Read Napu Lukasi 3 Bible Online

Lukasi 3 - Napu bible

Lukasi 3

¹Hampulomi hai lima parena Kaisar Tiberius moparenta i wanua Roma, Pontiu Pilatu mewali gubernur i tampo Yudea, hai Herode Antipas au moparenta i Galilea. Pilipu, halaluna Herode, moparenta i Iturea hai i Trakonitis, hai Lisanias moparenta i Abilene.

²Au mewali Tadulako Mpenomba Mahile i tempo iti, Hanas hai Kayapas. I pare iti, mongkorami Pue Ala i Yohane, anana Sakaria, i pada wungi.

³Ido hai molumaomi Yohane moure hai moisau owai Yarade mopahawe Ngkorana Pue Ala i tauna bosa, nauli, “Menosomokau hangko i dosami bona dosami naampungi Pue Ala hai maimokau kuriu.”

⁴Pobagona Yohane iti mopabukei apa au teuki i lalu Surana Nabi Yesaya au manguli node: Ara hadua tauna i pada au mekakakio, nauli, “Ina hawe Pue! Nipasilolongaa raraNa! Nipakanoto rara au ina Napoliungi!

⁵Au mokalo-kalo hangangaa raiwungi, au mapangka hai au mobulu-bulu hangangaa rapahindere. Au motengko-tengko hangangaa rapakanoto, hai au motataloke hangangaa raparata.

⁶Roo indo, ope-ope tauna ina moita Datu Topehorema au natudu Pue Ala.”

⁷Bosa tauna lao mampoperiu i Yohane, agaiana nauliangaahe Yohane, “Ikamu au motengko babehiami, moapari hai maikau? Ba nipehangu peisakau tekabaha hangko i karumpuna Pue Ala au ina morumpakau?

⁸Ane tou-tou menosokau hangko i dosami, nibabehimide babehia au maroa. Hai inee nauli lalumi: ‘Ikita ide, pemuleanake Burahima. Barake ina nahuku Pue Ala.’ Iti bara tou! Nipehadingi: ane naunde Pue Ala, pemuleana Burahima peisa Napopewali hangko i watu ide.

⁹Ina hawe pehukuna Pue Ala! PehukuNa iti nodo owahe au masilolongami i patoa kau. Ope-ope kau au bara maroa wuana ina ratiwi hai ratende i lalu api.”

¹⁰Tauna bosa mekune i Yohane, rauli, “Ane nodo, apami au hangangaa kibabehi?”

¹¹Nahanai Yohane, “Hema au morontau baduna, hantau hangangaa nawei i tauna au bara ara baduna. Nodo wori, hema au ara paandena, hangangaa nakiraia i tauna au marimi.”

¹²Ara worihe toperuru asele au lao mampoperiu i Yohane. Mekunehe, rauli, “Guru, apami au hintoto kibabehi?”

¹³Nahanaihe, “Ineekau mesingara asele melumbu hangko i au rapatokami topoparenta.”

¹⁴Arahe surodado au lao mekune iria, rauli, “Noumba wori ikami? Apami au hintoto kibabehi?” Nauliangaahe, “Ineekau morampaki anu-anuna tauna ntanina, hai ineekau mampopalanga tauna bona raweikau doi. Saromi hangangaa nipohandaka.”

¹⁵I tempo iti, tauna bosa mampempegiahe kahawena Datu Topehompo au nadandi Pue Ala. Ido hai mekune-kunehe i lalunda rauli, “Ba Yohane itimi Datu Topehompo?”

¹⁶Mololitami Yohane, nauli, “Ane iko, kuriu peakau hai owai. Agaiana ara hadua au ina mai au meliu kuasaNa hangko iriko. Mogalorina mokakahi pekapu kandupaNa, barana hintoto. Ia au ina moriukau hai Inao Malelaha hai api.

¹⁷Ia peisa rapandiri nodo hadua tauna au motapihi pare bona tepatani pare au moihi hai tepatani wori au wara. Pare au moihi napopesua i lalu tambaru, hai au wara natende i api.”

¹⁸I tempona Yohane mobambari Ngkora Marasa i tauna bosa, ngkaia pakana paturo au napahaweahe.

¹⁹Ia mokambaroa Herode Antipas, gubernur i tampo Galilea, lawi Herode moala Herodias, towawinena wutuna bona napotambia. Bara iti pea au nakambaroangaa Yohane, lawi ngkaia mani babehiana Herode au kadake.

²⁰Kanahadina Herode pekambaroana Yohane iti, ia bara mokabaha babehiana au kadake, agaiana natambairi; ia motudu surodadona bona Yohane rahaka hai ratarunggu.

²¹Hangko damani Yohane ratarunggu, bosa tauna lao iria bona rariu. Yesu lao wori mampoperiu i Yohane. Karoona Yesu rariu, i tempona mekakae, tebungkahimi langi,

²²hai Inao Malelaha nodo tadasi manggebodo mendaulu Iria. Hai ara hambua wotu hangko i suruga au manguli, “Oiomi AnaNgku au Kupokakaia hai Kupokatana.”

²³Handami talu pulona parena tinuwuNa, Yesu mampepongkami pobagoNa au nawei Pue Ala. Moula pelambianda tauna, Yesu iami anana Yusupu, Yusupu anana Eli, Eli anana Matat, Matat anana Lewi, Lewi anana Malki, Malki anana Yanai, Yanai anana Yusupu, Yusupu anana Matica, Matica anana Amos, Amos anana Nahum, Nahum anana Hesli, Hesli anana Nagai, Nagai anana Maat, Maat anana Matica, Matica anana Simei, Simei anana Yosek, Yosek anana Yoda, Yoda anana Yohanan, Yohanan anana Resa, Resa anana Serubabel, Serubabel anana Sealtiel, Sealtiel anana Neri, Neri anana Malki, Malki anana Adi, Adi anana Kosam, Kosam anana Elmadam, Elmadam anana Er, Er anana Yesua, Yesua anana Elieser, Elieser anana Yorim, Yorim anana Matat, Matat anana Lewi, Lewi anana Simeo, Simeo anana Yehuda, Yehuda anana Yusupu, Yusupu anana Yonam, Yonam anana Elyakim, Elyakim anana Melea, Melea anana Mina, Mina anana M(...)