Read Napu Lukasi 10 Bible Online

Lukasi 10 - Napu bible

Lukasi 10

¹Roo indo, Pue Yesu mopilei pitu pulona topeulaNa au ntanina hai Natuduhe rorodua moioru i ope-ope boea au ina Nakalaongi.

²Nauliangaahe, “Tauna bosa nodohe pare au mangka. Ngkaia pare au mangkami, agaiana topepare barahe bosa. Ido hai hangangaa niperapi i ampu bonde bona natuduhe tauna lao mepare i bondena.

³Laomokau, agaiana hangangaa maroa-roakau. Lawi Kutudukau lao i olonda tauna au kadake. Ikamu nodo ana dimba i olonda serigala.

⁴Ineekau moanti dompe ba tasi ba kandupa. Ineekau motabe ba hema-hema pea i tanga rara.

⁵Ane mesuakau i lalu sou, hangangaa niuliangaahe ampu sou: ‘Tabea! Roa ngkatuwo hangko i Pue Ala hawe irikamu!’

⁶Ane bula lalunda ampu sou iti modokokau, ina nawatihe Pue Ala. Agaiana ane bara maroa lalunda, barahe ina molambi pewati hangko i Pue.

⁷Ane radokokau, ineekau melimba-limba. Maidakau i sou iti duumi meangka lao i boea ntanina. Niande hai nienu apa au raweikau lawi hintoto mpuu ane topobago molambi sarona.

⁸Ane mesuakau i lalu hambua boea hai radokokau, niande apa au raweikau.

⁹Nipakaoha tomahai au ara i lalu boea iti, hai niuliangaahe ampu boea: ‘Ina hawemi poparentana Pue Ala irikamu.’

¹⁰Agaiana ane mesuakau i lalu hambua boea hai barakau radoko, laomokau i rara mahile hai niuliangaahe,

¹¹‘Mogalo awu hangko i boeami au mentaka i palanta bitingki, kitaronta i lindomi bona niisa barapi ikami au mohuru ane Pue Ala mohukukau. Agaiana maroa-roakau, lawi ina hawemi poparentana Pue Ala!’

¹²Kuuliangaakau, i alo pebotusi i kahopoa dunia, ina meliu pehukuna Pue Ala i tauna iti pane pehukuNa i ampu boea Sodomo hangkoia.”

¹³“Hurewukau to Korasim hai to Betsaida! Ngkaiami tanda kuasa au Kubabehi i boeami, agaiana bara mpuukau menoso hangko i dosami. Ane rapana tanda kuasa iti Kubabehi i lalu wanua Tirus hai Sidon, kemahaemohe menoso hangko i dosanda, nauri barahe to Yahudi. Kemangalamohe waru ngkasusa rapohampi, hai watanda raawui, tanda katebalikinami lalunda.

¹⁴I alo pebotusi i kahopoa dunia, ina rumihi mpuu pehukuna Pue Ala irikamu pane pehukuNa i to Tirus hai to Sidon.

¹⁵Hai ikamu wori to Kapernaum! Ba nipehangu ina naangkakau Pue Ala hawe i suruga? Bara! Ina Natendekau i lalu naraka!”

¹⁶Roo indo, mololita mbuli Yesu i topeguruNa, Nauli, “Hema au modoko lolitami, himbelami lolitaNgku au nadoko. Hema au mosapuakakau, himbelami Iko au nasapuaka. Hai hema au mosapuakaNa, himbelami Pue Ala au nasapuaka, lawi Ia au motuduNa.”

¹⁷Bahangkia kamahaena hangko indo, mesulemohe topeguruNa au pitu pulona. Matana mpuu lalunda, hai rauli i Yesu, “Pue, mogalori seta, mengkoru worihe irikami, hai kipopelohohe i lalu hangaMu.”

¹⁸Nauli Yesu, “Kuitami Datu Tokadake manawo hangko i langi nodo kila!

¹⁹Nipehadingi lolitaNgku: Kuweimokau kuasa moiheki ile ba topehingki hai kuasa monangi ope-ope kamarohona iwali. Bara ara hadua au peisa mopakarugikau.

²⁰Agaiana nauri nodo, inee nipokatana pengkorunda seta irikamu. Aginari nipokatana kateukinami hangami i lalu suruga.”

²¹I tempo iti, matanami Yesu i lalu Inao Malelaha, hai hangko i kamatanana laluNa, Nauli, “O Uma, Ampu langi hai tampo! KutoiaKo, lawi ope-ope au tewuniangi hangkoia Nupopaisaamohe tauna au i woi tuwonda, agaiana Nuwuniangiahe tauna au mapangka posikolanda hai tauna au mapande. Lawi nodomi peundeaMu, Uma.”

²²Roo indo, nauli mbuli Yesu, “Hinangkana naweimoNa UmaNgku. Bara ara hadua au moisa kaIkona Anana Pue Ala, batena pea UmaNgku au moisaNa. Nodo wori, bara ara au moisa UmaNgku, batena pea Iko AnaNa hai hema pea au Kupopaisaa.”

²³Hangko inditi bona dati rahadi tauna, Pue Yesu membalili i topeguruNa, Nauliangaahe, “Morasi mpuukau, lawi niitami ope-ope ide.

²⁴Lawi hangkoia arahe bosa nabi hai datu au mampeinaohe moita apa au niitami, agaiana bara raita. Mampeinao mpuuhe mampehadingi apa au nihadi, agaiana bara rahadi.”

²⁵Ara hadua guru agama to Yahudi au mampeinao mampetandaka Yesu. Napekune, “Guru, apa au hangangaa kubabehi bona molambina katuwo maroa au bara mokahopoa?”

²⁶Nauli Yesu, “Apa au teuki i lalu Aturana Musa? Apa au nubasa inditi?”

²⁷Nahanai guru agama iti, “Au kubasa, node: ‘Nipokaahi Pue Ala, Ampumi, i sukana kabulana lalumi, i sukana pekirimi, i sukana rohomi, hai i sukana kapandemi.’ Hai teuki wori: ‘Nipokaahi hangka rangami nodo pampokaahimi watami haduduami.’ ”

²⁸Nauli Yesu, “Kana pehanamu. Babehimide nodo bona molambiko katuwo maroa.”

²⁹Agaiana guru agama iti mampeinao mopakanoto babehiana. Ido hai nauli, “Hemahe rangangku au hangangaa kupokaahi?”

³⁰Nahanai Yesu, “Ara hadua tobalilo au molumao hangko i Yerusale lao i boea Yeriko. I tanga rara, tauna iti rapohidupaa toperampaki. Raperampaimi anu-anuna hai hampina, hai watana rapapahai duuna malimpu. Kahopoana rapalehi tedampa i wiwi rara.

³¹I tempo iti, ara hadua tadulako mpenomba au moliu i rara iti. Kamoitana tauna au marugi iti, naleliki pea.

³²Nodo wori ara hadua to Lewi au moliu inditi. Kamoitana tauna au marugi iti, naliu pea wori.

³³Bara mahae hangko indo, moliu wori hadua to Samaria i rara iti. Kamoitana tauna au marugi iti, maahi laluna iria.

³⁴Laomi i tauna iti, nabahoi belana mopake lana mawongi hai anggoro, pane nawewehi. Roo indo, napopesawimi i kalidena, naanti lao i sou posanggaraha,[8] hai nakadipura inditi.

³⁵Kahalona madondo, naalami rompeka doi pera, nawei ampu sou, nauliangaa, ‘Nukadipura hampai tauna ide. Ane mesulena mai deade hai doi ide bara mani handa, ina kubaiari ope-ope.’ ”

³⁶Roo indo, mekunemi Yesu i guru agama iti, Nauli, “Moula pelambiamu, hangko i tauna au talu inona, hema au mewali rangana tauna au rapakarugi iti?”

³⁷Nahanai guru agama, “Tauna au motudungia ahina.” Nauli Yesu, “Kanami. Ido hai hangangaa nubabehi wori nodo.”

³⁸Hangko indo, Yesu mopaliliumi polumaona hihimbela hai topeguruNa, hawemi i hambua boea. I lalu boea iti, ara hadua towawine au rahanga Marta mampopehupe Yesu i souna.

³⁹Ara wori hadua halaluna Marta au towawine, hangana Maria. Maria iti mohuda i lindona Yesu hai mampehadingi liliu lolitaNa.

⁴⁰I tempo iti, Marta rumpu i Maria, lawi ngkaia bagona morora torare. Ido hai laomi Marta i Yesu, nauliangaa, “Pue, halalungku ide barana nadurei. Haduduangku pea mobago! Nuuliangaa bona maina nadurei.”

⁴¹Nauli Pue Yesu, “Marta, Marta! Inee karao inaomu, hai inee mampopengaa nupekiri.

⁴²Katouana, ara hampaka au paraluu ntepuu; hangangaa mampehadingike Ngkorana Pue Ala. Iti au maroa ntepuu, hai itimi au napilei Maria. Hai apa au napilei Maria bara ina raala hangko iria.”