Read Napu Lukasi 1 Bible Online

Lukasi 1 - Napu bible

Lukasi 1

¹Teopilu au kubila, bosa tauna mopari-pari mouki tuntukana au mewalimi i olonta.

²Au rauki i lalu suranda iami au rapahaweamoke tauna au moita mata apa au mewali hangko i nguru-nguruna, hai tauna iti mewalihe topobambari Ngkora Marasa.

³Mewali, karoona kuparesa maroa hinangka au mewali hangko i pepongkana, nauli lalungku agina mouki worina hambua sura bona kupakanotoako tuntukana moula pombeusuna.

⁴Tunggaiaku bona nuisa ntepuu apa au roomi rapaturoako.

⁵Tempona mani Datu Herode moparenta i tampo Yudea, ara hadua tadulako mpenomba, hangana Sakaria. Sakaria iti hantina-ntinahe hai tadulako mpenomba pemuleana Abia. Hangana towawinena, Elisabet, pemuleana Tadulako Mpenomba Mahile Haruni.

⁶Tohamboko iti, manoto babehianda i peitana Pue Ala, lawi hangko i lalunda mpuu mampeulaihe ope-ope atura hai parentana Pue Ala.

⁷Agaiana, barahe moana, lawi Elisabet lalo hai saemohe.

⁸Hawemi temponda Tadulako Mpenomba pemuleana Abia mampopolumao bagona Pue Ala, Sakaria rapakana mobago i Souna Pue Ala.

⁹Moula adanda, raundi bona manoto kahemana au tepilei mesua i lalu Souna Pue Ala mointu dupa. Au molambi iami Sakaria.

¹⁰Mewali, tanganda tauna bosa mekakae i raoa, mesuami Sakaria i lalu Souna Pue Ala lao mointu dupa.

¹¹I tempo iti, hadua malaekana Pue Ala mopatongawa watana iria. Malaeka iti meangka ntanda i koanana meja pointua dupa.

¹²Kanaitana Sakaria malaeka iti, tingkarami hai langa.

¹³Nauli malaeka iti iria, “Ineeko langa, Sakaria, lawi pekakaemu nadokomi Pue Ala. Elisabet towawinemu ina moana hadua tobalilo. Anangkoi iti hangangaa nuhanga Yohane.

¹⁴Anangkoi iti ina nupokatana mpuu, hai i karapoanakana, ina rapokatana wori bosa tauna ntanina.

¹⁵Ia ina mewali tauna au mahile tuwona i peitana Pue Ala. Ia bara ina maenu apa au melangui. Hai mepongka i karapoanakana, ina nakuasai Inao Malelaha.

¹⁶Hai i pepaturona, ia ina monini bosa to Yahudi bona mepoinalai hulehe i Pue Ala au rapenombai toiorunda hangkoia.

¹⁷Anamu iti, ina mewali suro au hawe ioru hangko i Pue. Kamarohona hai kuasana nodo nabi Elia hangkoia. Anti kuasana hai pepaturona, ia ina mopahintuwu anangkoi hai umanda. Hai tauna au barahe meula i Pue ina nanini hule i rara au manoto. Ope-ope au nababehi iti, ina mopasilolonga lalunda tauna bosa bona motarimahe Pue.”

¹⁸Nauli Sakaria i malaeka, “Noumba kakuisana katouna au nuuli iti? Lawi saemona. Apa mani towawinengku, sae ntepuu worimi.”

¹⁹Nahanai malaeka, “Iko, Gabriel. Meangkana i lindona Pue Ala mampegia hawaNa. Iami au motuduna mai mopahaweako bambari au maroa ide.

²⁰Apa au kuuliangaako ide batena ina mewali ane hawe tempona. Agaiana anti kadana nupoinalai lolitangku, mepongka ide-ide, barapoko peisa mololita duuna tepabukei apa au kuuli ide.”

²¹Tangana Sakaria i lalu Souna Pue Ala, tauna bosa mangingimohe mepegia. Rapowuli moapari hai mahae gaga i lalu Souna Pue Ala.

²²Pesuwuna Sakaria i raoa, ia barapi peisa mololita, mekawe-kawe pearai. Ido hai tongawami i tauna bosa, ara au napetudungia Pue Ala i lalu SouNa.

²³Hopomi tempona mobago i Souna Pue Ala, mesulemi Sakaria lao i boeana.

²⁴Bara mani mahae hangko indo, mantimi mpuumi Elisabet towawinena. Lima wulana kamahaena, Elisabet mengkatuhu pea i lalu souna. I tempo iti, nauli,

²⁵“Au mewali ide, nababehiana Pue! Ide-ide Nawati worimona bona moanana, barapona maea.”

²⁶Handami ini wulana Elisabet mantimi, Pue Ala motudumi malaeka Gabriel lao i boea Nasare i tampo Galilea

²⁷bona mampohidupaa hadua anantowawine au rahanga Maria. Anantowawine iti, momanu hai hadua anantomoane au rahanga Yusupu, pemuleana Datu Daudi.

²⁸Kahawena malaeka iti i Maria, mololita nauli, “Tabea. Oiomi au napilei Pue Ala molambi pewati! Pue Ala au mamporangaiko!”

²⁹Tingkara Maria mohadi lolitana malaeka, hai napekiri mpuu apa lempona lolitana iti.

³⁰Nauli mbuli malaeka iria, “Ineeko langa, Maria, lawi oio au napilei Pue Ala molambi pewati.

³¹Ina mantimiko, hai ina moanako hadua tobalilo au hangangaa nuhanga Yesu.

³²Ia ina mahile tuwoNa, hai Ia ina rauli Anana Pue Ala au melumbu kuasaNa hangko i ope-ope au rapenombai. Hai ina naangka Pue Ala mewali Datu, hai Napopohuda i pohudaana Datu Daudi, toioruNa.

³³Anamu iti ina moparenta to Yahudi hawe i hae-haena, hai poparentaNa bara ina mokahopoa.”

³⁴Nauli Maria i malaeka iti, “Noumba pane peisa mewali apa au nuuli iti? Lawi bamani wongkoia motambi.”

³⁵Nahanai malaeka, “Inao Malelaha ina mendaulu irio, hai kuasana Pue Ala ina mobobongiko. Ido hai anangkoi au ina nupoanaka iti, ina rauli Anana Pue Ala au Malelaha.

³⁶Pehadingi: halalumu Elisabet, au sae ntepuumi hai au rauli lalo, ide-ide mantimimi ini wulana!

³⁷Lawi ane Pue Ala, bara ara au bara Nabuku Nababehi.”

³⁸Nauli Maria, “Ane nodo, mengkoruna i hawana Pue Ala bona tunggaiaNa iriko ina mewali moula apa au nuuliangaana iti.” Roo indo, padumi malaeka iti mopalehi Maria.

³⁹Hangko indo, meangkami Maria lao i tampo Yudea i hambua boea au ara i tongku-tongkuna.

⁴⁰Kahawena i souna Sakaria, mesuami hai motabe Elisabet.

⁴¹Kanahadina Elisabet petabena Maria, mokalemi anangkoi au nakantimia, hai Elisabet nakuasai Inao Malelaha,

⁴²pane nauli masisimbuku, “Oiomi au nawati Pue Ala hangko i ope-ope towawine, hai anangkoi au nukantimia iti nawati wori Pue Ala.

⁴³Oiomi, inana Pue au kupenombai! Hemana wongkoia pane maina nusondaki?

⁴⁴Kakuhadina petabemu inona, liliu mokale anangkoi au kukantimia lawi rumihi kamatanana.

⁴⁵Anti pepoinalaimu i lolitana Pue, morasi mpuuko, lawi apa au Nauliangaako, batena mewali!”

⁴⁶Nauli Maria, “Hangko i lalungku mpuu motoia Pue.

⁴⁷Matana mpuu lalungku lawi Pue Ala mohoremana hangko i huku dosangku.

⁴⁸Nakatuinaomona, iko hawiNa au meahi-ahi. Mepongka ide-ide, ope-ope tauna ina mangulihe kaikonami au molambi pewati hangko i Pue Ala.

⁴⁹Lawi Pue Ala au makuasa motudungiamona kamahilena kuasaNa. Malelaha mpuu hangaNa!

⁵⁰Napopaitami ahiNa i ope-ope tauna au mengkoru Iria, duuna hawe i pemuleanda.

⁵¹Anti kamarohona kuasaNa, Ia mobabehi apa au maroa ntepuu. Tauna au mampemahile, Nahawu-hawuhe bona tunggaianda bara mewali.

⁵²Datu Napopendauluhe hangko i lantinda, Agaiana tauna au mengkaiwoi, Napaiwongkohe.

⁵³Tauna au marimi, Napamabuhuhe i paka-pakana paande au maroa. Agaiana topebuku, Nawura matahe hai bara ara au raanti.

⁵⁴Pue Ala mopabukei dandiNa au Nadandi hangkoia i toiorunta Burahima hai i pemuleana. Ido hai ikita to Isaraeli Natulungike, hai Napopaitaake ahiNa hawe i hae-haena.”

⁵⁵

⁵⁶Maria maida hihimbela hai Elisabet ba arato pae talu wulana kamahaena, hangko mesuleri lao i boeana.

⁵⁷Hawemi tempona, Elisabet moanami hadua tobalilo.

⁵⁸Hintonggina hai halaluna mohadimohe noumba Pue motudungia ahiNa i Elisabet i kaNaweina anana iti; ido hai matana worihe hihimbela hai Elisabet.

⁵⁹Handami ualu alona tinuwuna anana Sakaria iti, maimohe ope-ope hintongginda hai halalunda mobabehi ada mpetile moula adanda to Yahudi. Tunggaianda bona anangkoi iti rahanga Sakaria moula hangana umana.

⁶⁰Agaiana nauli inana, “Inee hangana umana au tapake! Hangangaa rahangari Yohane.”

⁶¹Mehanahe, rauli, “Agaiana bara mani ara halalumi au rahanga nodo!”

⁶²Ido hai mokawemohe Sakaria bona rapekune iria ba hema au naunde rapopohanga anana.

⁶³Sakaria mamperapi watu poukia hai nauki, “Hangana Yohane.” Tingkaramohe ope-ope.

⁶⁴I tempo iti, unga pea peisa mololita, pane motoiami Pue Ala.

⁶⁵Tingkara mpuumohe ope-ope hintongginda, hai bambari iti tehawukami i tongku-tongkuna i tampo Yudea.

⁶⁶Bambari au tehawuka iti, rapailalu ope-ope tauna au mampehadingi. Ido hai rauli, “Apa au ina nababehi anangkoi iti?” lawi tongawami kuasana Pue Ala ara iria.

⁶⁷Sakaria, umana anangkoi iti, nakuasaimi Inao Malelaha, hai mohowara lolita ide au hangko i Pue Ala, nauli,

⁶⁸“Ikita to Yahudi, tatoiami Pue Ala Amputa! Lawi Iami au maike mosondaki, ikita anaNa, hai Iami au mokabahake hangko i iwalinta.

⁶⁹Naweimoke hadua Datu au makuasa au peisa mohoremake, Iami pemuleana Datu Daudi, hawiNa.

⁷⁰Hangkongkoiapi dandina Pue Ala rapahawe nabi-nabi au malelaha. Pue Ala modandi

⁷¹kaina Nakabahanta hangko i iwalinta hai hangko i kuasanda tauna au mokahihike.

⁷²Pue Ala motudungia ahiNa i toiorunta, hai mopabukei dandiNa au malelaha au Nadandi i toiorunta hangkoia.

⁷³Maroho mpuu podandiNa i toiorunta, lawi Nadandi hai mosumpa i Burahima, bona ikita au mewali pemuleana ina Nakabahake hangko i iwalinta. Ina mewalike taunaNa au malelaha au mopakatana laluNa, hai ina Napaaraake rara mengkoru Iria dati ara kalanganta hawe i kahopoana tuwonta.”

⁷⁴

⁷⁵

⁷⁶Roo indo, Sakaria mouliangaa anana: “Oio, anangku, ina rauliko nabina Pue Ala au melumbu kuasaNa hangko i ope-ope au rapenombai. Lawi oiomi au ina lao ioru hangko i Pue, mopasilolonga lalunda tauna bosa motarima Ia.

⁷⁷Oio au ina mopahawe i tauna bosa noumba rara bona dosanda naampungi Pue Ala alana molambihe pehorema

⁷⁸anti kamaahina Pue Ala Amputa. Ia mai mosondakike hangko i suruga nodo pembetona alo.

⁷⁹Lawi nodo alo mosimbaki dunia au makaindi ide, nodo wori Pue mowangkahi tauna au tuwo i lalu kamakaindi hai au mampokalanga kapate. Ia ina moninike bona molambike roa ngkatuwo.”

⁸⁰Anana Sakaria iti, kahile-hilea hai kamanoto-notoa laluna. Mahilemi, laomi maida i pada wungi duuna hawe tempona mampepongka mopahawe Ngkorana Pue Ala i to Yahudi.