Read Napu Lukasi 15 Bible Online

Lukasi 15 - Napu bible

Lukasi 15

¹Hambela tempo, bosa toperuru asele hai tauna ntanina mai i Yesu lawi mampeinaohe mampehadingi lolitaNa. Ihira raimbahe tauna kadake.

²Ara worihe toParisi hai guru-guru agama au moitahe. Mohume-humemohe, rauli, “Ae! Ia mohimada hai tomadosa, hai maandehe hihimbela!”

³Ido hai Yesu mopahaweahe ngkora pandiri ide, Nauli,

⁴“Ane rapana ara hadua rangami au ara dimbana hangatu baana. Ane matanta hambaa, apa au nababehi? Batena mopalehi dimbana au hahio pulona hai hahio i pada, hai lao mohaoki hambaa au matanta duuna nalambi.

⁵Ane nalambi hule, matana mpuu. Anti kamatanana, ia mohompomi dimbana hai naanti hule lao i gimpuna.

⁶Roo indo, mokakiomi himadana hai hintonggina, nauliangaahe, ‘Mosusamoke! Lawi dimbaku au matanta kulambi hulemi.’

⁷Nodo wori i suruga, ane hadua tauna au madosa menoso hangko i dosana, melumbu kamatanana Pue Ala mampokatana tauna iti pane hahio pulona hai hahio tauna au manoto au bara paraluu menoso.”

⁸Napaliliu Yesu lolitaNa hai ngkora pandiri ide, Nauli, “Pandirina ara hadua towawine au mowoli hampulo pekana doi pera. Ane matanta hampeka, apa au nababehi? Ia lao mohuwe hulo hai mokawohi souna. Batena nahaoki duuna nalambi.

⁹Kanalambina, ia mokakiomi rangana hai hintonggina, nauli, ‘Maimoke mosusa! Matana mpuuna, lawi kulambi hulemi doingku au matanta.’

¹⁰Nodo wori kamatananda malaekana Pue Ala mampokatana hadua tomadosa au menoso hangko i dosana.”

¹¹Nauli mbuli Yesu, “Pandirina, ara hadua uma au ara rodua anana, tobalilo haha.

¹²Au toadi mouliangaa umana, ‘Uma, nuweimona kirangku hangko i anu-anumu.’ Mewali, umanda mokira-kiraamohe anu-anuna i anana au rodua iti.

¹³Bahangkia alona roo indo, anana au toadi mampobalumi kirana hai laomi molilo. Inditi, ia mopaope mbero doina i babehia au bara maroa.

¹⁴Opemi doina, mewalimi rimi mahile i tampo iti, duuna meahi-ahi tuwona.

¹⁵Laomi mampedurei i hadua ampu boea bona molambi paandena. Ampu boea iti motudu mokampai boena.

¹⁶Anti kamarimina, napeinaomi moande paande boe. Nauri nodo, bara ara au mokira paande boena.

¹⁷Kahopoana, mokatuinaomi umana, hai nauli laluna, ‘I souna umangku, mogalorihe topobago, melabi-labi paandenda, agaiana iko, ina mateohomona inde.

¹⁸Mewali, ina mesulena lao i umangku, hai ina kuuliangaa, Uma, masalamona i Pue Ala hai irio.

¹⁹Barapona hintoto nukakio anamu. Agina nuimbamona hawimu.’

²⁰Roo indo, mesulemi lao i umana. Karao mani hangko i sou, naitami umana. Anti kamaahina, melangkami lao napohidupaa, nakalapui hai naangki.

²¹Nauli anana iti, ‘Uma, masalamona i Pue Ala hai irio. Barapona hintoto nupoana.’

²²Agaiana umana mokakiohe topobagona, nauliangaahe, ‘Holigakau mai! Nianti mai hampi au makara nibaduia. Nisisikalei hai nikandupai.

²³Roo indo, lao niala ana japi au marudu hai nisambale. Ina mosusake hai matana-tana!

²⁴Lawi anangku ide matemi hangkoia, agaiana tuwo hulemi. Matantami hangkoia, agaiana kulambi hulemi.’ Mewali mosusamohe i katana-tana.

²⁵I tempo iti, anana au towutu ara i bonde. Pesulena hangko i bonde, hungkumi i sou, mohadimi topotulali hai topotaro-taro.

²⁶Ido hai mokakiomi hadua topobagona umana, pane napekune ba apa au tangana rababehi.

²⁷Nahanai topobago iti, ‘Adimu hawe hulemi! Umamu motudumi tauna mosambale ana japi au marudu, lawi anana au matanta nalambi hulemi i kamaroa-roana.’

²⁸Masodomi anana au towutu iti, ido hai barapi mau mesua i lalu sou. Laomi umana mowawaha mesua.

²⁹Agaiana nauli, ‘I pare-parena madotana mobago irio, Uma. Bara hambela kutaronta hawamu. Nauri nodo, apami au nuweina? Mogalori hambaa towau, bara mani ara au nuweina bona mobabehina susa hihimbela hai himadangku.

³⁰Anamu au hangko mesule iti motende mbero anu-anumu i towawine au kadake babehiana, agaiana i pesulena ide, nuposambaleari ana japi au marudu!’

³¹Nahanai umana, ‘Anangku, oio maida liliuko hihimbela hai iko. Ihi soungku, oio wori ampuna.

³²Agaiana, hintoto mpuuke mosusa i katana-tana, lawi adimu au mate, tuwo hulemi. Matanta hangkoia, agaiana talambi hulemi.’ ”