Read Napu Matiu 9 Bible Online

Matiu 9 - Napu bible

Matiu 9

¹Hangko inditi, mesawimi Yesu i duanga hihimbela hai topeguruNa, mowetahe mesule lao i paidaanda i boea Kapernaum.

²Kahawenda, arahe tauna au mokowa hadua topalu au rapopaturu i ale, maihe i Yesu. Kanaitana Yesu kamahilena pepoinalainda, mololitami i topalu iti, Nauli, “AnaNgku, nupakaroho lalumu! Teampungimi dosamu.”

³Bahangkia guru agama mohadi lolitana Yesu iti. Nauli lalunda, “Kadake mpuu tauna ide. Ia mopahimbela kuasaNa hai Pue Ala!”

⁴Agaiana naisa ntepuu Yesu apa au ara i lalunda. Ido hai Nauliangaahe, “Moapari hai kadakeri pekirimi?

⁵Umba au mamura rauli: ‘Teampungimi dosamu,’ ba ‘Pearo hai molumaomoko.’

⁶Bona niisa, Iko, Ana Manusia, makuasaNa moampungi dosa i dunia. Ide-ide ina Kupatongawaakau kaarana kuasaNgku moampungi dosa.” Hangko inditi, membalilimi i topalu iti, Nauliangaa, “Mearomoko, nulolomi alemu, hai mesulemoko!”

⁷Mearo mpuumi topalu iti, hai mesule lao i souna.

⁸Karaitana tauna bosa apa au mewali iti, langamohe, hai motoiahe Pue Ala, rauli, “Mahile mpuu kuasana Pue Ala au Nawei manusia!”

⁹Roo indo, padumi Yesu hangko inditi. I tanga rara, Ia moita hadua au mohuda i bambaru pobaiaria asele, hangana Matiu. Nauli Yesu iria “Peulamide Iriko!” Meangkami Matiu hai liliu meula Iria.

¹⁰Hangko inditi, Yesu hai topeguruNa maandehe i souna Matiu. Tanganda maande, hawe worihe bosa toperuru asele hai tauna ntanina maande sambela hai ihira. Tauna iti raimbahe tauna au kadake.

¹¹Arahe toParisi au moita iti. Ido hai rapekune i topeguruna Yesu, rauli, “Moapari hai gurumi maande sambela hai toperuru asele hai tomadosa?”

¹²Nahadi Yesu lolitanda, ido hai Nauliangaahe, “Tauna au bara mahai, bara moparaluu sando. Tauna au mahai pea au moparaluu sando.

¹³BaraNa mai mokakio tauna au manoto babehianda. Kamaingku ide, mokakioNa tomadosa bona menosohe hangko i dosanda. Mewali, nipekiri hampai apa lempona Ngkorana Pue Ala au teuki node: ‘Bara Kuperapi binata au nipopenomba Iriko. Au Kuperapi bona maahikau i hangka rangami.’ ”

¹⁴Hangko inditi, hawehe bahangkia topeguruna Yohane Toperiu i Yesu, mekunehe iria, rauli, “Ikami hai toParisi mopuasa. Moapari pane topeguruMu barahe mopuasa?”

¹⁵Nahanaihe Yesu hai ngkora pandiri, Nauli, “Tauna i posusa petauna barahe mopuasa i tempona toratauna tobalilo ara mani i olonda. Agaiana hambela tempo, toratauna tobalilo ina raala hangko i olonda. I tempo itirai, hangko mopuasahe.”

¹⁶Roo indo, Yesu mopahawe mani rompaka ngkora pandiri, Nauli, “Bara ara hadua tauna au motampelei badu au hae hai hasepa bana au wou. Lawi hasepa bana au wou ina mengkuru duuna mahepa badu au hae iti, alana kahile-hileari kahepana.

¹⁷Nodo wori bara maroa mokando anggoro au wou i pambolia[9] au hae. Lawi ane rengke, ina mahepa pambolia au hae iti, alana anggoro mabubu, hai marugi wori pamboliana. Mewali anggoro au wou hangangaa rakando i pambolia au wou bona maroa ope-ope.”[10]

¹⁸Tangana mani Yesu mololita i topeguruna Yohane Toperiu, hawemi hadua tadulako sou penombaanda to Yahudi molingkudu i lindona Yesu merapi tulungi, nauli, “Anangku towawine hangko mate. Laoke i soungku, Nupetobo bona tuwo hule.”

¹⁹Laomi Yesu meula i tauna iti, hai topeguruNa meula worihe.

²⁰I tempo iti i tanga mpolumaonda, ara hadua towawine au hampulomi hai rompare mantodiha nahumba. Towawine iti lao mohungkuki Yesu hangko i taleu hai natobo wuntu baduNa,

²¹lawi nauli i laluna, “Asala kupetobomi wuntu baduNa, hangangaa maohamona.”

²²Membalilimi Yesu i towawine iti hai Nauliangaa, “AnaNgku, nupakaroho lalumu! Maohamoko, lawi mepoinalaiko Iriko.” Tempo iti pea womi, maohami towawine iti.

²³Roo indo, pulomi Yesu lao i souna tadulako sou penombaa. Kahawena, Naita bosa tauna au motulali hai au moteria.

²⁴Nauliangaahe, “Pelohokau ope-ope hangko inde. Anangkoi ide bara mate. Leta pea.” Karahadina, raele-eleri.

²⁵Padumohe ope-ope, mesuami Yesu i paturuana anangkoi iti, hai Nakingki taiena. Liliu anangkoi iti mearo.

²⁶Bambari ide tehawuka i humalele tampo iti.

²⁷Tangana Yesu mopaliliu polumaoNa, ara rodua tobilo au meula-ula i bokoNa hai mekakakiohe, rauli, “Pemuleana Datu Daudi, Nupokaahi wongkamia!”

²⁸Pesuana Yesu i lalu sou, maimohe tobilo au rodua iti mampohidupaa. Napekunehe Yesu, “Ba nipoinalai kaarana kuasaNgku mopakaohakau?” Rahanai, “Kipoinalai, Pue!”

²⁹Hangko inditi, Napetobomi matanda hai Nauliangaahe, “Kupakaohamokau moula pepoinalaimi.”

³⁰Unga peahe meita. Roo indo, nakontohe Yesu, Nauli, “Inee nipopololita i hema pea apa au Kubabehi irikamu ide.”

³¹Agaiana lao peahe i humalele tampo iti mobambari apa au nababehi Yesu irihira.

³²Kapadunda tobilo iti, raanti wori i Yesu hadua tauna au mahai. Tauna iti bara peisa mololita lawi napesuangi seta.

³³Yesu mampopelohomi seta hangko i tauna iti, pane peisami mololita. Rapotingkara tauna bosa moita au mewali iti, rauli, “Mahile ntepuu kuasaNa! Bara mani hambela taita au nodo Ia i tamponda to Isaraeli!”

³⁴Agaiana toParisi, barahe mampoinalai kahangko i Pue Alana kuasana Yesu, rauli, “Tauna iti mopake kuasa hangko i datu seta, ido hai peisa mampopeloho seta.”

³⁵Nodomi Yesu mampolumaongi boea-boeana. Ia mepaturo i sou penombaa, mopahawe Ngkora Marasa kana i poparentana Pue Ala. Napakaoha wori ope-ope tauna au mahai hai au bara masilolonga watanda.

³⁶Moita tauna bosa iti, maahi laluNa lawi ngkaia kaparinda, hai barahe ara au motulungi, nodohe dimba au bara raporewu.

³⁷Nauli Yesu i topeguruNa, “Tauna bosa nodohe pare au mangka. Ngkaia pare au mangkami, agaiana topepare barahe bosa.

³⁸Ido hai hangangaa niperapi i ampu bonde bona Natuduhe tauna lao mepare i bondeNa.”