Read Napu Lukasi 7 Bible Online

Lukasi 7 - Napu bible

Lukasi 7

¹Karoona Yesu mololita i tauna bosa, laomi i boea Kapernaum.

²I boea iti, ara hadua tadulakonda surodado to Roma. Tadulako iti ara hawina au napokakaia ntepuu. Hawina iti rumihi kamahaina, ina matemi.

³Kanahadina tadulako iti kaarana Yesu i lalu boea iti, natudumohe bahangkia totosaenda to Yahudi lao merapi tulungi i Yesu bona mai mopakaoha hawina.

⁴Kahawenda i Yesu, rapahawemi peraroana tadulako iti, rauli, “Tadulako ide, hintoto mpuu Nutulungi,

⁵lawi ia mampokaahike, ikita to Yahudi, hai mokira doina rapopoaro sou penombaaki.”

⁶Hangko inditi, lao mpuumi Yesu hihimbela hai ihira. Hungkumi Yesu i souna tadulako iti, tadulako iti motudu bahangkia rangana lao mampohidupaa Yesu bona rauliangaa, “Tua, baraKo paraluu mai i soungku, lawi barana hintoto Nusondaki.

⁷Hai masandaana lao Irio, lawi barana hintoto mampohidupaaKo. Kehapiri hantepo pea lolitaMu Nuuli, hangangaa maoha hawingku.

⁸Kuisa Oio au makuasa mobabehi nodo, lawi ide iko, ara wori au i wongkoku, hai ara worihe au kupohawaa. Ane rapana kupohawaa hadua surodado kuuliangaa: ‘Laoko!’ hangangaa lao. Ane kukakio surodado au ntanina: ‘Maiko!’ hangangaa mai. Ane kuuliangaa hawingku: ‘Babehi iti!’ hangangaa nababehi. Nodo wori Oio Tua, apa au Nuuli inde, itimi au ina mewali i soungku.”

⁹Tingkara Yesu mohadi lolitana tadulako iti. Ido hai membalili i tauna bosa au meula Iria, Nauliangaahe, “Mahile mpuu pepoinalaina tauna ide! Kehapiri i to Isaraeli, bara mani ara hadua Kuhumba au mahile pepoinalaina nodo tauna ide.”

¹⁰Roo indo, mesulemohe rangana tadulako iti. Kahawenda inditi, maohami hawina au mahai.

¹¹Bara mahae hangko indo, laomi Yesu i boea au rahanga Nain. TopeguruNa hai bosa tauna ntanina lao worihe hihimbela hai Ia.

¹²Hungkumohe i baba bente boea, moitamohe topopakowa hadua tomate mesuwu lao i raoa boea. Tomate iti, hadua anantomoane, ana saduduana hadua tobemba. Bosa ampu boea lao i talumba mamporangai inana.

¹³Kanaitana Pue Yesu towawine iti, maahimi laluNa, hai Nauliangaa, “Ineemoko moteria!”

¹⁴Nahungkukimi Yesu popakowaa tomate iti hai Napetobo. Mengkaroomohe tauna au mopakowa. Nauli Yesu, “Anantomoane! Mearomoko!”

¹⁵Tuwo hulemi anantomoane au mate iti, liliu mohuda hai mololita. Nauli Yesu irinana, “Ina, idemi anamu.”

¹⁶Tauna au moitahe apa au mewali iti, langamohe hai mepongkamohe motoia Pue Ala, rauli, “Hadua nabi au makuasa ntepuu ara i olonta! Hawemi Pue Ala irikita taunaNa.”

¹⁷Bambari iti tehawuka i humalele tamponda to Yahudi hai i ope-ope boea au hungku.

¹⁸Nahadimi Yohane Toperiu hangko i topeguruna, ope-ope au nababehi Yesu. Ido hai mokakiomi rodua topeguruna,

¹⁹nauliangaahe, “Laomokau i Yesu hai niuliangaa, ‘Ba Oio mpuumi Datu Topehompo au nadandi Pue Ala? Ba ara mani au ntanina kipegia?’ ”

²⁰Lao mpuumohe topeguruna au rodua iti mouliangaa Yesu, rauli, “Ido hai maingkai i Tua, lawi natudungkai Yohane Toperiu. Napekune: ba Oio mpuumi Datu Topehompo au nadandi Pue Ala? Ba ara mani au ntanina kipegia?”

²¹I tempo iti wori, Yesu mopakaoha bosa tauna hangko i hakinda, pantodihanda hai mampopeloho seta hangko i tauna au napesuangi. Napakaoha worihe tobilo bona meitahe.

²²Mewali, Yesu mohanaihe topeguruna Yohane, Nauli, “Mesulemokau, hai nipetumbuia Yohane apa au niita hai au nihadi: au bilo meitami, au palu molumaomi, au ketangga maohami, au bongo mehadimi, tauna au mate Kupatuwo hule, hai Ngkora Marasa Kupahawemi i tauna au meahi-ahi tuwonda.

²³Morasihe tauna au bara bata-bata lalunda Iriko.”

²⁴I pesulenda topeguruna Yohane iti, Napepongkami Yesu mololita i tauna bosa kana i Yohane, Nauli, “Apa tunggaiami lao i Yohane i pada wungi hangkoia? Ba mampeinao peakau moita tala au nawui himburu node hou node mai? Bara![6]

²⁵Mewali, apari au nipeinao lao nipeita? Ba mampeinaokau mampeita tauna au makara hampina? Bara wori, lawi tauna au makara hampinda hai au pebuku tuwonda maida peahe i souna datu.

²⁶Mewali, apari au nipeinao lao nipeita? Ba mampeinaokau mampeita nabi? Ane nodo, tou. Agaiana Kuuliangaakau, meliu kamahilena tuwona Yohane hangko i nabi au ntanina.

²⁷Lawi Yohane iti au natunggai i lalu Sura Malelaha hangkoia. Nauli Pue Ala i AnaNa, ‘Idemi suroNgku au ina Kutudu moioru hangko Irio, bona mopasilolonga raraMu.’ ”

²⁸Hai nauli mbuli Yesu, “Pehadingi maroa: hangko i ope-ope tauna au rapoanaka i lalu dunia ide, bara ara hadua au meliu kamahilena tuwona hangko i Yohane. Agaiana i poparentana Pue Ala mogalori tauna au tepakoi tuwona, mahile tuwona pane Yohane. Mewali mepongka ide-ide, morasihe tauna au mengkoru i Pue Ala.”

²⁹Lolitana Yesu iti rahadi ope-ope tauna, tepesua toperuru asele. Tauna bosa iti mampokanamohe ope-ope tunggaiana Pue Ala, lawi roomohe mampoperiu i Yohane.

³⁰Agaiana toParisi hai guru-guru agama mosapuakahe tunggaiana Pue Ala irihira, lawi barahe mampoperiu i Yohane.

³¹Hai nauli mbuli Pue Yesu, “Ikamu au tuwo i tempo ide peisa rapandiri nodo anangkoi au mohuda-huda i pobalu-balua hai au mombekakiohe, rauli, ‘Kipotulaliakau, agaiana barakau motaro-taro. Kipandawiakau, agaiana barakau moteria.’

³²

³³Lempona: Yohane Toperiu bara niunde. Iko wori, baraNa niunde. Kamaina Yohane, ia mopuasa hai bara moenu anggoro. Nisapuaka liliu, niuli node, ‘Ia napesuangi seta!’

³⁴KamaiNgku Ana Manusia, maenuNa anggoro hai maandeNa. Agaiana nisapuaka woriNa, niuli, ‘Peita! Topehioro, tomalangu, ranganda toperuru asele hai tomadosa!’

³⁵Agaiana nauri nodo, kamanotona rarana Pue Ala tongawa i lalu katuwonda tauna au mampeulai peundeaNa.”

³⁶Ara hadua toParisi, hangana Simo, au mokakio Yesu maande i souna. Lao mpuumi Yesu i souna. I tempo iti, mohudahe lawi ina maande.

³⁷I lalu boea iti, ara wori hadua towawine au paka mobabehi sala. Kanahadina ara Yesu tangana maande i souna toParisi, laomi towawine iti moanti habotolo lana mawongi. Masuli ntepuu holona.

³⁸Maimi towawine iti hungku-hungku i bitina Yesu. Ia moteria, pane mowurui bitina Yesu hai owai matana. Roo nodo, nabowohimi weluana napopoumpahi. Moangki wori bitina Yesu hai nalanaimi lana mawongi.

³⁹Kanaitana Simo apa au nababehi towawine iti, nauli laluna, “Ane tauna ide tou-tou mpuu hadua nabi, hangangaa Naisa kahemana towawine au motobo, hai hangangaa Naisa wori kadana maroa babehiana.”

⁴⁰Ido hai nauli Yesu i toParisi iti, “Simo, ara au ina Kuuliangaako.” Nahanai Simo, nauli, “Ulimide, Guru.”

⁴¹Nauli Yesu, “Ara rodua tauna au moinda i hadua tauna au moweihe doi rapebolo. Hadua moinda lima atuna doi pera, hai hadua mbuli lima pea pulona doi pera.

⁴²Anti kadana rabuku tauna iti mobaiari indanda, naulimi tauna au moweihe doi iti, ‘Indami ineemi nibaiari.’ Mewali, hangko i tauna au rodua iti, hema au ina meliu ahina i tauna au moweihe doi rapebolo?”

⁴³Nahanai Simo, nauli, “Moula iko, tauna au ngkaia indana.” Nauli Yesu, “Tou pehanamu.”

⁴⁴Roo indo, Yesu mototoki towawine iti hai mololita i Simo, Nauli, “Peita towawine ide. KahaweNgku inde inona, baraNa nupasilolongaa owai pobahoiana bitiNgku, moula adanta i torare. Agaiana towawine ide mobahoi bitiNgku hai owai matana, pane naumpahi hai weluana.

⁴⁵Oio, baraNa nutabe ba nuangki moula adanta i torare. Agaiana towawine ide moangki liliu bitiNgku mepongka i kahaweNgku inona.

⁴⁶Oio, baraNa nuwalugaingi hai lana moula adanta i torare. Agaiana towawine ide molanai bitiNgku hai lana mawongi au masuli holona.

⁴⁷Mewali ahina au mahile iti mopatongawa dosana au mahile raampungimi. Agaiana tauna au raampungi hangko i dosana au haodi, haodi pea wori ahina.”

⁴⁸Roo indo, nauli Yesu i towawine iti, “Teampungimi dosamu.”

⁴⁹Ido hai mololitamohe tauna au maande sambela, hadua hai hadua, rauli, “Hemari tauna ide, pane Nabuku moampungi dosa?”

⁵⁰Hangko inditi, nauli Yesu i towawine iti, “Anti pepoinalaimu Iriko, tehoremamoko hangko i huku dosamu. Mesulemoko i lalu Roa ngkatuwo.”