Read Napu Markus 5 Bible Online

Markus 5 - Napu bible

Markus 5

¹Hangko inditi, laomohe Yesu hai topeguruNa ntanda i orupena rano i tampo Gerasa.

²Kahawenda i tampo Gerasa, maimi hadua tauna au napesuangi tokadake mampohidupaa Yesu.

³Tauna iti maida pearai i talumba. Mogalori hai rante, bara rabuku tauna mohilu, lawi rumihi kamarohona.

⁴Bosami belana bitina hai taiena rahilu, agaiana koloro hai rante batena pea nabotu-botu. Ido hai bara ara hadua au pebai mohaka.

⁵Hahangaloa hai hahambengia, ia molulumao i talumba hai i tongku-tongkuna, monganga-nganga hai mobelai watana hai watu.

⁶Karao mani Yesu, tauna iti moitami Yesu, hai melangka lao Iria, pane molingkudu menomba i lindoNa.

⁷Yesu mowura seta au mampesuangi tauna iti, Nauli, “Melohomoko hangko i tauna ide!” Monganga tauna iti, nauli, “Yesu Anana Pue Ala au i suruga! Apari mai Nuala? Kuperapi bona modandiKo i lalu hangana Pue Ala, barana ina Nupopeahi-ahi.”

⁹Yesu mekune iria, Nauli, “Hema hangamu?” Nahanai, “Hangangku Legion, lawi bosangkai.”[6]

¹⁰Seta iti merapihe i Yesu bona ineehe Napopeloho hangko i tampo iti.

¹¹Bara karao hangko inditi, arahe boe hambanguna tanganda masui i tampeka.

¹²Seta iti merapihe i Yesu, rauli, “Tudungkai mesua i boe olouhe.”

¹³Nauli Yesu, “Laokau!” Roo indo, meloho mpuumohe seta iti liliu mesua i boe. Pesuanda i boe, melangkamohe boe iti hai mengkanawohe i rano, pane matehe maliso. Kabosanda ba aratohe pae rosabu baana.

¹⁴Karaitana tauna au mokampai boe apa au mewali, melangkamohe lao i boea hai i bonde au hungku mopahawe apa au raita. Ido hai maimohe ampu boea mampeinao moita apa au mewali iti.

¹⁵Kahawenda i Yesu, moitahe tauna au napesuangi isabuna tokadake inona, mohudami nodo biasa, mebadu, hai manotomi pekirina. Ido hai langamohe.

¹⁶Tauna au moita apa au nababehi Yesu inona, motuntuahe tauna au hawe kana i apa au mewali i tauna au napesuangi tokadake, hai apa au mewali i boenda.

¹⁷Roo indo, ampu boea iti mopari-parihe Yesu bona padu hangko i tamponda. Mewali, mesawi mbulimi Yesu i lalu duanga.

¹⁸Tangana Yesu mesawi i duanga, tauna au napesuangi tokadake inona merapi bona meula Iria.

¹⁹Agaiana bara napaliu Yesu, Nauliangaa, “Mesulemoko lao i soumu, nuuliangaahe hambomboeamu apa au nababehi Pue Ala irio hai noumba kamaroana laluNa irio.”

²⁰Lao mpuumi i tampo Dekapolis[7] mopahawe apa au nababehi Yesu iria. Tingkarahe tauna au mohadi bambari iti.

²¹Mesule mbulimi Yesu lao ntanda i orupena rano Galilea. I kahaweNa, liliu ratoleliki bosa tauna. TangaNa mani i wiwi rano,

²²hawe hadua tadulako sou penombaanda to Yahudi, hangana Yairus. Kamoitana Yesu, molingkudumi i lindona Yesu

²³merapi tulungi, nauli, “Anangku towawine ina matemi. Laoke i soungku, Nupetobo bona maoha hai batena pea woia tuwo.”

²⁴Meulami Yesu i tauna iti, hai bosa tauna meula duuna Yesu barapi peisa mokale.

²⁵I olonda tauna bosa, ara hadua towawine au hampulomi hai rompare motorare liliu, bara mengkangkaroo.

²⁶Bosami belana rapakulii sando, duuna ope ihi souna napobalu napopobaiari. Agaiana bara mau maoha, karurumihiari hakina.

²⁷Kanahadina apa au rapololita tauna kana i Yesu, nauli laluna, “BaduNa pea kupetobo, hangangaa maohana!” Mewali mengkalumpiimi i olonda tauna bosa mohungkuki Yesu hangko i taleu, hai natobo mpuumi wuntu baduNa.

²⁹I kanatobona, unga pea teompo wahena. Nahadi maoha mpuumi.

³⁰I tempo iti wori, nahadi Yesu ara kuasa au mesuwu hangko Iria. Membalilimi i tauna bosa hai mekune, Nauli, “Hema au motobo baduNgku?”

³¹Rahanai topeguruNa, “Guru, bosa ntepuu tauna au mombeupi-upi mogaguKo. Moapari hai Nupekune hema au motoboKo?”

³²Agaiana Yesu membalili mantoleli mohaoki tauna au motobo baduna.

³³Naisa towawine iti apa au mewali i watana. Moradami anti kalangana, ido hai mai molingkudu i lindona Yesu mopangaku apa au nababehi.

³⁴Yesu mouliangaa towawine iti, “AnaNgku! Maohamoko lawi mepoinalaiko Iriko. Mesulemoko maroa-roa. Maohamoko, barapi ara hakimu.”

³⁵Tangana mani Yesu mololita, hawemohe bahangkia suro hangko i souna Yairus au mouliangaa Yairus, “Tua, anamu mepalehimi. Ineemoko mopakasusa Guru.”

³⁶Kanahadina Yesu apa au rauli suro iti, Ia mololita i Yairus, Nauli, “Ineeko langa! Nupoinalai peamoNa!”

³⁷Napaliliumi Yesu polumaoNa agaiana bara mopaliu tauna bosa meula Iria, batena pea Peturu, Yakobu hai Yohane adina.

³⁸KahaweNa i souna Yairus, Yesu moita bosa tauna au mogewo-gewo hai rumihi poterianda.

³⁹PesuaNa i lalu sou, Nauliangaahe, “Moapari hai mogewo-gewokau hai rumihi poteriami? Ia bara mate. Leta pea.”

⁴⁰Karahadina, raele-eleri. Hangko indo, Yesu motuduhe ope-ope tauna meloho hangko i lalu sou, pane mesuami i paturuana anangkoi iti hihimbela hai tosaena anangkoi iti, hai topeguruNa au talu.

⁴¹(Tinuwuna anangkoi iti hampulo hai rompare.) Yesu mokingki taiena anangkoi iti, hai Nauliangaa, “AnaNgku, mearomoko!” I lalu basanda to Yahudi, nodemi lolitaNa, “Talita kum!” Mearomi anangkoi iti hai liliu molumao. Tingkara mpuumohe ope-ope tauna au moita.

⁴³Agaiana Nakontohe Yesu, Nauli, “Inee nipopololita apa au hangko mewali ide.” Hai Nauliangaahe, “Nipaande anangkoi ide.”