Read Napu Markus 15 Bible Online

Markus 15 - Napu bible

Markus 15

¹Madondo-dondo, ope-ope tadulako agama hai kapala-kapala tadulako mpenomba hai guru agama hai totosaenda to Yahudi au ntanina himpudumohe bona Yesu rahilu taiena hai raanti lao i lindona Pilatu. Kahawena Yesu inditi,

²mekunemi Pilatu Iria, nauli, “Datunda mpuuKo pae to Yahudi?” Nahanai Yesu, Nauli, “Tou, nodo au nuulimi.”

³Hai ngkaia mani pakana pesalai i Yesu au rapahawe kapala-kapala tadulako mpenomba i Pilatu i tempo iti.

⁴Ido hai mekune mbuli Pilatu i Yesu, nauli, “Barahe pae Nuhanai? Ngkaia pakana au rasalaiaKo.”

⁵Agaiana Yesu bara mau mehana, ido hai napotingkara Pilatu.

⁶Pare-parena i Alo Posusa Pasa, Pilatu mokabaha hadua tauna au ratarunggu, hema pea au raperapi tauna bosa.

⁷I pare iti, ara hadua toratarunggu au meewa i topoparenta, hangana Baraba. Baraba hai rangana mopapatehe tauna i lalu peewanda i topoparenta Roma.

⁸Mewali, moteruhumohe tauna bosa, merapi i Pilatu bona nakabahaahe hadua au ratarunggu nodo au nababehi pare-parena.

⁹Mekunemi Pilatu, nauli, “Noumba? Ba niunde ane kukabahaakau datunda to Yahudi ide?”

¹⁰(Pilatu manguli nodo, lawi naisa: kapala-kapala tadulako mpenomba mohuhuhe Yesu iria anti kamahinanda.)

¹¹Agaiana kapala-kapala tadulako mpenomba mohuweki lalunda tauna bosa bona raperapi Baraba au rakabahaahe.

¹²Hangko inditi, nauli mbuli Pilatu i tauna bosa, “Ane rapana Baraba au kukabahaakau, kupanoumbami tauna ide au niuli datumi to Yahudi?”

¹³Mongangamohe tauna bosa, rauli, “Papate i kau mombehape!”

¹⁴Mekune Pilatu, nauli, “Dake apari au Nababehi?” Agaiana monganga-ngangahe “Papate i kau mombehape!”

¹⁵Pilatu mampeinao mopabukei peundeanda tauna bosa, ido hai nakabahaamohe Baraba. Roo indo, natudumohe surodadona mohepe-hepe Yesu hai pekandangi au modui, hai nahuhuamohe bona rapaku i kau mombehape.

¹⁶Roo indo, surodado moantihe Yesu lao i hologa pebotusia i souna Gubernur, hai mokakiohe ope-ope ranganda.

¹⁷Yesu rabadui hantau badu au malentoro nodo badu datu. Hangko inditi, rababehimi hambua songko hangko i daangkau au modui au nodo songko datu, hai rasongkoia.

¹⁸Roo indo, rapopowoo-woomi, rauliangaa, “KibilaKo, datunda to Yahudi!”

¹⁹Rawombe-wombemi waaNa hai lai, ratinuduhi, hai molingkudumohe motumpa i lindoNa nodo tauna au raadai.

²⁰Karoona rapopowoo-woo, rawosui hulemi badu au malentoro au rabaduia inona, hai rabaduia hulemi hampiNa. Roo indo, raantimi Yesu lao i raoa wanua bona rapaku i kau mombehape.

²¹I tanga rara, mampohidupaahe hadua tauna au ina mesua i wanua. Hangana Simo to Kirene, umanda Aleksander hai Rupus. Surodado to Roma mopari-pari Simo motalondo kau popakuana Yesu.

²²Bara mahae, hawemohe i paidaa au rahanga Golgota, lempona Bulu Banga waa.

²³Inditi, Yesu rapaenu anggoro au ragalo mur,[18] agaiana bara mau moenu.

²⁴Roo nodo, rapakumi Yesu i kau mombehape; hampiNa rakira-kira. Motendehe dadu bona mopakanoto kiranda hadua-hadua.

²⁵Karapakuna Yesu i kau mombehape, tinti hahio madondo.

²⁶I kau popakua i wongko waaNa, rapopatakai pata. I pata iti teuki apa au rasalaia. Node au rauki: DATUNDA TO YAHUDI.

²⁷Ara wori rodua tauna au kadake rapaku i kau mombehape hihimbela hai Ia, hadua ntanda i koanaNa hai hadua ntanda i kabeoNa.

²⁸[Mewali, apa au rababehi iti mopabukei apa au teuki i lalu Sura Malelaha au manguli, “Datu Topehompo rapahimbela hai tauna au kadake.”]

²⁹Tauna au melempo inditi, molili-liliahe waanda mopapakoi Yesu, rauli, “Ee! Nuuli woo ina mogeroKo Souna Pue Ala hai Nuaro hule i lalu talu alona!

³⁰Ane nodo, tulungimide wataMu! MendaulumoKo hangko i kau mombehape iti!”

³¹Nodo wori kapala-kapala tadulako mpenomba hai guru-guru agama mopapakoi worihe Yesu. Mololitahe, hadua hai hadua, rauli, “Tauna ntanina Natulungihe. WataNa haduduaNa bara Nabuku Natulungi!

³²Nauli kaIana Datu Topehompo, Datunda to Isaraeli! Ane nodo, maroa ane mendaulu hangko i kau popakuaNa iti bona taita hai tapoinalai!” Mogalo tauna au rapaku hihimbela hai Ia, mopapakoi worihe Yesu.

³³Pualomi, unga pea makaindi i humalele tampo iti i lalu talu jaa.

³⁴Tinti talu kalumba, meraroami Yesu masisimbuku, Nauli, “Pue AlaNgku! Pue AlaNgku! Moapari hai NupalehiNa?” I lalu basanda to Yahudi, “Eloi, Eloi, lama sabaktani?”

³⁵Arahe bahangkia tauna au meangka hungku i popakuana Yesu mohadi peraroaNa, mewali rauli, “Pehadingi! Ia mokakio nabi Elia.”

³⁶Ara hadua au melangka lao moala lomo, naememi i lalu anggoro mangilu, nawoli i wuntu daangkau, hai napakana humena Yesu, “Pegia, tapeita hampai ba mai mpuu Elia mokabaha hangko i kau mombehape!”

³⁷Hangko inditi, mongangami Yesu masisimbuku, pane opemi inaoNa.

³⁸I tempo iti, rindi bana au tetoe i lalu Souna Pue Ala mahepa ntanga hangko i wongko hawe i woi.

³⁹Tadulako surodado au meangka molindo kau mombehape iti, moita noumba kapatena Yesu. Ido hai nauli, “Tou mpuu Ia ide Anana Pue Ala!”

⁴⁰Ara worihe inditi bahangkia towawine au mampeita ngkarao. I olonda ara Maria Magdalena. Ara wori Maria inanda Yakobu au mangura hai Yoses, hai ara wori Salome.

⁴¹Towawine iti au moula hai motulungihe Yesu i tampo Galilea. Hai bosa mani wori towawine au ntanina au meula i Yesu hangko i Galilea hawe i Yerusale.

⁴²Kalumbami i alo pampasilolongaa, hai mepongka i katampuna alo rapaliami mobago moula ada to Yahudi lawi mepongkami Alo Pengkarooangaa. Mewali,

⁴³maimi hadua tauna au rahanga Yusupu to Arimatea. Yusupu iti, hadua tadulako agama Yahudi au rabila hai au mahaemi mampegia kahawena poparentana Pue Ala i lalunda tauna i dunia. Napengkabaikimi lao i Pilatu mamperapi watana Yesu.

⁴⁴Tingkara Pilatu mohadi Yesu polo mate. Ido hai mokakio tadulako surodado napampekunei ba tou-tou mpuumi mate.

⁴⁵Kanahadina Pilatu lolitana tadulako iti, naiomi pamperapina Yusupu.

⁴⁶Roo indo, laomi Yusupu meholo bana bula, hai liliu lao motaura watana Yesu hangko i kau mombehape, nabungkuhi hai bana iti. Karoona nabungkuhi, laomi nadampa i lalu talumba au rakae i bulu watu, hai mololimi haogu watu napopotuko baba talumba iti.

⁴⁷Maria Magdalena hai Maria inana Yoses moita kaiumbana watana Yesu rawoli.