Read Napu Markus 1 Bible Online

Markus 1 - Napu bible

Markus 1

¹Idemi Ngkora Marasa, tuntukana katuwona Yesu Kerisitu, Anana Pue Ala.

²Tuntukana mepongka hangko i kahawena Yohane Toperiu. Kaina hawena Yohane iti, napahawemi nabi Yesaya hangkoia. [1]I lalu surana Yesaya, Pue Ala mongkora node, “Idemi suroNgku au Kutudu moioru hangko Irio, bona mopasilolonga raraMu.”

³“Iami au monganga-nganga i pada wungi, nauli, ‘Ina hawemi Pue! Nipasilolonga raraNa. Nipakanoto rara au ina Napoliungi.’ ”

⁴Moula apa au teuki iti, hawe mpuumi Yohane Toperiu i pada wungi. Ia mopahawe Ngkorana Pue Ala i tauna bosa, nauli, “Menosomokau hangko i dosami bona naampungikau Pue Ala hai maimokau kuriu.”

⁵Bosa tauna au hawe mampeinao mampehadingi lolitana. Arahe au hangko i wanua Yerusale hai hangko i humalele tampo Yudea, maihe mopangaku dosanda hai nariuhe i owai Yarade.

⁶Hampina Yohane hangko i wulu onta. Pampouna hangko i koli. Paandena kakomba hai tinaha.

⁷Yohane mopahawe bambari ide, “Ina hawe hadua tauna au meliu kuasaNa hangko iriko. Mokakahi pea pekapu kandupaNa, barana hintoto.

⁸Kuriukau hai owai, agaiana Ia ina moriukau hai Inao Malelaha.”

⁹I tempo iti, Yesu hangko i boea Nasare lao i tampo Galilea, hai nariu Yohane i owai Yarade.

¹⁰Pesorena Yesu hangko i owai, Naitami langi tebungkahi hai Inao Malelaha nodo tadasi manggebodo mendaulu Iria.

¹¹Roo nodo, rahadimi wotuna Pue Ala hangko i langi au manguli, “Oiomi AnaNgku au Kupokakaia hai Kupokatana.”

¹²Roo indo, Inao Malelaha moanti Yesu lao i pada wungi.

¹³Ia maida inditi iba pulona alona, kamahaena, i olonda binata maila, hai nakelo Datu Tokadake. Hai Ia rarora malaeka.

¹⁴Bahangkia kamahaena hangko inditi, rahakami Yohane Toperiu hai ratarunggu. I tempo iti, laomi Yesu i tampo Galilea, hai mopahawe Ngkora Marasa hangko i Pue Ala,

¹⁵Nauli, “hawemi tempo au napakanoto Pue Ala; poparentaNa ina hawemi! Menosomokau hangko i dosami hai nipoinalaimide Ngkora Marasa.”

¹⁶Hambela tempo, tangaNa Yesu molumao i wiwi rano Galilea, Naitamohe rodua tauna, iamohe, Simo hai Andaria adina. I tempo iti, tanganda modala i rano, lawi itimi bagonda.

¹⁷Nauliangaahe Yesu, “Maimokau hai meulakau Iriko! Barapi ikane au nidala, agaiana manusiami.”

¹⁸Mewali rapalehi mpuumi dalanda, hai mepongka alo iti, meulamohe i Yesu.

¹⁹Roo indo, napaliliu Yesu polumaoNa, hai Naita mbuli rodua topohalalu, iamohe, Yakobu hai Yohane, ananahe Sebedeus, au tanganda mopakaroa dala i lalu duanga.

²⁰Yesu mokakiohe bona meulahe Iria. Mewali, rapalehimi umanda i lalu duanga hihimbela hai topobagona, liliu meula worihe i Yesu.

²¹Hangko inditi, Yesu hai topeguruNa laohe i boea Kapernaum. I Alo Pengkarooangaanda to Yahudi, mesuami Yesu i lalu sou penombaa hai mepongka mepaguru.

²²Tingkaramohe tauna au mohadi paturoNa, lawi pepaguruNa bara nodo guru-guru agama. PepaguruNa, nodo tauna au makuasa ntepuu.

²³I tempo iti, ara wori inditi hadua tauna au napesuangi hai monganga-nganga, nauli,

²⁴“Ee Yesu to Nasare! Ina Nupoapangkai? Ba ina Nupakarugingkai? Kuisa kaOiona mpuu Suro au malelaha hangko i Pue Ala.”

²⁵Agaiana nakambaroa Yesu, Nauli, “Mandiiko! Pelohomide hangko i tauna iti!”

²⁶Tokadake iti mampoporada-rada tauna iti, monganga-nganga hai meloho.

²⁷Tingkaramohe ope-ope tauna au moita iti, hai molololitahe, mombekune hadua hai hadua, rauli, “Apa wei dide? Ide paturo wou, hai tauna ide makuasa ntepuu! Mogalori tokadake, mampeulaihe hawaNa!”

²⁸Hangko inditi, bambari kana i Yesu rapahawemi i humalele tampo Galilea.

²⁹I pesulenda hangko i sou penombaa iti, laomi Yesu i sounda Simo hai Andaria. Yakobu hai Yohane meula worihe.

³⁰Inditi, pengantina Simo au towawine maturu lawi napawembe. Kamahaina iti rapopaisaa Yesu.

³¹Roo indo, laomi Yesu mampeita pengantina Simo i paturuana. Nakingkimi taiena hai Napopearo. Liliu maoha, pane towawine iti mororahe Yesu hai topeguruNa.

³²Kalumbami, i katampuna alo, ope-ope tomahai hai au napesuangi tokadake raantimohe i Yesu.

³³Bosa ampu boea moteruhu i tabangaa souna Simo.

³⁴Bosa tauna au Napakaoha hangko i hakinda au mampopengaa. Ngkaia wori tokadake au mesua i tauna napopeloho Yesu; barahe Napaliu mololita, lawi raisa mpuu kahemana Yesu.

³⁵Kahalona, hungku mabaa, mearomi Yesu hai padu hangko i boea iti lao mekakae haduduana i paidaa au boa.

³⁶Simo hai rangana laohe mohaoki Yesu. KaralambiNa peami liliu rauliangaa,

³⁷“Guru, bosa tauna mohaokiKo.”

³⁸Agaiana nauliangaarihe Yesu, “Laomoke i boea ntanina au hungku bona mopahawe woriNa Ngkorana Pue Ala inditi. Lawi itimi tunggaiaKu mai i dunia.”

³⁹Ido hai laomi Yesu mobambari Ngkorana Pue Ala i ope-ope boea i tampo Galilea hihimbela hai topeguruNa. Ia mepaguru i sou penombaa au ara inditi, hai mampopeloho tokadake au mesua i tauna.

⁴⁰Ara hadua tauna au ketangga au mai molingkudu i lindona Yesu merapi tulungi, nauli, “Kuisa kaNubukuna mopakaohana. Ane Nupokana Nupakaoha wongkoia!”

⁴¹Ido hai maahimi laluna Yesu moita tauna iti. Mewali Napetobomi hai Nauliangaa, “MauNa. Maohamoko!”

⁴²Unga pea matanta hakina, hai maohami.

⁴³Roo indo, natudumi Yesu bona padu, hai Nauliangaa,

⁴⁴“Inee nupopololita i hema pea apa au mewali inona. Laomoko hampai nupetudungia watamu i tadulako mpenomba, bona naita kamaohamumi, hai moantiko popenombamu moula parenta au teuki i lalu Aturana Musa, bona tongawa i ope-ope tauna kamaohamumi.”

⁴⁵Agaiana, iumba pea kalaoana tauna iti, napololita liliuri kanapakaohana Yesu, alana Yesu barapi peisa mesua i lalu boea iti tontolea dati ratoleliki tauna. Ido hai Yesu maida pearai i raoa boea i pada wungi. Agaiana nauri nodo, bosa liliuhe tauna au hangko i boea-boeana mampeinao mampohidupaa Yesu.