Read Napu Lukasi 24 Bible Online

Lukasi 24 - Napu bible

Lukasi 24

¹Madondo-dondo i alo Minggu, laomohe towawine iti i talumba moanti lana mawongi au rapasilolongami.

²Hawemohe inditi, raita watu petuko baba talumba telolimi.

³Pesuanda i lalu talumba, ralambi watana Pue Yesu barapi ara.

⁴Wuli mani lalunda moita iti, unga peahe ara rodua tobalilo au mehampi mengkila-ngkila meangka i holanda.

⁵Towawine iti, tepalingkuduhe anti kalanganda. Agaiana rodua tobalilo iti mouliangaahe, “Moapari hai nihaoki tauna au tuwo i olonda tomate?

⁶Barapi ara inde. Ia tuwo hulemi! Bara pae nikatuinao apa au Nauliangaakau hangkoia i tempomi mani i tampo Galilea?

⁷Nauli, Ana Manusia hangangaa rahuhu i tauna au kadake bona rapaku i kau mombehape, agaiana i kataluna alona ina tuwo hule.”

⁸Roo indo, hangko rakatuinaori lolitana Yesu.

⁹Pesulenda towawine iti hangko i talumba, rapahawemi ope-ope au mewali iti i topeguruna Yesu au hampulo hai hadua hai i ope-ope tauna au ara inditi.

¹⁰Towawine iti, iami Maria Magdalena, Yohana, hai Maria inana Yakobu, hai ara worihe towawine ntanina au hihimbela hai ihira.

¹¹Agaiana karahadina topeguruNa lolitanda iti, bara rapoinalai; raimba pea lolita au bara tou.

¹²Peturu liliu meangka hai melangka lao i talumba. Kahawena, motumpami meloga i lalu, naita bana popebungkuhina pearai au ara inditi. Roo indo, mesulemi, hai mekune-kune i laluna kana i apa au mewali iti.

¹³I alo iti wori, ara rodua topeulana Yesu au lao i boea Emaus. Kakaraona boea Emaus iti, ba arato pae hampulo hai hakilo hangko i Yerusale.

¹⁴Tanganda molumao, mampololita liliuhe kana i ope-ope au hangko mewali.

¹⁵Tanganda mololita, unga pea hawe Yesu mohungkukihe hai molumao sambelahe.

¹⁶Moitamohe Yesu, agaiana ara au mopawuli pekirinda ido hai bara raisa kaIana Yesu.

¹⁷Tanganda molumao, mekunemi Yesu irihira, Nauli, “Apari au nipololita tangami molumao?” Mengkaroomohe lumao hai tongawa kamasusana lalunda.

¹⁸Roo indo, hadua au rahanga Kleopas mekune i Yesu, nauli, “Hangko iumbariKo mai pane bara Nuisa apa au mewali inde i Yerusale bahangkia alona au liu?”

¹⁹Nauli Yesu, “Apari au mewali?” Mehanahe, rauli, “Au mewali iti kana i Yesu to Nasare! Ia hadua nabi au makuasa i pobagoNa hai i pololitaNa, maroa i peitana Pue Ala ba i peitana tauna.

²⁰Kapala-kapala tadulako mpenomba hai totosaengki i boea mohuhu Ia i topoparenta bona rahuku mate. Ido hai Yesu rapakumi i kau mombehape.

²¹Katouana, Iami au kiharunga ina mokabahake, ikita to Isaraeli hangko i iwalinta. Hai alo ide, alo katalunami hangko i karapapateNa,

²²bahangkia towawine au hamporangaangkai laomohe i talumba madondo-dondo, agaiana wataNa bara rahumba. Tingkara mpuumongkai lawi i pesulenda rapahaweangkai kamoitanda malaeka i talumba au mampololita katuwo hulenami Yesu.

²³

²⁴Hangko indo, bahangkia rangangki lao worimohe i talumba. Kahawenda inditi, raita batena nodo au rauli towawine inona. Agaiana Yesu bara ara raita.”

²⁵Roo indo, nauli Yesu, “Ntuli mpuukau! Moapari pane bara niisa lempona apa au mewali? Bara pae nipoinalai ope-ope au rauli nabi hangkoia?

²⁶Idemi au rapahaweakau nabi hangkoia: Datu Topehompo, hangangaa narumpa kapari, hangko molambiri pohudaa au meawa hai au teadai.”

²⁷Hangko indo, Yesu mopakanotoahe ope-ope au teuki i lalu Sura Malelaha kana i wataNa, mepongka hangko i Sura Aturana Musa duuna i ope-ope suranda nabi au ntanina.

²⁸Hungkumohe mehupe i boea au ratunggai, mepehindorungimi Yesu nodo au ina mopaliliu polumaona.

²⁹Agaiana tauna au rodua iti mopari-parihe Yesu bona mehupe sambelahe, rauliangaa, “Indemoke hampai, lawi ina kaindimi, ina tampumi alo.” Mewali mehupe mpuumi Yesu hihimbela hai ihira.

³⁰Mohudamohe hihimbela ina maande, Yesu moala roti. Napekakaea, Nabise-bise hai Nahuhuahe.

³¹I tempo iti, hangko manotori lalunda kaYesunami au maande sambelahe. Roo indo, unga pea matanta Yesu; barapi raita.

³²Mololitamohe, rauli, “I tanga rara inona, tekalea mpuu lalunta i kaNapakanotoanta ope-ope au teuki i lalu Sura Malelaha kana i wataNa!”

³³Liliuhe meangka mesule i Yerusale. Kahawenda inditi, molambihe topeguruna Yesu au hampulo hai hadua moguluhe hai ranganda.

³⁴Molololitahe, rauli, “Tou mpuu, Pue Yesu tuwo hulemi. Ia mopatongawami wataNa i Simo!”

³⁵Mewali, tauna au rodua iti motuntua worihe ope-ope au mewali i tanga rara inona, hai mopahaweahe apa au mewali i tempona Yesu mobise-bise roti, lawi i tempo iti, hangko manotori i lalunda kaYesunami au ara hihimbela hai ihira.

³⁶Tanganda mani mololita, unga pea Yesu meangka i olonda hai Natabehe, Nauli, “Roa ngkatuwo hawe irikamu.”

³⁷Tingkaramohe hai langahe, lawi rapehangu tanoana.

³⁸Ido hai nauliangaahe Yesu, “Moapari hai langakau? Moapa wori hai bata-bata mani lalumi?

³⁹Nipeita ide lari i taieNgku hai i bitiNgku. Ikomi dide! NipetoboNa bona niisa kadaNgku tanoana, lawi moonto hai mobuuNa.”

⁴⁰Roo indo, Napopaitaamohe taieNa hai bitiNa.

⁴¹Anti kamatananda, bara gaga mani rapoinalai hai rapotingkara wori. Ido hai nauli Yesu, “Ara ditihou paandemi?”

⁴²Rahuhua mpuumi hantepo ikane au ratunu.

⁴³Nadokomi Yesu Naande bona raita kadana mpuu tanoana.

⁴⁴Roo indo, mololitami Yesu irihira, Nauli, “Ope-ope au teuki i lalu Sura Aturana Musa, suranda nabi hai i sura Petoia kana i wataNgku hangangaa tepabukei. Ide lolitaNgku au Kupahaweamokau i tempoKu mani hihimbela hai ikamu.”

⁴⁵Roo indo, Yesu mobungkahi pekirinda kana i apa au teuki i lalu Sura Malelaha.

⁴⁶Nauli, “I lalu Sura Malelaha teuki node: Datu Topehompo hangangaa molambi kapari hai kapate, hai i kataluna alona ina tuwo hule.

⁴⁷Ope-ope tauna hangangaa menoso hangko i dosanda, bona naampungihe Pue Ala, anti kanapahurunda Datu Topehompo. Bambari iti hangangaa rapahawe i humalele dunia, mepongka i Yerusale.

⁴⁸Ikamumi au mewali sabiNgku lawi niita matami ope-ope au mewali ide.

⁴⁹Nipehadingi lolitaNgku! Ina Kutudu Inao Malelaha mai irikamu. Agaiana hangangaa nipegia hampai inde i wanua Yerusale, duumi molambi kuasa moula dandiNa UmaNgku.”

⁵⁰Roo indo, nawawahe Yesu lao i raoa wanua Yerusale, hungku i boea Betania, pane Naangkami taieNa hai Nawatihe.

⁵¹TangaNa mewati, teangkami Yesu lao i suruga.

⁵²Molingkudumohe menomba Iria, pane mesulehe i Yerusale hai matana mpuu lalunda.

⁵³I Yerusale, alo-alona maidahe i Souna Pue Ala hai motoiahe Pue Ala.