Read Napu Matiu 5 Bible Online

Matiu 5 - Napu bible

Matiu 5

¹Kanaitanda Yesu tauna bosa, mempanaimi lao i tongku-tongkuna hai mohuda. Pohudana peami Yesu, laomohe topeguruna hungku Iria.

²Ia mepongkami mepaturo, Nauli,

³“Morasihe tauna au bara rasauru hai meharunga peahe i Pue Ala, lawi ihirami au mewali taunana Pue Ala i lalu poparentaNa.

⁴Morasihe tauna au mapari lalunda, lawi Pue Ala ina mopalindohe.

⁵Morasihe tauna au mengkaiwoi, lawi ina molambihe apa au nadandiahe Pue Ala.

⁶Morasihe tauna au mampeinao mewali manoto i peitana Pue Ala, lawi Pue Ala ina moweihe apa au rahaoki.

⁷Morasihe tauna au mampokaahi hangka ranganda, lawi Pue Ala ina mampokaahihe.

⁸Morasihe tauna au malelaha lalunda, lawi ihirami au ina moita Pue Ala.

⁹Morasihe tauna au moanti pohintuwu i hangka ranganda, lawi ihirami au ina rauli anana Pue Ala.

¹⁰Morasihe tauna au rapopeahi-ahi anti poulanda peundeana Pue Ala, lawi ihirami au mewali taunana Pue Ala i lalu poparentaNa.

¹¹Morasikau ane rakakabosaikau, rapopeahi-ahikau hai rasalaikau hai mampopengaa lolita au kadake anti peulami Iriko.

¹²Nabi-nabi au hangkoia, rapopeahi-ahi worihe. Mewali, nipamatana lalumi, lawi mahile hurungina au ina nihumba i lalu suruga.”

¹³“Ikamu au meula Iriko, nodokau bure, lawi moantikau roa ngkatuwo i tauna i dunia. Agaiana ane bure iti mewali matawaa, peisa pae rapakebure hule? Bara! Barapi ara bunduna. Aginami ratende hai rapangka-pangka tauna.

¹⁴Ikamu au meula Iriko, nodokau pewangka au raita ope-ope tauna. Wanua au raaro i wongko bulu bara ina tewuniangi.

¹⁵Hai bara ara hadua tauna au mohuwe hulo hai nabobongi. Hulo batena nawoli i paidaana bona pewangkana raita ope-ope tauna i lalu sou.

¹⁶Nodo wori pewangka au ara i lalumi, inee niwuni. Nipakaroa babehiami bona ope-ope tauna ina moita babehiami iti, pane motoiahe Umami au ara i suruga.”

¹⁷“Inee nipehangu tunggaiana kamaiNgku ide bona mogeroNa Aturana Pue Ala au nauki Musa hai paturonda nabi hangkoia. Bara mai Kugero. Agaiana MairiNa mopabukei Atura iti.

¹⁸Tou mpuu au Kuuliangaakau, ope-ope lolita au teuki i lalu Sura Aturana Pue Ala hangangaa mewali. Ane ara mani langi hai dunia ide, batena bara ara hambua lolita i lalu Aturana Pue Ala au bara ina mewali, nauri au koi ntepuu.

¹⁹Idomi hai Kuuliangaakau, hema au moliungi hampaka pea parenta i lalu Aturana Pue Ala, nauri parenta au koi ntepuu, hai mopaturo tauna ntanina bona mobabehi nodo, tauna itimi au koi ntepuu katuwona hangko i ope-ope taunana Pue Ala. Agaiana hema au mampeulai ope-ope parenta i lalu Aturana Pue Ala hai mopaturo tauna ntanina mobabehi nodo, tauna itimi au mahile ntepuu katuwona hangko i ope-ope taunana Pue Ala.

²⁰Mewali, Kuuliangaakau, ane niunde bona mewalikau taunana Pue Ala, hangangaa nipeulai peundeaNa, hai peulami hangangaa meliu hangko i peulanda guru agama hai toParisi.”

²¹“Niisa ntepuu parenta au raweihe toiorunta hangkoia au manguli, ‘Inee mepapate, hai hema au mepapate hangangaa rabotusi kara-karana hai rahuku.’

²²Agaiana ide-ide kuuliangaakau: hema au rumpu i halaluna hampepepoinalai, ina rabotusi i kara-karana. Hema au motunda-tunda halaluna, ina raanti i Topeparesa Mahile. Hai hema au mampotontulia hampepepoinalaina, hintoto mpuu ratende i lalu api naraka.

²³Mewali, ane pandirina mesuako i Souna Pue Ala moanti popenombamu, hai ane unga pea nukatuinao kaarana mani rangamu au koi inaona irio,

²⁴nukabahami hampai popenombamu, hai mesuleko lao modame hai rangamu. Roori iti, hangko mesuleko lao mohuhu popenombamu i Pue Ala.

²⁵Nodo wori, ane ara au mampeinao mosalaiko i lindona topobotusi, hangangaa modameko hai rangamu iti i tempomi mani lao i topobotusi. Lawi ane barakau modame, ina rahawirako i topobotusi, hai topobotusi iti ina mohuhuko i pulisi, hai pulisi ina mampopesuako i lalu tarunggu.

²⁶Tou mpuu au Kuuliangaakau, barapoko tekabaha hangko i tarunggu ane bara mani piri indamu nubaiari.”

²⁷“Niisato ara parenta au raweike hangkoia au manguli, ‘Inee mebualosi.’

²⁸Agaiana ide-ide Kuuliangaakau, hema au mototoki hadua towawine hai napokaelu, mebualosimi i laluna.

²⁹Mewali, maroa-roako bona ineeko madosa i apa au nuita ba apa au nubabehi. Ane pandirina mata koanamu au moantiko madosa, nudungkiki peami hai nutende. Aginami matanta matamu hambali hai barapoko mobabehi dosa, paneko ratende i lalu naraka. Ane pandirina taie koanamu moantiko madosa, nubohoki hai nutende. Aginami matanta taiemu hambali hai barapoko mobabehi dosa, paneko ratende i lalu naraka.”

³⁰

³¹“Ara wori paturo au raweike hangkoia au manguli, ane ara hadua tobalilo au mampogaaki towawinena, ia hangangaa mowei sura mpogaa iria.

³²Agaiana ide-ide Kuuliangaakau, hema au mampogaaki towawinena au barato masala iria, madosa, lawi anti kanapogaakina, ia moanti towawinena mebualosi, ane towawinena iti motambi hule. Hai tobalilo au mampotambia towawine au napogaaki rangana, mebualosi worimi.”

³³“Niisa worimi kaarana parenta au rapahawe i toiorunta hangkoia au manguli, ‘Ineeko mousuli hangko i podandimu ba posumpamu. Apa au nudandi i lindona Pue Ala, hangangaa nupabukei.’

³⁴Agaiana ide-ide Kuuliangaakau, ineeko mosumpa! Ane modandiko, inee mosumpa mokabelai langi ba tampo. Lawi langi iami pohudaana Pue Ala, hai tampo pepangkaaNa. Ineeko mosumpa mokabelai wanua Yerusale, lawi iti wanuana Pue Ala, Datu au mahile.

³⁵

³⁶Inee woriko mosumpa mokabelai waamu, lawi bara nubuku mopabula ba mopamaeta weluamu, nauri hangkau pea.

³⁷Ane tunggaiamu manguli io, nuuli ‘Io.’ Ane tunggaiamu manguli bara, nuuli ‘Bara.’ Bara maroa ane nupakaroho lolitamu hai sumpa, lawi babehia au nodo mesupa hangko i Datu Tokadake.”

³⁸“Niisato kaarana parenta au raweike hangkoia au manguli, ‘Ane ara au mombetie hai hadua modungkiki matana rangana ba mowuka ngihina rangana, nidungkiki wori matana, hai niwuka wori ngihina.’

³⁹Agaiana ide-ide Kuuliangaakau, inee nuhurungi babehiana hangka rangamu au mobabehi dake irio. Ane pandirina ara au mohapa kalimpimu hambali, nuwei mbuli kalimpimu au hambali.

⁴⁰Ane ara au mosalaiko i topobotusi hai mamperapi badumu, nuwei wori komomu.

⁴¹Ane hadua surodado mopari-pariko mohalea antiana hakilo kakaraona, nuhaleangaami rokilo kakaraona.

⁴²Ane ara au merapi ba apa pea, nuwei woia. Hai inee nupokabohi i hangka rangamu au mampeinao mebolo irio.”

⁴³“Niisato wori paturo au manguli, ‘Nupokaahi hangka rangamu, hai nukahihi iwalimu.’

⁴⁴Agaiana ide-ide Kuuliangaakau, nipokaahi iwalimi, hai nipekakaea tauna au mampopeahi-ahikau.

⁴⁵Lawi ane maroa lalumi i iwalimi, babehiami ina nodo babehiana Umami au ara i suruga, hai ina tongawa kaikamuna anana Pue Ala. Lawi Pue Ala maroa laluna i ope-ope tauna. Ia mampopesupa alo i tauna au maroa hai i tauna au kadake. Napopendaulu uda i tauna au manoto hai i tauna au motengko lalunda.

⁴⁶Ane mampokaahi peakau tauna au mampokaahikau, babehiami iti barakau ina nahurungia Pue Ala. Mogalori toperuru asele au niimba nodo topodongko, maahihe i tauna au mampokaahihe.

⁴⁷Ane maroa pea lalumi i himadami, ba niuli maroami babehiami? Mogalori tauna au bara moisa Pue Ala, nodo wori rababehi.

⁴⁸Kamaahina Umami i suruga, bara ara kamakurana. Mewali, iti wori au hangangaa nibabehi.”