Read Napu Matiu 7 Bible Online

Matiu 7 - Napu bible

Matiu 7

¹“Ineekau mosalai hangka rangami dati worikau nasalai Pue Ala.

²Lawi hoka au nipake i hangka rangami, iti wori au ina rahokaakau. Lempona, ane mobotusikau rangami, nodo wori Pue Ala ina mobotusi kara-karami.

³Moapa hai niparesa pupu i matana rangami, moleri rangka kau au ara i matami bara niita?

⁴Noumba pane peisakau mouliangaa rangami, ‘Mai kuingihi pupu i matamu,’ moleri ara mani rangka kau i matami.

⁵Ineekau mengkamaroa! Hangangaa niingihi hampai rangka au ara i matami, hangko manotori petotokimi moingihi pupu i matana rangami.”

⁶Roo indo, Yesu mopahawe ngkora pandiri ide, Nauli, “Ineekau mowei paande au maroa i dike, kahopoana napenggoliikau nakeki. Ineekau mowei apa au masuli i boe bona dati napangka-pangka mbero pea.”[5]

⁷“Perapimide i Pue Ala, batena Naweikau. Haokimide apa au niparaluu i Pue Ala, batena nilambi. Tidongkomide baba, batena Nabungkahiakau.

⁸Lawi hema au merapi ina rawei. Hema au masaoki ina molambi. Hema au motidongko baba, ina rabungkahia.

⁹Ba arakau au mowei watu i anami ane merapi roti? Ba niweihe ile ane merapihe bau? Bara!

¹¹Kehapirikau kadake, niisa mani mowei apa au maroa i anami. Apa mani Umami au ara i suruga! Batena ina mowei apa au maroa i tauna au merapi Iria.”

¹²“I paka-pakana, apa au niunde rababehi rangami irikamu, iti wori au hangangaa nibabehi i rangami. Itimi paturona Aturana Musa hai paturonda nabi.

¹³Mesuakau moliu i babaka au maigu, lawi baba au maemba hai rara mahile monontohi naraka, hai bosa wori tauna au moula rara iti.

¹⁴Agaiana maigu baba hai kokoi rara au monontohi katuwo maroa, hai haodi pea tauna au molambi.”

¹⁵“Mainga-ingakau i nabi au mepakanawohe. Ihira hawe i olomi nodohe dimba agaiana katouana nodohe serigala au maseke.

¹⁶Niisa podongkonda ane niita wuana pobagonda au kadake. Anggoro bara rapupu hangko i dui sumbali. Kau rodo bara mowua gambu.

¹⁷Kau au marudu, maroa wuana. Kau au maduhu, bara maroa wuana.

¹⁸Bara ara kau au maroa au kadake wuana, hai bara ara kau au kadake au maroa wuana.

¹⁹Kau au bara mowua maroa, ina ratiwi hai raintuki.

²⁰Niisa pepakanawonda nabi iti ane niita wuana pobagonda.

²¹Bara ope-ope tauna au mokabelaiNa ‘Pue,’ ina mesua i lalu poparentana UmaNgku au ara i suruga. Batena pea tauna au mobabehi peundeana Pue Ala au ina mesua i lalu poparentaNa.

²²I alo pebotusi i kahopoa dunia, bosa tauna ina mouliangaaNa, ‘Pue! Pue! Bara pae Nuisa kaikamina au mopahawe Ngkorana Pue Ala i lalu hangaMu! Hai i lalu hangaMu mampopelohongkai seta. Hai ngkaia wori tanda kuasa kibabehi i lalu hangaMu.’

²³Ina Kuhanaihe: ‘Barakau Kuisa! Pelohokau hangko inde, ikamu au kadake babehiami.’ ”

²⁴“Hema au mampehadingi lolitaNgku hai napeulai, peisa rapandiri nodo hadua tauna au mapande; ia moaro souna i wongko watu au maroho.

²⁵Toa uda, meumbalami owai, hai angi morumpa sou iti, agaiana bara mapoka, lawi raaro i wongko watu au maroho.

²⁶Agaiana tauna au mohadi lolitaNgku ide hai bara napeulai, peisa rapandiri nodo hadua tauna au ntuli au moaro souna i wongko wungi.

²⁷Toa uda, meumbalami owai, hai angi morumpa sou iti, pane liliu mapoka, magero ope-ope.”

²⁸Karoona Yesu mololita, tingkaramohe ope-ope tauna au mohadi pepaguruNa,

²⁹lawi pepaguruNa bara nodo guru-guru agama, agaiana nodo tauna au makuasa ntepuu.