Read Napu Matiu 20 Bible Online

Matiu 20 - Napu bible

Matiu 20

¹Nauli Yesu, “Ane Pue Ala mohurungi pobagonda ope-ope taunaNa i alo au ina mai, pewalina nodo ngkora pandiri ide: Hadua ampu bonde anggoro lao mohaoki tauna au raunde mobago i bondena. Madondo-dondo nalambihe tauna, hai nauliangaahe: ‘Laomokau mobago i bondeku, hai ina kuweikau hadua-hadua saromi hampeka doi pera hangaloa.’ Rapokanami lolitana iti, lao mpuumohe.

³Tinti hahio madondo, lao mbulimi mohaoki au ntanina, naita bahangkia tauna mohuda-huda i pobalu-balua.

⁴Nauliangaahe: ‘Laomokau mobago i bondeku, kuweikau saromi au hintoto hai pobagomi.’ Lao mpuumohe.

⁵Pualomi, lao mbuli mohaoki tauna, nauliangaahe: ‘Laokau mobago i bondeku.’ Nodo wori au nababehi i tinti talu kalumba.

⁶Kalumbami, ina tinti lima, molambi mbuli tauna au mohuda-huda. Napekunehe: ‘Moapa hai mohuda-huda peakau hangaloa, barakau mobago?’

⁷Rahanai: ‘Lawi bara ara au mampopobagongkai.’ Nauli ampu bonde iti: ‘Ane nodo, laomokau mobago i bondeku.’ Lao mpuumohe.

⁸Tampumi alo, naulimi ampu bonde i mandorona: ‘Kakiomohe topobago iti, hai nuweimohe saronda. Nuweihe hampai saronda tauna au mepongkahe mobago tinti lima kalumba. Roo indo, nuwei worihe saronda i tauna au mepongkahe mobago tinti talu. Nubabehi nodo duuna hawe i tauna au mobagohe mepongka madondo.’

⁹Mai mpuumohe au mobago mepongka tinti lima kalumba, molambihe saronda hadua-hadua hampeka doi pera.

¹⁰Nodo mpuumi duuna hawehe topobago au mepongka madondo-dondo. Topobago au mepongka madondo iti manguli i lalunda: ‘Manoto hangangaa melabi au naweike, lawi hangaloake mobago!’ Agaiana batena pea wori hampeka doi pera au rahumba.

¹¹I polambinda saronda iti, mohume-humehe i ampu bonde, rauli,

¹²‘Au hawe mobago i boko, mobagohe hajaa pea. Agaiana ikami, mobagongkai hangaloa, nasimbakingkai alo au makere. Moapari hai nubaiarihe himbela hai ikami?’

¹³Nahanai ampu bonde iti: ‘Ene, barana masala irikamu. Bara pae himpudumoke, molambikau saromi hampeka doi pera i lalu hangaloa?

¹⁴Nialami saromi hai laomokau! Peundeakumi mowei saronda i tauna au hawe i boko himbela hai au kuweikau.

¹⁵Bara pae peunde-undeakuto mampopobundu doingku? Moapari hai mahinakau i rangami ane maroa lalungku irihira?’ ”

¹⁶Napahopo Yesu ngkora pandiri iti, Nauli, “Nodo wori i alo pebotusi: bosa tauna au tepaibokoa tuwonda i tempo ide ina mewali tepaiorua i alo au ina mai. Hai bosa wori tauna au mahile tuwonda i tempo ide ina mewali tepaibokoa i alo au ina mai.”

¹⁷I tempo iti, Yesu molumao monontohi wanua Yerusale. I tanga rara, Nakakiohe topeguruNa au hampulo hai rodua mogulu mopatani, hai Nauliangaahe:

¹⁸“Nipehadingi maroa! Ide-ide laomoke monontohi Yerusale. Inditimi, Iko Ana Manusia ina rahuhuNa i kapala-kapala tadulako mpenomba hai guru-guru agama, hai ina rabotusi bona rahuku mateNa.

¹⁹Roo indo, ina rahuhuNa i tauna au barahe to Yahudi bona rakakabosaiNa, rapapahaiNa, hai rapapateNa i kau mombehape. Agaiana i alo katalu, ina tuwo huleNa.”

²⁰I tempo iti, towawinena Sebedeus hai anana rodua maihe i Yesu. Inanda iti molingkudu motumpa i lindoNa lawi ara au ina naperapi.

²¹Mekunemi Yesu iria, Nauli, “Apa au nuperapi?” Nahanai inanda iti, “Pamperapiku bona ane mewaliKo Datu, anangku au rodua mohuda moparenta hihimbela hai Oio, hadua ntanda i koanaMu, hadua ntanda i kabeoMu.”

²²Nauliangaahe Yesu, “Bara niisa apa au niperapi? Nibuku pae mohalea kapari au hangangaa Kuhalea?” Rahanai topeguruNa au rodua iti, “Kibuku!”

²³Nauli Yesu, “Tou, hangangaa nihalea kapari nodo au Kuhalea. Agaiana bara Iko au mopakanoto hema au mohuda ntanda i koanaNgku hai ntanda i kabeoNgku. Batena pea UmaNgku au mopakanoto kahemana.”

²⁴Karahadina topeguruNa au hampulo, pamperapinda ranganda au rodua, rumpumohe.

²⁵Ido hai Yesu mokakio ope-ope topeguruNa, hai Nauliangaahe, “Niisato kamakancana poparentanda tauna au bara moisa Pue Ala moparentai tauna bosa. Tauna au mahile lantinda mopari-pari tauna bosa mampeulai hawanda.

²⁶Agaiana ikamu, inee nodo babehiami. Hema au mampeinao mapangka lantina, hangangaa mewali hampai nodo hadua topekadipura.

²⁷Hai hema au mampeinao mahile hangana hangangaa mewali hampai nodo hadua hawi.

²⁸Hangangaa nipeulai poantiKu, Iko Ana Manusia. Lawi tunggaiaKu mai i dunia ide, baraNa mai mewali topohawa. Agaiana kamaiNgku i dunia ide bona mewaliNa hawi, hai bona mohuhuna wataNgku rapapate mohuru salanda tauna bosa.”

²⁹Kapadunda Yesu hai topeguruNa hangko i boea Yeriko, mokoloromohe tauna meula Iria.

³⁰Arahe rodua tobilo mohuda i wiwi rara. Karahadina Yesu au moliu, meraroahe, rauli, “Pue, pemuleana Datu Daudi! Pokaahi wongkamia!”

³¹Bosa tauna mokarumpuihe, rauli, “Mandiikau!” Agaiana to bilo iti monganga-nganga peahe masisimbuku, “Pue, pemuleana Datu Daudi, pokaahi wongkamia!”

³²Mengkaroomi Yesu, Nakakiohe, hai Nauliangaahe, “Apa au niunde bona Kubabehi?”

³³Rahanai, “Pue, kiunde wongkamia meita!”

³⁴Maahi laluna Yesu moitahe, pane Napetobo matanda. Unga peahe meita, liliu meulahe Iria.