Read Napu Matiu 4 Bible Online

Matiu 4 - Napu bible

Matiu 4

¹Roo indo, Yesu naanti Inaona Pue Ala lao i pada wungi bona nakelo Datu Tokadake.

²Indo, Yesu mopuasa iba pulona alona hai iba pulona wengina kamahaena, ido hai marimimi.

³I tempo iti, hawemi Datu Tokadake mouliangaa, “Ane tou-tou AnanaKo Pue Ala, Nutuduhe watu ide mewali roti!”

⁴Nahanai Yesu, “I lalu Sura Malelaha teuki node: ‘Tauna bara pea tuwo hangko i roti, agaiana tuwo worihe hangko i pampeulainda ope-ope lolita au napahawe Pue Ala.’ ”

⁵Roo indo, Datu Tokadake moanti Yesu lao i Yerusale, wanua au malelaha, hai natudu meangka i wongko wumbu Souna Pue Ala,

⁶hai nauliangaa, “Ane tou-tou Anana mpuuKo Pue Ala, mengkanawomoKo hangko inde! BaraKo ina moapa-apa, lawi ara teuki i lalu Sura Malelaha: ‘Pue Ala motuduhe malaekaNa mokampaiKo datiKo marugi. Ina radokoKo dati tetuhu bitiMu i watu.’ ”

⁷Nahanai Yesu, “Agaiana ara wori teuki i lalu Sura Malelaha au manguli node, ‘Ineeko mampetandaka Ampumu, Pue Ala.’ ”

⁸Roo indo, Datu Tokadake moanti mbulimi Yesu lao i wongko bulu au mapangka ntepuu, hai natudungia ope-ope kadatua i dunia hai peawanda,

⁹hai nauliangaa, “Ope-ope ide kuweiKo, ane motumpaKo menomba iriko.”

¹⁰Nahanai Yesu, “Peloho Tokadake! Lawi i lalu Sura Malelaha teuki node, ‘Hangangaa menombako i Ampumu, Pue Ala. Batena pea Ia au hintoto nupengkorui.’ ”

¹¹Hangko inditi, padu mpuumi Datu Tokadake mopalehi Yesu, pane hawemohe malaeka morora.

¹²Bara mani mahae hangko inditi, Yohane Toperiu rahaka hai ratarunggu. Kanahadina Yesu bambari iti, lao hulemi i boea Nasare i tampo Galilea.

¹³Roo indo, Napalehimi boea Nasare lao maida i boea Kapernaum. Kapernaum iti, boea au i wiwi rano Galilea, i tampo Sebulo hai Naptali.

¹⁴Inditi Yesu mobambari Ngkorana Pue i ampu boea, alana tepabukei lolita au napahawe nabi Yesaya hangkoia au manguli node,

¹⁵“Tamponda to Sebulo hai to Naptali au hungku i rano Galilea, ara ntanda i orupena owai Yarade. Tampo iti iami Galilea au rapaidai tauna bosa au barahe to Yahudi.

¹⁶Hangkoia, tauna inditi tuwohe i lalu kamakaindi, hai monontohihe kapate. Agaiana ide-ide, moitamohe pewangka au mahile, lawi mesupami hadua tauna au nodo alo au mowangkahihe.”

¹⁷Mepongka hangko indo, Yesu mopahawe lolitaNa, Nauli, “Nipenosoimide dosami, lawi ina hawemi poparentana Pue Ala i dunia.”

¹⁸Tangana Yesu molumao i wiwi rano Galilea, Ia moita rodua tauna, iamohe Simo (au rahanga wori Peturu) hai Andaria, adina, au tanganda modala i rano, lawi itimi bagonda.

¹⁹Nauliangaahe Yesu, “Maimokau hai meulakau Iriko! Barapi ikane au nidala, agaiana manusiami.”

²⁰Rapalehi mpuumi dalanda, hai mepongka alo iti, meulamohe i Yesu.

²¹Roo indo, Yesu mopaliliu polumaoNa. TangaNa lumao, moita mbuli rodua topohalalu, iamohe, Yakobu hai Yohane, anana Sebedeus. Ihira hai umanda tanganda mopakaroa dala i lalu duanga. Yesu mokakiohe tontaliadi iti bona meulahe Iria.

²²Rapalehimi duanganda hai umanda, hai meula worihe i Yesu.

²³Yesu molumao i humalele tampo Galilea hai mepaturo i ope-ope sou penombaa. Ia mopahawe Ngkora Marasa kana i poparentana Pue Ala, hai mopakaoha worihe ope-ope tauna au mahai hai au bara masilolonga watanda.

²⁴Pobagona Yesu tebambari i ope-ope boea i tampo Siria, alana bosa tauna au mai mampeinaohe mohidupa hai Ia. Tauna iti moantihe ranganda ba halalunda au mantodiha ngkaia pakana hakinda hai kaparinda, au napesuangi seta, au mohaki dungka, hai au palu. Yesu mopakaohahe ope-ope.

²⁵I tempo iti, bosa mpuu tauna au meula Iria. Arahe au hangko i tampo Galilea, hangko i Dekapolis,[3] hangko i Yerusale, hangko i tampo Yudea, hai ara worihe au hangko i ntanda orupena owai Yarade.