Read Napu Lukasi 13 Bible Online

Lukasi 13 - Napu bible

Lukasi 13

¹I tempo iti, arahe tauna au mopahawe i Yesu kana i bahangkia to Galilea au napapate Pilatu tanganda mohuhu popenombanda i Pue Ala.

²Kanahadina Yesu lolitanda, Nauli, “Ba nipehangu to Galilea iti rapapate nodo lawi melumbu dosanda hangko i ranganda?

³Bara! Agaiana ane barakau menoso hangko i dosami, batena worikau rahuku.

⁴Ara wori hampulo hai ualu tauna au mate lawi nadungkangi sou au mapangka i Siloam au ara i Yerusale. Ba nipehangu kapatenda iti mewali nodo lawi melumbu dosanda hangko i ope-ope tauna ntanina i Yerusale?

⁵Bara! Agaiana ane barakau menoso hangko i dosami, batena worikau rahuku.”

⁶Roo indo, napaliliumi Yesu lolitaNa hai ngkora pandiri ide, Nauli, “Ara hadua tauna au motuda kau ara i bonde anggorona. Hambela tempo, laomi ampu bonde bona mampeita ba ara wuana. Agaiana bara huba haogu wuana.

⁷Ido hai nauli ampu bonde iti i topokadipura bondena: ‘Peita, i lalu talu parena, maina moparesa kau ide, agaiana bara huba haogu wuana au kulambi. Mewali, nutiwi peami! Apa bunduna tuwo inde; mopaope pea karudu tampo.’

⁸Agaiana nahanai topokadipura bondena: ‘Ampu, nupogiangaa hampai tuwo hampare mani. Ina kubahi patoana, hai kuwoli awu bona marudu.

⁹Mole mowuato pae pare mai. Ane bara mowua, hangko kutiwiri.’ ”

¹⁰Hambela tempo, Yesu mepaturo i sou penombaa i Alo Pengkarooangaa.

¹¹Inditi, ara hadua towawine au hampulomi hai ualu parena mahai, lawi napesuangi seta. Towawine iti bungku, bara peisa meangka togo.

¹²Kanaitana Yesu towawine iti, Nakakiomi, Nauliangaa, “Ina! Maohamoko hangko i hakimu.”

¹³Roo indo, Yesu motobo towawine iti. Unga pea manoto bengona, meangkami, hai liliu motoia Pue Ala.

¹⁴Agaiana inditi ara hadua tadulako sou penombaa au koi inaona moita Yesu mopakaoha tauna i Alo Pengkarooangaa. Ido hai nauli i tauna bosa, “Ini alona, peisake mobago. I alo-alo iti, peisakau mai mampopepakaoha, inee i Alo Pengkarooangaa!”

¹⁵Nahanai Pue Yesu, “Ikamu, maroa i raoa peakau! I Alo Pengkarooangaa, ope-ope tauna mokabaha japinda hai baulanda hangko i gimpunda bona raanti lao rapaenu i raoa.

¹⁶Inde, ara hadua towawine au pemuleana wori Burahima; hampulomi hai ualu parena nahilu Datu Tokadake. Bara pae hintoto ane towawine ide rakabaha hangko i karatakana i Alo Pengkarooangaa?”

¹⁷Lolitana Yesu iti mopakaeahe timaliNa, agaiana tauna bosa mampokatana ope-ope tanda kuasa au nababehi Yesu iti.

¹⁸Napaliliu Yesu lolitaNa, Nauli, “Ane poparentana Pue Ala hawe i dunia, noumba pewalina? Poparentana Pue Ala nodo lihu hahawi i lalu ngkora pandiri ide: ara haogu lihu hahawi au naala hadua tauna, hai natuda i bondena. Lihu hahawi iti tuwo hai kamahile-hilea, duuna mewali nodo hampoa kau. Hawemohe tadasi mobabehi haranda i daana.”

²⁰Napahawe mbuli Yesu hampaka ngkora pandiri i tauna bosa, Nauli, “Poparentana Pue Ala rapandiri nodo ragi i lalu ngkora pandiri ide:

²¹Ara ragi au naala hadua towawine, nagalo hai tapu. Nauri ragi iti haodi pea peisa mampopembongke tapu au ngkaia[10].”

²²I polumaona Yesu lao i Yerusale, Ia mampolumaongi ngkaia boea au mahile hai au koi, mopaguru tauna.

²³Ara hadua tauna au mekune i Yesu, nauli, “Pue, ba haodi pea tauna au ina molambi katuwo maroa au bara mokahopoa?” Nahanai Yesu, nauli,

²⁴“Au molambi katuwo maroa, peisa rapandiri nodo hadua tauna au mesua i baba au maigu. Hangangaa nipari-pari mesua i baba au maigu iti liana mani tebungkahi. Lawi ane hawemi tempona baba iti natuko ampu sou, bosa tauna ina mampeinaohe mesua, agaiana barapohe peisa. Mewali ane meangka manikau i raoa, ina mekakakiokau merapi bona rabungkahiakau baba. Ina niuli, ‘Ampu bungkahia wongkamia baba!’ Ina nahanai: ‘Barakau kuisa, hai bara wori kuisa kahangko iumbami mai.’

²⁶Ina niuli, ‘Ampu! Maande hai maenu sambelamongkai hai oio! Mepaturomoko i lalu boeangki!’

²⁷Agaiana ina nahanaikau ampu sou: ‘Barakau kuisa, hai bara wori kuisa kahangko iumbami mai. Pelohokau hangko inde, ikamu ope-ope au kadake babehiami.’

²⁸I tempo iti, ina moitakau toiorumi hangkoia nodo Burahima, Isaki hai Yako hai ope-ope nabi. Ina mohudahe matana-tana i lalu poparentana Pue Ala. Agaiana ikamu ina moteteriakau hai mantodiha liliukau, lawi rapotukoakau baba, hai ikamu i raoa pearaikau.

²⁹Bosa tauna au barahe to Yahudi ina mewali taunana Pue Ala i lalu poparentaNa. Ina maihe hangko i humalele dunia, mohudahe hai maandehe matana-tana i lalu poparentana Pue Ala.

³⁰Kahopoana, tauna au tepaibokoa ina mewali tepaiorua. Hai tauna au tepaiorua ina mewali tepaibokoa.”

³¹I tempo iti, arahe bahangkia toParisi au mai i Yesu, rauliangaa, “PadumoKo hangko inde, hai laomoKo i boea ntanina, lawi ara tunggaiana Datu Herode mopapateKo.”

³²Nauliangaahe Yesu, “Niuliangaa topeakalangi iti node: Alo ide hai kahalo Kupopolumao mani pobagoNgku mampopeloho seta hai mopakaoha tauna au mahai. Agaiana i kataluna alona, ina hopomi bagoNgku.

³³Agaiana kehapiri nodo, hangangaa molumao liliuNa monontohi Yerusale. Lawi bara hintoto ane hadua nabi rapapate i raoa wanua Yerusale.

³⁴To Yerusale, to Yerusale! Mopapatemokau nabi-nabi. Hai tauna au natudu Pue Ala lao irikamu, niwatuihe. Bosa belana Kupeinao mokalapuikau nodo hambaa manu ntina au motaoboki anana, agaiana bara niunde.

³⁵Bona niisa: ina napalehikau Pue Ala! Tou mpuu Kuuliangaakau, barapoNa niita, duuna hawe tempona niuli: ‘Rawatimi tauna au mai i lalu hangana Pue!’ ”