Read Napu Markus 4 Bible Online

Markus 4 - Napu bible

Markus 4

¹Hambela tempo, mepaturo mbulimi Yesu i wiwi rano Galilea. Bosa mpuu tauna teruhu motoleliki Yesu. Ido hai laomi Yesu mesawi i duanga, hai mohuda inditi, hai tauna bosa meangkahe i wiwi rano.

²Ngkaia pakana au Napaturoahe i lalu ngkora pandiri, Nauli,

³“Pehadingi! Ara hadua tauna au lao mohawu.

⁴I pohawuna iti, ara tinuda au manawo i rara. Hawehe tadasi, motilo tinuda iti duuna ope.

⁵Ara wori au manawo i tampo au mowatu-watu, haodi pea tampona. Tinuda iti holiga mpuu tuwo, lawi manipi tampona.

⁶Agaiana ane kealo, malaumi duuna bangi, lawi bara kaladu uakana.

⁷Ara wori au manawo i lalu dui. Dui mobalungkuhi tinuda iti, alana bara mowua.

⁸Ara wori tinuda au manawo i tampo au marudu. Tinuda iti tuwo maroa hai kamahile-hilea, alana mowua. Ara au talu pulona belana hangko i tinudana, ara au ini pulona belana, ara wori au hangatu belana hangko i tinudana.”

⁹Roo mopahawe ngkora pandiri iti, Nauliangaahe, “Hema au motalinga, nipehadingi maroa!”

¹⁰Roo indo, tangana Yesu haduduana, topeguruNa au hampulo hai rodua hai bahangkia tauna ntanina au meula Iria maihe mekune rauli, “Apari lempona ngkora pandiri inona?”

¹¹Nauli Yesu, “Hangkoia, noumba poparentana Pue Ala i dunia tewuniangi mani. Ide-ide rapopaisaamokau, agaiana i tauna ntanina Kupahaweahe hai ngkora pandiri,

¹²bona tepabukei au teuki i lalu Sura Malelaha node: Raitato, agaiana bara raisa lempona apa au raita. Rahadito, agaiana bara raisa tunggaiana apa au rahadi. Mewali, barahe mesule i Pue Ala, hai dosanda bara teampungi.”

¹³Roo indo, Yesu mouliangaahe topeguruNa node, “Ane ngkora pandiri inona barapi niisa lempona, noumbami kaniisana molempo ngkora pandiri au ntanina?

¹⁴Topohawu, iami au mopahawe Ngkorana Pue Ala.

¹⁵Tauna peisa rapandiri nodo iba pakana tampo: Arahe au rapandiri nodo tampo au mapempe, iami tauna au matua lalunda. Mohaditohe Ngkorana Pue Ala, agaiana Datu Tokadake mopawuli lalunda, alana Ngkorana Pue Ala au rahadimi iti bara rapailalu.

¹⁶Ara worihe tauna au peisa rapandiri nodo tampo au mowatu-watu. Kamohadinda Ngkorana Pue Ala, rapokatana mpuu.

¹⁷Agaiana Ngkora iti bara mouaka i lalunda, ido hai bara mantaha pepoinalainda. Ane rapopeahi-ahihe ba rapamaparihe anti pepoinalainda i Ngkorana Pue, usulihe hai barapohe mepoinalai.

¹⁸Ara worihe tauna au rapandiri nodo tampo au nakatuwoi hehi modui. Mohadi mpuumohe Ngkorana Pue Ala,

¹⁹agaiana mampekiri liliu peahe katuwonda i lalu dunia ide. Tauna iti mampeinao peahe morampu anu-anu dunia hai mampopengaa peundeana lalunda. Ido hai Ngkora iti bara mobundu i lalu katuwonda.

²⁰Ara wori tauna au rapandiri nodo tampo au marudu. Kamohadinda Ngkorana Pue Ala, liliu radoko. Rapailalu ntepuu hai rapopobundu, alana Ngkora iti mowua i lalu katuwonda. Ara au mowua talu pulona belana hangko i tinudana, ara wori au ini pulona belana, ara wori au hangatu belana hangko i tinudana.”

²¹Nauli mbuli Yesu, “Ara pae tauna au mohuwe hulo i lalu sou hai nabobongi ba nawoli i woi koina? Bara ara. Hulo batena rawoli i paidaana bona pewangkana raita ope-ope tauna i lalu sou.

²²Nodo wori ope-ope paturoNgku au tewuniangi ina tepambole, hai ope-ope lolitaNgku au rawuniangi batena ina tongawa.

²³Hema au motalinga, pehadingi maroa!”

²⁴Mololita mbuli Yesu, Nauli, “Nipailalu apa au nihadi ide. Lawi ane ngkaia au nihadi hai nipeulai, ngkaia wori au ina napakanotoakau Pue Ala, ba melumbuto mani hangko inditi.

²⁵Tauna au mampoinalai Ngkorana Pue Ala, rapakanoto lalunda bona tetambai au ara irihira. Agaiana tauna au barahe mampoinalai Ngkorana Pue Ala, nauri arami haodi au raisa, hangangaa raala hule.”

²⁶Mololita mbuli Yesu, Nauli, “Ane hawemi poparentana Pue Ala i dunia, pewalina nodo ngkora pandiri ide: hadua tauna lao motudai bondena.

²⁷Maroa kaindi ba mabaa, maroa i tempona maturu ba i tempona mearo, tinudana iti tuwo liliu duuna mahile. Agaiana bara naisa topobonde noumba katuwona tinudana iti hai pane mahile.

²⁸Tampo haduduana au mampopembeti. Nguru-nguruna tawena hai kauna au mesupa, hangko inditi howumi duuna moihi.

²⁹Ane mangkami, laomi ampuna mampepare, lawi temponami rapepare.”

³⁰Nauli Yesu, “Ane poparentana Pue Ala hawe i dunia, peisa tapandiri nodo apa?

³¹Poparentana Pue Ala nodo lihu hahawi[5] i lalu ngkora pandiri ide: Ara hadua tauna au mohawu lihu hahawi i bondena. Lihu hahawi iti manete ntepuu, kamanetena meliu hangko i ope-ope lihu au peisa rahawu.

³²Agaiana ane rahawu, hai tuwo, meliu kapangkana hangko i tuda-tuda au ntanina. Tuwo nodo hampoa kau au peisa rapoharai hai rapeongai tadasi.”

³³Hai ngkaia mani ngkora pandiri au napake Yesu mopahawe Ngkorana Pue Ala i tauna bosa. Napaturohe moula karabukuna moisa lempona.

³⁴Bara ara au Napaturoahe ane bara hai ngkora pandiri. Agaiana ane Ia pea hihimbela hai topeguruNa, hangko Napakanotori lempona ope-ope.

³⁵Kalumbami, mololitami Yesu i topeguruNa, Nauli, “Laomoke ntanda i orupena rano.”

³⁶Lawi Yesu ara amimi i lalu duanga, meangkawomohe topeguruna i duanga iti, mopalehihe tauna bosa au i wiwi rano. Ara wori bahangkia duanga ntanina inditi au meula.

³⁷Bara mahae hangko indo, hawemi himburu kebuu. Duanganda narumpa balumba, alana duanganda ina buke owai.

³⁸I tempo iti, Yesu tangana leta i ale au ara ntanda i taleu. Laohe topeguruNa morua, rauliangaa, “Guru! Moapari hai leta peaKo? Ina marugike!”

³⁹Mearomi Yesu, liliu mokambaroa himburu hai balumba, Nauli, “Pengkaroo himburu! Tindamoko balumba!” Mengkaroo mpuumi himburu, hai unga pea lene rano.

⁴⁰Roo indo, Yesu mouliangaahe topeguruNa, “Moapari hai langakau? Moapari hai bara maniNa nipoinalai?”

⁴¹Tingkara mpuuhe topeguruNa, hai molololitahe hadua hai hadua, rauli, “Hemari tauna ide! Mogalo himburu hai balumba moula hawaNa!”