Read Napu Matiu 24 Bible Online

Matiu 24 - Napu bible

Matiu 24

¹Mesuwumi Yesu hangko i Souna Pue Ala, topeguruNa mai motudungia kamaroana karababehina sou iti.

²Nauliangaahe Yesu, “Niitami ope-ope iti. Bona niisa, bara ina ara haogu watu au mentara i paidaana. Batena ope ragero.”

³Roo indo, laomi Yesu i Bulu Saitun. Tangana mohuda-huda haduduana, hawemohe topeguruNa mekune Iria, “Impira pewalina au Nuuli inona?” Hai mekune mbulihe, rauli, “Tanda apa au ina mewali i kahaweMu i kahopoa dunia ide?”

⁴Nahanai Yesu, “Mainga-ingakau bona datikau rapakanawo.

⁵Lawi bosa tauna ina mai hai mangulihe kaihiranami Datu Topehompo. Bosa tauna ina rapakanawo.

⁶Ina mohadikau pombeala ba bambari pombeala agaiana inee nipowulunga. Lawi ope-ope iti hangangaa mewali hampai, agaiana bara mani hawe kahopoa dunia.

⁷I tempo iti, tohangamba ina mombeala hai tohangambana, kadatua hambua ina moewa kadatua hambuana, hai iumba-iumba pea ara rimi hai linu.

⁸Agaiana ope-ope iti hangko pepongkana, nodo kapari au nahadi hadua towawine au ina moana.

⁹I tempo iti, ikamu ina rahaka hai rahuhu i tauna bona rapopeahi-ahikau hai rapapatekau. Anti peulami Iriko, tauna i humalele dunia ina mokahihikau.

¹⁰Bosa tauna ina mosapuaka peulanda Iriko. Ara au ina mohuhu halalunda hampepepoinalai i iwalinda. Bosa tauna mombekahihi.

¹¹Hai ina hawe worihe bosa nabi au mopakanawo bosa tauna.

¹²I tempo iti, katetetambaia kakadakenda tauna, duuna makura ahi lalunda tauna.

¹³Agaiana tauna au mepoinalai liliu Iriko duuna i kahopoana ina molambihe katuwo maroa.

¹⁴Hai Ngkora Marasa kana i poparentana Pue Ala batena rabambari i humalele dunia bona rahadi ope-ope tauna, hangko haweri kahopoa dunia.”

¹⁵“Hangkoia nabi Danieli mampololita kahawena au rahanga ‘Dake au Mepamaropu.’ (Hema au mobasa lolita ide, niparesa lempona!) Ane niita au natunggai Danieli iti meangka i Souna Pue Ala,

¹⁶agina tauna au maida i Yudea melangkahe lao i bulu.

¹⁷Tauna au mohuda-huda i pengkangkalahea i wongko sou[28], ineehe mesua i lalu sou mangala ba apa-apa.

¹⁸Tauna au i bonde, ineehe hampai mesule i boea mangala hampinda. Hangangaa liliuhe melangka!

¹⁹Ina masusa mpuu tuwonda towawine au mantimi hai au mopatomi ananda.

²⁰Mekakaekau i Pue Ala bona alo pelangkami iti inee i tempo makuli ba i Alo Pengkarooangaa.

²¹Lawi i tempo iti, ina hawe kapari au rumihi ntepuu au bara mani hambela mewali hangko i pewalina dunia duuna ide-ide, hai bara wori ara au ina mewali nodo i alo au i bokona.

²²Agaiana tempo kapari iti ina napaholiga Pue Ala, lawi ane bara Napaholiga, bara ara hadua au tuwo. Mewali, anti pampokaahiNa tauna au Napilei, ido hai ina Napaholiga tempo kapari iti.

²³I tempo iti, ane ara au mouliangaakau: ‘Peita, idemi Datu Topehompo!’ ba ‘Olou mai!’ ineehe nipoinalai.

²⁴Lawi ina hawe bosa tauna au mepakanawo au manguli Datu Topehompohe ba nabihe. Ina mobabehihe tanda kuasa hai tanda au metingkarai bona mopakanawohe bosa tauna. Ane peisa, mogalo tauna au napilei Pue Ala, rapakanawo wori.

²⁵Nikatuinao! Kuuliangaa amimokau ope-ope iti hangko damani mewali.

²⁶Mewali, ane ara au mouliangaakau: ‘Peita, Datu Topehompo ara indolou i pada wungi,’ ineekau lao! Ane rauli: ‘Peita, ara inditi i lalu sou,’ ineehe nipoinalai!

²⁷Lawi ane hawe suleNa, Iko Ana Manusia, ina tongawa mpuu. KahaweNgku ina raita i humalele dunia, nodo pewangka kila au mesupa i Mata alo hai mewangka hawe-hawe i Katampua alo.

²⁸Ane moitakau tadasi kaloa mogulu, niisa kaarana au mate inditi. Nodo wori, ina tongawa mpuu kahaweNgku hule i dunia.”

²⁹“Ane liu tempo kapari iti, ‘alo ina mobali mewali makaindi, wula barapi mewangka, hai betue ina manawo hangko i langi. Ope-ope au makuasa i langi ina rumihi kamagunegonda.’

³⁰I tempo iti, ina ara tanda i langi au mampopaisa kahaweNgku, Iko Ana Manusia. Hai ope-ope tauna i dunia ina moteria, lawi raitaNa mai i wongko gawu. Ina makuasaNa hai meawa ntepuuNa.

³¹Tatamburu au mahile ina ratawue, hai ina Kutudu malaekaNgku lao mogulu tauna au Kupilei hangko i humalele dunia, mepongka i wuntuna hambali hawe i wuntuna hambali.”

³²“Nipailalu apa au Kupaturoakau hangko i kau ara. Ane niita pengana motumbe hai motawemi, niisa kaina hawenami tempo madii.

³³Nodo wori ane niita ope-ope ide, niisa kadanapi mahae ina mewali ope-ope au natunggai Pue Ala.

³⁴Tou mpuu au Kuuliangaakau, ope-ope au Kuuli inona batena mewali hangko damani ope mate tauna au tuwo tempo ide.

³⁵Langi hai tampo ina magero, agaiana lolitaNgku batena ara hawe i hae-haena.”

³⁶“Agaiana alo hai jaa pewaliana ope-ope iti, batena pea UmaNgku au moisa. Bara ara tauna au moisa. Mogalorihe malaeka au ara i suruga, bara wori raisa. Hai Iko AnaNa, bara wori Kuisa.

³⁷Apa au mewali i tempona nabi Noho hangkoia, ina mewali wori i alo kahaweaNgku Iko Ana Manusia.

³⁸I tempona nabi Noho hangkoia, manusia mampomalea, bara raisa apa au ina morumpahe. Ina maande-ande hai maenu-enu liliu peahe, motambihe hai rapopotambihe. Iti au rababehi liliu duuna nabi Noho mesua i lalu duanga mahile.

³⁹Nabalumbangiraihe owai, hangko raisari apa au mewali. Nodo wori kamampomaleanda tauna i kahaweNgku hule Iko Ana Manusia i dunia.

⁴⁰I tempo iti, rodua tauna mobago sambelahe i bonde, hadua raala hai hadua rapalehi.

⁴¹Rodua towawine tanganda mombau, hadua raala hai hadua rapalehi.

⁴²Ido hai Kuuli mainga-ingakau, lawi bara niisa impira Ampumi ina hawe!”

⁴³“Hangangaa nipailalu ngkora pandiri ide: ane naisa ami ampu sou, impira kahawena topanangka, batena mainga-inga, bara napogiangaa mesua i lalu souna.

⁴⁴Ido hai hangangaa mainga-ingakau, lawi bara niisa impira kahaweNgku, Iko Ana Manusia.”

⁴⁵“Nipailalu ngkora pandiri ide: ara hadua hawi au manoto laluna hai au peisa napoinalai ampuna. Ia naangka ampuna motosaengi hawi ntanina hai mourusi paandenda alo-alona.

⁴⁶I pesulena ampuna, morasi mpuu katuwona hawi iti ane nahumba tangana mampopolumao bagona.

⁴⁷Hawi iti batena naangka ampuna mokadipura ope-ope anu-anuna.

⁴⁸Agaiana noumba ane hawi iti bara maroa poantina? Nauli laluna: ‘Barato ina polo hawe ampuku!’ alana barapi mampopolumao bagona.

⁴⁹Napepongkami mopapahai hangka hawina, pane maande hai maenu liliu hihimbela hai tauna au malangu-langu.

⁵⁰Agaiana, hawe ampuna i alo hai i jaa au bara nahaharunga.

⁵¹Hawi iti ina napapahai hai natende i raoa nodo hadua topodongko. Inditi, ia ina moteria hai mantodiha.”