Read Napu Lukasi 6 Bible Online

Lukasi 6 - Napu bible

Lukasi 6

¹Hambela tempo i Alo Pengkarooangaa,[4] Yesu hai topeguruNa moliuhe i halimbo bonde. Tanganda moliu i bonde iti, topeguruna Yesu mokanukihe pare, hai ranuku bona raande.

²Karaitana toParisi, liliu rakambaroahe, rauli, “Moapari pane molingkaikau atura agamanta? Mobagokau i Alo Pengkarooangaa!”

³Nahanaihe Yesu, Nauli, “Bara pae nibasa apa au nababehi Datu Daudi hai ranganahe hangkoia i temponda marimi?

⁴Daudi mesua i lalu sou penombaa, moande roti au rapopenomba i Pue Ala, hai nakira-kiraa worihe rangana. Moula ada agamanta, Tadulako Mpenomba pea au peisa moande roti iti. Agaiana nauri nodo, babehiana Daudi iti bara rasalai.”

⁵Napaliliu Yesu lolitaNa, Nauli, “Nodo wori Ana Manusia, makuasa mopakanoto apa au peisa rababehi i Alo Pengkarooangaa.”

⁶Hambela tempo i Alo Pengkarooangaa wori, laomi Yesu i sou penombaanda to Yahudi hai mepaturo inditi. I sou penombaa iti, ara hadua tauna au mate taie koanana.

⁷Ara worihe bahangkia toParisi hai guru agama au mohaoki kanawoana Yesu, ba ina mobago i Alo Pengkarooangaa. Ido hai rakamata liliu apa au ina nababehi Yesu, lawi rapeinao mosalai Yesu.

⁸Agaiana naisari Yesu tunggaiana lalunda. Ido hai mouliangaa tauna au mate taiena hambali iti, “Maiko meangka inde i lindo!” Lao mpuumi meangka inditi.

⁹Roo indo, Nauliangaahe Yesu, “Moula atura agamanta, apa au peisa tababehi i Alo Pengkarooangaa: mobabehike au maroa ba au kadake? Motulungike ranganta ba mopapateke ranganta?”

¹⁰Membalilimi Yesu, Natotokihe ope-ope hai mouliangaa tauna au mate taiena hambali iti, “Ona taiemu!” Naona mpuumi taiena, liliu maoha.

¹¹Hangko indo, rumpu ntepuumohe guru agama hai toParisi. Ido hai mogombomohe mohaoki akala, ba apa au ina rababehi i Yesu.

¹²Hambela tempo, Yesu laomi i tongku-tongkuna, hai mekakae hambengia i Pue Ala.

¹³Mesupami alo, Nakakiomohe tauna au meula Iria, hai Napileihe hampulo hai rodua hangko i olonda. Ihira itimi au Napakanoto Yesu bona mewali suroNa au mobambari Ngkora Marasa i tauna bosa.

¹⁴Idemi hanganda: Simo au Nahanga Peturu, Andaria adina Simo, Yakobu hai Yohane, Pilipu hai Bartolomeus, Matiu hai Tomas, Yakobu anana Alfeus, Simo to Selot,[5] Yudasi anana Yakobu, hai Yudasi Iskariot au mampobalu Yesu.

¹⁵

¹⁶

¹⁷Roo indo, mempanaulumi Yesu hihimbela hai topeguruNa. Mengkaroomohe i lempena, lawi inditi bosahe tauna au meula Iria mepegia. Inditi ara worihe bosa tauna au hangko i humalele tamponda to Yahudi, hangko i wanua Yerusale hai hangko i wanua Tirus hai Sidon au i wiwi ntahi.

¹⁸Hawehe inditi, lawi mampeinaohe mohadi lolitana Yesu hai merapihe bona Napakaohahe. Au napesuangihe seta Napakaoha worihe.

¹⁹Tauna bosa iti mopari-parihe motobo Yesu, lawi ara kuasa au mesuwu hangko i wataNa au mopakaohahe ope-ope tauna.

²⁰Yesu mototoki topeulaNa hai Nauliangaahe: “Morasikau au meahi-ahi tuwomi, lawi ikamumi au mewali taunana Pue Ala i lalu poparentaNa.

²¹Morasikau au marimi, lawi ikamumi au ina rapamabuhu. Morasikau au moteria, lawi ikamu au ina matana-tana.

²²Morasikau au rakahihi, au barakau rapohintuwua, rakakabosai hai rasalai tauna anti peulami Iriko Ana Manusia.

²³Iti au rababehi worimi toiorunda i nabi-nabina Pue Ala hangkoia. Mewali, ane iti au rababehiakau, mesende-sendekau anti kamatanana lalumi. Hangangaa matanakau lawi mahile hurungina au ina nihumba i lalu suruga.

²⁴Agaiana marugikau, ikamu au pebuku ide-ide, lawi nihumbami kamatanami, hai barapokau ina matana.

²⁵Marugikau au mabuhu ide-ide, lawi ina marimikau. Marugikau au matana ide-ide, lawi ina masusa lalumi hai ina moteriakau.

²⁶Marugikau ane ratoiakau ope-ope tauna, lawi nabi-nabi au mepakanawo ratoia worihe toiorunda hangkoia.”

²⁷“Agaiana ikamu au mampehadingi lolitaNgku, idemi hawaNgku: nipokaahi iwalimi, hai nibabehi au maroa i tauna au mokahihikau.

²⁸Niwatihe au motunda-tundakau, nipekakaeahe tauna au kadake irikamu.

²⁹Ane pandirina ara tauna au mohapa kalimpimi hambali, inee nihurungi. Niwei wori kalimpimi au hambali. Ane ara au moala komomi, niwei wori badumi.

³⁰Ane ara au mamperapi ba apa pea, niwei woia. Hai ane ara au moala ba apa-apa hangko irikamu, ineemi niperapi sule.

³¹I paka-pakana, apa au niunde rababehi rangami irikamu, iti wori au hangangaa nibabehi i rangami.

³²Ane maahi peakau i tauna au mampokaahi worikau, inee nipehangu ina nawatikau Pue Ala. Mogalori tauna au kadake, maahihe i tauna au mampokaahihe.

³³Ane maroa pea babehiami i tauna au mobabehi roa irikamu, inee nipehangu ina nawatikau Pue Ala. Mogalori tauna au kadake, nodo wori rababehi.

³⁴Ane nikira ba apa rapebolo i tauna au nabuku pea mampopesule, inee nipehangu ina nawatikau Pue Ala. Mogalori tauna au kadake, mowei worihe doi i hangka ranganda au kadake, lawi raharunga ina rapopesule pea.

³⁵Inee nodo babehiami! Hangangaa nipokaahi iwalimi, hai hangangaa nibabehi au maroa irihira. Ane ara tauna au mampeinao mebolo irikamu, niwei woia hai inee niharunga pesulena. Ane nibabehi nodo, ngkaia pewati ina naweikau Pue Ala, hai ina raimbakau anaNa, lawi nodomi kamaroana laluna Pue Ala i tauna au kadake hai i tauna au bara raisa manguli ngkaia kamaroana Iria.

³⁶Kamaahimi hangangaa nodo kamaahina Umami i suruga.”

³⁷“Ineekau mosalai hangka rangami dati worikau nasalai Pue Ala. Inee niuli tauna ntanina au masala hangangaa rahuku, hai ikamu bara worikau ina nahuku Pue Ala. Niampungi kamasalana rangami, bona naampungi worikau Pue Ala.

³⁸Maroakau i rangami, mewali nilambi wori au maroa. Pehoka au maroa, au melabi hai au rapii-pii hawe melumbea, iti ina nilambi. Lawi hoka au nipake i hangka rangami iti wori au rahokaakau.”

³⁹Napaliliu Yesu lolitaNa hai ngkora pandiri ide, Nauli, “Ane ara hadua tobilo au monini hangka tobilona, batena ina manawohe rorodua i lalu kalolu.

⁴⁰Nodo wori, bara ara toposikola au meliu karabilana hangko i guruna. Ane hopomi posikolana, hangko himbelari hai guruna.”

⁴¹Roo indo, Yesu mopahawe ngkora pandiri ide, Nauli, “Moapa hai nuparesa pupu i matana rangamu, moleri rangka kau au ara i matamu bara nuita?

⁴²Noumba pane peisa nuuliangaa rangamu: ‘Halalu, mai kuingihi pupu matamu,’ moleri rangka kau i matamu bara nuita? Ineeko mengkamaroa! Hangangaa nuingihi hampai rangka au ara i matamu, hangko manotori petotokimu moingihi pupu i matana rangamu.”

⁴³“Kau au maroa, maroa wori wuana, hai kau au kadake, kadake wori wuana.

⁴⁴Niisa kamaroana hinangkana kau ane niitami powuana. Anggoro bara rapupu hangko i dui sumbali. Kau rodo bara mowua gambu.

⁴⁵Nodo wori i manusia. Tauna au maroa ina mohowara apa au maroa, lawi lalunda buke roa. Tauna au kadake ina mohowara apa au kadake, lawi lalunda buke dake. Lawi apa au ara i lalunta, iti wori au mesuwu hangko i humenta.”

⁴⁶“Moapa hai nikakioNa Pue, agaiana bara nipeulai hawaNgku?

⁴⁷Idemi ngkora pandiriKu: hema au mampehadingi hai mampeulai lolitaNgku peisa rapandiri nodo hadua tauna au mapande moaro sou. Ia mokae tampo napakaladu, nawoli hampai watu au maroho, hangko moarori souna i wongko watu iti. Toa uda kebuu, meumbalami owai morumpa souna iti, agaiana bara madungka, lawi raaro i wongko watu au maroho.

⁴⁸

⁴⁹Agaiana tauna au mohadi lolitaNgku hai bara napeulai, ia nodo hadua tauna au moaro souna i wongko tampo pea, bara mopake watu. Ane meumbala owai morumpa souna, ina liliu madungka duuna magero ope-ope.”