Read Napu Markus 16 Bible Online

Markus 16 - Napu bible

Markus 16

¹Kaliuna Alo Pengkarooangaa, laomohe Maria Magdalena, Maria inana Yakobu, hai Salome, meholo lana mawongi. Tunggaianda bona laohe molanai watana Yesu.

²Mewali, madondo-dondo i alo Minggu, i pembetona alo, laomohe i talumba.

³I tanga rara molololitamohe, rauli, “Hemami au ina motulungike mololi watu petuko baba talumba iti?” Lawi watu iti mahile. Agaiana kahawenda i talumba, raita watu iti malolimi.

⁵Pesuanda i lalu talumba, moitamohe hadua anantomoane au mohuda ntanda i koana, mebadu bula. Tingkarahe towawine iti moita tauna iti.

⁶Nauli anantomoane iti, “Ineekau tingkara! Kuisa kamohaokimi Yesu to Nasare au rapaku i kau mombehape. Ia tuwo hulemi! Barapi ara inde. Nipeita karadampaaNa.

⁷Laomokau i Peturu hai topeguruna Yesu au ntanina niuliangaahe node: Yesu tuwo hulemi. Moiorumi lao i tampo Galilea, hai Ia ina niita inditi nodo au Nauliangaamokau.”

⁸Melangkamohe towawine iti mopalehi talumba, lawi langa hai tingkarahe. Anti kalanganda, bambari iti bara rapopololita i hema pea.

⁹[Pearona Yesu hangko i kapate madondo-dondo i alo Minggu, nguru-nguruna Ia mopatongawa wataNa i Maria Magdalena. Maria iti, au napakaoha Yesu hangkoia i kanapesuangina pitu seta.

¹⁰Laomi Maria i topeguruna Yesu, nalambihe tanganda moteria hai masusa lalunda. Nauliangaahe, “Pue tuwo hulemi; kuitami inona!” Agaiana ope-ope au napololita Maria iti bara mpuu rapoinalai.

¹²Roo indo, Yesu mopatongawa mbulimi wataNa i rodua topeulaNa au tanganda lumao mesule hangko i Yerusale laohe i boeanda. I tempo iti, lenggeNa Yesu bara nodo biasa.

¹³I pesulenda hule i Yerusale tauna au rodua iti, mopahawe worihe i ranganda apa au mewali. Agaiana bara worihe rapoinalai.

¹⁴Hangko inditi, Yesu mampatongawa worimi i topeguruNa au hampulo hai hadua au tanganda maande. Nakambaroahe lawi makura pepoinalainda hai matua lalunda. Lawi barahe mampoinalai lolitanda tauna au moitamohe Yesu au tuwo hulemi.

¹⁵Nauliangaahe Yesu, “Laomokau i humalele dunia, mopahawe Ngkora Marasa i ope-ope tauna.

¹⁶Hema-hema au mepoinalai Iriko hai rariu, ina tehoremahe hangko i huku dosanda. Agaiana hema au bara mepoinalai batena rahuku.

¹⁷I tauna au mepoinalai, ina Kuweihe kuasa mobabehi tanda kuasa au node: i lalu hangaNgku, ihira ina mampopelohohe seta. Ina mololitahe i lalu basa au bara raisa.

¹⁸Nauri mokingkihe ile, ba maenuhe rasu, agaiana barahe ina moapa-apa. Ane motobohe tauna au mahai, tomahai iti batena ina maoha.”

¹⁹Karoona Yesu mampololitaa topeguruNa, Ia teangkami lao i suruga, hai mohuda ntanda i koanana Pue Ala.

²⁰Hangko inditi, laomohe topeguruNa mopahawe Ngkora Marasa iumba-umba pea. Naporangaihe Pue i lalu bagonda, hai Napakaroho pobambarinda Ngkora Marasa hai tanda kuasa au metingkarai bona tongawa katouna Bambari au raanti.][19]