Read Napu Lukasi 16 Bible Online

Lukasi 16 - Napu bible

Lukasi 16

¹Roo indo, Yesu mopahawe ngkora pandiri ide i topeguruNa, Nauli, “Ara hadua topebuku au ngkaia doina. Ia moangka hadua tauna mokadipura doina hai anu-anuna. Agaiana arahe tauna au morai topobagona iti, rauliangaa ampuna, ‘Topobagomu iti motende ntoo pea doimu!’

²Ido hai topebuku iti mokakio topobagona, nauliangaa, ‘Ara lolita au rapahaweana kana i pobagomu. Ba tou ba bara? Mewali, hangangaa nupasilolonga ope-ope suramu bona kuparesa. Roo naparesa, nauli topebuku iti, Oio barapoko ina mokadipura doingku hai anu-anungku.’

³Nauli laluna topobago iti, ‘Oo, apami au hangangaa kubabehi? Nakabahamona ampuku hangko i bagongku. Ane motongkona bara kubuku, hai maeana merapi-rapi.’

⁴Hangko indo, nauli laluna, ‘Aa, ide-ide kuisami! Lawi ina rakabahana hangko i bagongku, agina mohaokina hampai himadangku au bosa bona radokona i sounda.’

⁵Mewali, nakakiomohe ope-ope topoinda i ampuna. I tauna au nguru-nguruna, napekune: ‘Hangkia indamu i ampuku?’

⁶Nahanai tauna iti, ‘Hangatu belena lana.’ Nauli topobago iti, ‘Idemi sura indamu. Mohudamoko, nuuki inde lima pea pulona bele!’

⁷Roo indo, lao i tauna au hadua, nauliangaa, ‘Oio, hangkia indamu?’ Nahanai, ‘Hasabu karuna pare.’ Nauli topobago iti, ‘Idemi sura indamu. Mohudamoko, nuuki inde ualu pea atuna karuna.’

⁸Kanahadina topebuku iti apa au nababehi topobagona, natoia lawi nauri motengko babehiana agaiana naisa mampekiri karao bona maroa katuwona. Lawi nauri kadake babehianda, agaiana raisa wori mampekiri karao bona maroa katuwonda i alo au ina mai. Kamapandenda melumbu pane tauna au mengkoru i Pue Ala.

⁹Ido hai Kuuliangaakau: tauna au mengkoru i Pue Ala hangangaa mampekirihe karao. Anu-anumi i dunia ide hangangaa nipake motulungi hangka rangami bona ane hawe tempona anu-anumi iti barapi mobundu, ina radokokau i paidaa au maroa duuna i hae-haena.

¹⁰Ane hadua tauna peisa rapoinalai i anu-anu au haodi, ia peisa wori rapoinalai i anu-anu au ngkaia. Agaiana ane bara manoto pokadipurana anu-anu au haodi, apa mani pokadipurana anu-anu au ngkaia!

¹¹Mewali, ane bara nibuku mokadipura maroa anu-anumi i dunia ide, hema pae ina mampoinalaiakau peawa au tou-tou i suruga?

¹²Hai ane bara niisa mokadipura maroa anu-anunda tauna ntanina au rapoinalaiakau, hema pae ina moweikau anu-anu au mewali anumi haduduami?

¹³Bara ara hadua tauna au nabuku mampobagoa rodua tauna, lawi hadua ina napokaahi, hai hadua nakahihi. Hadua ina napeulai hawana, hai hadua nakoi hawana. Nodo wori ikamu, barakau peisa mampeulai peundeana Pue Ala hai mohahaoki wori anu-anu dunia.”

¹⁴Karahadina toParisi lolitana Yesu, raele-eleri, lawi mohahaoki peahe doi.

¹⁵Agaiana nauliangaahe Yesu, “Mampemanotokau i peitana tauna, agaiana Pue Ala moisa ihi lalumi. Lawi apa au nahaoki manusia, itimi au nakahihi Pue Ala.

¹⁶Mepongka hangkoia duuna kahawena Yohane Toperiu, Aturana Musa hai suranda nabi-nabi rabambarimi hai rapaturoahe tauna. Agaiana mepongka ide-ide, Ngkora Marasa kana i poparentana Pue Ala au rabambari liliu. Ido hai bosa tauna mopari-pari mesua i lalu poparentaNa.

¹⁷Ope-ope lolita au teuki i lalu Sura Aturana Pue Ala hangangaa mewali. Ane ara mani langi hai tampo, batena bara ara hampaka lolita i lalu Sura Aturana Pue Ala au bara ina mewali.

¹⁸Hema au mampogaaki towawinena hai mampotambia towawine au ntanina, mebualosi. Hai hadua tobalilo au mampotambia hadua towawine au napogaaki rangana, mebualosi wori.”

¹⁹Hangko indo, nauli Yesu, “Ara hadua topebuku. Pehampina nodo pehampi-hampi datu, ope-ope hampina masuli holona. Katuwona alo-alona, mosusa liliu.

²⁰I baba souna, ara hadua tauna au meahi-ahi tuwona, hangana Lasaru. Watana buke tangga.

²¹Anti kamarimina, napeinao woia moande wuta au ratende hangko i mejana topebuku iti, agaiana bara rapaliu. Tangana mohuda inditi, mairihe dike modilai mahaiana.

²²Roo indo, matemi Lasaru, hai ia raanti malaeka lao i pohudaa au maroa i holana Burahima. Bara mahae hangko indo, mate worimi topebuku iti, hai ratawu.

²³Agaiana topebuku iti raanti i paidaa tomate, hai inditi ia mantodiha liliu. Roo indo, mengoami hai moita ngkarao Burahima. Lasaru mohuda i holana.

²⁴Mekakiomi topebuku iti, nauli: ‘Uma Burahima! Nupokaahina wongkoia! Nutuduana Lasaru moeme karawena i owai bona mai motudoi dilangku. Mapari ntepuu kuhadi i lalu api ide!’

²⁵Nahanai Burahima: ‘Anangku, nukatuinao tuwomu i dunia: i tempo iti, molambimoko ope-ope au maroa, agaiana Lasaru molambi pea kapari. Ide-ide, tepalindomi Lasaru inde, agaiana oio hangangaa molambi kapari.

²⁶I olonta ara hambua kabe au matindo ntepuu, au bara peisa rapoliungi. Ido hai tauna hangko inde bara peisa lao inditi, hai tauna hangko inditi bara peisa mai inde.’

²⁷Roo indo, nauli mbuli topebuku iti: ‘Ane nodo, kuperapi mpuu bona nutudu Lasaru lao i souna umangku,

²⁸lawi ara manihe lima halalungku au maida indowei. Nutudu Lasaru mampopaingaahe kana i apa au mewali iriko dati worihe molambi paidaa au mapari ide.’

²⁹Nahanai Burahima: ‘Bara! Lawi arami surana Musa hai suranda nabi-nabi au raukiahe. Pogiangaamohe mampeulai apa au teuki i lalu sura iti.’

³⁰Nauli topebuku iti, ‘Uma Burahima, ane iti pea, bara handa! Ane nutudu hadua tomate au tuwo hule lao mololita irihira, hangko mampenosoirihe dosanda!’

³¹Agaiana nauli Burahima, ‘Ane lolitana Musa hai lolitanda nabi bara radoko, batena barahe ina mepoinalai, kehapiri ara tomate au tuwo hule.’ ”