Read Napu Lukasi 19 Bible Online

Lukasi 19 - Napu bible

Lukasi 19

¹I polumaoNa Yesu monontohi Yerusale, Ia moliu i boea Yeriko.

²I boea iti, ara hadua kapala toperuru asele au pebuku, hangana Sakeu.

³Sakeu iti mampeinao mpuu moita Yesu. Agaiana anti kantembena, ia bara peisa moita Yesu, lawi bosa mpuuhe tauna au mogulu inditi.

⁴Ido hai melangkami Sakeu mampehindorungi tauna bosa, hai mengkahe i kau ara bona peisa moita Yesu melempo.

⁵KahaweNa Yesu inditi, mengoami, hai mololita Nauli, “Sakeu, mendaulumoko holiga! Lawi ina mohambengiNa i soumu.”

⁶Hoholigami Sakeu mendaulu, hai matana laluna modoko Yesu i souna.

⁷Karaitana tauna bosa apa au mewali iti, mohume-humemohe, rauli, “Ae, moapari pane Ia mesonda i souna tomadosa?”

⁸Tangana Yesu i lalu sou, meangkami Sakeu hai mololita nauli, “Pue, hantanga hangko i ope-ope anu-anungku ina kuweihe tauna au meahi-ahi tuwonda. Hai hema pea au kubagiu, ina kupopesuleahe iba belana hangko i apa au kubagiungaahe.”

⁹Nauli Yesu, “I alo ide, oio hai ope-ope tinamu tehoremamokau, lawi mepoinalaimokau i Pue Ala nodo Burahima toiorunta.

¹⁰Ido hai Iko, Ana Manusia, maiNa i dunia ide. Lawi tunggaiaKu bona mohaokiNa tauna au karao hangko i Pue Ala hai mohoremahe hangko i huku dosanda.”

¹¹I tempona Yesu barapi karao hangko i wanua Yerusale, bosahe tauna meula Iria. Tauna bosa iti mampehangu, ane hawe Yesu i Yerusale, poparentana Pue Ala unga pea ina hawe i dunia. Mewali, Yesu mopaliliu lolitaNa hai ngkora pandiri ide,

¹²Nauli, “Ara hadua tuana au motunggai lao i tampo au karao bona ralanti mewali datu, hai roo indo, ina mesule.

¹³Mewali, hangko damani padu, mokakiomi hampulo hawina, hai naweihe hadua-hadua hampeka doi bulawa. Naulimi tuana iti i hawina: ‘Doi au kuweikau ide, hangangaa nipopolumao bona i pesuleangku deade, ara anana.’

¹⁴Agaiana i tampona tuana iti, ara worihe tauna au mokahihi. Mewali, i kapaduna, rahawami bona bahangkia suro lao mouliangaa Datu Mahile: ‘Tua, ia inee talanti mewali datungki, lawi bara kiunde!’

¹⁵Nauri nodo, tuana iti ralanti pea, hai mesule lao i boeana. I pesulena, nakakiomohe hawina, mampekune noumba karapopolumaona doina.

¹⁶Au nguru-nguruna mai iria, nauli, ‘Datu, hangkoia nuhuhuana hampeka doi bulawa. Idemi anana, hampulo wori pekana doi bulawa.’

¹⁷Nauli datu iti: ‘Maroa mpuu kanupopolumaona bago au kuweiko. Oio hawi au maroa. Mewali, anti kamanotomu i bago au koi, ina kupoinalaiko motadulakoi hampulo boea.’

¹⁸Hawi au karoduana mai wori iria, nauli: ‘Datu, hangkoia nuhuhuana hampeka doi bulawa. Idemi anana, lima wori pekana doi bulawa.’

¹⁹Nauli mbuli datu i hawi au karoduana iti, ‘Maroami. Mewali, ina kupoinalaiko motadulakoi lima boea.’

²⁰Roo indo, mai worimi hawi au hadua. Nauli: ‘Idemi doimu Datu. Kuwoli maroa, kupoto i lalu lencoku.

²¹Langana irio Datu, lawi kuisa kamakancamu. Nupopobago mantimingkai. Nutudungkai mehua hai mantuda, agaiana irio haha wuana.’

²²Nauli datu iria, ‘Oio hawi au kadake! Ina kuhukuko hintoto hai lolitamu haduduamu. Nuisato iko tauna maseke au mampopobago mantimi hawingku, kutuduhe mehua hai mantuda bona iriko haha wuana.

²³Ane nodo, moapari doi iti bara nuwei peami tauna ntanina mampopolumao? Mewali ane mesulena, hangangaa kulambi doingku hai ara wori anana!’

²⁴Roo indo, nauli mbuli datu i tauna au meangka i holana, ‘Niala doi au ara iria, hai niwei i hawingku au molambi hampulo pekana doi bulawa.’

²⁵Wulimohe tauna au meangka i holana, ido hai rauli, ‘Noumbari, Datu? Iria arami hampulo pekana doi bulawa!’

²⁶Mehana datu, nauli, ‘Bona kuuliangaakau, hema au peisa rapoinalai i apa au rawei, ina rawei mbuli. Agaiana hema au bara peisa rapoinalai, nauri haodi pea au rawei, batena ina raala hule.’

²⁷Roo indo, nauli mbuli datu iti, ‘Antimide mai iwalingku au mosapuaka karalantiku mewali datunda. Nipapatemohe ope-ope inde kuita-ita mata!’ ”

²⁸Karoona Yesu mololita nodo, moiorumi lao monontohi wanua Yerusale.

²⁹Hungkumohe i boea Betpage hai Betania i bulu Saitun, Yesu motudu rodua topeguruNa moioru,

³⁰Nauliangaahe, “Laomokau i boea au talindo. Ane hawekau inditi, ina niita hambaa ana kalide au rataka, au bara mani hambela rapodara. Nikakahi hai niantiaNa mai.

³¹Ane ara au mekune irikamu moapa hai nikakahi, niuliangaa node: ‘Naparaluu Pue.’ ”

³²Lao mpuumohe topeguruNa au rodua iti, hai rahumba nodo au nauliangaahe Yesu.

³³Tanganda mokakahi koloro kalide iti, ampu kalide mekune, nauli, “Moapari hai nikakahi kalide ide?”

³⁴Rahanai, “Naparaluu Pue.”

³⁵Roo indo, kalide iti raantimi lao i Yesu, ralampii badunda, pane Yesu rapopesawi.

³⁶Poliuna Yesu, tauna bosa mowokehe hampinda i tanga rara anti pebilanda Iria.

³⁷Hungkumi i wanua Yerusale i pempanaulua hangko i bulu Saitun, ope-ope topeulaNa mampomahilehe hangana Pue Ala. Anti kamatanana lalunda, mogee-geemohe motoia Pue Ala lawi raitami ngkaia tanda kuasa au nababehi Yesu.

³⁸Monani-nanihe, rauli, “Rawatimi Datu au mai i lalu hangana Pue! Maroa hulemi pohintuwuta hai Pue Ala. Tetoiami Pue au i suruga!”

³⁹Hangko inditi, bahangkia toParisi i olonda tauna bosa mouliangaa Yesu, “Guru, Nukontomohe topeulaMu bona ineehe manguli nodo!”

⁴⁰Nahanai Yesu, Nauli, “Bara! Lawi ane mandiihe topeulaNgku, ope-ope watu ide ina monganga-ngangahe motoiaNa.”

⁴¹Hungkumi Yesu i Yerusale, Ia mampetiro wanua iti, hai Nateriahi,

⁴²Nauli, “Mpiondo mpuu katuwomi to Yerusale! Kemorasi mpuukau ane i alo ide peawomi niisa apa au peisa mopahintuwukau hai Pue Ala. Agaiana ope-ope iti tewuniangiri irikamu.

⁴³Hambela tempo, iwalimi ina mampombealaa wanuami. Wanuami ina ratoleliki surodado, duuna barapi ara rarami mesuwu.

⁴⁴Ina marugikau, ikamu hai boeami hai ope-ope ihina, duuna barapi ara haogu watu i soumi au mentara i paidaana. Ope-ope iti hangangaa mewali, lawi bara niisa alo kamaina Pue Ala irikamu.”

⁴⁵Roo indo, Yesu mesua i tabangaa Souna Pue Ala. Inditi, Ia mowurahe tauna au mobalu-balu,

⁴⁶Nauliangaahe, “I lalu Sura Malelaha, Pue Ala manguli node: ‘SouNgku ide iami sou pekakaea.’ Agaiana ikamu, nipopewaliri sou pogulua topanangka!”

⁴⁷Alo-alona Yesu mepaguru i Souna Pue Ala. Kapala-kapala tadulako mpenomba hai guru-guru agama hai totosaenda to Yahudi mampeinaohe mopapate Yesu,

⁴⁸agaiana bara ara raranda mobabehi tunggaiana lalunda, lawi tauna bosa tedii lalunda mampehadingi lolitaNa.