Read Napu Lukasi 14 Bible Online

Lukasi 14 - Napu bible

Lukasi 14

¹Hambela tempo i Alo Pengkarooangaa, Yesu lao maande i souna hadua tadulakonda toParisi. Tangana i sou iti, bosa tauna mokamata lawi mohaokihe kamanawoNa.

²I tempo iti wori, hawemi hadua tauna au mahai mangkawae.

³Yesu mekune i guru agama hai toParisi au ara inditi, Nauli, “Moula atura agamanta, ba peisake mopakaoha tomahai i Alo Pengkarooangaa, ba bara?”

⁴Guru-guru agama hai toParisi iti, barahe mehana. Mewali, Yesu mokingkimi tomahai iti, Napakaoha hai Natudu mesule.

⁵Roo indo, Nauliangaahe, “Ane rapana ara anami ba japimi au manawo i tibubu i Alo Pengkarooangaa, ba nipogiangaa i lalu tibubu? Ba nihore, kehapiri i Alo Pengkarooangaa?”

⁶Agaiana bara ara hadua au bai mohanai pampekunena Yesu iti.

⁷I souna toParisi iti, Yesu moita bahangkia torare au mampilei pohudaa au teadai. Ido hai Yesu mopaturohe hai ngkora pandiri ide, Nauli,

⁸“Ane rakakiokau lao i posusa petauna, ineeko mohuda i pohudaa au teadai. Mole ara pae tauna ntanina au melumbu karabilana hangko irio.

⁹Ane nodo, ampu sou ina mouliangaako node: ‘Pelimba! Ia mohuda inde.’ Ina maeako melimba lao mohuda i taleu.

¹⁰Mewali, ane rakakioko lao i posusa, agina mohudako hampai i taleu bona ampu sou ina mouliangaako: ‘Ene, maiko mohuda i pohudaa au maroa i lindo.’ Ane nodo, ina rabilako i lindonda tauna bosa.

¹¹Hema au mampeindora ina rapaiwoi, hai hema au mengkaiwoi ina rapaiwongko.”

¹²Roo indo, Yesu mololita i toParisi iti, Nauli, “Ane mokakioko tauna mai i posusamu, maroa pualo ba kaindi, ineeko mokakio rangamu, halalumu, hai topebuku i lalu boeamu. Lawi ihira, batena ina mokakio woriko, hai apa au nubabehi iti ina tehurungi.

¹³Agaiana ane mopaarako susa, hangangaa nukakio tauna au meahi-ahi tuwonda, au bara masilolonga watanda, au palu hai au bilo.

¹⁴Ane nodo babehiamu, ina nawatiko Pue Ala, lawi bara rabuku tauna iti mohurungi babehiamu. Apa au nubabehi iti ina nahurungi Pue Ala i karapatuwonda hule ope-ope tauna au maroa babehianda.”

¹⁵Tanganda maande, hadua torare au mohadi lolitana Yesu inona, mololita i Yesu nauli, “Morasi mpuu tauna au ina maande hihimbela hai Pue Ala i lalu poparentaNa.”

¹⁶Agaiana nauli Yesu i tauna iti, “Hambela tempo ara hadua tauna au mobabehi posusa mahile, hai bosa tauna nakakio.

¹⁷Masilolongami ope-ope, ampu susa motudumi hawina lao mouliangaahe tauna au rakakio, ‘Laomoke maande, lawi masilolongami ope-ope.’

¹⁸Agaiana ope-opehe au rakakio, ara penggolianda pane barahe peisa lao i posusana. Hadua au nguru-nguruna rakakio manguli, ‘Hangko meholona tampo, hai hangangaa lao hampai kupeita. Merapi ampuna, barana peisa lao.’

¹⁹Ara mbuli hadua au manguli, ‘Hangko meholona lima bokona japi, hai hangangaa laohe hampai kupopopajeko. Merapi ampuna, barana peisa lao!’

²⁰Ara mbuli hadua au manguli, ‘Hangko rataunana! Mewali, barana peisa lao.’

²¹Pesulena hawi iti, napahawemi i ampuna pehananda tauna au rakakio. Rumihi mpuu karumpuna ampu susa iti, ido hai mouliangaa hawina, ‘Laomoko hoholiga i rara mahile hai i penga-penga rara i boea. Nukakio mai ope-ope tauna au meahi-ahi tuwonda, au bara masilolonga watanda, au bilo, hai au palu.’ Lao mpuumi hawi iti moula hawana ampuna.

²²Pesulena, mololita mbuli i ampuna, nauli, ‘Ampu, hawamu kupopolumaomi, agaiana ara mani pohudaa au soa.’

²³Ido hai nauliangaa ampu susa iti, ‘Lao mbuliko i raoa boea bona nubambari posusa ide iumba pea, maroa i rara au mahile maroa i rara au koi. Hangangaa nupasimbukuhe mai tauna bona soungku buke.

²⁴Lawi tou mpuu kuuliangaakau: bara huba hadua tauna au kukakio nguru-nguruna ina mampemina paandeku!’ ”

²⁵Roo indo, Yesu mopaliliu polumaona. Bosa wori tauna meula Iria, ido hai Napembalilingihe, Nauli,

²⁶“Ikamu au mampeinao meula Iriko, nipehadingi! Hema au melumbu pampokakaiana inana ba umana, towawinena ba anana, halaluna ba watana haduduana hangko i ahina Iriko, ia bara peisa mewali topeulaNgku.

²⁷Nipehadingi, ikamu au mampeinao meula Iriko: hema au bara mau mohalea kau mombehape hai meula Iriko, bara peisa mewali topeulaNgku.

²⁸Ane ara hadua hangko i olomi au mampeinao moaro haogu sou au mahile, hangangaa naimba hampai doina ba handa napopoaro sou iti.

²⁹Lawi ane hangko ariina napopeangka, hai opemi doina hangko damani roo, ina raele-ele tauna au moita.

³⁰Ina rauli: ‘Ae! Tauna ide mampeinao moaro sou mahile, agaiana bara handa doina!’

³¹Nodo wori, ane ara hadua datu au moanti surodadona hampulo sabuna bona lao mombeala hai hadua datu au ara rompulo sabuna surodadona, agina datu iti mampepekiri hampai, ba nabuku moewa iwalina ba bara.

³²Lawi ane naisa kadana nabuku moewahe, i tempona karao manihe, ia peisa motudu bahangkia surona lao modame hai iwalina.”

³³Napaliliu Yesu lolitaNa, Nauli, “Nodo wori ikamu, agina nipepekiri hampai apa au hangangaa nibabehi bona mewalikau topeulaNgku. Lawi ane bara niunde mokabaha ope-ope au ara irikamu, barakau peisa mewali topeulaNgku.”

³⁴“Bure, mobundu ntepuu. Agaiana ane matawaami, peisa pae rapakebure hule?

³⁵Kehapiri rapopopakarudu pea tuda-tuda, barapi mobundu. Aginami ratende. Hema au mohadi lolitaNgku ide, nipehadingi maroa!”