Read Napu Matiu 27 Bible Online

Matiu 27 - Napu bible

Matiu 27

¹Madondo-dondo, ope-ope kapala tadulako mpenomba hai totosaenda to Yahudi mobotusi, Yesu hangangaa rahuku mate.

²Roo indo, Yesu rahilu taieNa hai raanti lao i lindona Gubernur Pilatu.

³Yudasi au mampobalu Yesu, moisami kaina rahuku matenami Yesu, mewali menosomi. Ido hai laomi i kapala-kapala tadulako mpenomba hai totosaenda to Yahudi mampopesule doi pera au talu pulona pekana,

⁴nauli, “Madosamona! Mampobaluna tauna au bara masala, alana rahuku mate!” Rahanai, “Apa pae kiuli! Babehiamuto pae!”

⁵Hangko indo, Yudasi motendemi doi iti i lalu Souna Pue Ala, hai lao menoo.

⁶Kapala-kapala tadulako mpenomba motimahe doi iti, rauli, “Doi ide, doi intolohi wahe. Moula atura agama, doi ide bara peisa rapake i Souna Pue Ala.”

⁷Himbelami pelambianda bona doi iti rapopeholo tampo au rahanga Tampo Topobabehi Kori, hai tampo iti rapotalumba tauna au barahe to Yahudi.

⁸Idomi pongkana tampo iti rahanga Tampo Wahe duuna ide-ide.

⁹Anti babehianda iti, tepabukeimi apa au natunggai nabi Yeremia hangkoia, au manguli node, “Moula ada to Isaraeli, holona hadua hawi iami talu pulona doi pera. Mewali, talu pulona doi pera raala hai

¹⁰rapopeholo tampona topobabehi kori. Iti mewali moula hawana Pue Ala iriko.”

¹¹Roo indo, Yesu raanti i Gubernur Pilatu hai rapopeangka i lindona. Pilatu mekune Iria, nauli, “Datunda mpuuKo pae to Yahudi?” Nahanai Yesu, “Tou, nodo au nuulimi.”

¹²Agaiana i karasalaina kapala-kapala tadulako mpenomba hai totosaenda to Yahudi, Yesu bara mehana.

¹³Ido hai Pilatu mekune mbuli Iria, nauli, “Bara pae Nuhadi ope-ope au rasalaiaKo?”

¹⁴Agaiana Yesu bara mau mehana, ido hai tingkara mpuu Gubernur.

¹⁵Pare-parena i Alo Mahile Pasa, Gubernur biasana mokabaha hadua tauna au ratarunggu, ba hema au rapakanoto tauna bosa.

¹⁶Mewali, pare iti, ara hadua toratarunggu au raisa mpuu tauna bosa, hangana Yesu Baraba.

¹⁷Mewali, i pohudana Pilatu mobotusi kara-karana Yesu, bosa tauna teruhu. Napekunehe Pilatu, “Hema au niunde kukabahaakau pare ide? Yesu Baraba, ba Yesu au rahanga Kerisitu?”

¹⁸Pilatu manguli nodo lawi naisa tunggaianda tadulakonda to Yahudi au mohuhu Yesu iria anti kamahinana lalunda.

¹⁹I tempona Pilatu mohuda mobotusi kara-kara kana i Yesu, hawemi hadua suro hangko i towawinena au mouliangaa, “Inee nuhuku tauna au bara masala iti! Anti kaIana panena mangipi au mewulungai inona kaindi.”

²⁰Agaiana kapala-kapala tadulako mpenomba hai totosaenda to Yahudi mohuweki lalunda tauna bosa, rauliangaahe, “Niperapi i Gubernur bona Baraba nakabaha hai Yesu nahuku mate!”

²¹Roo indo, mekunemi Gubernur Pilatu i tauna bosa, nauli, “Hangko i tauna au rodua ide, hema au niunde kukabahaakau?” Rahanai, “Baraba!”

²²Napekune mbuli Pilatu, “Ane nodo, kupanoumbami Yesu au rahanga Kerisitu?” Rahanai, “Papate i kau mombehape!”

²³Napekune mbuli Pilatu, “Dake apari au Nababehi?” Agaiana mongangahe masisimbuku, “Papate i kau mombehape!”

²⁴Kahopoana naita Pilatu barapi ara bunduna mololita irihira, lawi mogewo-gewohe. Ido hai moalami owai napemandoi i lindo tauna bosa hai nauli, “Memandona! Bona niita bara kupesuaki popapatemi tauna ide! Ikamu rai au mohuru.”

²⁵Mehanahe tauna bosa, rauli, “Io, ikami hawe-hawe i pemuleangki au mohalea kapateNa.”

²⁶Hangko inditi, nakabahaamohe Baraba, hai motuduhe surodadona mohepe-hepe Yesu hai pekandangi au modui. Roo indo, nahuhuamohe bona rapaku i kau mombehape.

²⁷Roo indo, surodadona Gubernur moantihe Yesu lao i paidaanda i lalu souna Gubernur, hai mokakiohe ope-ope ranganda motoleliki Yesu.

²⁸Rawosuimi hampiNa hai rakumbaia kumba au malentoro nodo badu datu.

²⁹Rababehimi hambua songko hangko i daangkau au modui, hai rasongkoia. Rawei wori hambua lai au rawoli i taie koanaNa nodo lai au nakingki datu, hai molingkudumohe i lindoNa, rauli, “KibilaKo, datunda to Yahudi!”

³⁰Ratinuduhimi, raalami lai au i taieNa hai rawombea waaNa.

³¹Karoona rakakabosai, rawosuimi badu au rabaduia inona, hai rabaduia hule hampiNa haduduaNa. Roo indo, Yesu raantimi lao i raoa wanua bona rapaku i kau.

³²I tanga rara, mampohidupaahe hadua tauna au rahanga Simo hangko i boea Kirene. Surodado to Roma mopari-pari Simo motalondo kau popakuana Yesu.

³³Bara mani mahae, hawemohe i paidaa au rahanga Golgota, lempona Bulu Banga waa.

³⁴Inditi, Yesu rapaenu anggoro au ragalo hai puru binata. Karoona Napemina, lohe moenu.

³⁵Roo nodo, Yesu rapakumi i kau mombehape, hai hampiNa rakira-kira. Motendehe dadu bona mopakanoto kahemana au molambi hampiNa.

³⁶Hangko indo, mohudahe mokampai Ia.

³⁷I kau popakua i wongko waaNa, rapopatakai pata. I pata iti, teuki apa au rasalaia Yesu node: IDEMI YESU DATUNDA TO YAHUDI.

³⁸Ara wori rodua topanangka au rapaku i kau mombehape hihimbela hai Ia, hadua ntanda i koanaNa hai hadua ntanda i kabeoNa.

³⁹Tauna au melempo inditi, molili-liahe waanda mopapakoi Yesu,

⁴⁰rauli, “Nuuli ina mogeroKo Souna Pue Ala hai Nuaro hule i lalu talu alona! Ane Anana mpuuKo Pue Ala, tulungimide wataMu! MendaulumoKo hangko i kau mombehape iti!”

⁴¹Nodo wori kapala-kapala tadulako mpenomba, guru agama hai totosaenda to Yahudi mopapakoihe Yesu, rauli,

⁴²“Tauna ntanina Natulungihe, wataNa haduduana bara Nabuku Natulungi! Ba Ia au rauli Datunda to Isaraeli? Ane mendaulu hangko i kau mombehape iti, hangko tapoinalairi!

⁴³Ia mepoinalai i Pue Ala, hai Nauli kaiana Anana Pue Ala. Tapeita ba mai mpuu nakabaha Pue Ala!”

⁴⁴Nodo wori topanangka au rapaku i kau hihimbela hai Ia, monganga-ngangahe mopapakoi Yesu.

⁴⁵Pualomi, unga pea makaindi i humalele tampo iti i lalu talu jaa.

⁴⁶Tinti talu kalumba, meraroami Yesu masisimbuku, Nauli, “Pue AlaNgku! Pue AlaNgku! Moapari hai NupalehiNa?” I lalu basa Yahudi, “Eloi, Eloi, lama sabaktani?”

⁴⁷Arahe bahangkia tauna au meangka hungku i popakuaNa au mohadi peraroaNa, rauli, “Pehadingi! Ia mokakio nabi Elia!”

⁴⁸Ara hadua au melangka lao mangala lomo, naeme i lalu owai anggoro au mangilu, nawoli i wuntu daangkau hai napakana humena Yesu.

⁴⁹Agaiana tauna au ntanina manguli, “Pegia hampai, tapeita ba mai mpuu natulungi Elia.”

⁵⁰Roo indo, monganga mbulimi Yesu masisimbuku, hai opemi inaoNa.

⁵¹I tempo iti, rindi bana au tetoe i lalu Souna Pue Ala bila-bila mahepa ntanga hangko i wongko hawe i woi.[29] Kelinu worimi, hai watu-watu mahile mabika.

⁵²Tempo iti, ngkaia talumba au tebungkahi hai bosa tauna au mengkoru i Pue rapatuwo hule. I karapatuwona hule Yesu, mesuahe i wanua Yerusale au rauli wanua au malelaha. Bosa tauna au moitahe.

⁵³

⁵⁴Tadulako surodado hai surodadona au mokampai Yesu, langa mpuuhe mohadi linu hai moita ope-ope au mewali iti. Rauli, “Tou mpuu Ia ide Anana Pue Ala!”

⁵⁵Inditi, bosa wori towawine au mampeita ngkarao. Ihira iti au meula hai motulungi Yesu, mepongka hangko i pobagoNa i tampo Galilea.

⁵⁶I olonda towawine iti, ara Maria Magdalena, Maria inana Yakobu hai Yusupu hai hadua wori inanda Yakobu hai Yohane.

⁵⁷Ina tampumi alo, maimi hadua topebuku au hangko i boea Arimatea, hangana Yusupu. Yusupu iti, meula wori i Yesu.

⁵⁸Ia lao i Pilatu mamperapi watana Yesu, hai Pilatu motudumi surodadona mowei wataNa iria.

⁵⁹Naalami Yusupu watana Yesu, nabungkuhi bana au bula,

⁶⁰hai napopaturu i lalu talumbana au napatimamami. Talumba au wou mani iti rakalolungi i tabingke bulu watu. Roo indo, mololimi haogu watu au mahile napopotuko baba talumba iti, hai padumi.

⁶¹Agaiana Maria Magdalena hai Maria au ntanina, mohudahe i raoa talumba iti.

⁶²Kahalona madondo i Alo Pengkarooangaa, kapala-kapala tadulako mpenomba hai toParisi laohe i Pilatu,

⁶³rauli, “Tua Gubernur, kikatuinao lolitana topodongko iti, lawi i tempona mani tuwo, Nauli, ‘Kaliuna talu alona, ina tuwo huleNa.’

⁶⁴Ido hai kiperapi bona nutuduhe surodadomu lao mokampai maroa-roa talumbaNa hawe i kataluna alona bona datihe lao topeguruNa mopanangka wataNa pane rauli i tauna bosa Yesu tuwo hule. Ane nodo, bosa tauna ina rapakanawo, hai ina meliu kabosanda au meula Iria i tempo ide pane i tempona mani tuwo.”

⁶⁵Nahanai Pilatu, “Idemohe surodado. Niantimohe lao mokampai talumbaNa maroho-roho.”

⁶⁶Lao mpuumohe i talumbaNa. Watu petukona rapekatandai bona dati peisa rabungkahi, hai surodado iti ratuduhe mokampai talumbaNa bona dati ara au mokakalea.