Read Napu Matiu 21 Bible Online

Matiu 21 - Napu bible

Matiu 21

¹Hungkumohe i wanua Yerusale, hawehe i boea Betpage i Bulu Saitun. Inditi, Yesu motudu rodua topeguruNa moioru,

²Nauliangaahe, “Laomokau i boea au talindo. Ane hawekau inditi, ina niita hambaa kalide au rataka hai anana hungku indo. Nikakahi hai niantiaNa mai.

³Ane ara au mokambaroakau, niuliangaahe: ‘Naparaluu Pue. Ina Napopesulea peakau deade.’ ”

⁴Iti mewali bona tepabukei apa au nauli hadua nabi hangkoia, node:

⁵“Uliangaahe ampu boea Sion i Yerusale: Peita, oloumi mai Datumi! Ia mengkaiwoi, mesawi i hambaa kalide. Ia mesawi i hambaa kalide au mangura mani.”

⁶Mewali, lao mpuumohe topeguruNa au rodua iti mobabehi nodo au Nauliangaahe.

⁷Kalide au ntaliana iti raanti i Yesu hai ralampii badunda. Roo ralampii, mesawimi Yesu.

⁸I poliuna Yesu, tauna bosa mowokehe hampinda i tanga rara, hantanga mobatakihe daangkau hai raparampi i tanga rara, tanda pampomahilenda Yesu.

⁹Bosa tauna au meula i Yesu, arahe au moioru, ara worihe au i boko. Mogee-gee liliuhe, rauli, “Tetoiami pemuleana Datu Daudi! Rawatimi tauna au mai i lalu hangana Pue! Tetoiami Pue Ala au indora i suruga!”

¹⁰Pesuana Yesu i wanua Yerusale, mombekune-kunemohe ampu boea, rauli, “Hema ide?”

¹¹Rahanai tauna au hihimbela hai Ia, “Idemi Yesu, hadua nabi hangko i Nasare i tampo Galilea.”

¹²Hangko inditi, mesuami Yesu i tabangaa Souna Pue Ala. Inditi, Nawurahe ope-ope tauna au mobalu-balu. Nadungkami mejanda topointolohi doi, hai Nadungka wori pohudaanda topobalu-balu tadasi manggebodo.

¹³Nauliangaahe, “I lalu Sura Malelaha, Pue Ala manguli node: ‘SouNgku ina rauli sou pekakaea.’ Agaiana ikamu, nipopewaliri sou pogulua topanangka!”

¹⁴Mewali hawemohe tauna au bilo hai au mokakuda mai i Yesu, i Souna Pue Ala, hai napakaohahe Yesu.

¹⁵Agaiana kapala-kapala tadulako mpenomba hai guru-guru agama, rumpuhe moita tanda kuasa au nababehi Yesu. Hai koi inaonda mohadi anangkoi au monganga-nganga i lalu Souna Pue Ala au manguli, “Tetoiami pemuleana Datu Daudi!”

¹⁶Ido hai mouliangaahe Yesu, “Bara pae Nuhadi lolitanda?” Nahanai Yesu, “Kuhadito. Bara mani pae nibasa apa au teuki i lalu Sura Malelaha au manguli: ‘Nupaturomohe anangkoi hai analei bona mamponanihe peawaMu.’ ”

¹⁷Hangko inditi, padumi Yesu mopalehi wanua Yerusale, lao mohambengi i boea Betania.

¹⁸Kahalona madondo, molumaomohe Yesu hai topeguruNa mesule i Yerusale. I tanga polumaonda, marimimi Yesu.

¹⁹Naita i wiwi rara hampoa kau ara. Laomi i patoana Nahaoki wuana, agaiana bara huba haogu wuana, batena pea tawena. Ido hai Yesu mogane kau iti, Nauli, “Mepongka alo ide, barapoko mowua!” Liliu malau hai bangi kau ara iti.

²⁰Karaitana topeguruNa apa au mewali iti, rapotingkara, rauli, “Noumba hai liliu malau hai bangi kau ara iti?”

²¹Nahanai Yesu, “Tou mpuu au Kuuliangaakau, ane nipoinalai hai bara bata-bata lalumi, peisa wori nibabehi nodo au Kubabehi i kau iti. Mogalori bulu olou, peisa nipohawaa, niuli: ‘Teangkamoko, pengkanawo i lalu tahi!’ hai batena ina mewali.

²²Apa pea au niperapi i lalu pekakaemi, ane nipoinalai, batena ina nilambi.”

²³Roo indo, Yesu mesua i lalu Souna Pue Ala hai mepaturo. Tangana mepaguru, hawemohe kapala-kapala tadulako mpenomba hai totosaenda to Yahudi mekune Iria, rauli, “Nuuliangaangkai, hangko iumba kuasaMu mobabehi ope-ope iti i Souna Pue Ala? Hema au moweiKo kuasa iti?”

²⁴Nahanai Yesu, “Ara wori hampaka pampekuneNgku irikamu. Ane nihanai pekuneNgku, hangko Kuuliri kahemana au moweiNa kuasa mobabehi ope-ope iti.

²⁵Hangko iumba kuasana Yohane Toperiu moriu tauna? Hangko i Pue Ala, ba hangko i manusia?” Mololitamohe tadulakonda to Yahudi iti hadua hai hadua, rauli, “Noumbami katahanaina? Ane tauli hangko i Pue Ala kuasaNa, ina Nauliangaake: ‘Ane nodo, moapari hai barakau mepoinalai i Yohane?’

²⁶Agaiana ane tauli hangko i manusia pea kuasana, langake i tauna bosa, lawi tauna bosa manguli Yohane iti hadua nabi.”

²⁷Mewali, rahanai, rauli, “Bara kiisa.” Ido hai nauliangaahe Yesu, “Ane nodo, bara worikau ina Kuuliangaa kahangko iumbana kuasaNgku mobabehi iti!”

²⁸Napaliliu Yesu lolitaNa i tadulako agama Yahudi, Nauli, “Noumba pelambiami: ara hadua uma, anana rodua, tobalilo haha. Ia lao i towutu, nauliangaa: ‘Anangku, alo ide, laoko mobago i bonde.’

²⁹Nahanai: ‘Lohena Uma!’ Agaiana kahopoana tebaliki laluna, hai lao mpuumi mobago i bonde.

³⁰Hangko indo, umana iti lao wori i anana au toadi, nauliangaa: ‘Anangku, laoko mobago i bonde.’ Nahanai anana: ‘Io, laona Uma.’ Agaiana bara lao!”

³¹Roo indo, mekune Yesu i tadulako agama Yahudi, Nauli, “Mewali, hangko i anangkoi au rodua iti, hema au mampeulai hawana umanda?” Rahanai tadulakonda to Yahudi, “Au towutu.” Nauli Yesu, “Kana pehanami. Agaiana Kuuliangaakau: tauna au madosa, nodo toperuru asele hai towawine au bara hintoto babehianda, ihirari au ina nadoko Pue Ala mewali taunaNa i lalu poparentaNa, bara ikamu.

³²Lawi ikamu, bara nipoinalai lolitana Yohane Toperiu au mopaturoakau rara au manoto. Agaiana toperuru asele hai towawine au bara maroa babehianda, ihirari au mepoinalai Iria. Hai nauri nodo, bara nipenosoi babehiami hai barakau mepoinalai Iria.”

³³Napaliliu Yesu lolitana i tadulako agama Yahudi, Nauli, “Pehadingi wori ngkora pandiri ide. Ara hadua ampu bonde au motudai bondena hai anggoro. Ampu bonde iti mokadipura bondena hai rawala mantoleli. Nababehi worimi popiengaa anggoro hai bambaru pokampaia. Roo indo, nasarohe bahangkia tauna mokampai, hai laomi modaga i tampo au karao.

³⁴Hawemi tempona mopupu wua anggoro, natudumi bahangkia hawina lao merapi kirana hangko i topokadipura bondena.

³⁵Agaiana topokadipura bonde iti mohakahe tauna au natudu ampu bonde: hadua rapapahai, hadua rapapate, hai hadua mbuli rawatui.

³⁶Ampu bonde iti motudu mbuli hawina au ntanina, meliu kabosanda pane au nguru-nguruna. Agaiana nodo pea karababehina.

³⁷Kahopoana, natudumi anana haduduana lao i topokadipura bondena. Nauli i laluna: ‘Batena ina raadai.’

³⁸Agaiana, i karaitana topokadipura bonde anana ampu bonde iti, mogombomohe, rauli: ‘Oloumi mai anana, ia au ina mewali ampu bonde ide. Agina tapapate, hai taala bondena hai ope-ope ihina.’

³⁹Mewali, rahaka mpuumi anana iti, radii lao i raoa bonde hai rapapate.”

⁴⁰Roo indo, mekune Yesu, Nauli, “Mewali, ane hawe hule ampu bonde, apa au ina nababehi i topokadipura bondena?”

⁴¹Rahanai, “Manoto ia ina mopapate tauna au kadake iti, hai bondena ina nasaroahe tauna ntanina au mounde mowei ihi bondena iria i tempo pepare.”[23]

⁴²Nauliangaahe Yesu, “Bara mani pae nibasa lolita ide i lalu Sura Malelaha au manguli node: ‘Watu au ratende topoaro sou, watu iti au mewali pohudaa sou. Iti mewali moula peundeana Pue Ala, hai maroa ntepuu apa au Nababehi iti.’ ”

⁴³Nauli mbuli Yesu, “BaraNa nidoko nodo Datumi, ido hai bara worikau Nadoko Pue Ala mewali taunaNa. Kirami i lalu poparentana Pue Ala, ina raala hangko irikamu hai raweihe tauna ntanina au mampeulai hawana Pue Ala.

⁴⁴Hema au manawo i watu ide ina mareta, hai hema au narumpa watu ide ina marupu.”[24]

⁴⁵I temponda kapala-kapala tadulako mpenomba hai toParisi mohadi ngkora pandiri au napahawe Yesu, raisa kaihirana au natunggai lolitaNa iti.

⁴⁶Ido hai rahaokimi rara bona mohaka Yesu, agaiana barahe bai. Mampokalangahe tauna bosa, lawi rauli tauna bosa Yesu iti iami hadua nabi.