Read Napu Matiu 26 Bible Online

Matiu 26 - Napu bible

Matiu 26

¹Karoona Yesu mopahawe ope-ope iti, Nauliangaahe topeguruNa,

²“Niisa rongalo rai, ina hawe alo mahile Pasa. Hai Ana Manusia ina rahuhu bona rapaku i kau mombehape.”

³I tempo iti, kapala-kapala tadulako mpenomba hai totosaenda to Yahudi mogulumohe i souna Tadulako Mpenomba Mahile au rahanga Kayapas.

⁴Mogombomohe, rauli, “Noumbami raranta mohaka Yesu bona rapapate?”

⁵Agaiana rauli wori, “Inee hampai tahaka i alo mahile dati ara pohiho i olonda tauna bosa.”

⁶I tempona Yesu maida i boea Betania, Ia lao i souna hadua tauna au rahanga Simo, au hangkoia ketangga.

⁷Tangana Yesu maande inditi, hawemi hadua towawine moanti hambua botolo au buke lana mawongi au masuli ntepuu holona. Towawine iti mobumbuha lana mawongi i waana Yesu tanda pebilana.

⁸Karaitana topeguruNa apa au nababehi towawine iti, rumpuhe, rauli, “Moapari hai lana au masuli iti ratende mbero pea?

⁹Aginami rapobalu bona holona raweihe tauna au meahi-ahi.”

¹⁰Naisa Yesu pekirinda, ido hai Nauliangaahe, “Moapari hai nipakasusa laluna towawine ide? Apa au nababehi Iriko, maroa.

¹¹Ane tauna au meahi-ahi, ara mani katepakami motulungihe lawi ara mpaliliuhe irikamu. Agaiana Iko, baraNa ara liliu irikamu.

¹²Towawine iti mobumbuhiNa hai lana mawongi bona mopasilolonga ami wataNgku i karatawuNgku.

¹³Bona niisa, i humalele dunia, iumba pea Ngkora Marasa ide rabambari, apa au nababehi towawine iti batena tekabelai, tanda karakatuinaona.”

¹⁴I tempo iti, hadua hangko i topeguruNa au hampulo hai rodua, au rahanga Yudasi Iskariot, lao i kapala-kapala tadulako mpenomba,

¹⁵napekunehe, “Ane kuhuhu Yesu i lalu taiemi, apa au ina niweina?” Raimbami doi pera talu pulona, pane rawei iria.

¹⁶Hangko inditi, Yudasi mohaokimi katepaka au maroa mohuhu Yesu irihira bona rahaka.

¹⁷I alo pepongkaa Posusa Roti Au Bara Raragii, maimohe topeguruNa i Yesu, mekune, “Pue, iumba peundeaMu lao kipasilolonga paande Pasa?”

¹⁸Nahanaihe, “Laomokau i hadua tauna i lalu wanua, niuliangaa node, nauli Guru, hawemi tempoNa. Naunde mamposusai alo mahile Pasa i soumu hai topeguruNa.”

¹⁹Lao mpuumohe topeguruNa Yesu moula apa au Nauliangaahe, hai mopasilolongahe paande Pasa.

²⁰Kaindina, Yesu hai topeguruNa au hampulo hai rodua mohudahe maande.

²¹Tanganda maande, nauli Yesu, “Tou mpuu ide lolitaNgku, hadua hangko irikamu ina mampobaluNa.”

²²Karahadina topeguruNa lolitaNa, masusami lalunda, hai hadua-haduamohe mekune i Yesu, rauli, “Inee mpuu pae iko au Nutunggai Pue?”

²³Nahanai Yesu, “Tauna au moeme roti i lalu mangko hihimbela hai Iko, iami au ina mampobaluNa.

²⁴Iko Ana Manusia hangangaa mateNa nodo au tepakanotomi i lalu Sura Malelaha. Agaiana hurewumi tauna au mampobaluNa. Agina tauna iti, ineemi rapoanaka.”

²⁵Hangko inditi, nauli wori Yudasi au ina mampobalu Yesu, “Bara pae iko au Nutunggai Guru?” Nahanai Yesu, “Nodo pangulimu!”

²⁶Tanganda maande, naalami Yesu roti hai mekakae i Pue Ala. Roo indo, roti iti Nabise-bisemi hai Nakira-kiraahe topeguruNa, Nauli, “Nialami, hai niande. Idemi kamba wataNgku.”

²⁷Roo indo, Naala wori hambua paenua anggoro, mekakae i Pue Ala, hai Nahuhuahe, Nauli, “Maenu hahamokau.

²⁸Lawi idemi waheNgku au tebumbuha i kapateNgku. WaheNgku ide mopakaroho dandina Pue Ala au mopahintuwu Pue Ala hai manusia bona teampungi dosanda.

²⁹Bona niisa, mepongka ide-ide, barapi ina Kuenu anggoro ide duuna maenuna anggoro au wou hihimbela hai ikamu i lalu poparentana UmaNgku.”

³⁰Roo indo, monanihe hampaka nani petoia. Karoonda monani, padumohe hangko i wanua lao i Bulu Saitun.

³¹Hangko inditi, Yesu mouliangaahe, “Deade kaindi, ikamu ope-ope ina mopalehiNa, lawi ara teuki i lalu Ngkorana Pue Ala node, ‘Toporewu iti ina rapapate, alana dimbana mahawuhe.’

³²Agaiana i katuwoNgku hule, ina moioruNa lao i tampo Galilea, hai Kupegiakau indolou.”

³³Nauli Peturu, “Kehapiri ope-ope tauna mopalehiKo Pue, agaiana iko bara!”

³⁴Nauli Yesu, “Kuuliangaako, wengi ide hangko damani motuturua manu, talumi belana nusapuakaNa.”

³⁵Nauli Peturu, “Kehapirina mate hihimbela hai Oio, bara mpuu ina kusapuaka kakuisaMu!” Nodo wori pololitanda topeguruNa ntanina.

³⁶Roo indo, hawemohe i bonde au rahanga Getsemani. Inditi Yesu mouliangaahe topeguruNa, “Mohudamokau inde. Iko, laoNa hampai mekakae.”

³⁷Agaiana Ia mowawaha Peturu hai anana Sebedeus au rodua bona meulahe Iria. I tempo iti, mapari Nahadi hai moradami laluNa.

³⁸Nauliangaahe, “Mapari mpuu laluNgku, nodoNa ina mate Kuhadi. Indemokau hampai, niporangaiNa mekakae. Ineekau leta!”

³⁹Roo indo, lao karao haodi, molingkudumi motumpa mekakae, Nauli, “UmaNgku, ane peisa, Nupakaraoa wongkoia kapari au ina morumpaNa ide. Agaiana bara peundeaKu au Kuula; peundeaMuri, Uma.”

⁴⁰Roo indo, lao mbulimi i topeguruNa au talu, Nalambihe tanganda leta. Nauli i Peturu, “Peita! Mogalori hajaa pea, bara nibuku mojaga-jaga hihimbela hai Iko!

⁴¹Mainga-ingamokau hai mekakaemokau datikau narumpa pekelo. I lalumi niunde mpuu mobabehi au manoto, agaiana bara nibuku lawi watami batena malede.”

⁴²Hangko inditi, lao mbulimi mekakae haduduana, Nauli, “UmaNgku, ane kapari ide bara peisa rapakarao hangko Iriko, batena peundeaMuri au mewali.”

⁴³Roo indo, mesule mbulimi mampombelambia topeguruNa. Leta mbulihe anti kamaleluenda.

⁴⁴Yesu mopalehihe lao mekakae i kataluna belana. PekakaeaNa iti himbela hai pekakaeNa au inona.

⁴⁵Karoona mekakae, mesule mbulimi i topeguruNa au talu, Nauliangaahe, “Maturu hai leta manikau pae? Peita, hawemi tempona Iko Ana Manusia ina rapobalu hai rahuhu i tauna au kadake.

⁴⁶Mearomokau! Laomoke! Peita, oloumi mai tauna au mampobaluNa.”

⁴⁷Tangana mani Yesu mololita, hawemi Yudasi, hadua hangko i topeguruNa au hampulo hai rodua, hihimbela hai bosa tauna au moanti piho hai pewombe. Tauna iti ratuduhe kapala-kapala tadulako mpenomba hai totosaenda to Yahudi bona laohe mohaka Yesu.

⁴⁸Napahawe amiamohe Yudasi hambua tanda bona raisa kahemana Yesu, nauli, “Hema au kuangki, Iami Yesu. Nihakami!”

⁴⁹Mewali, kahawenda inditi, laomi Yudasi mampohidupaa Yesu, nauli, “Ngkaia tabea, Guru!” hai naangki.

⁵⁰Nauli Yesu, “Ido pae hai maiko, ene!” Unga pea maihe bosa tauna mohungkuki Yesu hai rahaka.

⁵¹Inditi, hadua topeguruNa au ara hihimbela hai Yesu mowukami pihona mobata hawina Tadulako Mpenomba Mahile, kana talingana pane maingihi.

⁵²Nauliangaa Yesu, “Pusa hule pihomu! Lawi hema au mopake piho mopapate rangana, batena ina rapapate wori hai piho.

⁵³Bara pae nuisa, ane merapi tulungiNa i UmaNgku, hampalai peahe mai ina Napohawaa hampulo hai rontobu surodado malaeka, ba melabitori!

⁵⁴Agaiana ane taewahe au mohakaNa ide, bara ina tepabukei apa au teuki i lalu Sura Malelaha hangkoia au manguli ope-ope iti hangangaa mewali Iriko.”

⁵⁵I tempo iti, nauli mbuli Yesu i tauna bosa, “Tauna kadakeriNa pae dide, pane moantikau piho hai pewombe mai mohakaNa? Alo-alona mohudaNa mepaturo i Souna Pue Ala. Moapari hai baraNa nihaka i tempo iti?

⁵⁶Agaiana ope-ope ide hangangaa mewali bona tepabukei apa au rauki nabi hangkoia i lalu Sura Malelaha.” Roo indo, melangkamohe ope-ope topeguruNa mopalehi Ia.

⁵⁷I karoona Yesu rahaka, Ia raanti lao i souna Tadulako Mpenomba Mahile Kayapas. Guru-guru agama hai totosaenda to Yahudi mogulumohe inditi.

⁵⁸Peturu meula ngkarao pea, duuna hawe i tabangaa souna Tadulako Mpenomba Mahile. Ia mesua i tabangaa, mohuda hihimbela hai topekampai, lawi mampeinao moita ba apa au ina mewali i Yesu.

⁵⁹I tempo iti, kapala-kapala tadulako mpenomba hai ope-ope tadulako agama mohaoki sabi au bara tou bona Yesu peisa rahuku mate.

⁶⁰Nauri bosa sabi au mosalai Yesu, agaiana bara ralambi salaNa au hintoto bona rahuku mate. Kahopoana, ara rodua sabi au mai i lindonda topogombo iti au himbela lolitanda,

⁶¹rauli, “Tauna ide manguli, ‘Souna Pue Ala peisa Kugero, hai i lalu talu alona Kuaro hule.’ ”

⁶²Meangkami Tadulako Mpenomba Mahile mouliangaa Yesu, “Barahe pae Nuhanai tauna au mosalaiko iti?”

⁶³Agaiana Yesu, bara mehana. Nauli mbuli Tadulako Mpenomba Mahile Iria, “I lalu hangana Pue Ala au tuwo, uliangaangkai au manoto! Ba tou mpuu Oiomi Datu Topehompo, Anana Pue Ala?”

⁶⁴Nahanai Yesu, “Tou mpuu, nodo au nuuli iti. Hai Kuuliangaa mbulikau: ina niitaNa Iko Ana Manusia, mohuda ntanda i koanana Pue Ala au makuasa, hai ina niita woriNa mai mendaulu hangko i suruga i wongko gawu.”

⁶⁵Kanahadina Tadulako Mpenomba Mahile apa au nauli Yesu, ia mohepami baduna anti karumpuna, hai nauli, “Tauna ide mopahimbela kuasaNa hai Pue Ala! Barapi mobundu ara sabi! Nihadi mpuumi lolitaNa mopakoi tuwona Pue Ala.

⁶⁶Noumba pelambiami?” Rahanai topogombo iti, rauli, “Hangangaa rahuku mate!”

⁶⁷Hangko inditi, arahe au motinuduhi lindoNa hai mopapahai wataNa. Ara worihe au mopapakoi: rabungkuhi mataNa, rahapa hai rauliangaa,

⁶⁸“Ee Datu Topehompo! Uli ba hema au mohapaKo?”

⁶⁹I tempona Peturu mohuda i tabangaa, maimi hadua towawine au mobago i souna Tadulako Mpenomba Mahile mouliangaa Peturu, “Bara pae oio wori hadua rangana Yesu to Galilea iti?”

⁷⁰Agaiana nasapuakami Peturu i lindonda ope-ope, nauli, “Bara kuisa apa au nuuli!”

⁷¹Hangko inditi lao worimi Peturu meangka hungku i babaka. Ara wori hadua towawine au moita ia hai mouliangaahe tauna au inditi, “Ia ide hihimbela wori hai Yesu to Nasare iti.”

⁷²Mesapu mbulimi Peturu hai mosumpa, nauli, “Bara kuisa tauna iti!”

⁷³Bara mahae hangko indo, tauna au meangkahe inditi mohungkuki wori Peturu, rauliangaa, “Oio mpuu hadua rangaNa! Manoto hangko i pololitamu katoGalileamu.”

⁷⁴Mosumpa mbulimi Peturu, nauli, “Mate-materaina! Bara mpuu kuisa!” I tempo iti, motuturuami manu.

⁷⁵Nakatuinaomi Peturu lolitana Yesu au mouliangaa, “Hangko damani motuturua manu, talumi belaNgku nusapuaka.” Padumi Peturu lao i raoa, hai moteriami monggoro-nggoro lawi masusa laluna.