Read Napu Lukasi 21 Bible Online

Lukasi 21 - Napu bible

Lukasi 21

¹I lalu Souna Pue Ala, Yesu moita bahangkia tauna au pebuku mopusa doinda au ngkaia i lalu peti pambolia doi popenomba.

²Naita wori hadua towawine tobemba au meahi-ahi tuwona mopusa doi popenombana. Au napopesua iti, rompeka doi tambaga au haodi pea imbana.

³Nauli Yesu, “Kuuliangaakau: tobemba au meahi-ahi tuwona iti, popenombana melumbu hangko i ope-ope tauna ntanina au mopusa popenombanda,

⁴lawi ihira mokira hangko i pelabiana pea doinda. Agaiana tobemba iti, nauri meahi-ahi tuwona, ia mokira ope-ope au ara iria au naparaluu woia i lalu katuwona alo-alona.”

⁵I tempona bahangkiahe topeguruNa mampololita kana i peraena souna Pue Ala au raparewai mampopengaa watu au makara hai parewa ntanina au rapopenomba i Pue Ala, Mololitami Yesu, Nauli,

⁶“Souna Pue Ala au niita makara ide, i alo au ina mai, bara ina ara haogu watu au mentara i paidaana. Batena ope ragero.”

⁷Hangko indo, mekunemohe topeguruNa i Yesu, rauli, “Guru, impira pewaliana au Nuuli inona? Hai tanda apa au ina mewali ane hawemi tempo pewaliana?”

⁸Nauli Yesu, “Mainga-ingakau bona datikau rapakanawo, lawi bosa tauna ina mai hai mangulihe kaihiranami Datu Topehompo. Ara worihe au ina manguli kahawenami alo pebotusi i kahopoa dunia. Agaiana ineehe nipoinalai.

⁹Ane mohadikau pombeala ba bambari pombeala inee nipowulunga, lawi ope-ope iti hangangaa mewali hampai, agaiana bara mani hawe kahopoa dunia.”

¹⁰Hangko indo, napaliliumi Yesu lolitaNa, Nauli, “I tempo iti, tohangamba ina mombeala hai tohangambana, kadatua hambua ina moewa kadatua ntanina.

¹¹Iumba pea ina ara linu rimihi, haki, hai rimi. Hai batena ara wori tanda i langi au melangaki.

¹²Agaiana hangko damani ope-ope iti mewali, ikamu ina rahaka hai rapopeahi-ahi. Ina rasalaikau i lalu sou penombaa hai ratarunggukau. Anti peulami Iriko, ikamu ina rahuhu i datu hai topoparenta.

¹³I tempo iti, ina raweikau katepaka mopahawe kana i pepoinalaimi Iriko.

¹⁴Hangangaa nipakaroho lalumi, hai ineekau langa ba noumba pehanami mouli notomi.

¹⁵Lawi Iko ina mowoli i lalumi pehanami au manoto alana bara rabuku iwalimi mosapuaka apa au niuli.

¹⁶I tempo iti, ina rahuhukau i iwalimi. Ina rapobalukau tosaemi, halalumi, hantambiami, hai rangami. Hanggaakau ina rapapate.

¹⁷Anti peulami Iriko, ina rakahihikau ope-ope tauna.

¹⁸Agaiana mogalori hangkau weluami, bara ina matanta.

¹⁹Nipakaroho pepoinalaimi bona mantahakau i lalu ope-ope kapari ide, lawi hema au mantaha ina molambi katuwo maroa au bara mokahopoa.”

²⁰“Ane niita surodadonda iwalimi motoleliki wanua Yerusale ide, niisa kadanapi mahae Yerusale ina ragero.

²¹I tempo iti, tauna au maida i Yudea, agina melangkahe lao i bulu. Tauna au i lalu wanua, agina melangkahe hangko i wanua. Hai tauna au i raoa wanua, ineehe mesua i lalu wanua.

²²Lawi i alo iti, ina hawe Alo Pehukuna Pue Ala bona tepabukeimi ope-ope au teuki i lalu Sura Malelaha.

²³Ina masusa mpuu tuwonda towawine au mantimi hai au mopatomi ananda. Lawi i tempo iti tauna ina narumpahe kapari hai pehukuna Pue Ala au rumihi ntepuu.

²⁴Arahe ampu wanua Yerusale au ina rapapate hai piho. Ara worihe au ina ratawani hai rahawu-hawuhe iumba pea i humalele dunia. Hai wanua Yerusale ide ina ranangi hai raparentai tauna au barahe to Yahudi duuna hopo tempona au napakanoto Pue Ala.”

²⁵“I alo, i wula hai i betue, ina ara tanda-tanda au metingkarai. Ope-ope tauna i dunia, ina langa hai wulihe moita balumba tahi hai mohadi pogumuruna tahi.

²⁶Anti kalanganda moita ope-ope au mewali i humalele dunia, arahe tauna au ina malimpu, lawi ope-ope au makuasa i langi ina rumihi kamagunegonda.

²⁷I tempo iti, tauna ina moitaNa, Iko Ana Manusia, mendaulu mai hangko i wongko gawu. Ina makuasaNa hai meawa ntepuuNa.

²⁸Ane niita pepongkana tanda-tanda ide, nipakaroho lalumi hai mengoamokau, lawi ina rakabahakau hangko i kaparimi.”

²⁹Pue Yesu mopahawe ngkora pandiri ide i topeguruNa, Nauli, “Nipailalu apa au Kupaturoakau hangko i kau ara hai kau-kau au ntanina.

³⁰Ane niita pengana motumbe hai motawemi, niisa kaina hawenami tempo madii.

³¹Nodo wori, ane niita hinangka au Kuuliangaakau inona, niisami kaina hawenami poparentana Pue Ala i dunia.

³²Tou mpuu au Kuuliangaakau: ope-ope au Kuuli inona, batena mewali hangko damani ope tauna au tuwo i tempo ide mate.

³³Langi hai tampo ina magero, agaiana lolitaNgku batena ara hawe i hae-haena.”

³⁴“Mainga-ingakau, datikau mosusa-susa hai malangu-langu liliu. Mainga-ingakau datikau mampepekiri liliu katuwomi i dunia ide, alana mampomaleakau. Lawi alo kahaweNgku hule unga pea ina morumpa ope-ope tauna i dunia. KahaweNgku hule iti peisa rapandiri nodo tilobu au mopakanawo tauna au mampomalea.

³⁶Mewali, mainga-ingakau, hai mekakaekau i Pue Ala bona tekabahakau hangko i ope-ope kapari au ina mewali, hai bona nibuku meangka i lindoKu, Iko Ana Manusia.”

³⁷Ane mabaa, Yesu mepaturo i Souna Pue Ala. Ane kaindi, lao mohambengi i raoa wanua i Bulu Saitun.

³⁸Alo-alona madondo, tauna bosa moguluhe i Souna Pue Ala mampehadingi paturoNa.