimi. Apa mani au hangangaa kubabehi?”

²¹Nahanai Yesu, “Ane mampeinaoko mampeulai Pue Ala hangko i kabulana lalumu, laomoko hampai mampobalu hinangka anu-anumu, hai holona nuweihe tauna au meahi-ahi tuwonda. Ane nubabehi nodo, ina mahile hurungina au nuhumba i lalu suruga. Roo indo, maimoko meula Iriko.”

²²Kamohadina lolitana Yesu, masusa laluna hai padumi, lawi ngkaia anu-anuna.

²³Ido hai nauli Yesu i topeguruNa, “Nipehadingi maroa au Kuuliangaakau: mapari mpuu tauna au pebuku mewali taunana Pue Ala i lalu poparentaNa.

²⁴Bona niisa: hagolo mani hambaa onta mesua i kalolu gigiu pane topebuku mewali taunaNa Pue Ala i lalu poparentaNa.”

²⁵Karahadina topeguruNa lolitana Yesu, rapotingkara mpuu, rauli, “Oo, ane nodori, hema pae au nabuku molambi katuwo maroa au bara mokahopoa?”

²⁶Natotokihe Yesu hai Nauliangaahe, “Ane manusia, bara mpuu nabuku. Agaiana ane Pue Ala, bara ara au bara Nabuku.”

²⁷Hangko inditi, nauli Peturu i Yesu, “Noumbami ikami? Kipalehimi hinangkana bona kiulaKo. Apa au ina kihumba?”

²⁸Nahanai Yesu, “Bona niisa: i alo pebotusi i tempona Pue Ala mopawou hinangkana, Iko Ana Manusia ina mohuda moparenta i pohudaa au meawa. I tempo iti, ikamu au meula Iriko ina mohuda worikau i pohudaa au hampulo hai rombua, moparenta to Isaraeli au hampulo hai rontina.

²⁹Hema au mopalehi halaluna, inana ba umana, anana ba souna ba bondena lawi meula Iriko, batena molambi hurungina hangatu belana hangko i apa au napalehi, hai molambi wori katuwo maroa au bara mokahopoa.

³⁰Agaiana bosa tauna au tepaioruami tuwonda ide-ide ina mewali tepaibokoa i alo au ina mai. Hai bosa wori tauna au tepaibokoa tuwonda ide-ide ina mewali tepaiorua i alo au ina mai.”