Read Napu Lukasi 12 Bible Online

Lukasi 12 - Napu bible

Lukasi 12

¹Arahe isabuna tauna au moteruhu mampeinaohe moita Yesu, mombeupi-upihe alana mombepangka-pangkamohe. I tempo iti, Yesu mouliangaahe topeguruNa, “Maroa-roakau i raginda toParisi. Ineekau meguru i toParisi, lawi maroa i raoa peahe agaiana kadake lalunda.

²Agaiana ope-ope au ara i lalunda ina tewungkehi. Lawi ope-ope au ratuko ina tebungkahi, hai ope-ope au tewuniangi batena ina tongawa.

³Mewali, apa au nipololita i kakaindiana batena ina tewungkehi i kabaakana. Hai apa au nikanenia rangami i lalu soumi au tetuko, batena tebambari i humalele boea.”

⁴“Halalu, nipehadingi maroa lolitaNgku: ineekau mampokalanga tauna au peisa pea mopapate watami, lawi bara ara kuasanda mohukukau hawe i hae-haena.

⁵Agaiana au hangangaa nipokalanga iami Pue Ala. Lawi Pue Ala makuasa mopapate watami, hai makuasa wori motendekau i lalu naraka. Tou mpuu au Kuuliangaakau, Iami au hangangaa nipokalanga.

⁶Lima baana dena peisa rapobalu rompeka pea doi see. Agaiana nauri nodo, bara ara hambaa au bara nakadipura Pue Ala.

⁷Apa mani ikamu. Mogalori weluami, naisa Pue Ala kangkaiana. Mewali ineekau langa. Melumbu pekadipurana Pue Ala irikamu pane pokadipuraNa dena au bosa.”

⁸“Pehadingi maroa lolitaNgku: hema au mopangaku i lindonda tauna bosa peulana Iriko, Ana Manusia, ia ina Kupangaku wori i lindonda malaekana Pue Ala.

⁹Agaiana hema au mosapuakaNa i lindonda tauna, ia wori ina Kusapuaka i lindonda malaekana Pue Ala.

¹⁰Hema au mosapuaka Ana Manusia, peisa mani teampungi salana. Agaiana hema au mosapuaka Inao Malelaha, barapi peisa raampungi salana.

¹¹Ane raantikau i tadulako agama ba i topoparenta boea anti peulami Iriko, ineekau langa kana i apa au ina niuliangaahe hai ba noumba pehanami.

¹²Lawi i tempo iti, Inao Malelaha ina mopagurukau apa au hangangaa nihowara.”

¹³Ara hadua tauna hangko i olonda tauna bosa au mai i Yesu, nauli, “Guru, Nuuliangaa halalungku bona naweina wongkoia kirangku hangko i sosoranda tosaengki.”

¹⁴Nahanai Yesu, “Halalu, hema au moangkaNa mewali topetanga-tangaimi au mampokiraakau sosoranda tosaemi?”

¹⁵Roo indo, mololitami Yesu i tauna bosa, Nauli, “Mainga-ingakau hai maroa-roakau, ineekau mampeinao morampu anu-anu dunia. Lawi kehapiri ngkaia anu-anumi, barari iti au mopaara katuwo maroa.”

¹⁶Ido hai napahawe Yesu ngkora pandiri ide, Nauli, “Ara hadua topebuku, ngkaia tampona hai maroa tuda-tudana.

¹⁷Nauli laluna topebuku iti: ‘Apa au hangangaa kubabehi? Barapi handa tambaruku kupambolii parengku.’

¹⁸Kahopoana nahumba akala, nauli, ‘Agina tambaru au koi ide kubaliki, hai kuaro au mahile bona inditi kuwoli ope-ope parengku hai anu-anungku.

¹⁹Roo indo, barapona paraluu mobago, lawi ngkaiami pambolingku, melabi-labimi hai barapi ina ope. I tempo iti, ina maande hai maenu pearaina i lalu katana-tana!’

²⁰Agaiana Pue Ala mongkora iria Nauli, ‘Ee tontuli! Kaindi ide, inaomu ina raala. Mewali, ope-ope au nurampu iti, hemami ampuna?’ ”

²¹KarooNa mopahawe ngkora pandiri iti, nauli mbuli Yesu, “Nodomi kahurewunda tauna au mampeinao morampu peawa dunia, agaiana barahe mohaile Pue Ala hai barahe mampokaahi hangka ranganda.”

²²Nauli Yesu i topeguruNa, “Ido hai Kuuliangaakau inee karao inaomi ba niuli, ‘Apami wei au taande?’ Inee karao inaomi ba niuli, ‘Apami au tapohampi?’

²³Lawi katuwomi melumbu hangko i paande hai pehampi.

²⁴Nipeitahe tadasi! Barahe mowia, barahe mepare, bara ara tambarunda. Nauri nodo, Pue Ala batena mopaandehe. Apa mani ikamu. I peitana Pue Ala, meliu katuwomi pane katuwonda tadasi.

²⁵Apami pobunduana ngkaia au nipekiri? Kehapiri karao inaomi mampekiri mampopengaa, barakau peisa motambai tinuwumi nauri hambengia pea.

²⁶Mewali, ane bara nibuku mobabehi au koi iti, moapari hai mampokalangakau mampopengaa?

²⁷Nipeita bunga au tuwo i tanga mpada. Barahe mobago, barahe mandau. Agaiana Kuuliangaakau, mogalori Datu Salomo au pebuku ntepuu, hampina bara himbela peraena hai bunga iti.

²⁸Mewali, ane Pue Ala mampoperae hehi i pada au tuwo alo ide hai rahuwe kahalo, apa mani ikamu! Meliu pekadipurana Pue Ala irikamu. Mewali, moapari hai bara niharunga pekadipuraNa iti?

²⁹Inee karao inaomi ba nipekiri liliu, niuli: ‘Apami wei au taande hai taenu?’

³⁰Ope-ope iti rahaoki liliu tauna au bara moisa Pue Ala. Agaiana ineekau langa, lawi ope-ope au niparaluu, naisa haha Umami au i suruga.

³¹Mewali, hangangaa nipaioru poparentana Pue Ala i lalu katuwomi, hai hinangkana au niparaluu batena Naweikau.”

³²“Ikamu au meula Iriko, ineekau langa, nauri barakau bosa. Lawi hangko i kabulana laluna Pue Ala Umami, mopileikau molambi katuwo maroa i lalu poparentaNa.

³³Ido hai Kuuli, nipobalumi anu-anumi, hai holona niweihe tauna au meahi-ahi tuwonda. Lawi ane nibabehi nodo, mowolikau anu-anumi i lalu kusau au bara peisa mahepa, lempona, i lalu suruga. Anu-anumi iti bara ina matanta, lawi bara peisa rapanangka hai bara peisa naande bubu.

³⁴Niwolimi anu-anumi i lalu suruga, lawi iumba kaarana anu-anumi, inditi wori lalumi.”

³⁵Roo indo, Yesu mopahawe ngkora pandiri ide, Nauli, “Hangangaa mainga-inga liliukau hai hangangaa masilolonga peamokau bona ineekau napatingkara ba apa pea. Ikamu hangangaa nodokau hawi au mampegiahe ampunda mesule hangko i posusaa petauna. Hawi iti, tekadipura hampinda, masilolonga liliuhe, hai hulonda tuwo liliu. Ane hawemi ampunda motidongko baba, liliu rabungkahia.

³⁶

³⁷Morasihe hawi au mainga-inga hai mampegia ampunda, duuna hawe. Lawi ampunda iti ina mowewe pekona, napopohudahe, hai narorahe.

³⁸Morasi mpuuhe hawi au mepegia hai masilolonga i kahawena ampunda, kehapiri i laembengi ba liu hangko indo.

³⁹Hangangaa nipailalu ngkora pandiri ide: ane naisa ami ampu sou impira kahawena topanangka, batena mainga-inga; bara napogiangaa mesua i lalu souna.

⁴⁰Ido hai hangangaa mainga-ingakau, lawi bara niisa impira kahaweNgku, Iko Ana Manusia.”

⁴¹Napekune Peturu i Yesu, “Pue, hema au Nutunggai i lalu ngkora pandiri iti, ba ikami pea ba tauna bosa worihe?”

⁴²Nahanai Pue Yesu, “Nipailalu ngkora pandiri ide: Ara hadua hawi au manoto laluna hai au peisa napoinalai ampuna. Ia naangka ampuna motosaengi hawi ntanina hai mourusi paandenda alo-alona.

⁴³Morasi mpuu katuwona hawi iti, ane i pesulena ampuna, nahumba tangana mampopolumao bagona.

⁴⁴Hawi iti batena ina naangka ampuna mokadipura ope-ope anu-anuna.

⁴⁵Agaiana noumba ane hawi iti bara maroa poantina? Nauli laluna, ‘Bara ina polo hawe ampuku,’ alana barapi mampopolumao bagona. Napepongkami mopapahaihe hangka hawina maroa towawine maroa tobalilo. Ia maande hai maenu liliu duuna malangu-langu.

⁴⁶Agaiana, ina hawe ampuna i alo hai i jaa au bara nahaharunga. Hawi iti ina napapahai duuna mate hai napahimbela hai tauna au bara moisa Pue Ala.

⁴⁷Hadua hawi au moisa peundeana ampuna, agaiana bara mainga-inga hai bara mobabehi peundeana ampuna, hawi iti batena rumihi rapapahai.

⁴⁸Agaiana ane ara hadua hawi au bara woia moisa peundeana ampuna hai mobabehi au sala, bara rumihi karapapahaina. Lawi hema au rawei ngkaia, ngkaia wori au ina raperapi hangko iria. Hai ane ngkaia au rapoinalaia hadua tauna, ngkaia wori au ina rahaoki hangko iria.”

⁴⁹“MaiNa moanti api i dunia. Maroa mpuu ane api iti rore.

⁵⁰Agaiana ara mani kapari au hangangaa morumpaNa. Ina masusa laluNgku duuna mewali.

⁵¹Inee niharunga kamaiNgku ide ina mopahintuwu tauna. Bara! KamaiNgku ide ina mampoposisala tauna.

⁵²Mepongka ide-ide, tauna hantambi ina mosisalahe. Pandirina, ane ara lima i lalu hantambi, ina mosisalahe lawi talu meula Iriko, hai rodua bara.

⁵³Au rapouma ina moewa anana tobalilo, hai ana tobalilo ina moewa umana. Au rapoina ina moewa anana towawine, hai ana towawine ina moewa inana. Au rapopenganti ina moewa maniana, hai au rapomania moewa pengantina.”

⁵⁴Nauli mbuli Yesu i tauna bosa, “Ane niita gawu ntanda i Katampua alo, niuli ina keuda, hai keuda mpuu.

⁵⁵Ane mewui himburu hangko i Lau, niuli ina madii, hai batena mewali nodo.

⁵⁶Mengkamapande mpuukau! Niisa mampekatandai tanda i langi hai i dunia, agaiana bara niisa mampekatandai apa au nababehi Pue Ala i tempo ide.”

⁵⁷“Ikamu ide, moapari pane bara nibuku mobotusi apa au maroa hai au bara maroa?

⁵⁸Agina nibotusi sadudua apa au maroa i tempona mani ara katepakami. Ane rapana, ara hadua tauna au mampeinao mosalaiko i lindona tadulako boea, hangangaa modamekau. Lawi ane barakau modame, ina naanti mpuuko lao i topebotusi, hai topebotusi iti ina mohuhuko i pulisi, hai pulisi ina mampopesuako i lalu tarunggu.

⁵⁹Tou mpuu au Kuuliangaakau, barapoko tekabaha hangko i lalu tarunggu ane bara mani piri indamu nubaiari.”