Read Napu Matiu 25 Bible Online

Matiu 25 - Napu bible

Matiu 25

¹“Ane hawe suleNa nodo Datu, ara tauna au masilolonga hai ara wori au bara masilolonga. Pewalina nodo ngkora pandiri ide: hampulo anantowawine motunggai lao modupa toratauna tobalilo, hadua-haduahe moanti hulonda.

²Limahe au ntuli, limahe au mapande.

³Lima anantowawine au ntuli iti, moantihe hulonda, agaiana bara melabi minanda.

⁴Lima anantowawine au mapande moanti hulonda hai moanti worihe mina i pambolianda au ina rapopotambai minana hulonda.

⁵Agaiana anti kamahaena toratauna tobalilo iti rapepegia, alana maleluemohe anantowawine iti, hai kahopoana leta hahamohe.

⁶Tanga kaindi, hangko arari tauna au mekakio, nauli, ‘Oloumi mai toratauna tobalilo! Maimi nidupa.’

⁷Pearondami anantowawine au hampulo iti, hadua-haduahe mopasilolonga hulonda.

⁸Anantowawine au ntuli mouliangaahe ranganda au mapande, ‘Ene, niwei wongkamia minami haodi, hulongki ina matemi.’

⁹Rahanaihe au mapande, ‘Minangki bara handa ane tagaa! Laomokau hampai meholo i topobalu-balu mina.’

¹⁰Lao mpuumohe anantowawine au ntuli iti meholo mina. I kalaonda meholo, hawemi toratauna tobalilo. Lima anantowawine au mapande iti, masilolonga amimi hulonda, ido hai liliuhe mesua hihimbela hai toratauna tobalilo i lalu sou posusaa, pane ratukomi baba.

¹¹Roo indo, hawe mbulimohe anantowawine au ntuli. Mekakiohe hangko i raoa, rauli, ‘Ee tua! Bungkahia wongkamia baba!’

¹²Nauli toratauna tobalilo, ‘Barakau kuisa.’ ”

¹³Napahopo Yesu ngkora pandiriNa node, “Ido hai hangangaa masilolongakau, lawi bara niisa kaimpirana kahaweNgku.”

¹⁴“Ane hawe suleNa, pewalina nodo ngkora pandiri ide: hadua tuana ina lao i wanua au karao. Hangko damani padu, mokakio hawina hai naweihe doi rapopolumao bona ara anana.

¹⁵Naweihe hadua-hadua moula i pesauruanda. Hadua nawei lima sabuna doi bulawa, au hadua rosabu, hai au hadua hasabu. Roo indo, padumi.

¹⁶Hawi au rawei lima sabuna doi bulawa liliu mampopolumao doi iti mohaoki anana, nalambi mpuumi anana lima wori sabuna.

¹⁷Nodo wori hawi au rawei rosabu, ia molambi wori anana rosabu.

¹⁸Agaiana hawi au rawei hasabu pea laori mokae tampo napowunii doina ampuna.

¹⁹Mahae hangko indo, mesulemi ampunda, hai mokakiomohe hawina napekune noumba karapopolumaona doina.

²⁰Hawi au rawei lima sabuna doi bulawa mai hai moanti i ampuna hampulo sabuna, nauli, ‘Ampu, au nuweina hangkoia lima sabuna. Idemi anana, lima wori sabuna.’

²¹Nauli ampunda, ‘Maroa mpuu kanupopolumaona bago au kuweiko. Mewali, anti kamanotomu i bago au koi, kupoinalaiako bago au mahile. Maimoko hihimbela hai iko i lalu katana-tana.’

²²Hawi au rawei rosabu doi bulawa hawe worimi, nauli: ‘Ampu, rosabu hangkoia au nuweina. Idemi anana rosabu wori.’

²³Nauli ampunda iti, ‘Maroa mpuu kanupopolumaona bago au kuweiko. Mewali, anti kamanotomu i bago au koi, kupoinalaiako bago au mahile. Maimoko hihimbela hai iko i lalu katana-tana.’

²⁴Roo indo, hawe worimi hawi au rawei hasabu, nauli, ‘Ampu, kuisa kamakancamu. Nupopobago mantimingkai. Nutudungkai mehua hai mantuda, agaiana irio haha wuana.

²⁵Langana, ido hai laona mowuni doimu i lalu tampo. Mewali, idemi doimu.’

²⁶Nauli ampunda iti, ‘Oio hawi au kadake hai au lohe mobago! Nuisa ide iko tauna au mampopobago mantimi hawingku. Kutuduhe mehua hai mantuda bona iriko haha wuana!

²⁷Ane nodo, moapari doi iti bara nuwei peami tauna ntanina mampopolumao, bona ane mesulena, doingku kulambi hai ara wori anana!’

²⁸Nauli mbuli ampunda iti i hawi tohaduana, ‘Nuala doi au ara iria, hai nuwei i hawingku au molambi doi bulawa hampulo sabuna.

²⁹Lawi tauna au peisa rapoinalai hai apa au rawei, ina rawei mbuli bona tetambai. Agaiana tauna au bara peisa rapoinalai, nauri haodi pea au rawei, batena ina raala hule.

³⁰Hai hawi au bara mobundu iti, nitendemide i lalu kakaindiana. Inditi ia ina moteria hai mantodiha liliu.’ ”

³¹“Iko Ana Manusia, ane hawe suleNa, ina meawaNa hai mahile mpuu kamakuasaNgku, hai ina raporangaiNa ope-ope malaeka. Ina mohudaNa i pohudaa kadatuaNgku au meawa.

³²Ope-ope tauna ina teruhu i lindoKu hai Kugaahe mewali rontobu, nodo hadua toporewu mopatani dimbana hai towauna.

³³Tauna au mobabehi peundeana Pue Ala Kupahantobuhe ntanda i koanaNgku, hai tauna au mesapuakahe ntanda i kabeoNgku.

³⁴Hai Iko Datu, Kuuliangaahe au ntanda i koanaNgku, ‘Maimokau au nawati UmaNgku! Mesuamokau i lalu poparentaKu. Paidaami Kupasilolonga amiamokau hungka i pewalina dunia hangkoia.

³⁵Lawi i tempoKu marimi, nipaandeNa. MangkadouNa, nipaenuNa. MoliuNa i soumi, nipopehupeNa.

³⁶Bara ara hampiKu, nihampiiNa. MahaiNa, nipakuliiNa. TangaNgku ratarunggu, nisondakiNa.’

³⁷Mehanahe au ntanda i koanaNgku, rauli, ‘Pue, impiraKo kiita marimi hai kipaandeKo, ba mangkadouKo hai kipaenuKo?

³⁸ImpiraKo moliu i soungki, hai kipopehupeKo? ImpiraKo kiita bara ara hampiMu, hai kihampiiKo?

³⁹ImpiraKo kiita mahai hai kipakuliiKo, ba i lalu tarunggu, hai kisondakiKo?’

⁴⁰Hai Iko Datu, Kuhanaihe, ‘Bona niisa, apa au nibabehi motulungi halaluNgku, nauri hadua pea halaluNgku au meahi-ahi katuwona, lempona, himbelami hai nibabehi Iriko.’

⁴¹Roo indo, Kuuliangaahe au ntanda i kabeoNgku, ‘Padumokau hangko inde, ikamu au harara i UmaNgku! Mesuamokau i lalu api au rore liliu, au rapasilolonga mewali pohukuanda Datu Tokadake hai hinangka malaekana.

⁴²Lawi i tempoKu marimi, baraNa nipaande. MangkadouNa, baraNa nipaenu.

⁴³MelempoNa i soumi, baraNa nipopehupe. Bara ara hampiKu, baraNa nihampii. MahaiNa, baraNa nipakulii. TangaNgku ratarunggu, baraNa nisondaki.’

⁴⁴Rahanai woriNa, rauli, ‘Pue, impiraKo kiita marimi ba mangkadou ba nodo tauna au moliu, ba baraKo mehampi, ba mahai ba ratarunggu, hai baraKo kitulungi?’

⁴⁵Hai Iko Datu, Kuhanaihe, ‘Bona niisa, anti kadana nitulungi tauna au meahi-ahi tuwonda, lempona, Ikomi au bara nitulungi.’ ”

⁴⁶Napahopo Yesu lolitaNa, Nauli, “Ope-ope tauna au kadake iti ina ratendehe i lalu naraka hai rahuku hawe i hae-haena, hai tauna au manoto ina molambihe katuwo maroa au bara mokahopoa.”