Read Napu Markus 12 Bible Online

Markus 12 - Napu bible

Markus 12

¹Roo indo, Yesu mopahawe hampaka ngkora pandiri i tadulakonda to Yahudi, Nauli, “Ara hadua tauna au motuda anggoro i bondena. Tauna iti mokadipura bondena hai nawala mantoleli. Mokaemi kalolu mobabehi popiengaa anggoro, hai naaro worimi bambaru pokampaia. Karoona ope-ope iti napobago, bonde iti naweihe topobagona bona rakadipura hai rakiraia wori wuana. Roo indo laomi modaga.

²Hawemi tempo popupu wua anggoro, natudumi hadua hawina lao merapi kirana i topokadipura bondena.

³Agaiana topokadipura bonde iti mohakarihe hawi au ratudu iti, rapapahai hai ratudu mesule loa-loa.

⁴Roo indo, ampu bonde iti motudu mbuli hadua hawina. Hawe i bonde, hawi iti rapapahai wori duuna bela waana, rawura hai ratunda-tunda.

⁵Hangko indo, natudu mbulimi hadua hawina. Hawe inditi, hawi iti rapapateri. Hai batena nodo haha karababehina i ope-ope hawi au natudu ampu bonde iti: arahe au rawombe-wombe, arahe au rapapate.

⁶Barapi ara au ntanina au peisa natudu ampu bonde iti, batena rai anana au haduduana au napokakaia. Kahopoana anana itimi au natudu lao i topokampai bondena. Nauli laluna ampu bonde iti, ‘Anangku iti batena ina raadai.’

⁷Agaiana, i karaitana topokadipura bonde anana ampu bonde iti, mogombomohe, rauli, ‘Oloumi mai anana, iami au ina mewali ampu bonde ide. Agina tapapate bona taala bondena!’

⁸Mewali, rahaka mpuumi anana iti, rapapate hai ratende i raoa bonde.”

⁹Roo indo, mekunemi Yesu, Nauli, “Mewali, apa au ina nababehi ampu bonde iti? Batena ina mai mopapate topokadipura bondena, hai bondena ina naweihe tauna ntanina.

¹⁰Bara mani pae nibasa lolita i lalu Sura Malelaha au manguli node: ‘Watu au ratende topoaro sou, watu iti au mewali pohudaa sou.

¹¹Iti mewali moula peundeana Pue, hai maroa ntepuu apa au Nababehi iti!’ ”

¹²Karahadina tadulakonda to Yahudi lolitana Yesu, rapeinaomi rahaka, lawi raisa kaihirana au Natunggai hai ngkora pandiri iti. Agaiana barahe bai, lawi mampokalangahe tauna bosa. Mewali, padu pearaihe.

¹³Hangko inditi, tadulakonda to Yahudi motudumohe bahangkia toParisi hai taunana Datu Herode lao i Yesu.[16] Tunggaianda, rapeinao mopakanawo Yesu hai pekunenda.

¹⁴Kahawenda i Yesu, rauliangaa, “Guru, kiisa Oio tauna manotoKo. MepaturoKo i katou-touana moula peundeana Pue Ala. Barako langa i hema pea, lawi baraKo mampopontani tauna. Ido hai mekunengkai Irio: moula atura agamanta, ba hintoto ane mobaiarike asele i Kaisar, ba bara?”

¹⁵Mole naisari Yesu tunggaiana lalunda. Ido hai Nauliangaahe, “Moapa hai ina nipakanawoNa? NipopaitaaNa mai doi au biasa nipopobaiari asele bona Kuita.”

¹⁶Hangko inditi, rahuhua hampeka doi pera. Nadokomi Yesu hai Napekune, “Lenggena hema hai hangana hema au ara i doi ide?” Rahanai, “Lengge hai hangana Kaisar.”

¹⁷Nauli Yesu, “Ane nodo, wei Kaisar apa au hintoto rawei Kaisar, hai wei wori Pue Ala apa au hintoto rawei Pue Ala.” Tingkara mpuuhe mohadi pehanaNa.

¹⁸Roo indo, arahe bahangkia toSaduki au hawe i Yesu. (ToSaduki iti iamohe tadulako agama Yahudi au barahe mampoinalai katuwo hulenda tomate.)

¹⁹Kahawenda toSaduki iti, mohaokihe kanawoana Yesu, hai rauliangaa, “Guru, nabi Musa mouki i lalu sura atura agamanta node: ane hadua tobalilo au motambimi mate agaiana bara mani ara anana, halaluna hangangaa mampotambia bembana bona tauna iti ara pea pemuleana.

²⁰Mewali, arahe pitu topohalalu, tobalilo hahahe. Au towutu motambimi, agaiana bara mani woia ara ananda, matemi.

²¹Adina hangangaa mampotambia bembana. Bara mani worihe moana, matemi. Nodo wori au mewali i kataluna.

²²Nodomi au mewali duuna hawe i kapituna. Matemohe ope-ope agaiana bara mani ara ananda. Kahopoana, mate worimi towawine iti.

²³Mewali, i alo pearonda tomate, ane tou-tou mpuu tomate tuwo hulehe, towawine iti hemami ampuna? Lawi pitumohe au mampotambia.”

²⁴Nahanai Yesu, “Sala mpuu iti pekirimi, lawi bara niisa ihi Sura Malelaha, bara wori niisa kuasana Pue Ala.

²⁵Lawi i pearonda hule tomate, katuwonda nodomi katuwo malaeka i lalu suruga, barapohe motambi ba rapopotambi.

²⁶Kana i pearonda tomate, bara mani pae hambela nibasa lolita au ara i lalu Sura Malelaha au mopakanoto katuwonda hule tomate? I lalu sura Aturana Musa, tabasa tuntukana au mopahaweake noumba Pue Ala mongkora i nabi Musa hangko i rore api i lalu lopo. I tempo iti, Burahima, Isaki hai Yako mahaemohe mate. Agaiana nauri nodo, Pue Ala mouliangaa Musa node: ‘Ikomi Pue Ala au rapenombai Burahima, Isaki, hai Yako.’

²⁷Mewali, hangko i lolitana Pue Ala iti, taisa mpuumi Burahima, Isaki hai Yako, tuwo hulemohe. Lawi au menomba i Pue Ala, barahe tomate, agaiana tauna au tuwo pea. Sala mpuu pekirimi.”

²⁸I tempo iti, hadua guru agama to Yahudi hawe i Yesu. Guru agama iti mohadimi pombehanainda toSaduki hai Yesu inona, hai nauli laluna, “Maroa mpuu pehanana Yesu!” Ido hai mekune worimi i Yesu, nauli, “Parenta umba au meliu kamahilena hangko i ope-ope parenta?”

²⁹Nauli Yesu, “Idemi parenta au meliu kamahilena: ‘Nipehadingi to Isaraeli! Amputa Pue Ala hadua pea.

³⁰Nipokaahi Pue Ala, Ampumi, i sukana kabulana lalumi, i sukana pekirimi, i sukana kapandemi, hai i sukana rohomi.’ Itimi parenta au kaisa.

³¹Hai parenta au karompakana, node: ‘Nipokaahi hangka rangami nodo pampokaahimi watami haduduami.’ Bara ara parenta ntanina au meliu kamahilena hangko i au rompaka iti.”

³²Nauli guru agama iti i Yesu, “Tou, Guru! Lawi kana pehanaMu. ‘Pue Ala hadua pea, bara ara au ntanina.’

³³Hai hangangaa tapokaahi Pue Ala hangko i kabulana lalunta, hangko i sukana kapandeta, hai hangko i sukana rohonta. Hai hangangaa tapokaahi hangka ranganta nodo watanta haduduanta. Iti au meliu kamaroana hangko i ope-ope binata hai anu-anu ntanina au tapopenomba i Pue Ala.”

³⁴Kanahadina Yesu kamanotona pehanana tauna iti, Nauliangaa, “Hungkumoko mewali taunana Pue Ala!” Hangko indo, barapi ara hadua au bai mekune-kune i Yesu.

³⁵I tempona Yesu mepaguru i tabangaa Souna Pue Ala, Nauli, “Moapa hai rauli guru agama Datu Topehompo iami pemuleana Datu Daudi?

³⁶Mole Daudi haduduana mopakanoto Datu Topehompo iami Pue au napenombai. Anti peninina Inao Malelaha Daudi mampololita kana i Datu Topehompo node: Pue mongkora i Ampuku au kupenombai, Nauli: ‘MohudamoKo ntanda i koanaNgku duuna Kupopengkoruhe ope-ope iwaliMu Irio.’

³⁷Mewali, ane Daudi haduduana manguli Datu Topehompo iami Pue au napenombai, noumba hai rauliri pemuleana?” Tempo iti bosa mpuu tauna au moteruhu i tabangaa Souna Pue Ala hai matanahe mohadi paturoNa.

³⁸I tempona Yesu mopaguru tauna bosa, Nauliangaahe, “Maroa-roakau, ineekau mampeulai babehianda guru agama. Raunde molumao mopake badu au mandoe hai mampeinaohe rabila tauna bosa i pobalu-balua.

³⁹Raunde mohuda i pohudaa au raadai i sou penombaa hai i posusaa.

⁴⁰Moleri mopakanawotohe towawine au bemba hai rarampaki sounda. Mekakaehe mahae-hae mole motabungihirihe babehianda au kadake. Ina mantimi mpuu karahukunda.”

⁴¹Yesu mohuda hungku i peti pambolia doi popenomba, hai mokamata tauna au mopusa doi popenombanda i lalu. Bosa tauna au pebuku mopusa doi au ngkaia.

⁴²I tempo iti, hawe worimi hadua towawine tobemba au meahi-ahi tuwona au mopusa doi popenombana. Au napopesua iti, rompeka doi tambaga au haodi pea imbana.

⁴³Yesu mokakio topeguruNa, Nauliangaahe, “Tou mpuu au Kuuliangaakau: tobemba au meahi-ahi tuwona iti, popenombana melumbu hangko i ope-ope tauna ntanina au mopusa popenombanda,

⁴⁴lawi ihira mokira hangko i pelabiana pea doinda. Agaiana tobemba au meahi-ahi tuwona, mokira ope-ope au ara iria au katouana naparaluu woia i lalu katuwona alo-alona.”