Read Napu Markus 14 Bible Online

Markus 14 - Napu bible

Markus 14

¹Rongalo rai ina hawe Alo Posusa Pasa hai Posusa Roti Au Bara Raragii. I tempo iti, kapala-kapala tadulako mpenomba hai guru agama mohaoki rara mohaka ngkandii Yesu bona rahuhu rapapate.

²Rauli, “Agaiana inee tahaka i tempo alo mahile bona dati ara pohiho i olonda tauna bosa.”

³Tempona Yesu ara i boea Betania, Ia maida i souna Simo, au hangkoia ketangga. TangaNa maande inditi, hawemi hadua towawine moanti habotolo lana mawongi au masuli ntepuu holona, au rababehi hangko i uaka kau au mawongi. Napengkami botolona, hai lana iti natidorohia waana Yesu tanda pebilana.

⁴Arahe bahangkia tauna inditi au rumpu moita apa au nababehi towawine iti. Mololitamohe hadua hai hadua, rauli, “Moapari pane lana mawongi au masuli iti ratende mbero pea?

⁵Ane rapana lana mawongi iti rapobalu, holona labi talu atuna doi pera.[17] Aginami rapobalu hai holona raweihe topeahi-ahi.” Ido hai mokarumpuihe towawine iti.

⁶Agaiana Nauliangaarihe Yesu, “Pogiangaa peamide. Moapari hai nipakasusa laluna? Apa au nababehi Iriko, maroa.

⁷Lawi tauna au meahi-ahi, ara mpaliliuhe irikamu. Ane niunde motulungihe, arato katepakami. Agaiana Iko, baraNa ara liliu irikamu.

⁸Towawine iti mobabehimi apa au peisa nababehi. NabumbuhiaNa lana mawongi bona mopasilolonga amimi wataNgku i karatawuNgku.

⁹Bona niisa: i humalele dunia, iumba pea Ngkora Marasa rabambari, apa au nababehi towawine iti batena tekabelai, tanda karakatuinaona.”

¹⁰I tempo iti, hadua hangko i topeguruna Yesu au hampulo hai rodua, au rahanga Yudasi Iskariot, lao i kapala-kapala tadulako mpenomba, mampololita tunggaiana kaina mampobaluna Yesu irihira.

¹¹Matanamohe mohadi tunggaiana iti, hai radandiami rawei doi. Hangko inditi, Yudasi mohaokimi katepaka au maroa mohuhu Yesu irihira.

¹²I alo pepongkaa Posusa Roti Au Bara Raragii i tempona dimba Pasa rasambale, topeguruna Yesu mekune Iria, rauli, “Pue, iumba peundeaMu lao kipasilolonga paande Pasa au ina taande?”

¹³Mewali Natudumohe rodua topeguruNa, Nauliangaahe, “Laomokau i lalu wanua. Inditi ina nipohidupaa hadua tobalilo au moanti pantambuana au moihi owai. Meulamokau iria.

¹⁴Ane mesuakau i lalu sou, niuliangaa ampu sou iti: Guru mekune ba iumba Ia peisa moande paande Posusa Pasa hihimbela hai topeguruNa?

¹⁵Ampu sou iti ina motudungiakau hambua hologa mahile au ara i wongko. Hologa iti tepasilolonga amimi, handami parewana. Inditimi nipasilolongaake paande Pasa.”

¹⁶Lao mpuumohe topeguruNa au rodua iti mesua i lalu wanua. Kahawenda inditi, ope-ope mewali nodo au nauliangaahe Yesu, hai mopasilolongamohe paande Pasa.

¹⁷Kaindina, hawemi Yesu hihimbela hai topeguruNa au hampulo hai rodua i hologa au rapasilolongami inona.

¹⁸Tanganda mohuda, mololitami Yesu, Nauli, “Tou mpuu lolitaNgku ide: hadua hangko irikamu au maande sambelake ide-ide, ina mampobaluNa.”

¹⁹Karahadina lolitaNa iti, maparimi lalunda, hai mekunemohe hadua-hadua i Yesu, rauli, “Inee mpuu pae iko Pue?”

²⁰Nahanaihe Yesu, “Au mampobaluNa, iami hadua hangko irikamu au hampulo hai rodua ide au moeme sambela roti hai Iko i hambua tabo.

²¹Tou mpuu, Iko Ana Manusia hangangaa mateNa nodo au tepakanotomi i lalu Sura Malelaha. Agaiana hurewumi tauna au mampobaluNa. Agina tauna iti, ineemi rapoanaka.”

²²Tanganda maande, Yesu moala roti hai mekakae i Pue Ala. Roo nodo, roti iti Nabise-bise hai Nakira-kiraahe topeguruNa, Nauli, “Niala, hai niandemi. Idemi kamba wataNgku.”

²³Roo nodo, Naala worimi hambua paenua anggoro, mekakae i Pue Ala, hai Nahuhuahe. Opemohe maenu hangko i paenua anggoro iti,

²⁴hai Nauliangaahe, “Anggoro ide kamba waheNgku au mabubu i kapateNgku mohuru salanda tauna bosa. WaheNgku iti morohongi dandina Pue Ala au mopahintuwu Pue Ala hai manusia.

²⁵Bona niisa: mepongka ide-ide, anggoro ide barapi ina Kuenu duuna hawe tempona maenuNa anggoro au wou i lalu poparentana UmaNgku”

²⁶Roo indo, monanihe hampaka nani petoia. Karoonda monani, padumohe hangko i wanua laohe i Bulu Saitun.

²⁷Tanganda mempanai lao i Bulu Saitun, Yesu mouliangaahe topeguruNa, “Ikamu ope-ope ina nipalehiNa, lawi ara teuki i lalu Ngkorana Pue Ala node: ‘Toporewu iti ina rapapate, alana dimbana mahawuhe.’

²⁸Agaiana i katuwoNgku hule, ina moioruNa lao i tampo Galilea, hai Kupegiakau indolou.”

²⁹Nauli Peturu, “Kehapiri ope-opehe mopalehiKo Pue, agaiana iko bara!”

³⁰Nauli Yesu, “Kuuliangaako: hangko damani motuturua manu karombelana deade kaindi, talumi belana nusapuakaNa.”

³¹Agaiana hambela mani napakaroho Peturu lolitana, nauli, “Kehapirina mate hihimbela hai Oio, bara mpuu ina kusapuaka kakuisaMu!” Nodo wori pololitanda topeguruNa au ntanina.

³²Roo indo, hawemohe i bonde au rahanga Getsemani. Inditi Yesu mouliangaahe topeguruNa, “Mohudamokau inde. Iko, laoNa hampai mekakae.”

³³Agaiana Peturu, Yakobu hai Yohane Nawawahahe meula Iria. I tempo iti, masusami laluNa hai moradami.

³⁴Nauliangaahe, “Mapari mpuu ide laluNgku, nodomoNa ina mate. Indemokau hampai hai mainga-ingamokau. Ineekau leta!”

³⁵Roo indo, lao karao haodi, molingkudu, motumpa mekakae. I lalu pekakaeNa, merapi bona ane peisa inee molambi kapari iti,

³⁶Nauli, “UmaNgku! Bara ara au bara Nubuku Nubabehi. Nupakaraoa wongkoia kapari au ina morumpaNa ide. Agaiana bara peundeaKu au Kuula, peundeaMuri Uma.”

³⁷Roo indo, lao mbulimi i topeguruNa au talu, Nalambihe tanganda leta. Nauli i Peturu, “Simo! Ba letarikau pae? Mogalori pae hajaa bara nibuku mojaga-jaga?

³⁸Mainga-inga hai mekakaekau bona datikau narumpa pekelo. I lalumi niunde mpuu mobabehi au manoto, agaiana bara nibuku lawi watami batena malede.”

³⁹Hangko inditi, lao mbulimi mekakae. PekakaeNa iti himbela hai pekakaeNa au nguru-nguruna.

⁴⁰Roo indo, mesule mbulimi mampombelambia topeguruNa, hai Nalambi mbulihe tanganda leta anti kamaleluenda. Mewali bara raisa apa au hangangaa rauliangaa Yesu.

⁴¹Lao mbulimi Yesu mekakae i kataluna belana, hai roo indo, mai mbulimi i topeguruNa, Nauliangaahe, “Leta manikau pae? Handami! Hawemi tempona Iko Ana Manusia rapobalu hai rahuhu i tauna au kadake.

⁴²Mearomokau! Laomoke! Peita, oloumi mai tauna au mampobaluNa.”

⁴³Tangana mani Yesu mololita, hawemi Yudasi, hadua hangko i topeguruNa au hampulo hai rodua, hihimbela hai bosa tauna au moanti piho hai pewombe. Tauna iti ratuduhe kapala-kapala tadulako mpenomba, guru agama hai totosaenda to Yahudi bona laohe mohaka Yesu.

⁴⁴Nauliangaa amimohe Yudasi tanda bona raisa kaumbana Yesu, nauli, “Hema au kuangki, iami Yesu. Nihaka hai niantimi, nikampai mpuu.”

⁴⁵Mewali, kahawenda inditi, laomi Yudasi mampohidupaa Yesu, nauli, “Guru!” hai naangki.

⁴⁶Roo indo, rahakami Yesu hai rahilu taiena.

⁴⁷Hangko inditi, hadua tauna au meangka hungku i Yesu mowuka pihona mobata hawina Tadulako Mpenomba Mahile, kana talingana pane maingihi.

⁴⁸Nauli Yesu i tauna au mehaka, “Tauna kadakeriNa pae dide, pane maiNa nihaka moantikau piho hai pewombe?

⁴⁹Alo-alona araNa hihimbela hai ikamu i Souna Pue Ala mepaturo. Moapa hai baraNa nihaka i tempo iti? Agaiana ope-ope ide hangangaa mewali bona tepabukei apa au teuki i lalu Sura Malelaha.”

⁵⁰Roo indo, melangkamohe ope-ope topeguruNa mopalehi Yesu.

⁵¹I tempo iti, ara wori hadua anantomoane au meula i Yesu au bara mehampi, mekomo pea au bula. Tauna iti rahaka wori,

⁵²ido hai tewosuimi komona, hai melangka mengkabela.

⁵³Hangko inditi, raantimi Yesu lao i souna Tadulako Mpenomba Mahile. Inditi, moteruhumohe ope-ope kapala tadulako mpenomba, guru agama hai totosaenda to Yahudi au ntanina.

⁵⁴Peturu meula ngkarao pea duuna hawe i tabangaa souna Tadulako Mpenomba Mahile. Inditi, ia mohuda mamindu hihimbela hai topekampai.

⁵⁵I tempo iti, kapala-kapala tadulako mpenomba hai ope-ope tadulako agama mohaokimohe sabi au mosalai Yesu bona rahuku mate. Agaiana bara ralambi salaNa.

⁵⁶Bosa mpuu sabi au mosalai Yesu, agaiana tongawa dongkonda pea lawi bara himbela lolitanda.

⁵⁷Ara bahangkia au meangka hai au mosabi dongko, rauli,

⁵⁸“Tauna ide, kihadi manguli node: ‘Ina kugero Souna Pue Ala au naaro manusia, hai i lalu talu alona ina kuaro hule au ntanina, au bara nababehi manusia.’ ”

⁵⁹Agaiana i posabinda iti, bara wori himbela lolitanda.

⁶⁰Meangkami Tadulako Mpenomba Mahile i lindonda ope-ope tadulako mouliangaa Yesu, “Barahe pae Nuhanai pesalainda iti Irio?”

⁶¹Agaiana Yesu bara mehana, nauri hampaka lolita. Hambela mani Tadulako Mpenomba Mahile mekune Iria, nauli, “Oio mpuu pae Datu Topehompo, Anana Pue Ala au hintoto ratoia?”

⁶²Nahanai Yesu, Nauli, “Io, Ikomi, hai ina niitaNa, Iko Ana Manusia, mohuda ntanda i koanana Pue Ala au makuasa, hai ina niita woriNa mai mendaulu hangko i suruga i lalu gawu.”

⁶³Kanahadina Tadulako Mpenomba Mahile apa au nauli Yesu, mohepami baduna anti karumpuna, nauli, “Barapi mobundu ara sabi!

⁶⁴Nihadimi lolitaNa au mopapakoi Pue Ala. Noumba pobotusimi?” Rabotusi sambelami katouna Yesu masala hai hintoto rahuku mate.

⁶⁵Hangko inditi, arahe au motinuduhi Yesu, ara worihe au mampopowadi-wadi: ratuko mataNa, rajangguru, hai rauliangaa, “Ee nabi! Uli ba hema au mojangguruKo!” Topekampai mohapa worihe Yesu.

⁶⁶I tempona mani Peturu i tabangaa, maimi hadua towawine au mobago i souna Tadulako Mpenomba Mahile.

⁶⁷Kamoitana Peturu mamindu, napelengge maroa, hai liliu nauliangaa, “Bara pae oio wori hadua rangana Yesu to Nasare olou?”

⁶⁸Agaiana nasapuaka Peturu, nauli, “Bara kuisa apa au nuuli!” Roo indo, melimbami lao hungku i babaka. Motuturuami manu.

⁶⁹Towawine iti moita mbulimi Peturu, hai nauli i tauna au ara inditi, “Ia ide au hihimbela hai Yesu.”

⁷⁰Agaiana mesapuaka mbulimi Peturu. Bara mahae hangko indo, tauna au meangka inditi mouliangaa wori Peturu, “Manoto oio ranganako Yesu! Lawi to Galilea woriko.”

⁷¹Mosumpami Peturu, nauli, “Mate-matena ane kuisa tauna au niuli iti!”

⁷²I tempo iti, motuturuami manu karombelana. Nakatuinaomi Peturu lolitana Yesu au manguli, “Hangko damani motuturua manu karombelana, talumi belana nusapuakaNa.” Ido hai moteriami Peturu monggoro-nggoro.