Read Napu Lukasi 9 Bible Online

Lukasi 9 - Napu bible

Lukasi 9

¹Yesu mokakiohe topeguruNa au hampulo hai rodua. Naweihe kuasa monangi ope-ope seta hai mopakaoha tauna au mahai.

²Natuduhe lao mopahawe bambari kana i poparentana Pue Ala hai mopakaohahe tauna au mahai.

³Nauliangaahe Yesu, “Ineekau moanti apa-apa i polumaomi. Ineekau moanti lai ba tasi ba baku ba doi. Inee worikau moanti badumi morontau.

⁴Ane radokokau tauna i sou haogu, maidamokau inditi duumi padu lao i boea ntanina.

⁵Ane hawekau i boea hai barakau radoko ampu boea, nipalehi boea iti, hai nitaronta awu au mentaka i palanta bitimi, tandana barapi ikamu au mohuru ane Pue Ala mohukuhe.”

⁶Karoonda napaturo Yesu, meangkamohe lao i boea-boeana mobambari Ngkora Marasa hai mopakaohahe tauna au mahai iumba pea.

⁷I tempo iti, Herode Antipas au moparenta i Galilea. Ia mohadi ope-ope au nababehi Yesu, ido hai wuli laluna. Lawi ara au manguli, “Yesu iami Yohane Toperiu au tuwo hule.”

⁸Ara wori au manguli, “Yesu iami nabi Elia au hawe mbuli.” Hai ara wori au manguli, “Yesu iami hadua nabi hangkoia au tuwo hule.”

⁹Nauli Herode, “Hangkoia kutudumi tauna mobohoki tambolona Yohane. Mewali, hema Yesu ide? Bosami belana kuhadi tauna mololita kana Iria.” Ido hai Herode mohaoki rara mampohidupaa Yesu.

¹⁰I pesulenda topeguruna Yesu au hampulo hai rodua, mopahawehe i Yesu ope-ope au rababehimi i boea-boeana. Roo indo, Yesu moanti topeguruNa lao i paidaa au boa hungku i boea Betsaida. Tunggaiana Yesu bona mopalehihe tauna bosa.

¹¹Agaiana kalaoanda raisa tauna bosa, ido hai mekulelehe. Kahawenda i Yesu, Nadokohe hai Napaturoahe kana i poparentana Pue Ala. Hai hema pea au mahai, Napakaoha.

¹²Ina tampumi alo, laomohe topeguruNa au hampulo hai rodua i Yesu, rauliangaa, “Guru, ide paidaa au boa. Agina Nutudumohe tauna bosa ide lao i boea au hungku bona mohaokihe paandenda hai paturuanda.”

¹³Agaiana nahanai Yesu, “Ikamu au mopaandehe.” Rahanai topeguruNa, “Apami pae au kiweihe? Lawi au ara irikami, batena pea lima oguna roti hai rombaa ikane. Peisato asala laongkai hampai meholo paande bona handahe tapaandea tauna bosa ide.”

¹⁴(Kabosanda ba aratohe pae lima sabuna tobalilo, barahe teimba towawine hai anangkoi.) Nauli Yesu i topeguruNa, “Nituduhe tauna bosa iti mohuda motobu-tobu, lima pulona i lalu hantobu.”

¹⁵Apa au natuduahe Yesu, rapeulai mpuumi topeguruNa.

¹⁶Mohudamohe ope-ope, naalami Yesu roti au lima oguna hai ikane au rombaa, mengoa i langi mekakae i Pue Ala. Roo nodo, Nabise-bisemi roti hai ikane iti, pane Naweihe topeguruNa bona rakira-kiraahe tauna bosa.

¹⁷Maandemohe ope-ope duunda mabuhu. Karoonda maande, topeguruNa moguluhe pentarana, hampulo hai rombingka.

¹⁸Hambela tempo, tangana Yesu mekakae haduduana, hawehe topeguruna Iria. Mekunemi Yesu irihira, Nauli, “Moula pangulinda tauna bosa, ide Iko hemaNa?”

¹⁹Rahanai, “Arahe au manguli Yohane Toperiu. Ara worihe au manguli nabi Elia. Ara worihe au manguli Oio hadua nabi hangkoia au tuwo hule.”

²⁰Napekune mbulihe, Nauli, “Ane moula pelambiami, ide Iko, hemaNa?” Nahanai Peturu, “Oiomi Datu Topehompo au nadandi Pue Ala!”

²¹Agaiana nakonto mpuuhe Yesu bona inee hampai rapapahowa i hema pea.

²²Nauli mbuli Yesu, “Iko, Ana Manusia, hangangaa molambi ngkaia kapari. Ina rasapuakaNa totosae boea, kapala-kapala tadulako mpenomba hai guru-guru agama. Ina rapapateNa agaiana i kataluna alona ina tuwo huleNa.”

²³Hangko inditi, Yesu mouliangaahe ope-ope tauna, “Hema au mampeinao meula Iriko, hangangaa mokabaha peundeana haduduana hai alo-alona mohalea kau popakuana. Ane nodo, hangko peisari meula Iriko.

²⁴Hema au mokabaha peundeana haduduana anti peulana Iriko kehapiri rapapate, iami au molambi katuwo maroa. Agaiana hema au mampeulai peundeana haduduana bara molambi katuwo maroa.

²⁵Apa bunduna morampuke ope-ope peawa i dunia ide, ane barake molambi katuwo maroa i alo pebotusi?

²⁶Hema au maea mopangaku peulana Iriko hai mampokaea paturoNgku, Iko wori ina maea mopangaku kaiana topeulaNgku i kahaweNgku hule hangko i suruga. I tempo iti, Iko, Ana Manusia, ina mendaulu mai hangko i suruga, hai ina meawaNa anti kuasaNgku hai kuasana UmaNgku hai peawanda malaeka au malelaha.

²⁷Nipehadingi maroa apa au Kuuliangaakau ide: ara i olomi au bara mani mate hangko damani moita poparentana Pue Ala.”

²⁸Ualu alona hangko i pepaturoNa iti, Yesu moanti Peturu, Yohane hai Yakobu mempanai lao i wongko bulu bona mekakae.

²⁹Tangana Yesu mekakae, tebalikimi lindoNa, hai hampiNa mengkila-ngkila.

³⁰Unga peahe ara rodua nabi au molololita hai Ia, iami Musa hai Elia.

³¹Tauna au rodua iti mewangka hai meawa mpuuhe. Ihira mampololitahe kapatena Yesu au ina Napabukei i Yerusale.

³²I tempo iti, letahe Peturu hai rangana. Pearonda, moitamohe Yesu, meawa mpuu wataNa, hai rodua tauna arahe i holaNa.

³³I kapadunda tauna au rodua iti mopalehi Yesu, mololitami Peturu, nauli, “Guru, maroa mpuu ane maidake inde! Agina kibabehi talu oguna bambaru, haogu Irio Pue, haogu i Musa, hai haogu wori i Elia.” (Agaiana bara naisa apa au nahowara.)

³⁴Tangana mani Peturu mololita, hawemi gawu mobalungkuhihe. Langamohe moita gawu iti.

³⁵Unga peahe mohadi hambua wotu hangko i lalu gawu au manguli, “Idemi AnaNgku au Kupilei. Nipehadingi lolitaNa!”

³⁶Karoonda mohadi lolita iti, moitamohe Yesu haduduaNa pearai. Apa au raita topeguruNa au talu iti, bara hampai rapopololita i hema pea.

³⁷Kahalona, mendaulumohe hangko i wongko bulu, hai bosahe tauna mai mampohidupaa Yesu.

³⁸Ara hadua tobalilo i olonda tauna bosa au mekakio, nauli, “Guru! Tulungi wongkoia, Peitaana anangku. Ia ana saduduangku.

³⁹Ane napesuangi seta, monganga-nganga hai morada-rada, duuna mowire ngangana. Seta iti mampopeahi-ahi liliu anangku.

⁴⁰Kuperapi tulungimi i topeguruMu bona tokadake iti rapopeloho, agaiana bara rabuku.”

⁴¹Nauli Yesu i tauna bosa, “Noumbarikau dide? Moapari pane bara mani maroho pepoinalaimi i Pue Ala? Hangkia mani kamahaena ina hihimbelaNa hai ikamu? Hangkia mani kamahaena hangangaa Kusabarai peewami?” Roo indo, tauna iti Nauliangaa, “Anti mai iti anamu!”

⁴²Tangana mani anangkoi iti molumao monontohi Yesu, madungka mbulimi hai morada-rada anti kanapesuangina seta. Agaiana Yesu mokambaroa tokadake iti, alana anangkoi iti maoha. Roo indo, nauli Yesu i umana, “Maimide ala ide anamu. Maohami.”

⁴³Tingkara mpuuhe ope-ope tauna moita kamahilena kuasana Pue Ala. Tanganda mani tauna bosa mampotingkara ope-ope tanda kuasa iti, mololitami Yesu i topeguruNa, nauli,

⁴⁴“Nipehadingi maroa-roa lolitaNgku ide: Iko Ana Manusia, ina rahuhuNa i kuasa manusia au kadake.”

⁴⁵Agaiana bara raisa topeguruNa apa tunggaiana lolitana Yesu, lawi tewuniangi mani lempona irihira. Bara worihe bai mekune Iria apa lempona lolitaNa.

⁴⁶Hambela tempo, mombehahanaimohe topeguruna Yesu, ba hema hangko i olonda au meliu kamahilena tuwona.

⁴⁷Naisa Yesu apa au ara i lalunda. Ido hai Naalami hadua anangkoi, Napopeangka i holaNa,

⁴⁸hai Nauliangaahe, “Hema au modoko hai au motulungi anangkoi ide anti peulana Iriko, lempona Ikomi au nadoko. Hai hema au modokoNa, bara Iko pea au nadoko, agaiana modoko wori Pue Ala au motuduNa. Hema au mengkaiwoi, iami au mahile tuwona.”

⁴⁹Roo nodo, mololitami Yohane, nauli, “Guru, ara kiita hadua tauna au mampopeloho seta i lalu hangaMu, agaiana kikonto lawi ia bara meula irikita.”

⁵⁰Nahanai Yesu, nauli, “Inee rakonto, lawi hema au barahe meewa irikamu, ihirami au hihimbela hai ikamu.”

⁵¹Hungkumi tempona Yesu ina mengkaore lao i suruga, Ia mopakanotomi tunggaiaNa lao i Yerusale.

⁵²Natudumi bahangkia topeguruNa moioru. TopeguruNa au Natudu iti mesuamohe i hambua boeanda to Samaria bona mopasilolongahe ope-ope au raparaluu i kahawena Yesu.

⁵³Agaiana ampu boea iti, barahe mau modoko Yesu, lawi raisa tunggaiaNa lao i Yerusale.

⁵⁴Karaisana Yakobu hai Yohane kadanda mau modoko Yesu, merapimohe i Yesu, rauli, “Pue, ane Nuunde, merapingkai mai api hangko i langi mopapatehe ampu boea ide!”

⁵⁵Agaiana Yesu membalili irihira, hai Nakambaroahe.

⁵⁶Roo indo, liliumohe lao i boea ntanina.

⁵⁷Tanganda molumao, ara hadua tauna au mouliangaa Yesu, “Iumba pea kalaoaMu, kupeinao meula Irio!”

⁵⁸Nahanai Yesu, nauli, “Serigala ara kalolunda, hai tadasi ara haranda, agaiana Iko, Ana Manusia, bara ara sou au Kupaturui.”

⁵⁹Roo indo, nauli Yesu i tohaduana, “Meulako Iriko.” Agaiana nahanai tauna iti, “Pue, Nupaliuna hampai lao motawu umangku.”

⁶⁰Nauli Yesu, “Pogiangaamide tomate motawu hangka tomatenda.[7] Agaiana oio, laomoko mopahawe bambari kana i poparentana Pue Ala!”

⁶¹Ara wori hadua au mouliangaa Yesu, “Pue, kuunde mpuu meula Irio. Agaiana Nupaliuna hampai mesule mepalakana i tinangku.”

⁶²Agaiana nauliangaa Yesu, “Tauna au mepongka mopajeko, bara peisa membalili i taleu. Nodo wori tauna au mampeinao meula Iriko agaiana mobuhuinao liliu apa pea au napalehi, bara hintoto mewali topobago i lalu poparentana Pue Ala.”