Read Napu Yohane 1 Bible Online

Yohane 1 - Napu bible

Yohane 1

¹Nguru-nguruna, hangko damani dunia rapopewali, arami Ngkora.[1] Ngkora iti, aminami hihimbela hai Pue Ala, hai Ngkora iti iami Pue Ala haduduaNa.

²Nguru-nguruna Ia hihimbela hai Pue Ala.

³Iami au napopatoa Pue Ala mampopewali hinangkana au ara. Bara ara hampaka au mewali ane bara Ia.

⁴Iami pongka katuwo. Hai katuwoNa mopamabaa laluna manusia.

⁵Iami pewangka au mewangka liliu i lalu dunia au makaindi ide, hai Ia bara peisa nanangi kamakaindi.

⁶Hambela tempo, hawemi hadua tauna au natudu Pue Ala, hangana Yohane.[2]

⁷Kamaina Yohane, ia mopahawe kana i pewangka iti i ope-ope tauna bona mohadihe posabina hai mepoinalai i pewangka iti.

⁸Agaiana Yohane bara pewangka iti. Ia mai pea mopahawe kana i pewangka iti i ope-ope tauna.

⁹Ngkora iti iami pewangka au tou au mopamabaa lalunda ope-ope tauna. Ia au hawe i dunia.

¹⁰Ia au napopatoa Pue Ala mampopewali dunia ide. Agaiana i tempoNa ara i dunia, Ia bara raisa kahemaNa.

¹¹Mogalori i tampoNa haduduaNa, Ia bara radoko.

¹²Agaiana hema-hema au modoko hai mepoinalai Iria, ihirami au Napopewalihe anana Pue Ala.

¹³Mewalihe anana Pue Ala bara hangko i ulu bubunda, ba anti posamboko tauna ba anti i peundea manusia. Batena pea mpuu Pue Ala au mampopewalihe anaNa.

¹⁴Ngkora iti mewali manusia, hai maida i olonta i dunia ide. Hai ikami, kiitami kamahilena kuasaNa. KuasaNa iti Nalambi hangko i UmaNa, lawi iami AnaNa HaduduaNa. LolitaNa tou mpuu, hai tongawa ope-ope kabulaNa laluNa irikita.

¹⁵Hangkoia, Yohane mampopaisa i tauna bosa kahemana Ngkora iti. Ia mololitami masisimbuku, nauli, “Ia idemi tauna au hangkoia kuuli: ara au ina mai i bokongku, agaiana meliu kuasaNa hangko iriko. Lawi hangko damanina rapoanaka, Ia ara amimi.”

¹⁶Bara mokahopoa ahiNa, hai hangko i ahiNa iti, Ia mowatike ope-ope. Pewati au tahumba hangko Iria bara botu-botu.

¹⁷Au tadoko hangko i Musa hangkoia iami aturana Pue Ala. Agaiana au tadoko hangko i Yesu Kerisitu melumbu hangko indo iami kabulana laluna Pue Ala hai paturoNa au manoto.

¹⁸Bara ara hadua au moita Pue Ala, batena pea AnaNa Haduduana au ara liliu hihimbela hai Ia. Iami au mopakanotoake kahemana Pue Ala.

¹⁹Idemi posabina Yohane au mopahawe kahemana Yesu. Hambela tempo, tadulakonda to Yahudi i Yerusale motudumohe bahangkia tadulako mpenomba hai to Lewi lao i Yohane. Kahawenda i Yohane, rauliangaa, “Tunggaiaki maingkai mekune irio ba hemako. Ba oiomi Datu Topehompo?”

²⁰Nahanaihe Yohane i katou-touana, nauli, “Iko, barana Datu Topehompo.”

²¹Mekune mbulihe, “Ane nodo, hemariko? Ba nabi Eliako?” Nauli Yohane, “Bara.” Mekune mbulihe, rauli, “Ba oiomi nabi mahile[3] au radandi hangkoia au rauli ina mai i dunia?” Nauli Yohane, “Bara wori iko.”

²²Roo nodo, rauliangaa, “Ane nodo, nuuliangaangkai ba hema mpuuko bona ara hanaina pekunenda tauna au motudungkai. Apa pehanamu kana i watamu haduduamu?”

²³Nahanaihe Yohane hai lolitana nabi Yesaya hangkoia, nauli, “Ikomi tauna au monganga-nganga i pada wungi: ‘Pue ina hawe. Nipasilolonga raraNa!’ ”

²⁴Rauli mbuli suronda toParisi iti, “Ane barako Datu Topehompo, barako nabi Elia, hai bara woriko nabi au radandi, moapari pane baiko moriu tauna?”

²⁵

²⁶Nauli Yohane, “Iko moriu tauna hai owai pea. Ide-ide arami hadua i olomi, agaiana bara mani niisa.

²⁷Iami au hawe roo iko. Mogalorina mokakahi pekapu kandupaNa, barana hintoto.”

²⁸Ope-ope iti mewali i boea Betania, ntanda i orupena owai Yarade, periuana Yohane.

²⁹Kahalona, Yohane moitami Yesu mai iria. Nauli i tauna bosa, “Nipeita! Oloumi mai Ana Dimba au napasilolonga Pue Ala. Iami au ina mopahuru watanta, mohuru dosanta.

³⁰Iami au kuuli hangkoia ina hawe i bokongku, agaiana meliu kuasaNa hangko iriko. Lawi hangko damanina rapoanaka, Ia aminami ara.

³¹Nguru-nguruna, bara mani wori kuisa kaIanami Datu Topehompo. Agaiana idemi tunggaiaku, maina moriuhe to Isaraeli hai owai bona tongawa irihira kahemana Datu Topehompo iti.”

³²Ara wori posabina Yohane, nauli node, “Nguru-nguruna bara mani kuisa kaYesuna Datu Topehompo. Agaiana Pue Ala motuduna moriu tauna hai owai, Nauliangaana node: ‘Ane nuita Inao Malelaha mendaulu hai mengkatoa i hadua tauna, Iami au ina meriu hai Inao Malelaha.’ Mewali, kuita mpuumi Inao Malelaha mendaulu hangko i suruga nodo tadasi manggebodo hai maida i Yesu. Ido hai kuuli, Yesu iami Anana Pue Ala.”

³³

³⁴

³⁵Kahalona, Yohane ara mbuli inditi hihimbela hai rodua topeguruna.

³⁶Poitana Yesu moliu, liliu nauli, “Peita, ehoumi Ana Dimbana Pue Ala!”

³⁷Karahadina topeguruna lolitana, peulanda peami i Yesu.

³⁸Membalilimi Yesu, Naitahe meula. Napekunehe, “Apa nihaoki?” Rahanai, “Guru, iumba paidaaMu?”

³⁹Nauli Yesu, “Maimokau, niita pea deade.” Meula mpuumohe Iria hawe i paidaaNa, tempo iti ba arami pae tinti iba kalumba. Alo iti inditimohe hihimbela hai Yesu.

⁴⁰Tauna au rodua iti meulahe i Yesu anti pohadinda lolitana Yohane Toperiu. Hadua hangko irihira, hangana Andaria, adina Simo Peturu.

⁴¹Liliu Andaria lao mohaoki Simo, nauliangaa, “Kilambimi au rauli Mesias” (au rauli wori Kerisitu, lempona: Datu Topehompo).

⁴²Roo indo, naantimi lao i Yesu. Yesu mototoki Simo, Nauliangaa, “Oio Simo, anana Yohane. Mepongka ide-ide, ina rahangako Kefas.” (I lalu basanda to Yunani, “Peturu” lempona: ‘watu mahile’.)

⁴³Kahalona, Yesu motunggai lao i tampo Galilea. Hangko damani meangka, laomi mampombelambia Pilipu hai Nauliangaa, “Meulako Iriko!”

⁴⁴Pilipu iti, hangko i boea Betsaida, boeanda Andaria hai Peturu.

⁴⁵Hangko inditi, lao worimi Pilipu mampombelambia rangana au rahanga Natanael, nauliangaa, “Kilambimi Datu Topehompo, nodo au teuki i lalu Sura Aturana Musa hai suranda nabi hangkoia! Hangana Yesu. Ia anana Yusupu hangko i boea Nasare.”

⁴⁶Mehana Natanael, nauli, “Ara wori pae au maroa hangko i boea Nasare?” Nauli Pilipu, “Maimoko bona nuita!” Lao mpuumohe i Yesu.

⁴⁷KamoitaNa Natanael mai mepohidupaa, mololitami Yesu kana i Natanael, Nauli, “Olou mai hadua to Isaraeli ntepuu, ia bara topodongko!”

⁴⁸Nauli Natanael, “Noumbari hai Nuisana, Guru?” Nauli Yesu, “Hangko damaniko nakakio Pilipu, Kuitamoko i woi kau ara.”

⁴⁹Nauli Natanael, “Guru, tou mpuu AnanaKo Pue Ala! Oio mpuumi Datunda to Isaraeli!”

⁵⁰Nauli Yesu, “Ba nupoinalai lawi Kuuli kaKuitamu i woi kau ara? Ina nuita mbuli tanda kuasa au meliu kamahilena hangko inditi.”

⁵¹Roo indo, nauli mbuli Yesu, “Tou mpuu lolitaNgku ide: ina niita langi tebungkahi hai malaekana Pue Ala mendaulu mengkahe mai Iriko, Ana Manusia.”[4]