Read Napu Lukasi 17 Bible Online

Lukasi 17 - Napu bible

Lukasi 17

¹Roo indo, nauli Yesu i topeguruNa, “Batena ara pekelo au mopamanawo tauna alanda madosa. Agaiana hurewumohe tauna au mopaara pekelo iti!

²Hema au mopakanawo hadua tauna au koi tuwona alana barapi mepoinalai Iriko, ina rumihi mpuu pehukuna Pue Ala i tauna iti. Aginami haogu watu pogilia au mahile ratoe i tambolona hai ratende i tanga tahi.

³Ido hai hangangaa mainga-ingakau! Ane halalumi mobabehi sala, hangangaa nikonto. Ane tebalikimi laluna, niampungi woia.

⁴Ane halalumi masala irikamu kehapiri pitu belana i lalu hangalo, hai bela-belana masala mai merapi ampu irikamu, hangangaa niampungi.”

⁵Rauli topeguruNa, “Pue, pakarohoa wongkamia pepoinalaingki!”

⁶Nahanai Yesu, “Ane arami pepoinalaimi nauri kokoi pea nodo lihu hahawi, peisakau mouliangaa kau mahile ide: ‘Mawukamoko hangko inde, hai melimbako i tahi!’ hai batena ina mewali moula hawami.”

⁷Napaliliu Yesu lolitana hai ngkora pandiri ide, Nauli, “Pandirina, ara hadua hangko irikamu au ara hawina. Hawi iti lao mowia ba mokampai porewumu. Ane mesule hangko i pobagoana, apa au niuliangaa? Ba niuli: ‘Maimoko maande’?

⁸Manoto bara! Ina niuliangaari node: ‘Nupasilolongaana paandeku! Mempahuruko hampai. Nukampaina hawena roo maande; hangko peisariko maande.’

⁹Bara wori ina niuli ngkaia kamaroana i hawi iti, lawi ikamumi ampuna hai ia mia-mia moula hawami.

¹⁰Nodo wori ikamu. Ane nipeulaimi ope-ope au nahawaakau Pue Ala, hangangaa niuli: ‘Ikami ide, hawi peangkai au barangkai hintoto ratoia. Kibabehi pea apa au Nahawaangkai ampuki.’ ”

¹¹I lalu polumaoNa lao i Yerusale, Yesu moula pariolo tamponda to Samaria hai to Galilea.

¹²KahaweNa i hambua boea, hampulo tauna au ketangga mai mampohidupaa. Kakarao mani, mekakiomohe,

¹³rauli, “Yesu! Guru! Nupokaahi wongkamia!”

¹⁴Kanaitanda Yesu, Nauliangaahe, “Laomokau nipetudungia watami i tadulako mpenomba bona tongawa kamaohamimi.” Tanganda molumao, maohamohe.

¹⁵Hadua hangko i tauna iti mesule lao i Yesu, nauli masisimbuku, “Tetoiami Pue Ala. Maohamona!”

¹⁶Ia molingkudu motumpa i lindona Pue Yesu hai manguli ngkaia kamaroana Iria. Tauna iti iami hadua to Samaria.

¹⁷Roo indo, nauli Yesu i ope-ope tauna au meula Iria, “Bara pae hampulohe au Kupakaoha? Iumbamohe au hahio?

¹⁸Moapari pane hadua pea au mesule manguli ngkaia kamaroana i Pue Ala? Hai ia bara to Yahudi!”

¹⁹Hangko indo, nauli mbuli Yesu i tauna iti, “Meangkamoko, hai laomoko. Anti pepoinalaimu Iriko, ido hai maohamoko.”

²⁰Bahangkia toParisi mekunehe i Yesu, ba impira ina hawe poparentana Pue Ala i dunia. Nahanai Yesu, “Kahawena poparentana Pue Ala i dunia, bara ara tanda-tanda au ina raita.

²¹Nodo wori, bara ara tauna au ina manguli, ‘Peita olou, itimi!’ ba: ‘Peita inde, idemi!’ Lawi poparentana Pue Ala arami i olomi.”[11]

²²Roo indo, nauli Yesu i topeguruNa, “Hambela tempo, ina nipeinao mpuuNa niita, agaiana baraNa ina niita.

²³I tempo iti, ara tauna au ina mouliangaakau: ‘Peita, oloumi mai Ana Manusia!’ Ara wori au ina manguli: ‘Idemi!’ Agaiana ineekau meula irihira!

²⁴Lawi ane i kahaweNgku hule, Iko Ana Manusia, ina tongawa mpuu. KahaweNgku ina raita nodo pewangka kila au mesupa i Mata alo hai mewangka hawe-hawe i Katampua alo.

²⁵Agaiana nguru-nguruna, Iko hangangaa ina rapopeahi-ahiNa hai rasapuakaNa tauna au tuwo ide-ide.

²⁶Apa au mewali i tempona nabi Noho hangkoia, ina mewali wori i alo kahaweaNgku, Iko Ana Manusia.

²⁷I tempona nabi Noho hangkoia, manusia mampomalea, barahe moisa apa au ina morumpahe. Maande-ande hai maenu-enu peahe, motambihe hai rapopotambihe. Iti au rababehi liliu duuna nabi Noho mesua i lalu duanga mahile. Unga peahe naumbala owai mewali opehe mate.

²⁸Nodo wori kamampomaleanda tauna i wanua Sodomo i tempona Looti maida inditi. Maande-ande hai maenu-enu peahe, mobalu-baluhe, mowiahe hai moarohe sou.

²⁹Agaiana i kapaduna Looti hangko i wanua Sodomo, tauna iti ranawongihe api hai watu belerang hangko i langi, hai tehuwehe ope-ope.

³⁰Nodo wori kamampomaleanda tauna i kahaweNgku hule, Iko Ana Manusia, i dunia.

³¹I alo iti, tauna au mohuda-huda i pengkangkalahea i wongko sou, ineehe mesua i lalu sou mangala anu-anunda. Nodo wori tauna au i bonde, ineehe hampai mesule i boea mangala ba apa-apa. Hangangaa liliuhe melangka!

³²Nikatuinao apa au mewali i towawinena Looti![12]

³³Hema au mampeulai peundeana haduduana, bara molambi katuwo maroa. Agaiana hema au mokabaha peundeana hai meula Iriko kehapiri rapapate, iami au molambi katuwo maroa.

³⁴Tou mpuu au Kuuliangaakau: i alo pesuleaNgku, ara rodua au maturu i hambua koi, hadua raala hai hadua rapalehi.

³⁵Rodua towawine tanganda mombau, hadua raala hai hadua rapalehi.

³⁶[Rodua tauna mobago sambela i bonde, hadua raala hai hadua rapalehi.]”

³⁷Karoona Yesu mololita, mekunehe topeguruNa Iria, rauli, “Pue, iumba pewaliana ope-ope iti?” Nahanaihe Yesu, Nauli, “Iumba ara au mate, indo worihe tadasi kaloa mogulu. Nodo wori, ina tongawa mpuu kahaweNgku hule i dunia.”