Read Napu Lukasi 22 Bible Online

Lukasi 22 - Napu bible

Lukasi 22

¹Barapi mahae ina hawe alo mahilenda to Yahudi au rahanga Posusa Roti au Bara Raragii hai au rahanga wori Posusa Pasa.

²I tempo iti, kapala-kapala tadulako mpenomba hai guru-guru agama mohaokihe rara mopapate ngkandii Yesu, lawi mampokalangahe tauna bosa.

³Roo indo, Yudasi au rahanga wori Iskariot, hadua hangko i topeguruna Yesu au hampulo hai rodua, napesuangimi Datu Tokadake.

⁴Ido hai laomi Yudasi i kapala-kapala tadulako mpenomba hai kapala topokampai Souna Pue Ala mampololita tunggaiana kaina mampobaluna Yesu irihira.

⁵Matanahe mohadi tunggaiana iti, hai radandia ina rawei doi.

⁶Napokanami Yudasi lolitanda, hai nahaokimi katepaka au maroa mohuhu Yesu irihira bona rahaka i tempona bara raisa tauna bosa.

⁷Hawemi alo pepongkana Posusa Roti au Bara Raragii, hai moula ada agamanda to Yahudi, hambaa dimba hangangaa rasambale i alo iti bona raande i Posusa Pasa.

⁸Ido hai Yesu motuduhe Peturu hai Yohane, Nauliangaahe, “Laomokau mopasilolongaake paande Pasa.”

⁹Rapekune, “Pue, iumba peundeaMu kipasilolonga paande iti?”

¹⁰Nahanai Yesu, “Ane mesuakau i lalu wanua, ina nipohidupaa hadua tobalilo moanti pantambua au keihi owai. Meulamokau iria hawe i souna.

¹¹Ane mesuakau i lalu souna, niuliangaa, ‘Nauli Guru: iumbaNa peisa maande Posusa Pasa hihimbela hai topeguruNgku?’

¹²Ampu sou iti ina motudungiakau hambua hologa mahile au ara i wongko. Hologa iti tepasilolongami, hai handa parewana. Inditimi nipasilolongaake paande Pasa.”

¹³Lao mpuumohe Peturu hai Yohane i lalu wanua. Kahawenda inditi, ope-ope mewali nodo au nauliangaahe Yesu, hai mopasilolongamohe paande Pasa.

¹⁴Hawemi temponda moande paande Pasa, mohudami Yesu hai topeguruNa au hampulo hai rodua i sou iti.

¹⁵Tanganda mohuda, Nauliangaahe Yesu, “Kuunde mpuu maande sambela hai ikamu i Alo Posusa Pasa hangko damaniNa molambi kapari.

¹⁶Lawi Kuuliangaakau, barapoNa ina moande paande Pasa duuna tepabukei lempona Posusa Pasa ide i kahawena poparentana Pue Ala i dunia.”

¹⁷Roo indo, Yesu mangala hambua paenua au buke anggoro, mekakae i Pue Ala, pane Nauli i topeguruNa, “Nialami hai nikira-kira.

¹⁸Bona niisa: mepongka ide-ide, barapi ina Kuenu anggoro duuna hawe poparentana Pue Ala i dunia.”

¹⁹Roo nodo, Yesu moala mbuli roti hai mekakae i Pue Ala. Roo nodo, roti iti Nabise-bise hai Nakira-kiraahe, Nauli, “Idemi wataNgku au Kuhuhu mopahurukau. Nibabehimi ada ide bona nikatuinaoNa.”

²⁰Nodo wori, karoonda maande, Nahuhuamohe paenua anggoro, Nauliangaahe, “Paenua anggoro ide, lempona dandina Pue Ala au wou, au mopahintuwu Pue Ala hai manusia. Dandi ide Napakaroho hai waheNgku au tebumbuha i kapateNgku.

²¹Agaiana nipehadingi hampai! Hadua hangko irikamu au maande sambelake ide-ide, ina mampobaluNa!

²²Iko Ana Manusia hangangaa mateNa nodo au napakanotomi Pue Ala. Agaiana hurewumi tauna au mampobaluNa iti!”

²³Karahadina topeguruNa lolitaNa, mombekunemohe ba hema au ina mobabehi iti.

²⁴Hangko indo, mombehanaimohe topeguruna Yesu, ba hema i olonda au meliu kamahilena tuwona.

²⁵Ido hai Nauliangaahe Yesu, “Ope-ope datu i dunia au moparentahe tauna bosa, hai ope-ope topohawa raulihe ihirami topetingku.

²⁶Agaiana ikamu, ineekau nodo! Aginari tauna au meliu kamahilena tuwona hangangaa mengkaiwoi. Hai tauna au mepohawaa hangangaa mewali hampai nodo hadua hawi.

²⁷Mewali, hemami au tepamahilea tuwona: tauna au mohuda maande, ba tauna au merora? Taisami: i dunia ide, au mahile tuwona iami au mohuda maande iti. Agaiana irikita bara nodo, lawi Iko au mororakau nodo hadua hawi.

²⁸NiporangaiNa i lalu hinangkana kapariNgku.

²⁹Ido hai Kuuliangaakau: nodo UmaNgku moweiNa kuasa moparenta, Iko wori ina moweikau kuasa moparenta,

³⁰bona maande hai maenu sambelake i hambua meja i lalu poparentaKu. Hai ina mohuda worikau i pohudaa au hampulo hai rombua moparentai to Isaraeli au hampulo hai rontina.”

³¹Roo indo, Yesu mouliangaa Simo Peturu, “Simo! Nupehadingi: Datu Tokadake rawei mpuumi katepaka mokelokau. Nodo pare au ratapihi, ina tepatani au wara hai au moihi.

³²Agaiana Kupekakaengaako Simo bona dati maguli pepoinalaimu. Mewali, ane menosoko hai mesuleko Iriko, hangangaa nupakaroho lalunda halalumu.”

³³Nahanai Peturu, “Pue, baraKo ina kupalehi! Kehapirina ratarunggu ba mate hihimbela hai Oio, batengku meula liliu Irio!”

³⁴Nauli Yesu, “Peturu, Kuuliangaako: wengi ide, hangko damani motuturua manu, talumi belana nusapuaka kanuisaNgku.”

³⁵Roo indo, Yesu mouliangaahe topeguruNa, “KaKutudumi lao mobambari Ngkora Marasa, barakau Kupaliu moanti dompe ba rombe ba kandupami. I tempo iti, ba ara kamakurami?”

³⁶Rahanai, “Bara ara.” Nauli Yesu, “Agaiana mepongka ide-ide, hema au nakaarai doi ba baku, hangangaa nianti. Hai ane bara ara pihomi, nipobalu badumi nipopeholo piho.

³⁷Lawi teukimi node i lalu Sura Malelaha: ‘Datu Topehompo ina rapahimbela hai tauna au kadake.’ Hai apa au teuki ide hangangaa mewali Iriko, lawi ope-ope au teuki i lalu Sura Malelaha kana Iriko, batena ina tepabukei.”

³⁸Rauli topeguruNa, “Pue, idemi piho romata.” Nahanai Yesu, “Handami.”

³⁹Nodo biasana, padumi Yesu hangko i wanua lao i Bulu Saitun hihimbela hai topeguruNa.

⁴⁰Kahawenda inditi, Nauliangaahe, “Mekakaemokau bona datikau narumpa pekelo.”

⁴¹Roo indo, laomi karao haodi hangko irihira, hai molingkudu mekakae,

⁴²Nauli, “UmaNgku, ane Nuunde, Nupakaraoa wongkoia kapari au ina morumpaNa ide. Agaiana bara peundeaKu au Kuula, peundeaMuri, Uma.”

⁴³[Roo indo, hawemi hadua malaeka hangko i suruga mai mopakaroho laluNa.

⁴⁴Mapari mpuu Nahadi, ido hai napari-pari mekakae. Anti kamasusana laluNa, tumbumi siwuniaNa nodo wahe mougu-ogu tudo i tampo.]

⁴⁵Roo mekakae, meangkami Yesu lao i topeguruNa. Nalambihe tanganda leta anti kawiorana mpuu lalunda.

⁴⁶Nauliangaahe, “Moapari hai letakau? Mearomokau hai mekakaekau datikau narumpa pekelo.”

⁴⁷Tangana mani Yesu mololita, unga peahe hawe tauna au bosa. Tauna iti naantihe Yudasi, hadua hangko i topeguruna Yesu. Kahawenda inditi, laomi Yudasi i Yesu, natabe hai naangki moula adanda to Yahudi.

⁴⁸Agaiana nauli Yesu, “Yudasi, moapari hai nuangkiNa? Nodo pae raramu mohuhuNa, Iko Ana Manusia?”

⁴⁹Karaitana topeguruNa apa au ina mewali, rauli, “Pue, noumba, kiewamohe hai piho?”

⁵⁰Roo indo, hadua hangko i topeguruNa mowuka pihona mobata hawina Tadulako Mpenomba Mahile, kana talinga koanana pane maingihi.

⁵¹Nauli Yesu, “Handami!” Hai liliu motobo talingana hawi iti pane maoha.

⁵²Roo indo, Yesu mouliangaahe kapala-kapala tadulako mpenomba hai topokampai Souna Pue Ala hai totosaenda to Yahudi au mai mohaka, Nauli, “Tauna kadakeriNa pae dide, pane maiNa nihaka moantikau piho hai pewombe?

⁵³Alo-alona araNa hihimbela hai ikamu i Souna Pue Ala mepaturo. Moapa hai baraNa nihaka i tempo iti? Agaiana kaindi rai hangko baikau mohakaNa. Idemi tempomi, lawi ide wori tempona Datu Tokadake au makuasa i hinangkana au makaindi!”

⁵⁴Hangko inditi, rahakami Yesu hai raanti lao i souna Tadulako Mpenomba Mahile. Peturu meula ngkarao pea.

⁵⁵I tabangaa sou iti, arahe bahangkia tauna au mopatuwo api rapamindui. Lao worimi Peturu mohuda hihimbela hai ihira.

⁵⁶Hadua towawine au mobago i souna Tadulako Mpenomba Mahile moita Peturu tangana mamindu. Natotoki pane nauli, “Tauna ide ara hihimbela hai Yesu inona!”

⁵⁷Nasapuaka Peturu, nauli, “Bara kuisa tauna iti!”

⁵⁸Bara mahae hangko indo, hadua mbuli moita Peturu, nauliangaa, “Bara pae oio wori hadua topeguruNa?” Nasapuaka mbuli Peturu, nauli, “Bara, bara iko!”

⁵⁹Ba ara hajaa hangko indo, ara mani hadua au manguli, “Ia wori meula i Yesu, lawi ia to Galilea!”

⁶⁰Nahanai Peturu, “Bara mpuu kuisa apa au nuuli!” Tangana mani mololita, motuturuami manu,

⁶¹hai membalilimi Pue Yesu mototoki Peturu. I tempo iti, nakatuinaomi Peturu lolitana Pue Yesu au mouliangaa, “Hangko damani motuturua manu, talumi belaNgku nusapuaka.”

⁶²Padumi Peturu lao i raoa, hai moteria monggoro-nggoro lawi masusa laluna.

⁶³Roo indo, tauna au mokampai Yesu, mopapakoihe Yesu hai rapapahai.

⁶⁴Rabungkuhi matana, hai rauliangaa, “Ee nabi! Uli ba hema au mohapaKo!”

⁶⁵Ia rakakabosai wori hai mampopengaa lolita au kadake.

⁶⁶Madondona ope-ope kapala-kapala tadulako mpenomba hai guru-guru agama hai totosaenda to Yahudi mogulumohe i Pogombo Topeparesa Mahile Agama Yahudi, hai Yesu raanti i lindonda.

⁶⁷Rauli tadulako iti i Yesu, “Ide-ide Nuuliangaangkai, ba Oio mpuu Datu Topehompo?” Nahanai Yesu, Nauli, “Kehapirikau Kuhanai, batena ina bara nipoinalai.

⁶⁸Hai ane mekuneNa irikamu, batena baraNa ina nihanai.

⁶⁹Mewali, idemi pehanaNgku: barapi mahae Ana Manusia ina mohuda ntanda i koanana Pue Ala au makuasa.”

⁷⁰Rauli mbuli tadulako iti i Yesu, “Ba Anana mpuuKo Pue Ala?” Nahanai Yesu, “Tou mpuu, nodo au nuuli iti.”

⁷¹Hangko indo, raulimi, “Barapi bunduna ara sabi, lawi tahadi ntalingami lolitaNa au mopakoi Pue Ala!”