Read Napu Markus 7 Bible Online

Markus 7 - Napu bible

Markus 7

¹Hambela tempo, arahe toParisi hai guru agama Yahudi au hangko i Yerusale laohe mampohidupaa Yesu.

²Tauna iti moitahe bahangkia topeguruna Yesu au maande agaiana barahe hampai memando moula adanda to Yahudi.

³Lawi toParisi, nodo worihe to Yahudi ntanina bara manihe maande ane bara manihe memando moula ada, anti pokingkinda adanda toiorunda.

⁴Ane mesulehe hangko i pobalu-balua, moula adanda hangangaa mendoihe hampai hangko damanihe maande. Hai ngkaia mani ada au radoko hangko i toiorunda au rapeulai ntepuu, pandirina: ada mpobahoi mangko, kori hai anu-anu ntanina au rababehi hangko i tambaga.

⁵Ido hai toParisi hai guru-guru agama iti mekunehe i Yesu, rauli, “Moapari hai topeguruMu barahe mampeulai adanda toiorunta? Maandehe, agaiana barahe hampai memando.”

⁶Nahanaihe Yesu, Nauli, “Ane ikamu, i raoana pea peulami i Pue Ala! Tou mpuu lolitana nabi Yesaya hangkoia kana irikamu au manguli node: Nauli Pue Ala: ‘Tauna iti, i humenda pea mobilaNa, agaiana lalunda karao hangko Iriko.

⁷Bara mobundu penombaanda Iriko, lawi paturonda hangko i manusia pea, bara paturo hangko Iriko.’

⁸Mewali, mokingki manirikau ada manusia panekau mampeulai hawana Pue Ala.”

⁹Hangko inditi, nauliangaa mbulihe Yesu, “Mapande mpuukau mopakarao hawana Pue Ala hangko i katuwomi bona adami pea haduduami au nipeulai.

¹⁰Pandirina, i lalu Aturana Musa teuki node: ‘Bila umamu hai inamu.’ Hai ‘Hema au motunda-tunda umana ba inana hangangaa rapapate.’

¹¹Agaiana ikamu mepaturokau node: Ane hawehe tosaemi merapi tulungi, peisahe niuliangaa node: ‘Apa au ina kuweikau, kupopenombami i Pue Ala.’ Ane nodo paturomi mohombokimokau motulungi tosaenda.

¹³Mewali hai paturomi haduduami au nidoko hangko i toiorumi hai nipaturoahe tauna, mogewomokau Ngkorana Pue Ala, hai ngkaia mani babehiami au kadake.”

¹⁴Roo indo, Yesu mokakio mbulihe tauna bosa, Nauliangaahe, “Nipehadingi maroa bona niisa:

¹⁵kehapiri mampopengaa taande, bara iti au mopakedaike i peitana Pue Ala. Babehia au mesupa hangko i lalunta, itiri au mopakedaike i peitana Pue Ala.

¹⁶Mewali, hemakau au motalinga, nipehadingi maroa!”

¹⁷Roo indo, Yesu mopalehi tauna bosa, hai mesua i lalu sou. Mekunehe topeguruNa Iria apa tunggaiana ngkora pandiri inona.

¹⁸Nauliangaahe, “Bara wori pae niisa lempona? Paande au mesua i lalu nganganta, bara iti au mopakedaike i peitana Pue Ala.

¹⁹Paande au mesua iti bara mopakedai pekirinta. Lawi paande iti mesua pea i lalu tainta, hai hangko inditi liliu tatende.” Hai lolita iti, Napakanotomi Yesu kadana ara paande au rapalia.

²⁰Nauliangaa mbulihe, “Agaiana babehianta, itiri au peisa mopakedaike i peitana Pue Ala, lawi babehianta mesupa hangko i lalunta.

²¹Lawi hangko i lalunta, mesupa hinangka pekiri au kadake, alana arahe au mobabehi sala i towawine ba tobalilo, arahe au manangka, mepapate,

²²mebualosi, mampokaelu anu-anuna rangana, hai au mobabehi mampopengaa au kadake. Ara worihe au mepakanawo, nakuasai peundeana laluna au kadake, mahina, mepakadake, mampemahile, hai bara mau modoko paturo.

²³Ope-ope babehia au kadake iti mesupa hangko i lalunta. Itimi au mopakedai tauna i peitana Pue Ala.”

²⁴Roo indo, meangkami Yesu hangko i tampo Galilea lao i tampo au hungku i wanua Tirus. KahaweNa indo, Ia liliu mesua i lalu sou lawi bara Naunde raisa tauna kahaweNa. Agaiana kahaweNa bara peisa rawuniangi.

²⁵I boea iti, ara hadua towawine au anana, napesuangi tokadake. Kanahadina towawine iti kaarana Yesu i boea iti, maimi Iria molingkudu i lindoNa merapi tulungi, nauli, “Popelohoa wongkoia tokadake au mesawi i anangku!” Towawine iti, bara to Yahudi, ia hangko i tampo Fenisia au ara i propinsi Siria.

²⁷Ido hai nauli Yesu iria, “Pogiangaahe hampai anangkoi maande hawe mabuhu. Bara maroa moala paande anangkoi, hai rawei dike.”[8]

²⁸Mehana towawine iti, nauli, “Tou Pue, agaiana dike au ara i woi meja paandea, moande worihe wuta hangko i paandena anangkoi.”

²⁹Hangko indo, mololitami Yesu, nauli, “Ane nodo lolitamu, tongawa hangko inditi, kamarohona pepoinalaimu! Mesulemoko, lawi tokadake au mampesuangi anamu melohomi.”

³⁰Mesulemi towawine iti. Hawe i sou, moita anana i koi, maroa-roami lawi tokadake au mampesuangi melohomi.

³¹Hangko indo, Yesu mopalehi Tirus hai mopaliliu polumaoNa melempo i wanua Sidon, hai mesule hule lao i rano Galilea, hawe i tampo Dekapolis.

³²Inditi, arahe tauna au moanti hadua tobongo au bara wori peisa mololita. Merapihe i Yesu bona tauna iti natobo.

³³Yesu moanti tauna iti megaaki hangko i olonda tauna bosa. Roo nodo, Napopesuami karaweNa i talingana tobongo iti pontimali, motinudu, hai motobo dilana tauna iti.

³⁴Roo indo, mengoami Yesu i langi, hai modii inaona, Nauli, “Tebungkahimi!” (I lalu basanda to Yahudi, Nauli node, “Efata!”)

³⁵Liliu mehadi mpuumi tauna iti, hai maluntumi dilana. Peisami mololita.

³⁶Hangko indo, Yesu mokontohe tauna bosa bona inee rapopololita i hema pea apa au mewali iti. Kehapirihe Nakonto, bambari iti batena pea rapopololita.

³⁷Tingkara mpuuhe tauna bosa, rauli, “Hinangka au Nababehi, maroa haha. Tauna au bongo Napakaoha! Tauna au bara peisa mololita, mololitamohe!”