Read Napu Markus 13 Bible Online

Markus 13 - Napu bible

Markus 13

¹Roo indo, padumi Yesu hangko i Souna Pue Ala. Ara hadua hangko i topeguruNa au mouliangaa, “Guru, peita pae olou sou, makara mpuu hai mahile-hilehe watuna!”

²Nauli Yesu, “Souna Pue Ala au nuita olou? Agaiana Kuuliangaako: bara ina ara haogu watu au mentara i paidaana. Batena ope ragero.”

³Roo indo, laomi Yesu i Bulu Saitun hai mohuda molindo Souna Pue Ala. Tangana Yesu mohuda-huda, maimohe Peturu, Yakobu, Yohane hai Andaria mololita Iria i tempona bara ara tauna ntanina,

⁴rauli, “Mekunengkai ba impira pewaliana ope-ope au Nuuli inona. Hai tanda apa au ina mewali ane hawemi tempona mewali?”

⁵Nauli Yesu, “Mainga-ingakau bona datikau rapakanawo.

⁶Lawi bosa tauna ina mai hai mangulihe kaihiranami Datu Topehompo, alana bosa tauna ina rapakanawo.

⁷Ane mohadikau pombeala, ba bambari pombeala, inee nipowulunga, lawi ope-ope iti hangangaa mewali, agaiana bara mani hawe kahopoa dunia.

⁸I tempo iti, tohangamba ina mombeala hai tohangambana, kadatua hambua ina moewa kadatua hambuana, hai iumba-umba pea ara linu hai rimi. Agaiana ope-ope iti, hangko pepongkana, nodo kapari au nahadi hadua towawine au ina moana.

⁹Agaiana ikamu, mainga-ingakau! Lawi ikamu ina rahaka hai raanti lao i topebotusi agama Yahudi. Ina rapopeahi-ahikau i lalu sou penombaa. Anti peulami Iriko, ina rahuhukau i gubernur hai i datu. Indo, ina raweikau tempo mopahawe kana i pepoinalaimi Iriko.

¹⁰Hai Ngkora Marasa hangangaa rapahawe hampai i humalele dunia, hangko peisari mewali ope-ope au natunggai Pue Ala.

¹¹Ane rahakakau hai raantikau i pebotusia, ineekau langa ba noumba pehanami. Ane hawe tempomi mololita, niuli peami apa au napopaisaakau Pue Ala. Lawi apa au niuli tempo iti, bara mesupa hangko i pekirimi, agaiana hangko i Inao Malelaha.

¹²Hambela tempo tauna ina mohuhuhe wata halalunda bona rapapate. Nodo wori hadua uma ina mohuhu wata anana, hai anangkoi ina moewahe tosaenda hai rahuhuhe bona rapapate.

¹³Anti peulami Iriko, ina rakahihikau ope-ope tauna. Agaiana tauna au meula liliu Iriko duuna i kahopoana ina tehoremahe.”

¹⁴“Hangkoia nabi Danieli mampololita kahawena hadua au rauli ‘Dake au Mepamaropu.’ (Hema au mobasa lolita ide, niparesa lempona!) Mewali, ane niita au natunggai Danieli iti meangka i paidaa au bara rapaliua napaidai, agina tauna au maida i Yudea melangkahe lao i bulu.

¹⁵Tauna au mohuda-huda i pengkangkalahea i wongko sou, ineehe hampai mesua i lalu sounda mangala ba apa-apa.

¹⁶Tauna au i bonde, ineehe mesule mangala hampinda. Hangangaa liliuhe melangka!

¹⁷Tempo iti ina masusa mpuu tuwonda towawine au mantimi hai au mopatomi ananda.

¹⁸Mekakaekau i Pue Ala bona alo pelangkaami iti inee i tempo uda.

¹⁹Lawi i tempo iti, ina hawe kapari au rumihi ntepuu au bara mani hambela mewali hangko i nguru-nguruna i tempona Pue Ala mampopewali dunia duuna ide-ide, hai barapi ina mewali i alo au ina mai.

²⁰Agaiana tempo kapari iti ina napahampalai pea Pue Ala, lawi ane bara Napanodo, bara ina ara hadua au tuwo. Mewali, anti pampokaahiNa tauna au Napilei, ido hai ina Napahampalai pea tempo kapari iti.

²¹I tempo iti, ane ara au mouliangaakau: ‘Peita! Idemi Datu Topehompo’ ba rauli ‘Olou mai Datu Topehompo!’ ineehe nipoinalai.

²²Lawi ina hawe bosa tauna au mepakanawo au moulihe kaihirana Datu Topehompo, ba au mouli kaihirana nabi. Ina mobabehihe tanda kuasa hai tanda au metingkarai bona mopakanawohe bosa tauna. Rapari-pari wori ane peisa, maitu tauna au napileimohe Pue Ala mewali taunaNa, rapakanawo wori.

²³Agaiana ope-ope iti Kuuliangaa amimokau hangko damani mewali. Ido hai hangangaa mainga-ingakau!”

²⁴“Mewali, i tempo iti, ane liumi tempo kapari iti, alo ina mewali makaindi, wula barapi mewangka, hai betue ina manawo hangko i langi.

²⁵Ope-ope au makuasa i langi ina rumihi kamagunegonda.

²⁶I tempo iti, ope-ope tauna ina moitaNa, Ana Manusia, mendaulu mai i lalu gawu, i lalu kamakuasa hai peawa.

²⁷Ina Kutuduhe malaekaNgku lao mogulu tauna au Kupilei hangko i humalele dunia, hangko i Mata alo hawe i Katampua alo.”

²⁸“Nipailalu ngkora pandiri kana i kau ara au Kupaturoakau. Ane niita pengana motumbe hai motawemi, niisa kaina hawenami tempo madii.

²⁹Nodo wori, ane niita ope-ope au Kuuli inona mewalimi, niisa kadanapi mahae ina mewali ope-ope au natunggai Pue Ala.

³⁰Tou mpuu au Kuuliangaakau: ope-ope au Kuuli inona batena mewali hangko damani ope tauna au tuwo i tempo ide mate.

³¹Langi hai tampo ina magero, agaiana lolitaNgku batena ara hawe i hae-haena.”

³²“Agaiana ane alo hai jaa pewaliana ope-ope iti, batena pea UmaNgku au moisa. Bara mpuu ara hadua tauna au moisa. Mogalorihe malaeka au i suruga, bara wori raisa. Hai Iko, AnaNa, bara wori Kuisa.

³³Ido hai hangangaa mainga-ingakau hai masilolongakau, lawi bara niisa impira kahaweNgku.

³⁴Ane hawe suleNa, pewalina nodo ngkora pandiri ide. Hadua ampu sou motunggai lao i wanua au karao. Hangko damani meangka, mampohawaamohe taunana mokadipura souna, hadua-haduahe nawei bagonda. I topokadipura baba, nauliangaa: ‘Mainga-ingako!’

³⁵Mewali, ikamu wori hangangaa mainga-ingakau bona ane unga pea hawe ampu sou barakau nalambi tangami leta, lawi bara niisa ba impira kahaweana ampu sou, ba kalumba ba i tanga kaindi ba hungku mabaa ba madondo-dondo. Hangangaa mainga-ingakau, lawi bara niisa impira kahaweaNgku.

³⁷Apa au Kuuliangaakau ide, Kuuli wori i ope-ope tauna. Hangangaa mainga-ingakau!”