Read Napu Markus 3 Bible Online

Markus 3 - Napu bible

Markus 3

¹Hambela tempo, mesua mbulimi Yesu i lalu sou penombaanda to Yahudi. Inditi, ara hadua tauna au wara taiena hambali.

²Ara worihe toParisi inditi au mohaoki kanawoana Yesu, ba ina mobago i Alo Pengkarooangaa. Ido hai rakamata liliu apa au ina nababehi Yesu.

³Mololitami Yesu i tauna au wara taiena hambali, Nauli, “Maiko meangka inde i lindo.”

⁴Roo indo, mouliangaahe toParisi, “Moula atura agamanta, apa au peisa tababehi i Alo Pengkarooangaa: mobabehike au maroa ba au kadake? Motulungike ranganta ba mopapateke ranganta?” Agaiana toParisi iti, barahe mau mehana, mandii-ndii peahe.

⁵Membalilimi Yesu mototokihe. Rumpumi hai masusa laluNa anti kamatuana lalunda, hai mouliangaami tauna au wara taiena, “Ona taiemu!” Naona mpuumi taiena hai liliu maoha.

⁶Padumohe toParisi hangko i sou penombaa, hai laohe moteruhu hai taunana Datu Herode. Mohaokihe rara bona mopapatehe Yesu.

⁷Hangko inditi Yesu hai topeguruNahe meangkahe lao i wiwi rano Galilea. Bosa to Galilea meula i Yesu. Bosa wori au hawe hangko i tampo Yudea,

⁸hangko i Yerusale, hangko i tampo Idumea, hangko i ntanda orupena owai Yarade, hai ara wori hangko i wanua Tirus hai Sidon. Bosa ntepuu tauna au mai i Yesu lawi mohadihe ope-ope au Nababehi.

⁹Yesu mopakaoha bosa tomahai, alana momberirimohe tauna lao mohungkuki Yesu bona ratobo. Anti kabosanda tauna, ido hai motudumi topeguruNa mopasilolonga duanga bona rapesawii dati raupi-upi tauna bosa.

¹¹Hawe worihe tauna au napesuangi tokadake. Kamoitanda Yesu, liliuhe molingkudu i lindoNa, hai monganga-ngangahe, rauli, “Oio AnanaKo Pue Ala!”

¹²Agaiana nakontohe Yesu bona inee mpuu rauli-uli kahemaNa.

¹³Roo indo, mempanaimi Yesu lao i tongku-tongkuna, hai mokakio tauna hintoto hai peundeaNa. I kahawenda tauna iti,

¹⁴Napileimi hampulo hai rodua hangko i olonda au Napopewali suroNa, Nauliangaahe, “Kupileikau bona niporangaiNa. Ina Kutudukau lao mopahawe Ngkora Marasa,

¹⁵hai ina Kuweikau kuasa mampopeloho seta.”

¹⁶Idemi hanganda au hampulo hai rodua iti: Simo (au Nahanga Peturu); Yakobu anana Sebedeus; hai Yohane adina Yakobu (Nahangahe, Boanerges—lempona: ‘ana gumpatahe’[4]); roo indo, Andaria, Pilipu, Bartolomeus, Matiu, Tomas, Yakobu anana Alfeus, Tadeus, Simo to Selot, hai Yudasi Iskariot au mampobalu Yesu.

²⁰Roo indo, mesulemi Yesu i sou. Agaiana bosa wori tauna hawe motoleliki, alana Yesu hai topeguruNa barapohe tepaka maande.

²¹Mohadi apa au mewali iti, hawemohe halaluNa mai moala Yesu, lawi rauli Ia magilami.

²²Ara worihe guru agama to Yahudi au hawe hangko i Yerusale. Rauli guru agama iti, “Ia napesuangi Beelsebul, datu seta. Datu seta itimi au mowei kuasa mampopeloho seta.”

²³Ido hai Nakakiohe Yesu, hai Napololitaahe bahangkia pakana ngkora pandiri, Nauli, “Peisa pae seta mampopeloho hangka setana?

²⁴Ane pandirina ara hambua kadatua, hai tauna bosa i lalu kadatuana mosisala liliuhe hai mombeewahe, kadatua iti bara ina mantaha.

²⁵Ane tauna hantina mobungka-bungka liliuhe, bara wori mantaha potina iti.

²⁶Nodo wori i kadatua seta: ane Datu Tokadake mampopeloho hangka tokadakena, lempona seta moewa hangka setana, alana kadatuanda magero.

²⁷Datu Tokadake peisa rapandiri nodo tauna au maroho. Ane mesuake i lalu souna tauna au maroho hai mampeinaoke morampaki ihi souna, hangangaa tahilu hampai ampu sou iti, hangko peisarike morampaki ope-ope anu-anuna. Nodo wori, ane Iko mampopeloho seta, lempona, Kunangimi Datu Tokadake.

²⁸Mewali bona niisa: ope-ope dosa hai lolita pesapuaka peisa raampungi.

²⁹Agaiana hema au mosapuaka Inao Malelaha, barapi ara ampungina. Babehia iti ina rasalai hawe i hae-haena.”

³⁰Yesu Mololita nodo, lawi ara au manguli Yesu napesuangi tokadake.

³¹Bara mahae hangko indo, hawemi inana hai adinahe Yesu meangka i raoa sou. Motuduhe tauna lao mokakio Yesu, lawi rapeinao mololita Iria.

³²I tempo iti, tauna bosa au motoleliki Yesu, mololitahe, rauli, “Guru, inaMu hai adiMuhe, arahe i raoa maiKo rahaoki.”

³³Mekune Yesu, “Hema inaNgku? Hemahe halaluNgku?”

³⁴Roo indo, Yesu mototokihe tauna au motoleliki, Nauli, “Ihira idemi, inaNgku hai halaluNgku.

³⁵Lawi hema-hema au mobabehi peundeana Pue Ala, ihirami halaluNgku hai ihirami inaNgku.”