Read Napu Matiu 28 Bible Online

Matiu 28 - Napu bible

Matiu 28

¹Kaliuna Alo Pengkarooangaa, hangko damani mesupa alo i alo Minggu, Maria Magdalena hai Maria au ntanina lao mampeita talumba iti.

²Unga pea ara linu mahile, lawi hadua malaekana Pue mendaulu hangko i suruga mai mololi watu popetuko talumba, hai mohuda i wongkona.

³Lenggena, mewangka nodo kila, hai hampina bula ntepuu.

⁴Surodado au mokampai inditi, langa mpuumohe, moradahe, hai madungkahe. Mewalihe nodo tauna au mate.

⁵Nauli malaeka i towawine iti, “Ineekau langa. Kuisa kamohaokimi Yesu au rapaku i kau mombehape.

⁶Barapi ara inde, tuwo hulemi nodo au Nauliangaamokau. Mai nipeita karadampaaNa.

⁷Mewali, laomokau hoholiga, niuliangaahe topeguruNa katuwona hulemi Yesu. Hai Ia moiorumi lao i tampo Galilea. Ia ina niita inditi. Nikatuinao apa au kuuliangaakau ide!”

⁸Hoholigahe towawine iti padu hangko i talumba. Langa mpuuhe, agaiana matana worihe. Melangkamohe lao i topeguruna Yesu lawi rapeinao mopahawe apa au mewali.

⁹Bila-bila Yesu hawemi i olonda towawine iti, hai Natabehe. Maimohe hungku-hungku, mokalapui bitiNa hai menomba Iria.

¹⁰Yesu mouliangaahe, “Ineekau langa! Laomokau niuliangaahe halaluNgku bona laohe i Galilea, lawi ina raitaNa indolou.”

¹¹I kapadunda towawine iti, bahangkia surodado au mokampai talumba laohe i lalu wanua mopahawe i kapala-kapala tadulako mpenomba ope-ope au mewali i talumba inona.

¹²Mohawamohe kapala-kapala tadulako mpenomba hai totosaenda to Yahudi au ntanina. Kabotuana lolitanda, agina moweihe surodado doi ngkaia rapopotuko humenda bona inee rapopololita.

¹³Rauli kapala-kapala tadulako mpenomba i surodado iti, “Niuliangaahe tauna node, ‘I tanga kaindi, topeguruna Yesu mai mopanangka wataNa tangangki leta.’

¹⁴Ane lolitami iti nahadi Gubernur, ikami rai au mololita iria bona ineekau rapopoapa.”

¹⁵Surodado iti modokohe doi au raweihe, hai mopahawehe apa au roomohe rapaturoa. Duuna hawe ide-ide, tebambari liliu lolita iti i to Yahudi.

¹⁶Topeguruna Yesu au hampulo hai hadua laohe i tampo Galilea. Laohe i bulu au natudungia amiamohe Yesu.

¹⁷Inditi, moita mpuumohe Yesu, hai menombahe Iria. Agaiana ara wori au bata-bata mani lalunda.

¹⁸Yesu mohungkuki topeguruNa, Nauliangaahe, “Ope-ope kuasa i suruga hai i dunia rahuhuamoNa.

¹⁹Mewali, laomokau i humalele dunia, nipopewalihe ope-ope tauna topeulaNgku, niriuhe i lalu hangana Uma hai Ana hai Inao Malelaha

²⁰hai nipaturomohe bona mampeulaihe hinangkana au Kuhawaamokau. Hai bona niisa, ina Kuporangaikau duuna hawe i kahopoa dunia ide.”