Read Napu Lukasi 23 Bible Online

Lukasi 23 - Napu bible

Lukasi 23

¹Roo indo, laomohe ope-ope tadulako iti hai moantihe Yesu i lindona Gubernur Pilatu.

²Kahawenda inditi, rapepongkami mosalai Yesu, rauli, “Tauna ide kilambi tangaNa mopakanawo tauna bosa! Nauli barangkai paraluu mobaiari asele i Kaisar i Roma. Hai Nauli wori kaIanami Datu au rahanga Kerisitu.”

³Mewali, mekunemi Pilatu i Yesu, nauli, “Datunda mpuuKo pae to Yahudi?” Nahanai Yesu, “Tou, nodo au nuulimi.”

⁴Hangko indo, nauli Pilatu i kapala-kapala tadulako mpenomba hai i tauna bosa, “Tauna ide bara kulambi salana au ina kuhukua.”

⁵Agaiana rapaliliumi pesalainda Iria, rauli, “Anti pepaturoNa, Ia mohuweki lalunda tauna bosa moewa poparenta i humalele tampo Yahudi, mepongka i Galilea duuna hawe inde.”

⁶Kanahadina Pilatu lolitanda iti, napekunehe, “To Galilea pae tauna ide?”

⁷Rahanai, “Io, Ia to Galilea.” Kanahadina Pilatu pehananda, natudumi tauna moanti Yesu lao i Datu Herode, lawi Herode datu au moparenta i tampo Galilea. Tempo iti, Herode ara wori i Yerusale.

⁸Matana mpuu Herode moita Yesu, lawi mahaemi nahadi bambari kana Iria, hai naharunga wori kaina Natudungiana hampaka tanda kuasa au metingkarai.

⁹Ido hai Herode mopahawe ngkaia pakana pampekune i Yesu, agaiana bara ara au Nahanai Yesu.

¹⁰Ara worihe inditi kapala-kapala tadulako mpenomba hai guru-guru agama au mosalai ntepuuhe Yesu i lindona Herode.

¹¹Roo indo, Herode hai surodadona mampopowadi-wadi hai mopapakoihe Yesu. Rabadui badu datu, hai raanti hule lao i Pilatu.

¹²I alo iti, Herode hai Pilatu mombepomaroamohe, lawi hangkoia moiwalihe.

¹³Hangko indo, Pilatu mogulu mbulimi ope-ope kapala tadulako mpenomba hai totosae boea hai tauna bosa,

¹⁴pane nauliangaahe, “Tauna ide, nianti mai iriko hai niuli Ia mohuweki lalunda tauna bosa bona moewa poparentata. Alo ide kuparesami i lindomi, agaiana bara kuhumba hampaka babehiaNa au kadake nodo au nisalaia.

¹⁵Nodo wori pelambiana Herode, lawi napopesule pea mai iriko. Tauna ide bara mobabehi apa pea au hintoto rahukua mate.

¹⁶Mewali, ina kuhepe-hepe peami hai pekandangi au modui roo indo, kukabaha.”

¹⁷(Pilatu manguli nodo, lawi pare-parena i Alo Posusa Pasa, ia mokabaha hadua tauna au ratarunggu, ba hema au raperapi tauna bosa.)

¹⁸Karahadina tauna bosa lolitana, monganga-ngangamohe rauli, “Ia hangangaa rapapate! Baraba au nukabaha!”

¹⁹(Baraba iti, ratarunggu anti pepapatena hai peewana i lalu wanua.)

²⁰Hambela mani Pilatu Mololita i tauna bosa, lawi napeinao mokabaha Yesu.

²¹Agaiana monganga-nganga liliuhe masisimbuku, rauli, “Papate! Papate i kau mombehape!”

²²I kataluna belana, Pilatu mololita irihira, nauli, “Apa dakeNa? Mogalori hampaka salaNa au hintoto rapapatea, bara ara kulambi. Kupapahai pea hai kukabaha.”

²³Agaiana tauna bosa iti mopasimbukumohe pamperapinda monganga-ngangahe bona Yesu rapaku i kau mombehape. Kahopoana tauna iti menangihe.

²⁴Nabotusimi Pilatu bona Yesu rahuku mate hai Baraba au rakabaha moula pamperapinda tauna bosa. Roo indo, nahuhumi Yesu i surodadonda to Roma bona rapapate moula peundeanda to Yahudi.

²⁵

²⁶Hangko inditi, surodado to Roma moantimohe Yesu lao i raoa wanua, hai i tanga rara mampohidupaahe hadua to Kirene au hangko hawe i Yerusale, hangana Simo. Simo iti rataha hai rapari-pari motalondo kau mombehape meula i bokona Yesu.

²⁷Tangana Yesu raanti lao i raoa wanua, bosahe tauna meula Iria, tepesuahe bahangkia towawine au moteriahi Yesu.

²⁸Yesu mampembalilingihe towawine iti, hai mololita, Nauli, “Towawine to Yerusale, inee Iko au niteriahi, agaiana niteriahi watami haduduami hai anami.

²⁹Lawi barapi mahae tauna ina manguli: ‘Morasihe towawine au lalo hai au bara mopatomi ananda!’

³⁰I tempo iti, tauna ina manguli: ‘Barapi kiunde tuwo! Agina narumpingingkai bulu hai natabungingkai tampo!’

³¹Ane tauna mobabehi nodo i kau au tuwo,[17] apa mani i kau au bangi.”

³²Ara wori rodua tauna au kadake babehianda raanti bona rapapatehe hihimbela hai Yesu.

³³Kahawenda i bulu au rahanga Bulu Banga waa, rapakumi Yesu i kau mombehape hihimbela hai rodua tauna au kadake iti. Hadua rapaku ntanda i koanaNa hai hadua ntanda i kabeoNa.

³⁴Yesu mekakae, Nauli, “Uma, Nuampungi wohiraia tauna ide, lawi bara raisa apa au rababehi.” Surodado au mopaku Yesu motendemohe dadu bona mopakanoto kahemana au molambi hampiNa.

³⁵Bosa tauna meangka i woi kau mombehape mampengoa Yesu. Ara worihe tadulakonda to Yahudi au mopapakoi Ia, rauli, “Peita! Ia motulungi tauna ntanina, agaiana wataNa bara Nabuku Natulungi. Ane tou-tou mpuu kaIana Datu Topehompo au napilei Pue Ala, hangangaa mendaulu hangko i kau mombehape iti!”

³⁶Surodado mopapakoi worihe Yesu, hai rahungkuki pane rapaenu anggoro au mangilu,

³⁷rauli, “Ane tou-tou datundaKo to Yahudi, tulungimide wataMu!”

³⁸I kau popakua i wongko waaNa, teuki node: IDEMI DATUNDA TO YAHUDI.

³⁹Hadua tauna au kadake babehiana au rapaku i kau mombehape hihimbela hai Yesu, mopapakoi Yesu, nauli, “Nuuli kaOiona Datu Topehompo! Ane tou mpuu apa au Nuuli iti, tulungimide wataMu hai Nutulungi woringkai!”

⁴⁰Agaiana tohaduana mokambaroa rangana, nauliangaa, “Barako pae langa i Pue Ala? Ide ikita, hihimbelake rahuku mate hai Ia.

⁴¹Ane ikita, hintotoke rahuku mate anti babehianta au kadake, agaiana Ia, bara mpuu ara salaNa.”

⁴²Roo indo, nauli mbuli tauna iti, “Yesu, Nukatuinao wongkoia, ane haweKo i poparentaMu!”

⁴³Nauli Yesu, “Tou mpuu au Kuuliangaako, i alo ide peami, ina hihimbelako hai Iko i lalu Paradesi.”[18]

⁴⁴Pualomi, ba tinti hampulo hai duami pae, unga pea makaindi i humalele tampo iti hawe tinti talu.

⁴⁵Rindi bana au ratoe i lalu Souna Pue Ala, mahepa ntanga.

⁴⁶Roo indo, naulimi Yesu masisimbuku, “Uma, i lalu taieMu Kupaisare inaoNgku!” KarooNa mololita nodo, opemi inaoNa.

⁴⁷Kanaitana tadulako surodado apa au mewali iti, motoiami Pue Ala, nauli, “Tongawa mpuu! Ia ide tauna au manoto!”

⁴⁸Pesulenda tauna bosa au lao mosabiki apa au mewali iti, mohapa-hapamohe pondanda lawi rumihi mpuu penosonda.

⁴⁹Ope-ope tauna au mahaemohe moisa Yesu tepesuahe towawine au meula hangko i Galilea, meangka ngkaraohe bona mampeitahe hinangkana au mewali iti.

⁵⁰I tempo iti, ara hadua tobalilo au rahanga Yusupu au hangko i boea Arimatea i tampo Yudea. Yusupu iti, iami tauna au maroa laluna hai manoto babehiana. Mahaemi mampegia kahawena poparentana Pue Ala. Ia wori hadua tadulako i Pogombo Topeparesa Mahile Agama Yahudi, agaiana bara napokana pobotusinda tadulako iti au manguli Yesu hangangaa rahuku mate.

⁵¹

⁵²I kapatena Yesu, laomi Yusupu mampombelambia Pilatu mamperapi wataNa Yesu bona ratawu.

⁵³Roo indo, motaurami watana Yesu hangko i kau mombehape, nabungkuhi hai bana au bula, hai nawoli i lalu talumba au rababehi i bulu watu. Talumba iti bara mani hambela rapopatawui.

⁵⁴Alo iti iami Alo Pampasilolonga, lawi kahalona Alo Pengkarooangaa. Moula adanda to Yahudi, mepongka kaindi iti, rapaliami mobago.

⁵⁵I kanaantina watana Yesu lao i talumba, bahangkiahe towawine au mamporangai Yesu hangko i Galilea meulahe i Yusupu. Kahawenda i talumba, moitamohe noumba watana Yesu rawoli inditi.

⁵⁶Roo indo, mesulemohe lao i boea mopasilolonga rampa-rampa hai lana mawongi bona rapake mobumbuhi watana Yesu, agaiana i Alo Pengkarooangaa barahe mobago moula Aturana Musa.