Read Napu Matiu 23 Bible Online

Matiu 23 - Napu bible

Matiu 23

¹Hangko indo, Yesu mololita i tauna bosa hai topeguruNa, Nauli,

²“Guru-guru agama hai toParisi nodohe tauna au mohuda i pohudaana Musa, lawi ihirami au mopaturoakau Aturana Musa.

³Ido hai hangangaa nipeulai hinangkana apa au rapaturoakau. Agaiana inee nipeulai babehianda, lawi ihira iti barahe mampeulai apa au rapaturoakau.

⁴Ihira mopahaleangiahe tauna bosa parenta hai ada agama au mantimi, agaiana bara mpuuhe motulungi tauna bosa mampeulai parenta hai ada iti.

⁵Mampempemaroahe bona ratoiahe ranganda. Ane moula adanta, ikita hangangaa mopatakake kapipi pambolia bahangkia wati hangko Sura Malelaha.[26] Agaiana ane toParisi, kapipi iti rapamahile-hile, nodo wori rombo-rombo i badunda rapamandoe-ndoe bona rauli rumihi pampeulainda ada agama.

⁶Matanahe ane rapopohudahe i pohudaa au maroa i posusaa hai pohudaa au raadai i sou penombaa.

⁷Matanahe ane rabilahe tauna i pobalu-balua hai ane rakakiohe ‘Guru.’[27]

⁸Agaiana ikamu, ineekau mampeinao rabila hai rakakio ‘Guru,’ lawi hadua pea gurumi, iami Kerisitu, hai ikamu ope-ope topohalalu peakau.

⁹Hai inee wori nipomahile tauna i dunia ide hai nikakiohe ‘Uma,’ lawi Umami hadua pea, iami Umami au ara i suruga.

¹⁰Hai inee worikau mampeinao rakakio ‘Tadulako,’ lawi tadulakomi hadua pea, iami Kerisitu.

¹¹Hema au mounde bona mahile tuwona, hangangaa mewali hampai hawi i rangana.

¹²Tauna au mampeindora batena rapaiwoi, hai tauna au mengkaiwoi batena rapaiwongko.

¹³Hurewumokau, guru agama hai toParisi! Batena ina molambikau rugi, lawi maroa i raoa peakau! Bara niunde mampeulai paturoNgku bona mewalikau taunana Pue Ala i lalu poparentaNa. Hai tauna ntanina au mau, nikonto.

¹⁴[Marugikau, guru agama hai toParisi! Lawi maroa i raoa peakau! Niuli motulungikau towawine tobemba au meahi-ahi tuwonda. Agaiana katouana nipakanawo peahe hai nirampaki sounda. Hai roo indo, mekakaekau mahae-hae motabungihi babehiami au kadake. Ido hai pane ina rahuku mantimikau!]

¹⁵Marugikau, guru agama hai toParisi! Maroa i raoa peakau! Madota mpuukau mopaturo rangami bona mampeulaihe paturomi. Niagikato pae moweta tahi hai molumao karao bona ara pea hadua tauna au mewali topegurumi. Hai ane arami topegurumi, nipaturohe bona mampeulaihe dongkomi, alana rumihiri kakadakena babehianda pane ikamu, hai meliu kahintotonda rahuku i naraka pane ikamu.

¹⁶Batena ina marugikau! Nodokau tobilo au mampeinao monini rangana! Ikamumi au mewali guru agama, agaiana nipakanawo peahe tauna bosa hai paturomi au bara tou. Mepaturokau node: ane ara hadua tauna au modandi hai mosumpa mokabelai Souna Pue Ala, niuli bara tetaka hai sumpana iti. Agaiana ane mokabelai bulawa au i lalu Souna Pue Ala, tetaka hai sumpana iti.

¹⁷Ntuli hai bilo mpuukau! Umba au meliu peawana, bulawa ba souna Pue Ala au mopamalelaha bulawa iti?

¹⁸Mepaturo worikau node: ane ara hadua tauna au mosumpa mokabelai meja pohuwea popenomba au i lalu Souna Pue Ala, bara tetaka hai sumpana iti. Agaiana ane mokabelai popenomba au rahuwe i wongko meja iti, batena tetaka hai sumpana iti.

¹⁹Nodo mpuukau tobilo! Ba niuli, popenomba meliu pane meja pohuwea popenomba? Bara, lawi meja itimi au mopamalelaha popenomba au i wongkona.

²⁰Ane hadua tauna mosumpa mokabelai meja pohuwea popenomba, lempona mokabelai meja iti hai ope-ope au rahuwe i wongkona.

²¹Hai ane hadua tauna mosumpa mokabelai Souna Pue Ala, lempona mokabelai Souna Pue Ala hai Pue Ala au maida i sou iti.

²²Hai ane hadua tauna mosumpa mokabelai suruga, lempona mokabelai pohudaana Pue Ala, hai mokabelai wori Pue Ala au mohuda i pohudaa iti.

²³Hurewumokau, guru agama hai toParisi! Maroa i raoa peakau! Parenta au koi nipeulai haha. Mogalori tuda-tuda au koi i tabangaami nodo hare, suderei hai bunga-bunga i bondemi, nipopenomba hangkira hampulo i Pue Ala. Agaiana parenta mahile nodo kahintimba, pepokaahi hai kamatundu bara nipopolumao. Katouana itiri au hangangaa nipeulai, hai inee worikau mokoi parenta au ntanina.

²⁴Ikamu nodo tauna au moingihi dale hangko i owai au nienu, agaiana hambaa onta niame pea. Ikamu nodo tobilo au mampeinao monini rangana.

²⁵Hurewumokau, guru agama hai toParisi! Maroa i raoa peakau! Ikamu nodo hadua tauna au mobahoi paenua hai tabo i raoana pea. Agaiana i lalumi buke pehioro hai dosa.

²⁶Ikamu toParisi, nodo mpuukau tobilo! Hangangaa nibahoi hampai laluna paenuami bona malelaha wori i raoana.

²⁷Hurewumokau, guru agama hai toParisi! Maroa i raoa peakau! Nodokau talumba au radaio hai rawone bula, i raoana maroa raita, agaiana i laluna teihii buu tomate hai ngkaia pakana au merikai.

²⁸Nodo wori ikamu, manoto babehiami i raoami pea bona ratoiakau rangami. Agaiana i lalumi, buke dongko hai dake.

²⁹Hurewumokau, guru agama hai toParisi! Maroa i raoa peakau! Nipakaroa liliu daionda nabi hai tauna au manoto hangkoia.

³⁰Mampemahilekau, niuli, ‘Ane rapana tuwongkai hihimbela hai toiorungki hangkoia, kebarangkai moula babehianda mopapate nabi-nabi.’

³¹Mewali, nipangaku mpuu kaikamuna pemuleanda au mopapate nabi-nabi, hai babehianda toiorumi iti batena niula.

³²Mewali, nipaliliu peami mobabehi dosa moula babehianda toiorumi!

³³Topodongkokau! Motengko lalumi! Ba nipehangu ina tekabahakau hangko i karahukumi i lalu naraka?

³⁴Toiorumi hangkoia mopapatehe bosa tauna au manoto babehianda, mepongka hangko i Habeli hawe i nabi Sakaria anana Berekia au rapapate i tabangaa Souna Pue Ala i olo sou malelaha hai meja pohuwea popenomba. Mewali, ina kutuduhe nabi, tauna au mapande hai guru-guru laohe irikamu au tuwo ide-ide bona mopaturoakau lolitaNgku. Agaiana arahe au ina nipapate, arahe au ina nipaku i kau mombehape, arahe au ina nipapahai i lalu sou penombaami, hai ara worihe au ina niwuwulai i boea ntanina. Kahopoana, ikamu au tuwo ide-ide ina mohalea ope-ope kanawoana toiorumi hangkoia au mopapatehe tauna au manoto.

³⁶Tou mpuu au Kuuliangaakau, ikamu au tuwo ide-ide batena rahuku anti babehiami hai anti babehianda toiorumi au kadake.”

³⁷“To Yerusale, to Yerusale! Mopapatemokau nabi-nabi. Hai tauna au natudu Pue Ala lao irikamu, niwatuihe. Bosa belana Kupeinao mokalapuikau nodo hambaa manu ntina au motaoboki anana, agaiana bara niunde.

³⁸Nipehadingi: sou penombaami ide ina napalehi Pue Ala.

³⁹Tou mpuu au Kuuliangaakau, barapoNa niita duuna hawe tempona niuli: ‘Rawatimi tauna au mai i lalu hangana Pue!’ ”