Read Napu Markus 10 Bible Online

Markus 10 - Napu bible

Markus 10

¹Meangkami Yesu hangko i boea Kapernaum lao i tampo Yudea hai i tampo au ara ntanda i orupena owai Yarade. Bosahe tauna hawe motoleliki, hai Ia mopaturohe nodo biasana.

²Arahe bahangkia toParisi au mai mohaoki kamanawona Yesu, mekunehe, rauli, “Moula atura agamanta, ba peisa mpuu tobalilo mogaa hai towawinena?”

³Nahanai Yesu, nauli, “Parenta apa au naweikau nabi Musa?”

⁴Rahanai toParisi, “Musa mopaliu tobalilo mampogaaki towawinena, asala nababehi hampai sura mpogaa.”

⁵Nauli Yesu, “Anti kamatuana lalumi, Musa mouki parenta iti.

⁶Agaiana hangko i pewalina dunia, i tempona Pue Ala mampopewali manusia, ‘Napopewalihe tobalilo hai towawine.’

⁷‘Ido hai tobalilo hangangaa mopalehi umana hai inana, hai tuwo hihimbela hai towawinena,

⁸bona au rodua iti mewalihe hawata-wata.’ Mewali, tohamboko iti barapohe rodua, agaiana hawata-watamohe.

⁹Ido hai Kuuliangaakau, apa au napahintuwumi Pue Ala, inee mpuu hawe nagaa manusia.”

¹⁰Roo indo, Yesu hai topeguruNa mesua i lalu sou. Tanganda i lalu sou, mekune hulehe topeguruNa Iria kana i ada mpogaa.

¹¹Nauliangaahe Yesu, “Hema au mampogaaki towawinena hai mampotambia towawine ntanina, lempona mebualosi.

¹²Nodo wori towawine au mampogaaki tobalilona hai mampotambia tobalilo ntanina, ia mebualosi wori.”

¹³Hambela tempo, arahe tauna au moanti ananda i Yesu bona Natobo hai Nawatihe. Agaiana rakarumpuihe topeguruNa Yesu.

¹⁴Kanaitana Yesu apa au rababehi, Ia mokarumpuihe topeguruNa, Nauli, “Pogiangaahe anangkoi iti mai Iriko. Ineehe nikonto, lawi tauna au nodohe anangkoi ide ina mewali taunana Pue Ala i lalu poparentaNa.

¹⁵Tou lolitaNgku ide: ane barakau mengkoru i Pue Ala nodo hadua anangkoi, barakau ina mewali taunaNa i lalu poparentaNa.”

¹⁶Karoona mololita nodo, Nakalapuimohe anangkoi iti, Napaga tanoananda hai Nawatihe.

¹⁷Ina meangka mbulimi Yesu mopaliliu polumaoNa, unga pea ara hadua tauna au melangka mai Iria, liliu molingkudu i lindoNa, hai mekune, nauli, “Guru au maroa, apa au hangangaa kubabehi bona molambina katuwo maroa au bara mokahopoa?”

¹⁸Nahanai Yesu, nauli, “Moapari hai nuuli tauna maroaNa? Bara ara hadua tauna au maroa, batena pea Pue Ala.

¹⁹Nuisato hawa au teuki i lalu Aturana Musa: ‘Inee mepapate, inee mebualosi, inee manangka, inee mohowara dongko, inee mebagiu, hai bila umamu hai inamu.’ ”

²⁰Nauli tauna iti, “Guru, ope-ope hawa iti, aminami kupeulai hangko koi-koi peamona.”

²¹Yesu mototoki tauna iti lawi maahi laluNa, pane Nauliangaa, “Ara mani hampaka au hangangaa nubabehi. Laomoko hampai mampobalu hinangka anu-anumu, hai holona nuweihe tauna au meahi-ahi tuwonda. Ane nubabehi nodo, ina mahile hurungina au nuhumba i lalu suruga. Roo indo, maimoko meula Iriko.”

²²I pohadina lolitana Yesu, masusami laluna hai padumi, lawi ngkaia anu-anuna.

²³Yesu mototoki topeguruNa au meangkahe mantoleli, hai Nauliangaahe, “Mapari mpuu tauna au pebuku mesua i lalu poparentana Pue Ala.”

²⁴Rapotingkara topeguruNa mohadi lolitaNa iti, ido hai nauliangaa mbulihe Yesu, “AnaNgku, mapari mpuu mesua i lalu poparentana Pue Ala.

²⁵Hagolo mani hambaa onta mesua i kalolu gigiu, pane topebuku mesua i lalu poparentana Pue Ala.”

²⁶Karahadina topeguruna Yesu lolitaNa iti, rapotingkara mpuu, rauli, “Oo, ane mogalo topebuku mapari molambi katuwo maroa au bara mokahopoa, apa mani tauna ntanina?”[14]

²⁷Natotokimohe Yesu hai Nauliangaahe, “Ane manusia bara nabuku, agaiana i Pue Ala bara nodo, lawi ope-ope peisa haha Nababehi.”

²⁸Hangko indo, nauli Peturu, “Noumbami hai ide ikami? Mopalehimongkai hinangkana bona kiulaKo!”

²⁹Nauli Yesu, “Bona niisa: hema au mopalehi halaluna, inana ba umana, anana ba souna ba bondena anti peulana Iriko hai anti Ngkora Marasa,

³⁰batena molambi hurungina au mahile. I dunia ide ina molambi hangatu belana kangkaiana souna, halaluna, inana, anana, bondena, nauri molambi pepopeahi-ahi. Hai i alo pebotusi batena ina molambi katuwo maroa au bara mokahopoa.

³¹Agaiana bosa tauna au tepaioruami tuwonda ide-ide ina mewali tepaibokoa i alo au ina mai. Hai bosa wori tauna au tepaibokoa tuwonda ide-ide ina mewali tepaiorua i alo au ina mai.”

³²Yesu hai topeguruNa mopaliliuhe polumaonda lao i Yerusale. Tanganda molumao, napehindorungihe Yesu. Tingkarahe topeguruNa, hai tauna bosa au meula Iria langahe. Mewali Yesu mokakio mbulihe topeguruNa au hampulo hai rodua Napatanihe, hai Nauliangaahe apa au hangangaa mewali i wataNa.

³³Nauli, “Nipehadingi maroa! Ide-ide monontohimoke Yerusale. Inditimi, Iko Ana Manusia ina rahuhuNa i kapala-kapala tadulako mpenomba hai guru-guru agama, hai ina rabotusi bona rahuku mateNa. Roo indo, ina rahuhuNa i tauna au barahe to Yahudi.

³⁴Ina rakakabosaiNa, ratinuduhiNa, rapapahaiNa, hai rapapateNa. Agaiana i alo katalu, ina tuwo huleNa.”

³⁵Roo indo, Yakobu hai Yohane, anana Sebedeus, mohungkuki Yesu, rauliangaa, “Guru, ara hampaka au kipeinao kiperapi hangko Irio.”

³⁶Nauli Yesu, “Apa au niperapi Iriko?”

³⁷Rahanai, “Ane mewaliKo Datu au meawa, nupaliungkai mohuda hai moparenta hihimbela hai Oio, hadua ntanda i koanaMu, hadua ntanda i kabeoMu.”

³⁸Nauliangaahe Yesu, “Niisa pae apa au niperapi iti? Nibuku pae mohalea kapari au hangangaa Kuhalea? Ba nibuku motodiha au ina Kutodiha?”

³⁹Mehanahe Yakobu hai Yohane, rauli, “Kibuku!” Nauli Yesu, “Tou, hangangaa nihalea mpuu kapari nodo au Kuhalea, hai ina nitodiha apa au Kutodiha.

⁴⁰Agaiana bara Iko au mopakanoto hema au ina mohuda ntanda i koanaNgku hai ntanda i kabeoNgku. Batena pea UmaNgku au mopakanoto.”

⁴¹Karahadina topeguruNa au hampulo perapinda Yakobu hai Yohane iti, rumpumohe.

⁴²Ido hai Yesu mokakio ope-ope topeguruNa, Nauliangaahe, “Niisato kamakancana poparentanda tauna au bara moisa Pue Ala moparentai tauna bosa. Tauna au mahile lantinda mopari-pari tauna bosa mampeulai hawanda.

⁴³Agaiana ikamu, inee nodo babehiami! Hema au mampeinao mapangka lantina hangangaa mewali hampai nodo hadua topekadipura.

⁴⁴Hai hema au mampeinao mahile hangana hangangaa mewali hampai nodo hadua hawi i hangka rangana.

⁴⁵Mogalori Iko Ana Manusia, tunggaiaKu mai i dunia, baraNa mai bona mewali topohawa. KamaiNgku ide bona mewaliNa hawi, hai mokiraNa wataNgku rapapate mohuru salanda bosa tauna.”

⁴⁶Yesu hai topeguruNa hawehe i boea Yeriko. Hai i kapadunda hangko i boea iti, bosa tauna meula irihira. I wiwi rara, mohudami hadua tauna au bilo merapi-rapi. Hangana Bartimeus (lempona: Anana Timeus).

⁴⁷Kanahadina Bartimeus Yesu to Nasare au moliu, meraroami, nauli, “Yesu pemuleana Datu Daudi! Pokaahi wongkoia!”

⁴⁸Agaiana Rakarumpuiri tauna bosa, rauliangaa, “Mandiiko!” Agaiana tobilo iti monganga-nganga pea masisimbuku, “Pemuleana Datu Daudi, pokaahi wongkoia!”

⁴⁹Mengkaroomi Yesu, Nauli, “Nikakio mai!” Rakakio mpuumi tobilo iti, rauliangaa, “Patinda lalumu! Meangkamoko, lawi Nakakiomoko!”

⁵⁰Meangkami tobilo iti mowehika komona i rara, hai hoholiga lao i Yesu.

⁵¹Napekune Yesu iria, “Apa au nuunde bona Kubabehi?” Nahanai tobilo iti, “Guru, kupeinao wongkoia meita!”

⁵²Nauli Yesu, “Laomoko. Lawi mepoinalaiko Iriko, Kupakaohamoko!” Unga pea meita, hai liliu meula i Yesu.