Read Napu Matiu 22 Bible Online

Matiu 22 - Napu bible

Matiu 22

¹Mololita mbulimi Yesu i tadulako agama Yahudi, Napahaweahe ngkora pandiri ide, Nauli,

²“Pue Ala nodo datu i lalu lolita ide: hadua datu mobabehi susa i petaunana anana.

³Napohawaa hawina lao mokakio tauna node: ‘Laomoke maande i posusaa petauna!’ Agaiana ope-opehe au rakakio, barahe mau lao.

⁴Ido hai natudu mbulimohe hawina au ntanina, nauliangaahe: ‘Nipahawe i tauna au rakakio: japi rasambalemi, paande lehami, masilolongami ope-ope. Laomoke i posusaa petauna!’

⁵Agaiana ope-ope tauna au rakakio barahe mohaile pekakio iti. Hadua-hadua, laohe i bagonda. Arahe au lao i bondenda, arahe au lao i bagonda ntanina.

⁶Ara worihe au mohaka hawina datu iti, rapapahai hai rapapate.

⁷Kanahadina datu apa au mewali, rumihi mpuu karumpuna. Natudumohe surodadona lao mopapate topepapate iti hai mohuwe boeanda.

⁸Roo indo, nakakio mbulimohe hawina, nauliangaahe: ‘Posusa petauna masilolongami, agaiana tauna au kukakiomi, barahe hintoto.

⁹Mewali, laomokau i penga-penga rara, hai hema pea au nipohidupaa, niwawahamohe mai mesua i posusa petauna.’

¹⁰Lao mpuumohe hawi iti i penga-penga rara, mokakio ope-ope tauna au moliu, bara rapopontani au maroa babehianda ba au kadake. Kahopoana, buke mpuumi sou petaunaa hai torare.

¹¹Mesuami datu mokamata torare, Naita i olonda, ara hadua au bara mehampi posusa.

¹²Nauli datu: ‘Ene, moapari hai maiko i posusaa barako mehampi posusa?’ Bara mehana.

¹³Hangko indo, datu iti motuduhe hawina, nauli: ‘Nihilu bitina hai taiena, hai nitende i raoa i lalu kakaindiana! Inditi, ia ina moteria hai mantodiha.’ ”

¹⁴Napahopo Yesu ngkora pandiriNa hai lolita ide, “Bosa mpuu tauna au nakakio Pue Ala, agaiana haodi peahe au Napilei mewali taunaNa i lalu poparentaNa.”

¹⁵Roo indo, padumohe toParisi hangko i Souna Pue Ala. Mohaokihe akalanda lawi rapeinao molambi kamasalana lolitana Yesu hai pampekunenda.

¹⁶Ido hai rapohawaamohe bahangkia topegurunda hai bahangkia taunana Datu Herode lao i Yesu. Kahawenda, rauliangaa, “Guru, kiisami kaOiona tauna au manoto. MepaturoKo i katou-touana moula peundeana Pue Ala. Bara Nupeulai pampekirinda hema pea, lawi baraKo mampopontani tauna.

¹⁷Guru, ido hai kiperapi bona Nuuliangaangkai, noumba pelambiaMu: moula atura agamanta, ba hangangaa mobaiarike asele i Kaisar,[25] ba bara?”

¹⁸Naisami Yesu tunggaiana lalunda au kadake, ido hai Nauliangaahe, “Modongko mpuukau! Moapa hai nihaoki kamasalana lolitaNgku?

¹⁹NitudungiaNa mai doi au biasa nipopobaiari asele.” Rahuhua hampeka doi pera.

²⁰Mekune Yesu, “Lenggena hema hai hangana hema au ara i doi ide?”

²¹Rahanai, “Lenggena hai hangana Kaisar.” Nauli Yesu, “Ane nodo, niwei Kaisar apa au hintoto rawei Kaisar, hai niwei Pue Ala apa au hintoto rawei Pue Ala.”

²²Karahadina pehanaNa, tingkarahe, hai padumohe mopalehi Yesu.

²³I alo iti wori, arahe bahangkia toSaduki au hawe i Yesu. Tosaduki iti, iami tadulako agama Yahudi au manguli tauna au mate bara ina rapatuwo hule.

²⁴Kahawenda toSaduki iti, mohaokihe kanawoana Yesu, rauliangaa, “Guru, nabi Musa mepaturo node: ane hadua tobalilo mate agaiana bara mani ara anana, halaluna hangangaa mampotambia bembana bona tauna iti ara pea pemuleana.

²⁵Mewali, arahe pitu topohalalu, ope-opehe tobalilo. Au towutu, motambi. Bara mani wohiraia moana, matemi tobalilo iti. Bembana naposamboko adina.

²⁶Bara mani worihe moana, matemi. Nodo wori au mewali i kataluna duuna hawe i kapituna.

²⁷Kahopoana, mate worimi towawine iti.

²⁸Mewali i alo pearonda tomate, ane tou-tou mpuu tomate tuwo hulehe, hemami ampuna towawine iti? Lawi pitumohe au mampotambia.”

²⁹Nahanai Yesu, “Sala ntepuu pekirimi, lawi bara niisa ihi Sura Malelaha, bara wori niisa kuasana Pue Ala.

³⁰Lawi i pearonda hule tomate, katuwonda nodomi katuwo malaeka i lalu suruga, barapohe motambi ba rapopotambi.

³¹Kutudungiakau lolita au ara i lalu Sura Malelaha au mopakanoto pearonda tomate. Ara lolitana Pue Ala hangkoia au mouliangaakau node:

³²‘Ikomi Pue Ala au rapenombai Burahima, Isaki, hai Yako.’ Lempona, nauri matehe Burahima, Isaki hai Yako, batena tuwohe, lawi tauna au menomba i Pue Ala, batena pea tauna au tuwo.”

³³Karahadina tauna bosa paturona Yesu iti, tingkara mpuuhe.

³⁴Tosaduki iti, barapi rabuku mohanai Yesu. Ido hai toParisi, teruhu mbulimohe mohaoki rara moakalangi Yesu.

³⁵Ara hadua guru agama hangko i olonda au mohaoki kamasalana lolitana Yesu hai pampekunena, nauli,

³⁶“Guru, hangko i ope-ope parenta i lalu Aturana Musa, parenta umba au mahile ntepuu?”

³⁷Nahanai Yesu, “Teuki node: ‘Nipokaahi Pue Ala, Ampumi, hangko i kabulana lalumi, i sukana pekirimi hai i sukana kapandemi.’

³⁸Itimi parenta au mahile, hai au kaisa.

³⁹Hai parenta karompakana au himbela hai au kaisa iami: ‘Nipokaahi hangka rangami nodo pampokaahimi watami haduduami.’

⁴⁰Parenta rompaka itimi au mewali patoa hangko i ope-ope Aturana Musa hai paturonda nabi.”

⁴¹Tanganda mani toParisi mogulu inditi, Yesu mekune irihira, Nauli,

⁴²“Noumba pelambiami: hema Datu Topehompo au nadandi Pue Ala hangkoia? Pemuleana hema?” Rahanai, “Pemuleana Datu Daudi.”

⁴³Nauli Yesu, “Mewali, moapari pane nauli Daudi pemuleana iami Pue au napenombai? Lawi hangkoia anti peninina Inao Malelaha, Daudi manguli:

⁴⁴Pue mongkora i Ampuku au kupenombai, Nauli, ‘MohudamoKo ntanda i koanaNgku, duuna Kupopengkoruhe ope-ope iwaliMu Irio.’

⁴⁵Mewali, ane Datu Topehompo iami pemuleana Daudi, moapa hai nauli Daudi, Ia Pue au napenombai?”

⁴⁶Bara ara hadua au mohanai. Mepongka i alo iti, barapi ara hadua au bai mekune ba apa-apa i Yesu.