Read Napu Lukasi 18 Bible Online

Lukasi 18 - Napu bible

Lukasi 18

¹Roo indo, Yesu mopahawe hampaka ngkora pandiri i topeguruNa bona mekakae liliuhe hai inee malede lalunda.

²Nauli, “I lalu hambua boea, ara hadua topebotusi au bara mengkoru i Pue Ala hai bara wori mobila hema pea.

³I boea iti, ara wori hadua towawine au bemba. Bosami belana lao molindo topebotusi iti moanti kara-karana, nauli, ‘Tulungi wongkoia mampombelindoa iwalingku.’

⁴I lalu bahangkia kamahaena, topebotusi iti bara mau motulungi tobemba iti. Agaiana kahopoana, nauli laluna, ‘Kehapirina bara mengkoru i Pue Ala hai barana mobila hema pea,

⁵agaiana anti kahawena liliu tobemba iti mai mesalempori, agina kubotusi peami kara-karana. Lawi ane bara kutulungi, ina mai liliu iriko.’ ”

⁶Roo indo, nauli Pue Yesu, “Nipekiri apa au nauli topebotusi iti. Nauri bara manoto laluna, agaiana naunde motulungi tobemba au merapi tulungi liliu iria.

⁷Mewali, apa mani Pue Ala au Naunde mohanai pamperapinda taunaNa au meraroa Iria maroa kaindi ba mabaa. Ba nipehangu, hangangaa mahae-hae tapegia, hangko Natulungirike Pue Ala?

⁸Bara! Batena holiga kaNatulunginta. Agaiana ane hawe suleNa, Iko, Ana Manusia, ara mani pae tauna au mepoinalai Kulambi i dunia ide?”

⁹Napahawe mbuli Yesu ngkora pandiri ide i tauna au mampetomanoto hai au mopapakoihe ranganda.

¹⁰Nauli Yesu, “Ara rodua tauna au lao mekakae i Souna Pue Ala, hadua toParisi, hai hadua, toperuru asele.

¹¹Toparisi iti meangka hai mekakae, nauli, ‘Pue Ala, kuuli ngkaia kamaroana Irio, lawi barana nodo tauna ntanina au manangka, au motengko lalunda, hai au mebualosi. Kuuli ngkaia kamaroana Irio lawi barana nodo olou toperuru asele.

¹²Mopuasana rombela i lalu haminggu. Hai hangko i ope-ope wuana bagongku, kuweiKo hangkira hampulo.’

¹³Agaiana toperuru asele iti, meangka kakarao, hai bara bai mengoa i langi. Anti kanaisana kamadosana, mohapa-hapami pondana, nauli, ‘O Pue Ala! Nupokaahi wongkoia, lawi ide iko tauna au madosana!’ ”

¹⁴Hangko indo, napahopo Yesu lolitaNa, Nauli, “Tou mpuu au Kuuliangaakau: i pesulenda i sounda, toperuru asele itimi nadoko Pue Ala hai Naimba manoto i peitaNa, agaiana toParisi iti, bara nadoko Pue Ala. Lawi hema au mampeindora, ina napaiwoi Pue Ala. Hai hema au mengkaiwoi, ina napaiwongko Pue Ala.”

¹⁵Hambela tempo, arahe tauna au moanti ananda i Yesu bona Natobohe hai Nawatihe. Karaitana topeguruNa apa au rababehi tauna iti, rakarumpuirihe.

¹⁶Agaiana Yesu mokakiohe anangkoi iti, hai mouliangaahe topeguruNa, “Pogiangaahe anangkoi iti mai Iriko. Ineehe nikonto, lawi tauna au nodohe anangkoi ide ina mewali taunana Pue Ala i lalu poparentaNa.

¹⁷Tou lolitaNgku ide: ane barakau mengkoru i Pue Ala nodo hadua anangkoi, barakau ina mewali taunaNa i lalu poparentaNa.”

¹⁸Hambela tempo, ara hadua tuana au mekune i Yesu, nauli, “Guru au maroa, apa au hangangaa kubabehi bona molambina katuwo maroa au bara mokahopoa?”

¹⁹Nahanai Yesu, Nauli, “Moapari hai nuuli, Iko tauna au maroaNa? Bara ara hadua tauna au maroa, batena pea Pue Ala.

²⁰Nuisami hawa au teuki i lalu Aturana Musa: inee mebualosi, inee mepapate, inee manangka, ineekau mohowara dongko, hai bila umamu hai inamu.”

²¹Nauli tauna iti, “Ope-ope hawa iti, aminami kupeulai hangko koi-koi peamona.”

²²Kanahadina Yesu lolitana, Naulimi, “Ara mani hampaka au hangangaa nubabehi. Laomoko hampai mampobalu hinangka anu-anumu, hai holona nuweihe tauna au meahi-ahi tuwonda. Ane nubabehi nodo, ina mahile hurungina au nuhumba i lalu suruga. Roo indo, maimoko, meulamoko Iriko.”

²³Kamohadina lolitana Yesu, masusami laluna, lawi ngkaia anu-anuna.

²⁴Naisa Yesu kamasusana laluna, ido hai Nauli, “Mapari mpuu tauna au pebuku mewali taunana Pue Ala i lalu poparentaNa.

²⁵Hagolo mani hambaa onta mesua i kalolu gigiu pane topebuku mewali taunana Pue Ala i lalu poparentaNa.”

²⁶Tingkaramohe tauna au mohadi lolitana Yesu iti, pane rauli, “Oo, ane nodori, hema pae au nabuku molambi katuwo maroa au bara mokahopoa?”

²⁷Nahanai Yesu, “Ane manusia, bara rabuku. Agaiana ane i Pue Ala, ope-ope peisa mewali, lawi bara ara au bara Nabuku.”

²⁸Hangko indo, nauli Peturu, “Noumbamongkai ikami? Mopalehimongkai hinangkana bona kiulaKo.”

²⁹Ido hai nauli Yesu i topeguruNa, “Bona niisa: hema au mopalehi souna, ba towawinena ba halaluna ba tosaena ba anana anti pengkoruna i Pue Ala,

³⁰i dunia ide, batena molambi hurungina bahangkia belana hangko i ope-ope au napalehi, hai molambi wori katuwo maroa au bara mokahopoa i alo au ina mai.”

³¹Hambela tempo, Yesu mokakiohe topeguruNa au hampulo hai rodua mogulu mopatania, hai Nauliangaahe, “Nipehadingi maroa! Ide-ide monontohimoke Yerusale. I wanua iti, ina tepabukei ope-ope au rauki nabi-nabi kana i Ana Manusia.

³²Ana Manusia ina rahuhu i tauna au barahe to Yahudi. Ina rakakabosai, rapapakoi, ratinuduhi,

³³rapapahai,[13] hai rapapate. Agaiana i alo katalu, ina tuwo hule.”

³⁴Agaiana tunggaiana Yesu, bara raisa topeguruNa, lawi lolitaNa tewuniangi mani lempona irihira.

³⁵Hungkumi Yesu i boea Yeriko, ara hadua tobilo au mohuda merapi-rapi, i wiwi rara.

³⁶Pohadina tauna bosa moliu, mekunemi, nauli, “Apari au mewali?”

³⁷Rahanai tauna bosa, “Yesu to Nasare melempo!”

³⁸Kanahadina tobilo iti lolitanda, meraroami, nauli, “Yesu, pemuleana Datu Daudi! Nupokaahi wongkoia!”

³⁹Rakarumpuiri tauna au moioruhe, rauliangaa “Mandiiko!” Agaiana tobilo iti, monganga-nganga pea masisimbuku, nauli, “Pemuleana Datu Daudi! Nupokaahi wongkoia!”

⁴⁰Mengkaroomi Yesu hai motudu tauna, Nauli, “Nianti mai tobilo iti!” Raanti mpuumi i Yesu, hai Napekune, Nauli,

⁴¹“Apa au nuunde bona Kubabehi?” Nahanai tobilo iti, “Pue, kupeinao wongkoia meita!”

⁴²Nauli Yesu, “Meitamoko. Anti pepoinalaimu Iriko, ido hai maohako.”

⁴³Unga pea meita. Hangko indo, liliu meula i Yesu hai motoia Pue Ala. Hai ope-ope tauna au moita apa au mewali, motoia worimohe Pue Ala.