Read Napu Yohane 10 Bible Online

Yohane 10 - Napu bible

Yohane 10

¹Nauli Yesu, “Tou mpuu lolitaNgku ide: ane ara hadua tauna mesua i lalu gimpu bara moliu i babaka agaiana mengkaheri i wala, tauna iti iami topanangka hai tokadake.

²Hema au mesua moliu i babaka, ia toporewu.

³Topokampai gimpu mobungkahia babaka, hai dimbana, raisa mampekatandai wotuna. Toporewu iti mokakio hanganda hambaa-hambaa hai naerihe lao i raoa.

⁴Ane opemohe dimbana i raoa, molumaomi iorunda, hai dimbana meulahe iria, lawi raisa mampekatandai wotuna.

⁵Barahe moula tauna ntanina. Ane ara tauna au bara toporewunda au mokakiohe, tauna iti rapelangkaha, lawi bara raisa wotuna.”

⁶Yesu mopahawe lolita iti i toParisi, agaiana bara raisa lempoNa.

⁷Ido hai Nauli mbuli, “Tou mpuu lolitaNgku ide: Ikomi babaka au rapoliungi dimba mesua i lalu gimpu.

⁸Ope-ope tauna au mai hangko da Iko au mouli kaihirana toporewu au maroa, moleri topanangka hai tokadakehe. Agaiana dimbaKu, barahe meula i pekakionda.

⁹Ikomi babaka. Hema au mesua moliu Iriko, ina molambihe katuwo maroa. Ihira peisa rapandiri nodo dimba au mesua i lalu gimpu hai mesuwuhe lao i raoa molambi hehi au marudu.

¹⁰Ane tauna ntanina mouli kaihiranami Datu Topehompo, ihira peisa rapandiri nodo topanangka. Topanangka, mai peahe manangka, mepapate hai mepaope. Agaiana kamaiNgku ide bona manusia molambi katuwo au rumihi kamaroana.

¹¹Ikomi toporewu au maroa. Toporewu au maroa mokira tuwoNa i dimbaNahe.

¹²Ane ara hadua tauna au rasaro pea, bara maroa pamporewuna dimbana, lawi ia bara ampu dimba. Ane moita mai serigala, ia melangka mopalehi dimba iti. Mewali dimba iti nawulaihe serigala, alanda mahawu.

¹³Tauna au rasaro iti melangka, lawi ia mobago bona molambi pea sarona. Bara mampekiri dimba iti.

¹⁴Ikomi toporewu au maroa. Nodo UmaNgku moisaNa hai Iko moisa UmaNgku, nodo wori Iko moisa dimbaKu, hai dimbaKu moisaNa. TuwoNgku Kukira bona dimbaKu tuwohe.

¹⁶Ara manihe dimbaKu au ntanina, agaiana barahe hangko i gimpu ide. Ihira, hangangaa Kunini worihe mai. Ina raisa mpuu wotuNgku, ina mewali peahe hantobu, hai hadua pea au mamporewuhe.

¹⁷UmaNgku mampokakaiaNa, lawi Kuhuhu tuwoNgku bona tuwo huleNa.

¹⁸Bara ara hadua au mopapateNa ane bara peundeaKu. MokiraNa wataNgku moula peundeaKu haduduaNgku. MakuasaNa mokira wataNgku bona rapapate, hai makuasa woriNa tuwo hule. Itimi hawana UmaNgku au Kutarima hangko Iria.”

¹⁹Karahadina to Yahudi lolitana Yesu, mombehanai mbulimohe.

²⁰Bosahe au manguli, “Napesuangi wei seta hai magila! Barapi paraluu tapehadingi lolitaNa.”

²¹Agaiana ara wori au manguli, “Bara! Tauna au napesuangi seta bara mololita nodo. Peisa pae seta mopakaoha tauna au bilo?”

²²I tempo iti i Yerusale, tauna mopaarahe susa mokatuinao Alo Popamalelaha Souna Pue Ala hangkoia. I tempo iti, tempo makuli.

²³Yesu molumaomi i Souna Pue Ala i tambale au rahanga Tambale Salomo.

²⁴Tadulakonda to Yahudi motolelikihe Yesu, hai rauliangaa, “Moapa hai Nupogiangaa liliungkai wuli? Barangkai Nupakanotoa kahemaMu. Ane Datu Topehompo mpuuKo, Nupakanotoamongkai.”

²⁵Nauli Yesu, “Roomokau Kuuliangaa, agaiana bara nipoinalai. Tanda au Kubabehi hai kuasa au hangko UmaNgku, itimi au mopakanoto kahemaNgku.

²⁶Agaiana bara liliu nipoinalai, lawi barakau dimbaKu.

²⁷Dimbaku mohadi wotungku. Kuisa mpuuhe, hai raulana.

²⁸Kuweihe katuwo maroa au bara mokahopoa, hai manotomi kadanda ina rahuku. Bara ara hadua au peisa mamperampaihe hangko i taieNgku.

²⁹UmaNgku, au moweimoNa dimbaKuhe, kuasaNa meliu hangko i hinangkana. Hai bara ara hadua au peisa mamperampaihe hangko i taiena UmaNgku.

³⁰Iko hai UmaNgku, hadua peaNgkai.”

³¹Pohadinda lolitana Yesu, to Yahudi iti motimamohe watu, rapeinao mowatui Yesu bona mate.

³²Nauliangaahe Yesu, “Ngkaiami bago maroa au Kutudungiamokau, au Kubabehi moula hawana UmaNgku. Hangko i ope-ope bagoNgku iti, umba au mewali pongkana pane nipeinaoNa nipapate?”

³³Rauli to Yahudi, “Barari anti bagoMu au maroa pane ina kipapateKo, agaiana anti popapakoiMuri Pue Ala! Oio, manusia biasa peaKo, agaiana Nuuliri Pue AlaKo!”

³⁴Nauli Yesu, “I lalu Sura Aturami, teukimi lolitana Pue Ala i to Yahudi hangkoia au manguli node: ‘pue alakau.’[12]

³⁵Apa au teuki i lalu Sura Malelaha iti, bara ara katebaliana. Mewali, ane Sura Malelaha manguli ‘pue alakau’ i tauna au motarima Ngkorana Pue Ala hangkoia, pelumbunami Iko.

³⁶Ikomi au napilei UmaNgku au motuduNa mai i dunia. Mewali, moapari hai niuli mopapakoina Pue Ala ane Kuuli, Iko Anana Pue Ala?

³⁷Ane baraNa mobabehi bago au hangko i UmaNgku, ineeNa nipoinalai.

³⁸Agaiana ane mobabehiNa bago au hangko i UmaNgku, hangangaa nipoinalaiNa. Kehapiri baraNa nipoinalai, bagoNgku hangangaa nipoinalai. Ane nipoinalaimi pobagoNgku, ina niisa mpuu i lalumi: mohintuwuNa hai UmaNgku, hai UmaNgku mohintuwu hai Iko.”

³⁹Karahadina to Yahudi lolitana Yesu, rapetandaka mbulimi mohaka Yesu, agaiana bara mani mala.

⁴⁰Hangko indo, meangka mbulimi Yesu lao ntanda i orupena owai Yarade i periuana Yohane hangkoia, hai maida inditi.

⁴¹Bosahe tauna lao mampohidupaa Yesu. Rauli tauna iti, “Yohane bara mobabehi tanda kuasa. Agaiana ope-ope au napahawe kana i Yesu mewali hahami.”

⁴²Ido hai bosa tauna inditi mepoinalai i Yesu.