Read Napu Markus 11 Bible Online

Markus 11 - Napu bible

Markus 11

¹Hungkumohe Yesu hai topeguruNa i Yerusale, hawehe i boea Betpage hai Betania i Bulu Saitun. Inditi, Yesu motudu rodua topeguruNa moioru,

²Nauliangaahe, “Laomokau i boea au talindo. Ane hawekau inditi, ina niita hambaa ana kalide au rataka, au bara mani hambela rapodara. Nikakahi hai niantiaNa mai.

³Ane ara tauna mekune irikamu moapa hai nikakahi, niuliangaahe node, ‘Naparaluu Pue, Napebolo pea hai ina Napopesule deade.’ ”

⁴Kalaonda topeguruNa au rodua iti, rahumba mpuumi hambaa ana kalide au tetaka i wiwi rara hungku i babaka. Tanganda mokakahi kalide iti,

⁵tauna au meangkahe inditi mekune irihira, rauli, “Moapari hai nikakahi kalide iti?”

⁶Rahanai nodo au nauliangaahe Yesu inona. Karahadina tauna iti lolitanda, rapogiangaamohe moanti kalide iti.

⁷Kalide iti raanti lao i Yesu, hai ralampii badunda. Roo ralampii, mesawimi Yesu.

⁸Laomohe monontohi Yerusale. Bosa tauna meula Iria, arahe au moioru, ara worihe au i boko. Bosahe au mowoke hampinda i tanga rara au napoliungi Yesu, hai hantanga worihe lao mangala tawe harao i bonde hai rataleha i tanga rara, tanda pampomahilenda Yesu. Tauna au bosa iti, monganga-nganga liliuhe, rauli, “Hosana![15] Rawatimi Tauna au mai i lalu hangana Pue!

¹⁰Rawatimi poparentaNa, Ia ina moparenta nodo Datu Daudi, toiorunta hangkoia. Horemangkai, O Pue Ala au indora i suruga!”

¹¹Kahawena Yesu i wanua Yerusale, liliu mesua i lalu Souna Pue Ala. Inditi Ia moparesa mantoleli Sou iti. Roo indo, lawi ina kaindimi, mesule mbulimi hai topeguruNa, laohe mohambengi i boea Betania.

¹²Kahalona, padu mbulimohe hangko i Betania lao i Yerusale. I tanga rara, marimimi Yesu.

¹³Yesu moita ngkarao hampoa kau ara au motawemi. Laomi Napeita ba ara wuana. Agaiana bara huba haogu wuana, lawi bara mani tempona mowua.

¹⁴Ido hai Naganemi kau iti, Nauliangaa, “Mepongka alo ide, barapi ara hadua tauna au ina moande wuamu.” LolitaNa iti rahadi topeguruNa.

¹⁵Hawe mbulimohe i Yerusale, laomi Yesu i tabangaa Souna Pue Ala. Inditi, Ia mowurahe topobalu-balu. Mejanda topointolohi doi nadungka, nodo wori pohudaanda topobalu-balu tadasi manggebodo.

¹⁶Roo indo, barapi mopaliu tauna moanti anu-anunda melempo i tabangaa Souna Pue Ala.

¹⁷Roo indo, Napaturohe, Nauli, “Bara pae niisa apa au teuki i lalu Sura Malelaha? Pue Ala manguli node: ‘SouNgku ina mewali sou pekakaea au rapake tauna hangko i humalele dunia.’ ‘Agaiana ikamu, nipopewaliri sou pogulua topebagiu!’ ”

¹⁸Karahadina kapala-kapala tadulako mpenomba hai guru agama apa au nababehi Yesu iti, mohaokimohe rara mopapate Yesu anti kalanganda Iria, lawi raisa ope-ope tauna matanahe mampehadingi paturoNa.

¹⁹Ina kaindimi, Yesu hai topeguruNa padu mbulimohe hangko i Yerusale.

²⁰Kahalona madondo-dondo, lao mbulimohe Yesu hai topeguruna i Yerusale. I tanga rara, moitahe kau ara au nagane Yesu. Matemi, bangi hawe i uakana.

²¹Nakatuinaomi Peturu lolitana Yesu. Ido hai mouliangaa Yesu, “Guru! Peita pae kau ara au Nugane iti, bangimi!”

²²Nahanai Yesu, Nauli, “Mepoinalaimokau i Pue Ala!

²³Tou mpuu au Kuuliangaakau: ane rapana niuliangaa bulu iti: ‘Teangkamoko, manawoko i lalu tahi!’ batena ina mewali asala bara bata-bata lalumi hai nipoinalai mpuu pewalina apa au niuli iti.

²⁴Mewali, nipehadingi lolitaNgku ide: ane mekakaekau mamperapi ba apa-apa, hangangaa nipoinalai kaina Naweimi Pue Ala apa au niperapi, hai batena nilambi.

²⁵Ane mekakaekau hai ara mani rangami au mopakoi inaomi, niampungi hampai bona Umami au ara i suruga moampungi wori salami.

²⁶[Agaiana ane barakau moampungi rangami, salami bara wori ina Naampungi Umami au i suruga.]”

²⁷Hawe mbulimohe Yesu hai topeguruNa i Yerusale. I temponda molulumao i tabangaa Souna Pue Ala, hawemohe kapala tadulako mpenomba, guru agama hai totosaenda to Yahudi au ntanina.

²⁸Mekunehe i Yesu, rauli, “Nuuliangaangkai, hangko iumba kuasaMu mobabehi ope-ope iti i Souna Pue Ala. Hema au moweiKo kuasa iti?”

²⁹Nahanai Yesu, “Ara wori hampaka pampekuneNgku irikamu. Ane nihanai pekuneNgku, hangko kuuliri kahemana au moweiNa kuasa mobabehi ope-ope iti.

³⁰Hangko iumba kuasana Yohane Toperiu moriu tauna? Hangko i Pue Ala, ba hangko i manusia?”

³¹Mololitamohe tadulakonda to Yahudi iti hadua hai hadua, rauli, “Noumbami katahanaina? Ane tauli hangko i Pue Ala kuasana, ina Nauliangaake: ‘Ane nodo, moapari hai barakau mepoinalai i Yohane?’

³²Agaiana mapari wori ane tauli hangko i manusia pea kuasana.” Tadulakonda to Yahudi iti langahe mopakoi Yohane Toperiu datihe raewa tauna bosa, lawi ope-ope tauna manguli Yohane iti hadua nabi.

³³Mewali rahanai, rauli, “Bara kiisa.” Ido hai Nauliangaahe Yesu, “Ane nodo, bara worikau ina Kuuliangaa kahangko iumbana kuasaNgku mobabehi iti.”