Read Napu Lukasi 20 Bible Online

Lukasi 20 - Napu bible

Lukasi 20

¹Hambela tempo, Yesu mepaturo hai mopahawe Ngkora Marasa i tauna bosa au mogulu i Souna Pue Ala. Unga peahe hawe kapala-kapala tadulako mpenomba hai guru-guru agama hai totosaenda to Yahudi. Mekunehe i Yesu, rauli,

²“Nuuliangaangkai hangko iumba kuasaMu mobabehi ope-ope iti? Hema au moweiKo kuasa iti?”

³Nahanai Yesu, “Ara wori hampaka pekuneNgku irikamu.

⁴Hangko iumba kuasana Yohane Toperiu moriu tauna? Hangko i Pue Ala, ba hangko i manusia?”

⁵Mololitamohe tauna iti, hadua hai hadua, rauli, “Noumbami katahanaina? Ane tauli kuasana iti hangko i Pue Ala, ina Nauliangaake, ‘Ane nodo, moapari hai barakau mepoinalai i Yohane?’

⁶Agaiana ane tauli kuasana hangko i manusia pea, hangangaa rawatuike tauna bosa, lawi ope-ope tauna manguli Yohane iti hadua nabi.”

⁷Mewali, rahanai, rauli, “Bara kiisa.”

⁸Ido hai Nauliangaahe Yesu, “Ane nodo, bara worikau Kuuliangaa hangko iumba mai kuasaNgku mobabehi iti!”

⁹Roo indo, Yesu mopahawe hampaka ngkora pandiri i tauna bosa, Nauli, “Ara hadua tauna au motudai bondena hai anggoro. Ampu bonde iti mosaro bahangkia tauna mokadipura bondena i tempona padu lao i boea ntanina, lawi tunggaiana mahae haodi maida inditi.

¹⁰Hawemi tempona mopupu wua anggoro, natudumi hadua hawina lao merapi kirana hangko i topokadipura bondena. Agaiana topokadipura iti mohakarihe hawi au ratudu pane rapapahai hai ratudu mesule loa-loa.

¹¹Roo indo, ampu bonde iti motudu mbulimi hadua hawina. Hawe inditi, rapapahairi, rakakabosai hai rapopesule wori loa-loa.

¹²Hangko inditi, natudu mbulimi hadua hawina. Hawe inditi, rapapahai wori hai ratende i raoa bonde.

¹³Roo indo, naulimi ampu bonde iti, ‘Apa au hangangaa kubabehi? Aginami anangku au kupokaahi kutudu lao. Babila ina raadai.’

¹⁴Agaiana, i karaitana topokadipura bonde, anana iti, mogombomohe, rauli, ‘Oloumi mai anana, ia au ina mewali ampu bonde ide. Agina tapapate, hai taala bondena hai ope-ope ihina.’

¹⁵Mewali, rahaka mpuumi, rabisoso lao i raoa bonde hai rapapate.” Roo indo, napapulo Yesu lolitaNa, Nauli, “Ane mesule ampu bonde iti, apa au ina nababehi?

¹⁶Batena topokadipura bondena iti maihe napapate, hai bondena ina naweihe tauna ntanina.”[14] Karahadina tauna bosa ngkora pandiri iti, mololitamohe i Yesu, rauli, “Inee mpuu hawe mewali nodo! Ikita to Yahudi, barake ina nahuku Pue Ala nodo topokadipura bonde i lalu ngkora pandiriMu iti!”

¹⁷Agaiana Natotokihe Yesu hai Nauli, “Apa lempona lolita ide au teuki i lalu Sura Malelaha: ‘Watu au ratende topoaro sou, watu iti au mewali pohudaa sou’?”

¹⁸Hai nauli mbuli Yesu, “Ope-ope tauna au manawo i watu iti ina maretahe. Hai hema au narumpa watu iti ina marupu.”[15]

¹⁹Guru-guru agama hai kapala-kapala tadulako mpenomba moisa kaihirana au natunggai Yesu i lalu ngkora pandiriNa inona. Ido hai arami tunggaianda mohaka Yesu i tempo iti. Agaiana barahe bai, lawi mampokalangahe tauna bosa.

²⁰Mewali, mohaokihe tempo au maroa, hai motudumohe bahangkia tauna lao i Yesu mohaoki kamasalana lolitaNa bona peisa raanti lao i gubernur Roma hai rasalai i lindona. Tauna au ratudu iti, mengkamaroa peahe lawi tunggaianda mopakanawo Yesu.

²¹Kahawenda i Yesu, rauliangaa, “Guru, kiisa katouna lolitaMu hai ope-ope paturoMu. MepaturoKo i katou-touana moula peundeana Pue Ala, hai baraKo mampopontani tauna.

²²Ido hai kipekuneKo: moula atura agamanta, hangangaa mobaiarike asele i Kaisar,[16] ba bara?”

²³Agaiana naisari Yesu tunggaiana lalunda au tewuniangi. Ido hai Nauliangaahe:

²⁴“NipopaitaaNa hampai mai doi hampeka! Lenggena hema hai hangana hema au ara i doi ide?” Rahanai, rauli, “Lenggena hai hangana Kaisar.”

²⁵Nauli Yesu, “Ane nodo, wei Kaisar apa au hintoto rawei Kaisar, hai wei Pue Ala apa au hintoto rawei Pue Ala.”

²⁶Kahopoana tauna iti barahe peisa mopakanawo Yesu i lindo tauna bosa. Bara ara kamasalana lolitaNa au ralambi. Mandii-ndii peahe lawi tingkarahe mohadi pehanaNa.

²⁷Roo indo, arahe bahangkia toSaduki au hawe i Yesu. Tosaduki iti iami tadulako agama Yahudi au manguli tauna au mate bara ina rapatuwo hule.

²⁸Kahawenda toSaduki iti, mohaokihe kanawoana Yesu. Hai rauliangaa, “Guru, nabi Musa mouki i lalu sura atura agamanta node: ane hadua tobalilo au motambimi mate agaiana bara mani ara anana, halaluna hangangaa mampotambia bembana bona tauna iti ara pea pemuleana.

²⁹Mewali, arahe pitu topohalalu, ope-opehe tobalilo. Au towutu, motambi. Bara mani wohiraia moana, matemi tobalilo iti.

³⁰Adina mampotambia bembana. Bara mani worihe moana, matemi.

³¹Nodo wori au mewali i kataluna duuna hawe i kapituna.

³²Kahopoana mate worimi towawine iti.

³³Mewali, i alo pearonda tomate, ane tou-tou mpuu tomate tuwo hulehe, hemami ampuna towawine iti? Lawi pitumohe au mampotambia.”

³⁴Nahanai Yesu, “Tauna au tuwo ide-ide, motambi hai rapopotambihe.

³⁵Agaiana tauna au hintoto molambi kiranda i dunia au wou hai au napatuwo hulehe Pue Ala, barapohe motambi ba rapopotambi.

³⁶Lawi katuwonda nodo katuwo malaeka, hai barapohe mate. Ihira iti, napoanahe Pue Ala, lawi Pue Ala mopatuwo hulehe.

³⁷Ina Kutudungiakau lolita au ara i lalu Sura Malelaha au mopakanoto katuwonda hule tomate. I lalu sura Aturana Musa, tabasa tuntukana noumba Pue Ala mongkora i nabi Musa hangko i lalu lopo au rore. I tempo iti, Burahima, Isaki hai Yako, mahaemohe mate. Agaiana nauri nodo, Pue Ala mouliangaa Musa node: ‘Ikomi Pue Ala au rapenombai liliu Burahima, Isaki hai Yako.’

³⁸Mewali, hangko i lolitana Pue Ala iti, taisa ntepuu Burahima, Isaki hai Yako, batena tuwo manihe. Lawi barari tauna au mate au menomba i Pue Ala. Batena pea tauna au tuwo au menomba i Pue Ala. Lawi i Pue Ala ope-ope tauna tuwo.”

³⁹I tempo iti, bahangkia guru agama mouliangaa Yesu, “Guru, tou mpuu pehanaMu.”

⁴⁰Roo indo, barapi ara hadua au bai mampekune ba apa-apa i Yesu.

⁴¹Hangko indo, mekune Yesu i guru agama iti, Nauliangaahe, “Moapari hai rauli tauna, Datu Topehompo iami pemuleana Datu Daudi?

⁴²Lawi Daudi haduduana mopakanoto Datu Topehompo iami Pue au napenombai. I lalu sura Petoia, nauli Daudi node: Pue mongkora i Ampuku au kupenombai, Nauli, ‘MohudamoKo ntanda i koanaNgku

⁴³duuna Kupopengkoruhe ope-ope iwaliMu Irio.’

⁴⁴Mewali, ane Datu Topehompo iami pemuleana Daudi, moapa hai nauli Daudi kaIanami Pue au napenombai?”

⁴⁵Tanganda mani tauna bosa mampehadingi lolitaNa, nauli Yesu i topeguruNa:

⁴⁶“Mainga-ingakau, ineekau mampeulai babehianda guru-guru agama. Raunde molumao mopake badu au mandoe, hai mampeinaohe rabila tauna bosa i pobalu-balua. Raunde mohuda i pohudaa au raadai i sou penombaa hai i posusaa.

⁴⁷Mopakanawohe towawine au bemba bona rarampaki sounda. Hai mekakaehe mahae-hae motabungihi babehianda au kadake. Ina mantimi mpuu karahukunda!”