Read Napu Lukasi 5 Bible Online

Lukasi 5 - Napu bible

Lukasi 5

¹Hambela tempo, tangana Yesu meangka i wiwi Rano Genesaret,[1] bosahe tauna mombeupi-upi mampeinao mohadi Ngkorana Pue Ala.

²I tempo iti, Yesu moita roogu duanga i wiwi rano; ampu duanga mendauluhe hangko i duanganda laohe mobahoi dalanda.

³Laomi Yesu mesawi i duanga au haogu, duangana Simo Peturu, hai Naperapi bona Simo mobohe duangana karao haodi hangko i wiwi rano. Roo indo, mohudami i lalu duanga mopaguru tauna bosa.

⁴Roomi mepaturo, nauli Yesu i Simo, “Nubohe duangamu i kakaladuana, hai nitende dalami bona molambikau ikane.”

⁵Nahanai Simo, “Guru, hambengiamongkai modala, agaiana bara huba hambaa ihi dalangki. Agaiana nauri nodo, ina kutende mpuu, lawi Oio au motudungkai.”

⁶Hangko inditi, ratendemi dalanda, hai ngkaia mpuu ikane au mesua i lalu, alana dalanda mepongka mahepa.

⁷Mokawemohe ranganda au ara i duanga ntanina bona maihe medurei. Mai mpuumohe, hai roogu duanga iti raihii ikane duuna ina tirimi anti kamantimina.

⁸Tingkarami Simo Peturu hai ope-ope tauna au hihimbela hai ia moita kangkaiana ikane au ara i lalu dalanda. Ido hai molingkudumi Peturu i lindona Yesu, nauli, “Pue, ineena Nuhungkuki lawi ide iko tomadosana.”

¹⁰Ara worihe rodua rangana Simo Peturu au mampotingkara. Hanganda iami Yakobu hai Yohane, ananahe Sebedeus au mobago sambelahe hai Simo Peturu. Nauli Yesu i Simo, “Ineeko langa. Mepongka ide-ide, barapoko modala ikane, agaiana manusiami au nudala.”

¹¹Roo indo, modiimohe duanganda i lorena hai mopalehihe ope-ope anu-anunda, pane meulahe i Yesu.

¹²Tangana Yesu i hambua boea, maimi hadua tauna au ketangga humalele watana. Kamoitana Yesu, molingkudumi motumpa i lindoNa, hai meadede Iria, nauli, “Pue, kuisa kaNubukuna mopakaohana. Ane Nupokana, pakaoha wongkoia!”

¹³Napetobomi Yesu tauna iti, Nauliangaa, “MauNa. Maohamoko!” Unga pea maoha tauna iti.

¹⁴Roo indo, Yesu mokonto tauna iti, Nauli, “Inee nupopololita i hema pea apa au mewali inona. Laomoko hampai nupetudungia watamu i Tadulako Mpenomba bona naita kamaohamumi, hai nuantimi popenombamu moula parenta au teuki i lalu Aturana Musa bona tongawa i ope-ope tauna kamaohamumi.”

¹⁵Agaiana nauri nodo lolitana Yesu, bambari iti tehawuka iumba-umba pea, alanda bosa tauna mai i Yesu bona mohadihe lolitaNa hai Napakaohahe hangko i hakinda.

¹⁶Agaiana Yesu mengkambeiha lao mekakae i hambua paidaa au boa.

¹⁷Hambela tempo, tangana Yesu mepaturo, arahe bahangkia toParisi hai guru-guru agama au mohuda inditi. Ihira hawe hangko i boeanda i tampo Galilea, Yudea, hai hangko i wanua Yerusale. Kuasana Pue Ala ara i Yesu, ido hai Nabuku mopakaoha tomahai.

¹⁸I tempo iti, hawemohe bahangkia tauna au mokowa hadua topalu. Mohaokihe rara mesua i lalu sou, lawi mampeinaohe moanti ranganda i Yesu.

¹⁹Agaiana barahe peisa mesua, lawi sou iti buke tauna. Ido hai mengkahemohe i tuka moanti ranganda lao i wongko sou. Roo indo, mohongkahe atu sou, pane topalu iti raulu sambela hai alena duuna toa i lindona Yesu au ara i olonda tauna bosa.

²⁰Kanaitana Yesu pepoinalainda, mololitami i topalu iti, Nauli, “Halalu, teampungimi dosamu.”

²¹Bahangkia guru agama hai toParisi mohadihe lolitana Yesu iti. Nauli lalunda, “Hemari tauna ide pane bai mopahimbela kuasaNa hai Pue Ala? Bara ara hadua au peisa moampungi dosa, batena pea Pue Ala!”

²²Naisa Yesu apa au ara i lalunda. Ido hai Nauliangaahe, “Moapari hai nodori pekirimi?

²³Umba au mamura rauli, ‘Teampungimi dosamu,’ ba ‘Pearo, hai molumaomoko.’

²⁴Bona niisa, i dunia ide, Iko, Ana Manusia, makuasaNa moampungi dosa. Ide-ide ina Kupatongawaakau kaarana kuasaNgku moampungi dosa.” Hangko inditi, membalilimi Yesu i topalu iti, Nauliangaa, “Mearomoko, nulolomi alemu, hai mesulemoko!

²⁵Meangka mpuumi topalu iti i lindonda tauna bosa, mololomi alena, hai mesule lao i souna, hai tangana lumao ia motoia liliu Pue Ala.

²⁶Tingkara mpuuhe ope-ope tauna au moita, hai motoiahe Pue Ala. Langa worihe, rauli, Metingkarai mpuu apa au taita inona!”

²⁷Roo indo, padumi Yesu, hai i tanga rara, Ia moita hadua toperuru asele au mohuda i bambaru pobaiaria asele, hangana Lewi. Nauliangaa Yesu, “Peulamide Iriko.”

²⁸Meangka mpuumi Lewi mopalehi hinangka anu-anuna, pane meula Iria.

²⁹Roo indo, Lewi mamposusai mahile Yesu i souna, hai arahe bosa toperuru asele hai tauna ntanina au rakakio maande sambela hai ihira.

³⁰Inditi ara worihe toParisi hai guru-guru agama au mampeulai paturonda toParisi. Ihira mosasalaihe Yesu i topeguruNa, rauli, “Moapari pane ikamu maande hai maenu hihimbela hai toperuru asele hai tauna ntanina au kadake babehianda?”

³¹Nahanaihe Yesu, Nauli, “Tauna au bara mahai, bara moparaluu sando. Tomahai pea au moparaluu sando.

³²BaraNa mai mokakio tauna au manoto babehianda. KamaiNgku ide, maiNa mokakio tomadosa bona mampenosoihe dosanda.”

³³I tempo iti, arahe bahangkia tauna au mouliangaa Yesu, “Topeguruna Yohane Toperiu paka mopuasa hai mekakaehe. Nodo wori topegurunda toParisi. Moapari pane topeguruMu barahe mopuasa? Maande hai maenu liliuhe.”

³⁴Nahanaihe Yesu hai ngkora pandiri ide, Nauli, “Tauna i posusa petauna barahe mopuasa i tempona toratauna tobalilo ara mani i olonda.

³⁵Agaiana hambela tempo, toratauna tobalilo ina raala hangko i olonda. I tempo itirai, hangko mopuasahe.”

³⁶Yesu mopahawe wori ngkora pandiri ide, Nauli, “Bara ara hadua tauna motampelei badu hae hai hasepa bana au nahepaki hangko i badu au wou. Lawi ane nababehi nodo, ina mahepa pea bana wou popotampeleina iti. Hai bara wori maroa raita ane hasepa bana au wou ratampeleika i badu au hae.

³⁷Nodo wori, bara ara hadua tauna au mokando anggoro au wou i pambolia[2] au hae. Lawi ane rengke, ina mahepa pambolia au hae iti, alana anggoro iti mabubu, hai paidaana wori marugi.

³⁸Mewali anggoro au wou hangangaa rakando wori i pambolia au wou.[3]

³⁹Bara ara hadua tauna au naunde maenu anggoro au wou ane roo maenu anggoro au hae. Lawi ina nauli, ‘Anggoro au hae iti matama.’ ”