Read Napu Matiu 6 Bible Online

Matiu 6 - Napu bible

Matiu 6

¹“Nipamaroa-roa ineekau mobabehi rara mpoagama i lindonda tauna bosa bona raita peakau hangka rangami. Lawi ane nodo babehiami, barakau ina nawati Pue Ala, Umami au ara i suruga.

²Mewali, ane motulungikau tauna au meahi-ahi, inee nipopaisa i tauna bosa, nodo au rababehi tauna au maroa i raoa pea. Ihira mampetudungia kamaroana lalunda i lalu sou penombaa ba i rara au mahile bona ratoia hangka ranganda. Bara ara apa-apa au ina rahumba hangko i Pue Ala, lawi rahumbami petoia hangko i ranganda.

³Agaiana ikamu, ane moweikau ba apa pea i hangka rangami, niwei ngkandii i suka kabulana lalumi,

⁴dati raisa tauna bosa. Agaiana Umami au i suruga ina moisa babehiami au tewuniangi iti, hai ina Nahurungiakau.”

⁵“Ane mekakaekau, ineekau nodo tauna au maroa peahe i humenda. Raunde meangka mekakae i lalu sou penombaa ba i porompengaa rara bona raita hai ratoiahe tauna. Mewali, anti karahumbanami petoianda ranganda, barapohe molambi pewati hangko i Pue Ala.

⁶Agaiana ikamu, ane mekakaekau, hangangaa mesuakau i lalu lincumi hadua-hadua, nituko babami, hangko mekakaerikau i Umami au bara niita. Lawi Ia moita mpuu babehiami au bara raisa rangami, hai Ia ina mohurungiakau.

⁷Ane mekakaekau, inee nipopenggoli-nggoli nodokau tauna au bara moisa Pue Ala. Rapekiri, ane ngkalanga pekakaenda, pamperapinda ina tepabukei.

⁸Inee nipeulai babehianda! Lawi naisa amimi Umami au ara i suruga apa au niparaluu hangko damani niperapi.

⁹Mewali, mekakaemokau node: Umangki au ara indora i suruga, Kipomahile hangaMu au malelaha.

¹⁰Nupopewalimi poparentaMu i dunia, bona ope-ope tauna mobabehi peundeaMu nodo au mewali i suruga.

¹¹Nuwei wongkamia paandeki au handa i alo ide.

¹²Nuampungi wongkamia hangko i kamasalangki, nodo ikami moampungi woringkai rangangki au masala irikami.

¹³Inee wongkamia Nupogiangaa nakelo tokadake agaiana Nukabaha wongkamia hangko i kuasa au kadake. [Lawi Oiomi ampu Kadatua hai Kuasa hai Peawa, hawe i hae-haena. Amin.]

¹⁴Ane moampungimokau rangami au masala irikamu, Umami au i suruga ina moampungi worikau hangko i kamasalami.

¹⁵Agaiana ane barakau moampungi rangami au masala irikamu, Umami au i suruga bara wori ina moampungikau hangko i kamasalami.”

¹⁶“Ane mopuasakau, inee marinti lindomi nodohe tauna au maroa i raoa peahe. Ane mopuasahe, marinti lindonda hai raoaka barahe mewawalindo ba mekarabi bona raita tauna kamopuasanda. Nikatuinao, anti karalambinami petoia hangko i ranganda, barapohe molambi apa-apa hangko i Pue Ala.

¹⁷Agaiana ane mopuasakau, hangangaa mewawalindo hai mekarabikau

¹⁸dati raisa tauna popuasami. Batena pea Umami i suruga au moisa popuasami. Ia ina moita mpuu babehiami au bara raisa rangami, hai ina Nahurungiakau.”

¹⁹“Ineekau morampu anu-anu i dunia. Lawi anu-anu i dunia peisa naande bubu ba mewali tagara. Pambolia anu-anumi peisa rabungkahi hai ihina rapanangka.

²⁰Agina nibabehi babehia au maroa, lawi ane nibabehi nodo, lempona mowolikau anu-anumi i lalu suruga. Anu-anumi iti bara ina matanta, lawi indora bara ara au mopatagara, bara ara au mopabubu, bara ara au mopakarugi, hai bara ara au mopanangka.

²¹Lawi iumba kaarana anu-anumi, inditi wori lalumi.”

²²“Matami iami hulona watami, lawi ane maroa matami, manoto petotokimi.

²³Agaiana ane wura matami, makaindi wori humalele watami. Ane hulo au ara i watami mewali makaindi, meruu ntepuu kamakaindina.”[4]

²⁴“Bara ara hadua tauna au nabuku mampobagoa rodua tauna, lawi hadua ina napokaahi, hai hadua nakahihi. Hadua ina napeulai hawana, hai hadua bara napeulai. Nodo wori ikamu, barakau peisa mampeulai peundeana Pue Ala, hai mohaoki worikau anu-anu dunia.”

²⁵“Mewali, Kuuliangaakau, inee karao inaomi ba niuli, ‘Apami wei au taande hai taenu?’ Inee karao inaomi ba niuli, ‘Apami au tapohampi?’ Lawi katuwomi melumbu hangko i paande hai pehampi.

²⁶Peitahe tadasi au membaro node hou node mai. Barahe mowia, barahe mepare, bara ara tambarunda. Nauri nodo, Umami au ara i suruga batena mopaandehe. Apa mani ikamu. I peitana Pue Ala, meliu katuwomi pane katuwonda tadasi.

²⁷Apami pobunduana ngkaia au nipekiri? Kehapiri karao inaomi mampekiri mampopengaa, barakau peisa motambai tinuwumi nauri hambengia pea.

²⁸Moapari hai karao inaomi mampekiri pehampimi? Peita bunga i pada. Barahe mobago, barahe mandau.

²⁹Agaiana Kuuliangaakau, mogalori Datu Salomo au pebuku ntepuu, hampina bara himbela peraena hai bunga iti.

³⁰Mewali, ane Pue Ala mampoperae hehi i pada au tuwo alo ide, hai rahuwe kahalo, apa mani ikamu? Meliu pekadipurana Pue Ala irikamu. Moapari hai bara niharunga pekadipuraNa?

³¹Inee karao inaomi ba niuli, ‘Apami wei au taande hai taenu? Apami wei au tapohampi?’

³²Ope-ope iti rahaoki liliu tauna au bara moisa Pue Ala. Agaiana ineekau langa, lawi ope-ope au niparaluu, naisa haha Umami au i suruga.

³³Mewali, hangangaa nipaioru poparentana Pue Ala i lalu katuwomi hai hangangaa nibabehi liliu babehia au manoto i peitaNa. Ane nibabehi nodo, hinangkana au niparaluu batena Naweikau.

³⁴Mewali, inee karao inaomi mampekiri apa au ina mewali kahalo. Alo ide handami kamaparina, inee mbuli nitambai mampekiri apa au ina mewali kahalo.”